1 SAMUEL 10
10
1Samuel un yibə̄ ń ətō jīn tə́ kem kūú ní ur dɔ Saul tə́. Gō tə́ anī ɓirə̄n kə̄ rɔ̄n tə́ dagə ba ədan na: I Kɔ́ɔ̄ɓē nəkɔ́ n ur yibə̄ dɔí tə́ kadə̄ ḭ̄ i ngār yā deē yān gə̄ ní. 2Ɓōólaā nəkɔ́ ń toō ré ə́ya̰m̄ ba ɔ́tə anī, ā ī-dərā de gə̄ jōó ngɔr kə̄ dɔ ɓádə Rasel tə́, ɓē kə́ Selsa tə́, dɔ nin̄ dɔ nang yā Benjamḛ tə́. Anī de gə̄ ní a ədanī na: Kó̰o̰ kərō gə̄ ń āw̄ sāādə́ tə́ ní əngen̄də́ kɔ̄ɔ́, adə̄ dɔ bɔbí ndígə̄nal dɔdə́ tə́ kɔ̄ɔ́, banī tél a sōl̄ i sí sḭḭ̄. Adə̄ əda na ké na n-rāā i ba̰ý tām̄ yā ngōnən tə́ wa. 3Ré ḭ́ḭ loo ń noō tə́ āw̄ ūgə̄ kāgə̄ sén kə́ Tabor tə́ anī ā ə́nge de gə̄ mətá kə́ a aw̄n̄ kə̄ rɔ̄ Nə́ɓā tə́ kem ɓē kə́ Betel tə́. Nge kə́ kógə̄ḿ i kə ngán bə̄yā̰ gə̄ mətá ō, kə́rēý i kə mápa mətá ō, kə́ nge ko̰ mətá i kə sɔl kasə nduú kógə̄ḿ ō. 4Nin̄ a dəjenī na ké ī-to karī wa, ba a adə̄nī mápa jōó. Ba ḭ̄ ā ī-taā mápa gə̄ ní jīdə́ tə́. 5Gō tə́ anī ā ɔ̄tə̄ Gibea Eloim ń i ɓē ń ngé ko̰o̰ ɓē gə̄ yā Pilistin gə̄ ndin̄ tū tə́ ní. Ré ā údə kə̄ kem ɓēé anī, ā ə́nge ɓūtə̄ ngé koō ta gə̄ kə́ ḭḭn̄ loo kə́ kḭḭ kə̄ dɔɔ́ tə́ a reēn̄. Ngé kugə kənde kə́ kəlān i ngá̰ý gə̄ ō, kə́ kəlān i ngá̰ý aĺ gə̄ ō, ngé kənda kɔdə gə̄ ō, ngé kɔĺ nal gə̄ ō, a njə̄rān̄ kété nodə́ tə́. Ba nin̄ kɔ́ gə̄ tá a ɔrə̄n̄ najə̄ kə́ loo ngé koō ta gə̄ tə́ beé. 6Loo ń noō tə́ Ndíl yā Kɔ́ɔ̄ɓē a reē dɔí tə́ kə tɔ́gɔ́ adə̄ ā ī-rāā yá̰á̰ kə́ de kə́ yá̰a̰ rāān tə́ tītə̄ yādə́ ō, ā ī-tél de kə́ rang ō. 7Ré yá̰a̰ gə̄ ń noō rāān̄ yá̰a̰ malang anī, yá̰á̰ ń kadə̄ ī-rāā ní ī-rāā tɔdɔ̄ Nə́ɓā i naā tə́ seí. 8Āw̄ Gilgal kété. Ba m-ā m-āw̄ gōí tə́ yā kaw̄ ndējə̄ Nə́ɓā yá̰a̰ tun̄ kə́ róō horoó kə taá malang ō, yá̰a̰ tun̄ kə́ tām̄ yā kem kógə̄ḿ tə́ ō. Ā ī-ngóōm̄ ndɔ̄ sīrí. Ré m-ūgə̄ anī m-ā m-ə́daī yá̰á̰ ń kadə̄ ī-rāā ní.
9Dan ń Saul tūr̄ gidən adə̄ Samuel ba ɔtə a aw̄ kə̄ ɓēé anī, Nə́ɓā tūr̄ kemən ō, yá̰a̰ gə̄ ń Samuel əda ní rāān̄ yá̰a̰ malang ndɔ̄ nəkɔ́ ń noō tə́ ō. 10Dan ń Saul nin̄ kə nge kəla yānneé ugə̄n̄ Gibea anī, əngen̄ ɓūtə̄ ngé koō ta gə̄ kə́ a reēn̄ kum kə̄ rɔ̄də́ tə́. Loo ń noō tə́ Ndíl yā Nə́ɓā reē dɔ Saul tə́ kə tɔ́gɔ́ adə̄ udə dandə́ tə́ ba rāā yá̰a̰ tītə̄ kə́ yá̰a̰ rāān beé.
11Dan ń ngé gə̄ ń gērnən̄ jóó ní a̰a̰nən̄ loo rāā yá̰á̰ ní tə́ dan ngé koō ta gə̄ tə́ tītə̄ yādə́ anī, ədan̄ naā dɔ dáńdə́ tə́ na: I rí n rāā ngōn̄ Kis? Saul i dan ngé koō ta gə̄ tə́ ō a? 12De kógə̄ḿ kə́ dandə́ tə́ tél ədadə́ na: Ba gotə gə̄ ní i náā n i bɔbə̄də́ ní? Adə̄ najə̄ ní téĺ kāgə̄ najə̄ ń de gə̄ a ədan̄ na ké Saul i dan ngé koō ta gə̄ tə́ ō wa ní. 13Dan ń yá̰á̰ ń rāā Saul ní tél tetə kə̄ rɔ̄n tə́ anī, ni aw̄ loo kə́ kḭḭ kə̄ dɔɔ́ tə́. 14Bɔbə̄n kə́ ngōkó̰o̰ bɔbə̄ kojən dəjen na ké aw̄n̄ i rá nin̄ kə nge kəla yānneé wa. Anī ni tél ədan na: J-aw̄ i sāā kó̰o̰ kərō gə̄ tə́ ba j-a̰a̰də́ alé, adə̄ j-əja dɔɔ́ j-aw̄ i rɔ̄ Samuel tə́ koō yá̰á̰ ń a ədají tə́ ní. 15Anī bɔbə̄n ní dəjen na kə ɔjən gotə najə̄ gə̄ ń Samuel ədadə́ ní. 16Saul ədan na ədadə́ na i najə̄ yā kó̰o̰ kərō gə̄ ń əngen̄də́ ní, ba əda bɔbə̄n ní najə̄ kə́ dɔ kəndān mban̄g tə́ ń Samuel ɔr̄ seneé ní alé.
Túgə̄n̄ wə̄lā əndān̄neé Saul mban̄g
17Samuel ɓāŕ ngán Israel gə̄ malang adə̄ kánə̄n̄ naā rɔ̄ Kɔ́ɔ̄ɓē tə́ kem ɓē kə́ Misəpa tə́, 18ba ədadə́ na: Kɔ́ɔ̄ɓē Nə́ɓā yā Israel ɔr̄ najə̄ i tītə̄ ń toō beé: I mā n m̄-teē sesí sḭḭ̄ Israel gə̄ kɔ̄ɔ́ kem ɓē kə́ Ejiptə tə́ ní. I mā n m-ɔ̄r̄sí kɔ̄ɔ́ jī de kə́ Ejiptə gə̄ tə́ ō, ngé ko̰o̰ ɓē kə́ rang gə̄ ń rāān̄ kumsí ndoō tə́ ō ní. Najə̄ ń Kɔ́ɔ̄ɓē əda ní n noó. 19Ba ɓōólaā ní sḭḭ̄ ī-mbātíī Nə́ɓā yāsí ń ɔr̄sí kɔ̄ɔ́ kum yá̰á̰ kə́ tōr̄ gə̄ tə́ ō, ajəsí dan yá̰á̰ kə́ to kum kaȳ aĺ gə̄ tə́ ō ní, ba ə́daī na kə m-ə̄ndā mban̄g kógə̄ḿ dɔsí tə́ a? Beé ní ī-reēī ī-raī ta kum Kɔ́ɔ̄ɓē tə́ kə gō gír ɓē yāsí gēé ō, kə gō gír kaa yāsí gēé ō. 20Samuel əda de gə̄ kə́ gír ɓē yā ngán Israel gə̄ tə́ kadə̄ ndɔ́tə̄n̄ malang kə̄ ngɔr. Ba ni túgə̄ wə̄lā anī wə̄lā əhɔ i gír ɓē yā Benjamḛ gə̄. 21Ni-əda de kə́ gír ɓē yā Benjamḛ gə̄ tə́ kadə̄ reēn̄ kə gō gír kaa yādə́ gēé, anī wə̄lā əhɔ i de gə̄ kə́ gír kaa yā Matəri tə́. Go tə́ anī dan de gə̄ kə́ gír kaa yā Matəri tə́ ní wə̄lā əhɔ i Saul ngōn̄ Kis, ba sanən̄ sétə́ əngenən̄ alé. 22Tél dəjen̄ Kɔ́ɔ̄ɓē ɓáý to̰ na ké de kə́ rang reē laā wa. Anī Kɔ́ɔ̄ɓē əda na: I ni n ɓɔ̄ɔ̄ rɔ̄n dan yá̰a̰ mbā gə̄ tə́ toō. 23A̰ȳn̄ ngɔ̄də̄ aw̄ sāānən̄ dan yá̰a̰ mbā gə̄ tə́ reēn̄ seneé. Anī reē ra dan de gə̄ tə́. Ngāl̄ tɔȳ de gə̄ malang: dɔdə́ ndi i gíŕ sɔ́lən tə́. 24Samuel əda ngán Israel gə̄ malang na: Á̰a̰ī deē ń Kɔ́ɔ̄ɓē gə̄rān ní a? Dan ngán Israel gə̄ tə́ malang ní, de kə́ tītə̄n gətóo. Loo ń noō tə́ de gə̄ malang urən̄ kɔĺ rɔ̄nel̄ ba ədan̄ kə tɔ́gɔ́ na: Ādə̄ dɔ mban̄g ngan̄g májə́ májə́. 25Samuel ɔjə de gə̄ ndū najə̄ gə̄ yā mban̄g. Ni-ndangdə́ kem makətūbūú ba ənī no Kɔ́ɔ̄ɓē tə́. Gō tə́ anī əya̰ de gə̄ adə̄ télən̄ kə̄ ɓē yādə́ gə̄ tə́. 26Saul tél aw̄ gogə́ ɓēé Gibea ō. Ba de kə́ wur kil gə̄ ń Nə́ɓā ɔr̄ najə̄ sedə́ kemdə́ tə́ ní aw̄n̄ seneé. 27Banī de kə́ yá̰a̰ aĺ gə̄ ədan̄ na: Deē ń noō a ajəjí i ba̰ý? Nin̄ kídə̄nən̄ ba ndējə̄nən̄ yá̰a̰ alé. Ba ni tā a usən alé.
Currently Selected:
1 SAMUEL 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
