1 SAMUEL 5
5
1Dan ń Pilistin gə̄ unən̄ sandúkə yā Nə́ɓā ní, ḭḭn̄neé Eben Ejer aw̄n̄neé Asdod, 2ba aw̄ əndān̄ kem kújə ɓesə̄ yādə́ tə́. Rī ɓesə̄ ní na i Dagon#5.2 Dagon: Yá̰á̰ ń Pilistin gə̄ əndān̄ rīn na i Dagon ní, i kāgə̄ kə́ tɔ̄sə̄n̄ adə̄ to tītə̄ deē ba rāānən̄ nə́ɓā yādə́ tə́.. Nin̄ əndān̄ sandúkə yā Nə́ɓā ní i kadə Dagon tə́. 3Teē kə kōŕneé, dan ń Asdod gə̄ reēn̄ kem kújə yā Dagon tə́ kə gír looí ɓatə anī, Dagon i kə́ əsō sébə kumən nang tə́ no sandúkə yā Kɔ́ɔ̄ɓē tə́. Unən̄ Dagon dɔɔ́ ba əndānən̄ gotən tə́. 4Teē kə ndɔ̄ kə́ noō, dan ń Asdod gə̄ teē reēn̄ kem kújə yā Dagon tə́ kə gír looí ɓatə anī, Dagon i kə́ teē əsō ba sébə kumən nang tə́ no sandúkə yā Kɔ́ɔ̄ɓē tə́. Dɔn ō, jīn kə́ jōó gə̄ ō, i kə́ teē tə́sōn̄ ta róbə́ kújə́ tə́, ba na̰y i rɔ̄n ngóy. 5I tām̄ najə̄ ń noō tə́ n bátə́ ɓōólaā gə̄gē ní ngé tun̄ yá̰a̰ yā Dagon gə̄ kə de gə̄ malang ń a udən̄ kem kújə yā Dagon tə́ ní, ré reē ɔtə̄n̄ ta kújə yā ɓesə̄ Dagon kə́ Asdod tə́ anī a gə̄lān̄ dɔ ta róbə́ ní. 6Kɔ́ɔ̄ɓē rāā adə̄ yá̰á̰ kə́ tōr̄ rāā de kə́ Asdod gə̄. Ni- rāā adə̄ yá̰a̰ gə̄ nujən̄ ngá̰ý kem ɓē yādə́ tə́ ō, adə̄ yá̰a̰ agə̄də́ ō, agə̄ de kə́ gō nang kə́ Asdod tə́ gə̄ malang ō. 7Dan ń de kə́ Asdod gə̄ a̰a̰n̄ yá̰á̰ ń rāā yá̰á̰ ní anī ədan̄ na: Ādī sandúkə yā Nə́ɓā yā ngán Israel gə̄ ndi loojí laā alé. Tɔdɔ̄ rāā adə̄ yá̰á̰ kə́ tōr̄ rāājí ō, rāā Dagon nə́ɓā yājí ō. 8Əlan̄ gɔ̄ ngār gə̄ yā Pilistin gə̄ tə́ malang adə̄ reēn̄ ba dəjen̄də́ na ké kə n-rāān̄ i ba̰ý kə sandúkə yā Nə́ɓā yā ngán Israel gēé wa. Anī ngār gə̄ tél ədan̄də́ na kə aw̄n̄neé kem ɓē kə́ Gat tə́. Loo ń noō tə́ nin̄ ndɔ́tə̄n̄ kə sandúkə́ ní aw̄n̄neé Gat.
9Dan ń sandúkə ugə̄ kem ɓē kə́ Gat tə́ anī Kɔ́ɔ̄ɓē rāā adə̄ yá̰á̰ kə́ tōr̄ rāā ɓē kə́ Gat. Adə̄ ɓōĺ rāā de gə̄ ngá̰ý. Kɔ́ɔ̄ɓē rāā adə̄ yá̰a̰ agə̄ de kə́ kem ɓēé gə̄ malang. Yá̰á̰ ní agə̄ ngáń kə́ dūú gə̄ gə̄gē de kə́ tɔgə gə̄gē. 10Loo ń noō tə́ nin̄ əlan̄ kə sandúkə yā Nə́ɓāá Ekəron. Dan ń sandúkə yā Nə́ɓā reē ugə̄ kem ɓē kə́ Ekəron tə́ anī, de kə́ Ekəron gə̄ nōōn̄ ngá̰ý ədan̄ na reēn̄ kə sandúkə yā Nə́ɓā yā Israel gēé ɓēé loodə́ na i yā tɔ̄ləńdə́. 11Ə́lan̄ gō ngār gə̄ yā Pilistin gə̄ tə́ adə̄ reēn̄ malang ba ədan̄də́ na: Əlaī kə sandúkə yā Nə́ɓā yā Israel gēé gogə́ ɓēé. Ré ə́laīneé aĺ anī j-a j-oyiī malang. Kɔ́ɔ̄ɓē rāā adə̄ yá̰á̰ kə́ to yo reē dɔ ɓē yādə́ tə́, adə̄ de gə̄ malang ɓōlə́n̄ ngá̰ý. 12De gə̄ ń oyn̄ aĺ ní yá̰a̰ agə̄də́, adə̄ kɔŕ wur kɔl kə́ kem ɓēé ɓār̄ bátə́ teē dɔ rā̰ tə́.
Currently Selected:
1 SAMUEL 5: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
