1 SAMUEL 9

Saul ō, kó̰o̰ kərō kə́ ta tḭ̄ḭ̄ gə̄ ō

1Dan ń noō tə́ ní deē kógə̄ḿ ndi dɔ nang yā Benjamḛ tə́, rīn na i Kis. I de kə́ gír ɓē yā Benjamḛ tə́. Ni i ngōn̄ Abiel kə́ ngōn̄ Seror, kə́ ngōn̄ Bekorat, kə́ ngōn̄ Apia. Ni i de kə́ ngáā ō, i de kə́ ənge yá̰a̰ ō. 2Ngōnən kógə̄ḿ kə́ dəngam rīn na i Saul. Ngōnən ní i balsáá kə́ majə deē ngá̰ý. Adə̄ dan ngán Israel gə̄ tə́ ní de kə́ majə deē tɔȳn gətóo. Ngālən tɔȳ de gə̄ malang. Dɔ de gə̄ malang ndi i gír sɔ́lən tə́.

3Ndɔ̄ kə́rēý tə́ ta kó̰o̰ kərō gə̄ yā Kis ń i bɔbə̄ Saul ní tḭ̄ḭ̄. Anī ni-əda ngōnən Saul na kə ɓāŕ nge kəla kógə̄ḿ ba kə aw̄ kə sāān̄ kó̰o̰ kərō gə̄ ní. 4Saul nin̄ kə nge kəla ní unən̄ gō nang kə́ mbalá yā Epəraim malang ō, gō nang yā Salisa malang ō, ba əngen̄ kó̰o̰ kərō gə̄ ní alé. Unən̄ gō nang yā Salim banī əngen̄də́ aĺ ɓáý. Unən̄ gō nang yā Benjamḛ banī əngen̄də́ aĺ ɓáý to̰.

5Dan ń rēē ugə̄n̄ dɔ nang kə́ Supə tə́ anī Saul əda nge kəla ń dānə̄n ní na: Jə-tél j-aw̄ gogə́ ɓēé. m̄-ɓōĺ najə̄ kadə̄ bɔbə́ḿ gír̄ dɔ kó̰o̰ kərō gə̄ ní tə́ to̰ alé ba tél a sōl̄ i jí jḭḭ. 6Anī nge kəla ní tél ədan na: Ɓē ń ra kété nojí tə́ noō deē yā Nə́ɓā kógə̄ḿ kə́ rīn ɓār̄ ngá̰ý ndi kemeé noō. Yá̰a̰ malang ń a əda ní i yá̰á̰ kə́ a rāā yá̰á̰ gáŕ. Ní, j-aw̄ rɔ̄n tə́ na majanī a ədají najə̄ kə́ dɔ mbā ń j-a j-aw̄ tə́ toō. 7Saul əda nge kəla yān ní na: Majə, j-aw̄ tā. Ba yá̰á̰ ń j-a j-aw̄ń yā kadə̄n ní i rí? Mápá kə́ kem ngong yājí tə́ təgā kɔ̄ɔ́. Tá majə kadə̄ deē adə̄ deē yā Nə́ɓā sádə̄ alé. Ní, yá̰á̰ ń to jijí tə́ ní i rí? 8Nge kəla ní tél əda Saul na: Ngōn̄ njáŕ sə́lē arjā̰a̰ kógə̄ḿ to laā. Ní, m-ā m-ādə̄ deē yā Nə́ɓā ní kadə̄ ədańjí najə̄ kə́ dɔ mbā yājí tə́. 9Jóo dɔ nang kə́ Israel tə́ ní ré de gə̄ aw̄n̄ kə̄ koō ta Nə́ɓā tə́ anī a ədan̄ na: Ī-reē j-awī rɔ̄ nge ka̰a̰ yá̰á̰ tə́. Tɔdɔ̄ kété ní a ɓārə́n̄ nge koō ta na i nge ka̰a̰ yá̰a̰. 10Saul əda nge kəla yān na: Majə, j-aw̄ tā. Adə̄ nin̄ əsōn̄ róbó a aw̄n̄ kə̄ kem ɓē ń deē yā Nə́ɓā ndi tū tə́ ní tə́.

11Dan ń unən̄ róbə́ kə́ əta tan kə̄ dɔɔ́ ta kaw̄ kə̄ kem ɓēé anī, dərān̄ ngámandə gə̄ kə́ ḭḭn̄ kem ɓē ní tə́ a reēn̄ kə̄ kuȳ maná. Dəjen̄də́ na ké nge ka̰a̰ yá̰a̰ ndi noó wa. 12Anī ngámandə gə̄ ní tél ədan̄də́ na: A̰á̰ā̰, ugə̄ i ngɔr ɓáý. Reē kem ɓē yājí tə́ ɓōólaā. Tɔdɔ̄ ɓōólaā i ndɔ̄ ń de kə́ kem ɓēé gə̄ a tunə̄n̄neé yá̰a̰ dɔ loo kə́ kḭḭ kə̄ dɔɔ́ tə́ ní, adə̄ āwī láẃ. 13Ré údiī kə̄ kem ɓēé anī ā ə́ngeniī. Ā ə́ngeniī kété pá tá kadə̄ aw̄ kəsa yá̰á̰ loo kə́ kḭḭ kə̄ dɔɔ́ tə́ ɓáý. Ré ugə̄ aĺ anī deē a əsa yá̰a̰ alé. Tɔdɔ̄ i ni n a tɔ́r̄ tan dɔ yá̰á̰ kə́ tun̄ tə́ pá tá de gə̄ ń ɓārə́n̄də́ ta kəsa yá̰á̰ ní a əsan̄ ɓáý ní. Āwī na ā ə́ngeniī ngɔr ń toō tə́. Saul nin̄ kə Samuel əngen̄ naā.

14anī ɔrə̄n̄ dɔɔ́ a aw̄n̄ kə̄ kem ɓē ní tə́. A udən̄ kə̄ kem ɓēé anī Samuel teē kem ɓēé a aw̄ kə̄ loo kə́ kḭḭ kə̄ dɔɔ́ tə́. 15Ba Kɔ́ɔ̄ɓē tāā Samuel rāā ndɔ̄ kógə̄ḿ pá tá kadə̄ Saul ugə̄ ɓáý. Ni-əda Samuel na: 16Bírí, kə kum mbang nəkɔ́ ń toō, m-ā m-ə́la kə de kógə̄ḿ kə́ gō nang kə́ Benjamḛ tə́ yā kadī kadə̄ úr yibə̄ dɔn tə́, kadə̄ ni i ngār yā deē yāḿ gə̄ ń i ngán Israel gə̄ ní ō, kadə̄ ɔr̄ deē yāḿ gə̄ kɔ̄ɔ́ jī Pilistin gə̄ tə́ ō. Tɔdɔ̄ m-á̰á̰də́ ō, nōō yādə́ əsō mbīḿ tə́ ō. 17Adə̄ dan ń Samuel a̰a̰ Saul ní Kɔ́ɔ̄ɓē ədan na: Deē ń m-ə́daī najə̄ yān ní n toó. I ni n a ndi ngār dɔ deē yāḿ gə̄ tə́ ní.

18Saul aw̄ ngɔr rɔ̄ Samuel tə́ ta róbə ndogə̄ kə́ yā kudəń kə̄ kem ɓēé tə́ ba dəjen najə̄ əda na: m̄-rāāī ɓɔ́, ɔ́jəm̄ kújə́ ń nge ka̰a̰ yá̰a̰ a to tū tə́ ní. 19Anī Samuel tél əda Saul na: I mā n i nge ka̰a̰ yá̰á̰ ní, ba ī-mān̄ kə̄ noó ādə̄ j-aw̄ loo kə́ kḭḭ kə̄ dɔɔ́ tə́. Ɓōólaā ā ə́saī yá̰a̰ seḿ. Ba bírí dəloí ré m-ə́daī yá̰a̰ malang ń kemií a gír̄ najə̄ dɔ tə́ ní oy anī, m-ā m-ə́ya̰ī kadə̄ āw̄. 20Ba kó̰o̰ kərō yāí gə̄ ń tadə́ tḭ̄ḭ̄ asə ndɔ̄ mətá ɓōólaā ní, ī-lōō sōl̄ tām̄ yādə́ tə́, tɔdɔ̄ əngen̄də́ kɔ̄ɔ́. Ba yá̰a̰ malang kə́ Israel tə́ ń i yá̰á̰ kə́ gātə̄n i ngá̰ý ní a to i tām̄ yā náā tə́? I tām̄ yāí ḭ̄ tə́ ō, de gə̄ malang kə́ kem kújə yā bɔbí tə́ ō aĺ a? 21Saul tél əda na: Mā i de kə́ Benjamḛ. I gír ɓē kə́ dūú ngá̰ý kə́ dan gír ɓē gə̄ yā Israel gə̄ tə́ aĺ a? Tá i gír kojə yāḿ n i gír kojə kə́ dūú ngá̰ý tɔȳ gotə gír kojə gə̄ kə́ gír ɓē yā Benjamḛ tə́ ní aĺ a? Ɔ̄r̄ najə̄ kə́ beē seḿ i tām̄ rí tə́? 22Banī Samuel aw̄ kə Saul ō, nge kəla yān ō, kem kújə kəsa yá̰á̰ tə́. Ni-əndādə́ loo kə́ kété tə́ dan de gə̄ ń mērə̄n̄də́ kəsa yá̰á̰ tə́ ní. Nin̄ malang asən̄ deē kutə mətá. 23Samuel əda nge ndīr̄ yá̰a̰ na: Úń yá̰á̰ ń m-ādī ba m̄-mērī kəndā tayā ní ī-reēń. 24Nge ndīr̄ yá̰a̰ aw̄ un ɓúr dā̰ ō, kə̄lán ō, reēń əndā no Saul tə́. Ba Samuel əda Saul na: Yá̰á̰ ń i kə́ ngɔ̄m̄ tām̄ yāí tə́ yā kadī kum mbang ń toō tə́ ní n ndi noí tə́ noō, ə́sa. Adə̄ ndɔ̄ ń noō tə́ Saul əsa yá̰a̰ kə Samuelé. 25Gō tə́ anī risən̄ loo kə́ kḭḭ kə̄ dɔɔ́ tə́ ní ba tél aw̄n̄ kem ɓēé. Samuel aw̄ ɔr̄ najə̄ kə Saul dɔ kújə́ dúŕ duruú.

Samuel əndā Saul mban̄g dɔ Israel gə̄ tə́

26Teē kə ndɔ̄ kə́ noō anī, Saul nin̄ kə nge kəla yānneé ndólə̄n̄ kə gír looí ɓatə. Dan ń loo tīī unjə̄ anī, Samuel ɓārə́n dɔ kújə́ dúŕ duruú ba ədan na: Ḭ́ḭ dɔɔ́ ādə̄ m-ə̄ndāī róbó. Saul ḭḭ dɔɔ́, ba teēn̄ ndágá mbak kə Samuelé. 27Dan ń ugə̄n̄ ta ngóy ɓē tə́ anī Samuel əda Saul na: ə́da nge kəla yāí ādə̄ mān̄ kété nojí tə́. Nge kəla ní mān̄ kété. Ba Samuel əda ɓáý to̰ na: Ī-dəba ādə̄ m-ə́daī najə̄ yā Nə́ɓā.

Currently Selected:

1 SAMUEL 9: SARDC

Highlight

Copy

Compare