1 SAMUEL 8

Ngán Israel gə̄ gḛyn̄ mban̄g

1Dan ń Samuel tɔgə ngá̰ý kɔ̄ɔ́ ní, əndā ngánən kə́ dəngam gə̄ kadə̄ nin̄ i ngé gān̄g sarya yā Israel gə̄ kum gotən. 2Rī ngōnən kə́ nga tɔ́gə na i Joel ō, kə́ nge ko̰ jōó na i Abia ō. Ngánən gə̄ ní ndin̄ i Beer Seba n a gāngə̄n̄neé sarya ní. 3Banī unən̄ gō njan alé. Ngur kənge yá̰a̰ rāādə́, adə̄ táān̄ yá̰a̰ gə̄ ń de gə̄ adə̄n̄də́ kadə̄ əndān̄neé najə̄ yādə́ gə̄ naā tə́ ní. Adə̄ sarya gān̄gdə́ i gōtə́ alé. 4Tā anī kum kɔɔ̄ gə̄ yā Israel gə̄ kánə̄n̄ naā malang reēn̄ rɔ̄ Samuel tə́ kem ɓē kə́ Rama tə́, 5ba ədanən̄ na: Ngɔlaā ní ī-tɔgə ngá̰ý ō, ngání gə̄ unən̄ gō njaí aĺ ō ní, ə̄ndā mban̄g kógə̄ḿ dɔjí tə́ ādə̄ gān̄g sarya yājí, tītə̄ ń nápar de gə̄ malang a rāān̄neé ní.

6Kəda ń ədan̄ na kə Samuel kə əndā mban̄g kógə̄ḿ dɔdə́ tə́ kadə̄ kə gān̄g sarya yādə́ ní nel̄ Samuel alé. Adə̄ Samuel rāā Kɔ́ɔ̄ɓē ɓɔ́ tām̄ yādə́ tə́. 7Anī Kɔ́ɔ̄ɓē tél əda Samuel na: Ōō najə̄ yā ngán Israel gə̄ ba ī-rāā yá̰a̰ malang ń dəjenī ní. Tɔdɔ̄ i ḭ̄ n mbātə́nī ní alé ba i mā n mbātə́mə̄n̄ ní. Ndigən̄ kadə̄ m-ó̰o̰ ɓē dɔdə́ tə́ to̰ alé. 8Əla gír ndɔ̄ ń m̄-teēń sedə́ kɔ̄ɔ́ kem ɓē kə́ Ejiptə tə́ bátə́ ɓōólaā ní, asədə́ kəya̰m̄ kɔ̄ɔ́ ba ndɔ̄yń ɓesə̄ gə̄ alé. I yá̰á̰ ń rāān̄ seḿ ní n rāān̄ seí ō ní. 9Beé ní ōō yādə́ ba ɔ́jə́də́ loo ko̰o̰ ń mban̄g a o̰o̰ ɓē dɔdə́ tə́ ní kété ādə̄ gerə̄n̄.

Loo ko̰o̰ ń mban̄g a o̰o̰ ɓē ní

10Samuel tél kə najə̄ ń Kɔ́ɔ̄ɓē ɔr̄ seneé ní əda ngán Israel gə̄ ń gḛyn̄ mban̄g ní. 11Ədadə́ na: Mban̄g ń a o̰o̰ ɓē dɔsí tə́ ní, yá̰á̰ ń a rāā ní n toó: a əhɔ ngáńsí kə́ dəngam gə̄ kadə̄ nin̄ i áskar gə̄ kə́ ngé kal̄ púsə rɔ̄ɔ̄ yān gə̄ ō, kə́ ngé kal̄ sə́nda rɔ̄ɔ̄ yān gə̄ ō, kadə̄ a̰ȳn̄ ngɔ̄də́ kété no púsə́ sə́nda yān tə́ ō. 12A əhɔdə́ yā kəndādə́ ngāgəra dɔ de kə́ dūbú gə̄ tə́ ō, de kə́ kutə mí gə̄ tə́ ō, kadə̄ ndɔrə̄n̄ ndɔr̄ yān gə̄ ō, sāān̄ kōō yān gə̄ ō, rāān̄ yá̰a̰ rɔ̄ɔ̄ yān gə̄ ō, yá̰a̰ kal̄ sə́nda yān gə̄ ō. 13Ni a əhɔ ngáńsí kə́ dəyá̰ gə̄ kadə̄ télən̄ ngé rāā ítər gə̄ ō, ngé ndīr̄ yá̰a̰ gə̄ ō, ngé kɔr̄ mápa gə̄ ō. 14A taā ndɔr̄ yāsí kə́ majə gə̄ ō, kāgə̄ nduú yāsí kə́ majə gə̄ ō, kāgə̄ olibə yāsí kə́ majə gə̄ ō, yā kadə̄ ngé kəla yān gə̄. 15A ɔr̄ dɔ kōō yāsí gə̄ ō, kan̄ kāgə̄ nduú yāsí gə̄ ō, kə́ nge ko̰ kutə yā kadə̄ ngé gə̄ ń ənī kemən adə̄də́ ní ō, ngé kəla yān gə̄ ō. 16A əhɔ ngé kəla yāsí kə́ dəngam gə̄ ō, kə́ dəyá̰ gə̄ ō, balsáa yāsí kə́ ngan̄g gə̄ ō, kərō yāsí gə̄ ō, kadə̄ a rāān̄ kəla yān. 17Ré batə̄ yāsí gə̄ i kutə anī a əhɔ kógə̄ḿ ō, ré bə̄yā̰ yāsí gə̄ i kutə anī a əhɔ kógə̄ḿ ō. Yā tɔ̄ləń ta ɓáa sḭḭ̄ ā ī-téliī ɓəlo yān gə̄ ō. 18Ndɔ̄ ń noō tə́ ā ī-nōōī najə̄ yā mban̄g ń ī-gə̄rāī tə́ ní, banī Kɔ́ɔ̄ɓē a dalsí alé.

19Ngán Israel gə̄ mbātə́n̄ koō yā Samuel ba ədan̄ na: Nge ń noō usəjí alé. Jə-sāā i mban̄g kadə̄ ndi dɔjí tə́, 20yā kadə̄ jə-toń tītə̄ gotə nápar de gə̄ malang. Jə-sāā i mban̄g kadə̄ gān̄g sarya yājí kə gōó ō, kadə̄ njə̄rā kété no ngé rɔ̄ɔ̄ yājí gə̄ tə́ ō, kadə̄ rɔ̄ɔ̄ naā tə́ sejí ō. 21Samuel oō najə̄ gə̄ malang ń ngán Israel gə̄ ɔrə̄n̄ seneé ní, ba ni-tél kə najə̄ gə̄ ní ənī mbī Kɔ́ɔ̄ɓē tə́. 22Anī Kɔ́ɔ̄ɓē tél ədan na: Ōō najə̄ kɔr̄də́ ba ādə̄də́ mban̄g. Anī Samuel əda de kə́ Israel tə́ gə̄ na: Ī-tél āwī kə̄ ɓē yāsí gə̄ tə́.

Currently Selected:

1 SAMUEL 8: SARDC

Highlight

Copy

Compare