1 SAMUEL 20

Jonatan ndigə kadə̄ yá̰á̰ kə́ majaĺ rāā Dabid alé

1Dabid teē Nayot kə́ Rama tə́ a̰ȳ kɔ̄ɔ́. Ni-aw̄ ənge Jonatan ba dəjen na: m̄-rāā i rí yā bɔbí? I yá̰á̰ rí kə́ gōtə́ aĺ n m̄-rāā seneé ní? I majaĺ rí n m̄-rāā kə bɔbí á sāań tɔ̄lə̄m̄ ní? 2Anī Jonatan tél ədan na: M-ā m-á̰a̰ kumḿ tə́ alé, ḭ̄ ā óy alé. Bɔbə́ḿ a rāā yá̰a̰ kanjə̄ kɔr̄ najə̄n seḿ kété alé, a mundə̄m̄ najə̄ ń toō i tām̄ rí tə́? Yá̰á̰ ń noō a rāā yá̰a̰ alé. 3Dabid túbə ba əda ɓáý to̰ na: Bɔbí ger̄ majə ngá̰ý kadə̄ ndílí aw̄ dɔ yāḿ tə́ adə̄ ni-əda kə̄ kemən tə́ na: Ādə̄ Jonatan ger̄ alé na wurən a ɔlən ngá̰ý. Ba tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií toō ō ní, mā i de kə gír yāḿ gān̄g kɔ̄ɔ́. 4Jonatan əda Dabid na: M-ā m̄-rāā yá̰á̰ ń kemií gḛy ní yā kadī. 5Anī Dabid əda Jonatan na: Bírí i ndɔ̄ rāā nāā kə́ teē kijə ō, i mā n m-ā m̄-ndi kadə mban̄g tə́ loo kəsa yá̰á̰ tə́ ō ní. Ba ādə̄m̄ ta róbə ādə̄ m-āw̄ m̄-ɓɔ̄ɔ̄ rɔ̄ḿ bembeé bátə́ kadə̄ teē loo tīī loo sɔlí. 6Ré bɔbí a̰a̰ kadə̄ m̄-gətóo anī ə́dan na Dabid rāāī ɓɔ́ ādə̄ ə́ya̰n kadə̄ n-aw̄ ɓē yān tə́ Betlehem, tām̄ yá̰a̰ tun̄ kə́ kə dɔ ɓāl̄ gə̄ na i noó tām̄ yā de gə̄ malang kə́ gír yān tə́. 7Ré ni ədaī na majanī yá̰a̰ a rāām̄ alé. Ba ré rāā wōn̄g anī i loo ń noō tə́ n ā ī-gerə̄ń kadə̄ ni-əndā kemən dɔ tɔ̄lə̄ḿ tə́ ní. 8Ɓá anī ī-rāā yá̰á̰ kə́ rɔ̄kum ādə̄ m-á̰a̰ā̰, tɔdɔ̄ madə̄ naā ń jə-rāā kə rī Kɔ́ɔ̄ɓēé ní do̰ō̰jí naā tə́ seí. Adə̄ ká ré m̄-rāań i yá̰á̰ kə́ majaĺ gə̄gē anī īkɔ́ ī-tɔ̄lə̄m̄ ba ī-lōō kəlam̄ jī bɔbí tə́. 9Jonatan əda na: M-ā m-á̰a̰ kumḿ tə́ alé. Ré m̄-ger̄ kə gōó majə kadə̄ bɔbə́ḿ əndā kemən dɔ tɔ̄lī tə́ anī m-ā m-ə́daī. Nge ń noō m̄-túbə m-ādī loon tə́. 10Dabid dəje Jonatan na: Ba ré bɔbí do̰o̰ī rɔ̄ɔ̄ ní i náā n a ədam̄? 11Jonatan tūr̄ ədan na: Ī-reē, jə-teē, j-aw̄ kem bembeé. Anī nin̄ jōó mbak teē aw̄n̄ kem bembeé.

12Jonatan əda Dabid na: Kɔ́ɔ̄ɓē Nə́ɓā yā Israel gə̄ i kə́ kum tə́ yāḿ. Bírí aláa loo tīī m-ā m̄-nāā bɔbə́ḿ yā ka̰a̰ń gír̄ kə́ kemən tə́ kə kum mbang ń toō. Ré gír̄ kə́ kemən tə́ i kə́ majə tām̄ yāí tə́ tá m-ə́lá m-ə́daī aĺ anī, 13ādə̄ Kɔ́ɔ̄ɓē rāām̄ yá̰á̰ kə́ tōr̄ ba tél rāām̄ ɓáý to̰. Ba ré bɔbə́ḿ gír̄ rāāī yá̰á̰ kə́ to kum kaȳ aĺ anī m-ā m̄-tāāī kadə̄ āw̄ kɔ̄ɔ́ kanjə̄ sōl̄ yá̰á̰ kógə̄ḿ. Ba ādə̄ Kɔ́ɔ̄ɓē i naā tə́ seí tītə̄ ń ni i naā tə́ kə bɔbə́ḿ kété ní. 14Ndɔ̄ń tə́ ré m̄-ndi kə kumḿ ɓáý anī ī-rāā seḿ kə ta kūl̄ kem majə yā Kɔ́ɔ̄ɓēé. Ba ré m-óy anī, 15ún ta kem majə yāí kə̄ kété kə gír kojə yāḿ. Ká ré Kɔ́ɔ̄ɓē rāā adə̄ madə̄ ba̰ā̰í gə̄ gətóōn̄ kógə̄ḿ kógə̄ḿ kɔ̄ɔ́ dɔ nang tə́ gə̄gē anī ī-rāā nəkɔ́. 16Adə̄ Jonatan əhɔ madə̄ naā kə Dabid ō, kə de gə̄ kə́ kem kújə yā Dabid tə́ ō. Ni-əda na: Ādə̄ Kɔ́ɔ̄ɓē dal ba̰ā̰ dɔ madə̄ ba̰ā̰ Dabid gə̄ tə́. 17Jonatan mēr̄ Dabid túbə kadə̄n ɓáý to̰ kə rī táŕ ń aw̄ń kemən tə́ tām̄ yān tə́ ní. Tɔdɔ̄ nəkɔ́ Jonatan tár Dabid kə ngarā̰ kemənneé malang. 18Jonatan əda Dabid na: Bírí loo rāā nāā kə́ kijə tə́ ní de gə̄ a gerə̄n̄ kadə̄ ḭ̄ ī-gətóo, tɔdɔ̄ loo yāí a to i karī. 19Ba teē loo tīī anī ī-risə āw̄ bátə́ loo ń ī-ɓɔ̄ɔ̄ rɔ̄í tū tə́ ndɔ̄ tə́ gēé ní tə́, ba āw̄ ī-ndi kadə mbal̄ Ejel tə́. 20Ba mā m-ā m̄-túr̄ kum gərā kə́ mətá gə̄ ń toō kum kə̄ loo ní tə́ tītə̄ kə́ m-ā m-úr i yá̰á̰ kógə̄ḿ beē. 21Gō tə́ anī m-ā m-ə́la balsáá kə́ nge kəla yāḿ kadə̄ aw̄ gō gərā gə̄ ní tə́. Ré m-ə́dan na kum gərā gə̄ ní ton̄ i kum kə̄ gogə́ laā, ī-tél ī-reē ɔ́ýdə́, anī kumən na yá̰a̰ malang i kə́ majə tām̄ yāí tə́ ō, ásə kadə̄ ī-tél dɔ tə́ ī-reē ō. M-ə́da i najə̄ kə́ rɔ̄kum ta kum Kɔ́ɔ̄ɓē tə́, yá̰a̰ a rāāī alé. 22Ba ré m-ə́da balsáá ní na kum gərā gə̄ ní ton̄ i kum kə̄ kété ɓáý anī, āw̄ loo yāí tɔdɔ̄ Kɔ́ɔ̄ɓē ndigə kadə̄ āw̄. 23Ba najə̄ ń j-ɔr̄ kə naá ní, Kɔ́ɔ̄ɓē i kum tə́ bátə́ kə̄ no tə́. 24Adə̄ Dabid aw̄ ɓɔ̄ɔ̄ rɔ̄n kem bembeé.

Dan ń nāā kə́ kijə teē anī mban̄g Saul aw̄ ndi ta tábəl tə́ yā kəsa yá̰a̰. 25Ni-ndi i dɔ kōr̄ kāgə̄ yān tə́, kadə ndogə̄ mbal̄ tə́ tītə̄ kə́ kété gə̄. Abner ń i ngol ngé rɔ̄ɔ̄ gə̄ ní ndi kadən tə́ ō, Jonatan ndi non tə́ ō, ba loo yā Dabid tə́ to i karī. 26Ndɔ̄ ń noō tə́ ní Saul əda yá̰a̰ alé, tām̄ ɔjəń na i yá̰á̰ kə́rēý n rāā Dabid adə̄ ni unjə̄ njáý njáý aĺ i mbéé á gírəń reē aĺ ní. 27Ba teē kə kōŕneé, kə ndɔ̄ kə́ nge ko̰ jōó yā nāā kə́ kijə anī, loo yā Dabid to i karī ɓáý to̰. Anī Saul dəje ngōnən Jonatan na: I tām̄ rí tə́ á ngōn̄ Jese reē loo kəsa yá̰á̰ tə́ tagə́bēé aĺ ō, ɓōólaā aĺ ō ní? 28Tā anī Jonatan tūr̄ ədan na: Dabid rāām̄ ɓɔ́ kadə̄ m-ādə̄n ta róbə kadə̄ n-aw̄ Betlehem. 29Ni-rāām̄ ɓɔ́ ba ədam̄ na kə m-ə́ya̰n kadə̄ n-aw̄, na yá̰a̰ tun̄ kə́ tām̄ yā gír kojə yādə́ tə́ na to kem ɓē kə́ Betlehem tə́ noō, adə̄ ngōkó̰o̰n kə́ dəngam ədan na kə n-aw̄ kum tə́. Ré na m̄-gḛy najə̄ yān rɔ̄kum anī kə m-ə́ya̰n kadə̄ n-aw̄ n-a̰a̰ ngéén gə̄. I tām̄ najə̄ ń noō tə́ n ni gətóoń loo kəsa yá̰a̰ yāí tə́ ní. 30Wōn̄g rāā Saul ngá̰ý kə Jonatan adə̄ ni ədan na: Ngōn̄ dəyá̰ kə́ kaya, m̄-ger̄ kadə̄ ī-ndigə i najə̄ yā ngōn̄ Jese kadə̄ ə́lań rɔ̄sɔl̄ dɔ rɔ̄í tə́ ō, dɔ kó̰ó̰í tə́ ō. 31Banī ōō najə̄ ń toō majə, ré ngōn̄ Jese ń noō ndi kə kumneé ta kaw̄ jóo anī, ngəraī ḭ̄ a əhɔ nang aĺ ō, ngəra ko̰o̰ ɓē yāí a əhɔ nang aĺ ō. Adə̄ ī-mēr̄ kəhɔn ngɔr ń toō tə́ ādə̄ reēn̄ seneé adə̄mə̄n̄, tɔdɔ̄ ni-rāā yá̰á̰ kə́ asə yon. 32Jonatan tél əda bɔbə̄n Saul na: Kadə̄ tɔ̄l̄nən̄ kɔ̄ɔ́ i tām̄ rí tə́? Rāā i rí? 33Saul un nənga yān kə̄ dɔɔ́ yā kɔsəń Jonatan. Loo ń noō tə́ Jonatan ger̄ kadə̄ bɔbə̄n əndā kemən dɔ tɔ̄l̄ Dabid tə́. 34Jonatan ḭḭ ta tábəl tə́ kɔ̄ɔ́ kə wōngōó ba mbātə́ kəsa yá̰a̰ kə ndɔ̄ kə́ nge ko̰ jōó yā nāā kə́ kijií, tām̄ tōrə̄n najə̄ yā Dabid tə́ ngá̰ý tɔdɔ̄ bɔbə̄n tájə̄n.

35Teē kə kōŕneé dəloí anī Jonatan aw̄ bembeé loo ń nin̄ oōn̄ naā kə Dabidí yā kənge naā tū tə́ ní. Ba balsáá kə́ nge kəla yān i seneé. 36Ni-əda balsáá ní na: Ā̰ȳ ngɔ̄də̄ ɔ́y kum gərā gə̄ ń m-ā m̄-túr̄də́ ní ādə̄m̄. Balsáá ní a̰ȳ ngɔ̄də̄ aw̄ kété ba Jonatan ur kum gərā adə̄ mān̄ dɔn tə́. 37Dan ń balsáá ní aw̄ ugə̄ loo ń kum gərā əsō tū tə́ ní tə́ anī Jonatan əga kɔŕ əda na: Gərā ní i kum kə̄ kété noí tə́ nú ɓáý aĺ a? 38Jonatan əga kɔŕ ba əda balsáá ní ɓáý to̰ na: Āw̄ láý ba ī-lōō dəba. Balsáá ní un kum gərā ní ba tél reē rɔ̄ Jonatan tə́. 39Ni-ger̄ kum najə̄ gə̄ ní alé, ba i Jonatan nin̄ kə Dabid ngóy n gerə̄n̄. 40Jonatan adə̄ balsáa yān ní ga̰ gərā ō, gərā gə̄ ō, ba ədan na kə tél kə aw̄ń gogə́ ɓēé. 41Dan ń balsáá ní aw̄ kɔ̄ɔ́ anī, Dabid teē loo ń ɓɔ̄ɔ̄ rɔ̄n tū tə́ ní tə́ dām̄ mbɔ́r ɓē kə́ geleé tə́. Ni-ɔsə non nang tə́ nja mətá kə̄ no Jonatan tə́. Gō tə́ anī ɓirə̄n̄ naā dagə ba nōōn̄ mbak bátə́ kadə̄ asəń Dabid. 42Jonatan əda Dabid na: Āw̄ kə kem sɔlɔ́. Ba ādə̄ əga kemií dɔ madə̄ naā ń jə-túbə j-adə̄ naā j-əhɔń kə rī Kɔ́ɔ̄ɓēé ní tə́. Ādə̄ Kɔ́ɔ̄ɓē ra dɔ dáńjí tə́ ō, dɔ dáń ngáńjí gə̄ tə́ ō, ngán kaají gə̄ tə́ ō, bátə́ ta kaw̄ jóo.

Currently Selected:

1 SAMUEL 20: SARDC

Highlight

Copy

Compare