1 SAMUEL 21

1Tā anī Dabid əsō róbó ō, Jonatan tél ta kaw̄ gogə́ ɓēé ō.

Dabid ugə̄ Nob ɓē Ahimelek

2Dabid aw̄ Nob ɓē Ahimelek nge tun̄ yá̰a̰. Ahimelek tə́nī tan kə ɓōló ba dəjen na: I ba̰ý á īkɔ́ i kə kérí ba de kə́ dānī gətóó ní? 3Anī Dabid tūr̄ ədan na: Mban̄g əlam̄ ba ədam̄ na: Kəla ń m-ə́laī toó ā ə́dá yá̰á̰ kə́ tū tə́ kógə̄ḿ kadə̄ deē ger̄ alé. I tām̄ najə̄ ń noō tə́ n m-ɔ́jə loo kógə̄ḿ kadə̄ j-ənge naā tū tə́ kə ngé dānə̄ḿ gēé ní. 4I rí n i kə́ to kəsa ngɔr ń toō tə́ ní? Ādə̄m̄ mápá mí, aláa yá̰a̰ kəsa kə́ rang ń to jīí tə́ ní. 5Nge tun̄ yá̰á̰ tél əda Dabid na: Mápá kə́ karī gətóo ba i mápá kə́ kɔr̄ kam̄ n to laā. Adə̄ ré madə̄ mbāí gə̄ ní ɔdən̄ rɔ̄ dəyá̰ gə̄ aĺ pá tá m-ā m-ādī ɓáý. 6Dabid əda nge tun̄ yá̰á̰ ní na: A̰á̰ā̰ ɔgə̄n̄jí sāā dəyá̰ gə̄ kɔ̄ɔ́ tītə̄ ń a ɔgə̄n̄neéjí kété dan ń m̄-rāā yā kaw̄ kə̄ ta rɔ̄ɔ̄ tə́ ní. Adə̄ balsáa gə̄ ní yá̰á̰də́ i kə́ táĺ. Mbā ń j-a j-aw̄ toó i mbā kə́ karī. Ɓá tā ba téĺ kə́ táĺ ɓōólaā kə ta kūl̄ yá̰á̰də́ gə̄ ń toō. 7Adə̄ nge tun̄ yá̰a̰ adə̄ Dabid mápá kə́ kɔr̄ kam̄ gə̄ ní, tɔdɔ̄ mápá kə́ rang gətóo. Mápá gə̄ ní i kə́ ndējə̄n̄ Kɔ́ɔ̄ɓē pá tá gō tə́ anī ɔyn̄ kɔ̄ɔ́ kem loo kə́ táĺ tə́ yā ɓōkə́nń kə́ kijə gotoó.

8Ba ndɔ̄ ngeé ń noō tə́ ní nge kəla yā Saul kógə̄ḿ ndi ta kum Kɔ́ɔ̄ɓē tə́ yā rāā yá̰á̰ kə́ sɔɔ̄ dɔn. Deē ní rīn na i Doeg. Ni i Edom deē. Ba ni i ngol ngé kul̄ yá̰a̰ gə̄ yā Saul.

9Dabid əda Ahimelek ɓáý to̰ na: Yá̰á̰ kə́ tītə̄ nənga, aláa kaskar gətóo jīí tə́ a? M-ún kaskar yāḿ aĺ ō, m-ɔ́ý yá̰a̰ rɔ̄ɔ̄ yāḿ gə̄ aĺ ō, tɔdɔ̄ mban̄g əlam̄ i kəla kə́ láẃ ngá̰ý. 10Anī nge tun̄ yá̰á̰ tél ədan na: Pilistin ń ī-tɔ̄lə̄n wól loo kāgə̄ sén gə̄ tə́ á rīn na i Goliat ní, kaskar yān to laā. I kə́ ɓír̄ gidə kə kūbūú ba to gidə kūbə̄ yā nge tun̄ yá̰á̰ tə́ noō. Ré ī-ndigə kun anī ún, tɔdɔ̄ yá̰a̰ rɔ̄ɔ̄ kə́ rang gətóo laā. Dabid əda na: Kaskar kə́ rang kə́ to tītə̄n gətóo, adə̄ ādə̄m̄ seneé laā.

Dabid i ɓē Pilistin gə̄ kə́ Gat tə́

11Dabid ɔr̄ dɔɔ́ ndɔ̄ ń noō tə́. Ni-a̰ȳ Saul aw̄ sa̰y. Aw̄ ugə̄ rɔ̄ Akis mban̄g kə́ Gat tə́. 12Ngé kəla yā Akis gə̄ ədan̄ Akis na: I deē ń toō n i Dabid ń i mban̄g kə́ dɔ nang yā ngán Israel gə̄ tə́ ní aĺ a? I ni n de gə̄ ənīn̄ pā seneé ndāmə̄nneé ədan̄ na Saul tɔ̄l̄ dūbú ba Dabid tɔ̄l̄ i dūbú kutə ní aĺ a? 13Najə̄ ní əla ɓōĺ kem Dabid tə́, adə̄ ni ɓōĺ Akis ń i mban̄g kə́ Gat ní ngá̰ý. 14Ni-tɔ̄ rāā yá̰a̰ tītə̄ de kə́ nge kɔ̄r̄ kə̄ ta kumdə́ tə́ noō: Ɔr̄ najə̄ mbit mbit dandə́ tə́ ō, a tə́jā yá̰a̰ gə̄ tū bápə gə̄ kə́ ta róbə́ kújə́ tə́ ō, əya̰ ndɔl tan adə̄ də̄yā̰ mbāýn tə́ ō. 15Anī Akis əda ngé kəla yān gə̄ na: Sḭḭ̄ ī-gerī majə kadə̄ i nge kɔ̄r̄ tá ī-reēī seneé rɔ̄ḿ tə́ i tām̄ rí tə́? 16Ndoō ngé kɔ̄r̄ gə̄ rāām̄ á ī-reēī kə deē ń toō kadə̄ rāā kɔ̄r̄ dɔḿ tə́ a? Deē ń noō kadə̄ udə kem kújə yāḿ mā tə́ a?

Currently Selected:

1 SAMUEL 21: SARDC

Highlight

Copy

Compare