1 SAMUEL 6
6
Pilistin gə̄ əlan̄ kə sandúkə yā Nə́ɓāá gogə́ adə̄n̄ Israel gə̄
1Sandúkə yā Kɔ́ɔ̄ɓē rāā nāā sīrí dɔ nang yā Pilistin gə̄ tə́. 2Pilistin gə̄ dəjen̄ ngé tun̄ yá̰a̰ yādə́ gə̄ ō, kɔdə̄ sāā yādə́ gə̄ ō, na ké kə n-rāān̄ i ba̰ý kə sandúkə yā Kɔ́ɔ̄ɓēé wa. Kə ojən̄də́ loo tél kəlań gogə́ ɓēé. 3Anī nin̄ tél ədan̄də́ na: Ré ī-ndigiī tél kəla kə sandúkə yā Nə́ɓā yā ngán Israel gēé gogə́ anī ā ə́laīneé i karī alé. Ā ādə̄niī yá̰á̰ kógə̄ḿ yā kəsōnneé naā. Loo ń noō tə́ ā ə́ngeī rɔ̄ ngan̄g ō, ā ī-gerī yá̰á̰ ń rāā tá yá̰á̰ á asəń Nə́ɓā rāāsí yá̰á̰ kə́ tōr̄ aĺ ní ō. 4Ba Pilistin gə̄ tél dəjen̄də́ na ké kə n-əsōnən̄ naā i kə rí wa. Anī ngé tun̄ yá̰a̰ gə̄ kə kɔdə̄ sāā gə̄ tél ədan̄də́ na kə adə̄nən̄ yá̰a̰ gə̄ kə́ ton̄ tītə̄ yá̰á̰ kə́ agə̄ de kə́ rāā kə lɔ́rɔ́ gə̄ mí ō, yégə̄ gə̄ kə́ rāān̄də́ kə lɔ́rɔ́ gə̄ mí ō, kə gō kutə ngār gə̄ yā Pilistin gēé. Tɔdɔ̄ i yá̰á̰ kə́ tōr̄ kə́ kógə̄ḿ beē n rāāsí ō, rāā ngar yāsí gə̄ ō ní. 5Ī-rāāī yá̰a̰ gə̄ kə́ ton̄ tītə̄ yá̰á̰ kə́ agə̄ de gə̄ ō, kə́ ton̄ tītə̄ yégə̄ gə̄ ń nujən̄ ɓē yāsí ní ō, ɔ́siīneé gɔn Nə́ɓā yā Israel gə̄. Majanī a rāā kadə̄ yá̰á̰ kə́ tōr̄ rāāsí ō, rāā nə́ɓā yāsí gə̄ ń i ɓesə̄ yāsí gə̄ ní ō, ɓē yāsí ō, tītə̄ kə́ kété to̰ alé. 6Ī-lōōī rāā kem ngan̄g tītə̄ yā Parao̰ nin̄ kə de kə́ Ejiptə tə́ gēé. Ādə̄ əga kemsí dɔ yá̰á̰ ń rāā sedə́ tə́ ní, rāādə́ yá̰á̰ kə́ tōr̄ bátə́ adə̄ əya̰n̄neé Israel gə̄ adə̄ aw̄n̄. 7Adə̄ ī-rāāī púsə́ kə́ kijə ba ə́hɔī kó̰o̰ man̄g gə̄ jōó kə́ ngáńdə́ gə̄ a ilən̄ mbadə́ ō, ənīn̄ njúkə́ míndə́də́ tə́ kété aĺ ɓáý ō, ādə̄ unən̄ púsə́ ní. Ba ī-téliī kə ngáńdə́ gēé āwī sedə́ gogə́ kem kújə kəsa yá̰a̰ yādə́ tə́. 8Úniī sandúkə yā Kɔ́ɔ̄ɓē ə̄ndāī kem púsə́ ní tə́. Ba yá̰á̰ kə́ rāā kə lɔ́rɔ́ gə̄ ń ā ādī Nə́ɓā yā kəsōnneé naā ní, ī-ɓōkíīdə́ kem ngōn̄ sandúkə́ kə́rēý tə́ ba ə̄ndāī kadə sandúkə yā Kɔ́ɔ̄ɓē tə́. Gō tə́ anī ə́ya̰ī man̄g gə̄ ādə̄ aw̄n̄ kə púsə́ ní. 9Ba á̰a̰ī gōdə́: Ré man̄g gə̄ unən̄ i róbə́ kə́ ta kaw̄ kə̄ dɔ nang kə́ Israel tə́ adə̄ kumdə́ sɔɔ̄ Bet Semes anī, kumən na i Nə́ɓā yā Israel gə̄ nəkɔ́ n rāājí yá̰á̰ kə́ tōr̄ ń toō ní. Ba ré unən̄ i róbə́ kə́ rang anī i ni alé ba i kɔ́l n rāājí ní. 10Pilistin gə̄ rāān̄ tītə̄ ń ədan̄neédə́ ní. Əhɔn̄ kó̰o̰ man̄g gə̄ kə́ ngáńdə́ gə̄ a ilən̄ i mba ɓáý gə̄ jōó adə̄ unən̄ púsə ba utə̄n̄ ta ngáńdə́ gə̄ ní gɔngɔɔ́. 11Əndān̄ sandúkə yā Kɔ́ɔ̄ɓē kem púsə́ ní tə́ ō, əndān̄ ngōn̄ sandúkə ń yá̰á̰ kə́ to tītə̄ yá̰á̰ kə́ agə̄ deē, kə́ rāā kə lɔ́rɔ́ gə̄ i kemeé ō, yégə̄ kə́ rāā kə lɔ́rɔ́ gə̄ i kemeé ō ní kem púsə́ ní tə́ ō. 12Kó̰o̰ man̄g gə̄ ní unən̄ róbə́ súmūú ta kaw̄ kə̄ Bet Semes kə nōó tadə́ tə́, kanjə̄ tɔ̄ɔ̄ geleé ō, ko̰ó̰ ō. Ngār gə̄ yā Pilistin gə̄ unən̄ gōdə́ bátə́ ugə̄n̄neé dɔ nin̄ dɔ nang kə́ Bet Semes tə́. 13De kə́ kem ɓē kə́ Bet Semes tə́ gə̄ ran̄ kum wóĺ tə́ a əjan̄ gémē. Dan ń ɔrə̄n̄ dɔdə́ dɔɔ́ á a̰a̰n̄ i sandúkə yā Kɔ́ɔ̄ɓē ní anī, rɔ̄də́ nel̄də́ ngá̰ý. 14Púsə aw̄ ugə̄ ndɔr̄ yā Jojue kə́ Bet Semes tə́ anī dəba kadə kūbə̄rū mbal̄ kógə̄ḿ kə́ bo tə́. Njárə̄n̄ kāgə̄ púsə́ ní ō, tɔ̄lə̄n̄ kó̰o̰ man̄g kə́ jōó gə̄ ō ní róōn̄ horoó kə taá malang adə̄n̄ Kɔ́ɔ̄ɓē. 15Ngán Lebi gə̄ unən̄ sandúkə yā Kɔ́ɔ̄ɓē kem púsú əndān̄ dɔ kūbə̄rū mbal̄ kə́ bo ní tə́ ō, unən̄ sandúkə́ kə́ dūú ń yá̰á̰ kə́ rāā kə lɔ́rɔ́ gə̄ i kemeé ní əndān̄ dɔ kūbə̄rū mbal̄ kə́ bo ní tə́ ō. Ndɔ̄ nəkɔ́ ń noō tə́ de kə́ kem ɓē kə́ Bet Semes tə́ gə̄ tɔ̄lə̄n̄ dā̰ gə̄ ba róōn̄də́ horoó kə taá malang adə̄n̄ Kɔ́ɔ̄ɓē ō, tɔ̄lə̄n̄ dā̰ ba tun̄ adə̄n̄ Kɔ́ɔ̄ɓē tām̄ yā kem kógə̄ḿ tə́ ō. 16Dan ń ngār kə́ mí gə̄ yā Pilistin gə̄ a̰a̰n̄ yá̰á̰ ní anī, télən̄ dɔ tə́ ndɔ̄ nəkɔ́ ń noō tə́ aw̄n̄ Ekəron. 17Kutə yá̰a̰ gə̄ kə́ ton̄ tītə̄ yá̰á̰ kə́ agə̄ de gə̄ kə́ rāān̄də́ kə lɔ́rɔ́ gə̄ ń Pilistin gə̄ adə̄n̄ Kɔ́ɔ̄ɓē yā kəsōnneé naā ní n toó: Yā ɓē kə́ Asdod i kógə̄ḿ, yā ɓē kə́ Gaja i kógə̄ḿ, yā ɓē kə́ Askalon i kógə̄ḿ, yā ɓē kə́ Gat i kógə̄ḿ, yā ɓē kə́ Ekəron i kógə̄ḿ ō. 18Ba kutə yégə̄ lɔ́r gə̄ ń adə̄n̄ Kɔ́ɔ̄ɓē ní i kə gō kutə ɓē bo gə̄ kə́ ndogə̄ mbal̄ gə̄ i gidə tə́ gə̄ ō, ngán ɓē kə́ ndágá gə̄ kə́ kanjə̄ ndogə̄ mbal̄ gidə tə́ gə̄ ō ń ngār kə́ mí gə̄ yā Pilistin gə̄ o̰o̰n̄ ɓē dɔ tə́ ní. Ɓōólaā gə̄gē kūbə̄rū mbal̄ kə́ bo ń əndān̄ sandúkə yā Kɔ́ɔ̄ɓē dɔ tə́ ní to kem ndɔr̄ yā Jojue kə́ Bet Semes tə́ noō ɓáý. 19Kɔ́ɔ̄ɓē rāā adə̄ yá̰á̰ kə́ tōr̄ rāā de kə́ Bet Semes gə̄ tɔdɔ̄ kumdə́ a̰a̰ sandúkə yān. Ni-rāā adə̄ de kə́ dəngam gə̄ oyn̄ kutə sīrí dɔ dáńdə́ tə́. Loo ń noō tə́ gotə de gə̄ ń na̰yn̄ ní əhɔn̄ ndoō tām̄ yā yá̰á̰ kə́ tōr̄ ngá̰ý ń Kɔ́ɔ̄ɓē rāā sedə́ tə́ ní. 20Gō tə́ anī ədan̄ na: Kɔ́ɔ̄ɓē Nə́ɓā kə́ táĺ ń toō ké i náā n asə ra ta kumən tə́ wa. Ré ḭḭ loodə́ anī ké a aw̄ i ɓē náāá wa. 21Nin̄-əlan̄ ngé kəla gə̄ rɔ̄ de kə́ Kiryat Yearim gə̄ tə́#6.21 De kə́ Kiryat Yearim gə̄ i ngán Israel gə̄ alé, ba i ɓəlo yādə́ gə̄. Á̰a̰ī Joj 9.17. kadə̄ ədan̄də́ na Pilistin gə̄ na reēn̄ kə sandúkə yā Kɔ́ɔ̄ɓē ní kɔ̄ɔ́ ba kə reē kə un kə aw̄n̄neé ɓēé loodə́.
Currently Selected:
1 SAMUEL 6: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
