1 SAMUEL 22

Dabid tél ngol de kə́ gōn tə́ gə̄

1Dabid ḭḭ noó a̰ȳ aw̄ ɓɔ̄ɔ̄ rɔ̄n bəlo mbal̄ kə́ Adulam tə́. Ngákó̰o̰n gə̄ ō de kə́ ta kújə yā bɔbə̄n tə́ gə̄ malang ō oōn̄ kōōn adə̄ aw̄n̄ gōn tə́ loo ní tə́. 2Tá de gə̄ kə́ yá̰á̰ kə́ ngan̄g əngedə́ gə̄ ō kə́ kə̄rā i dɔdə́ tə́ gə̄ ō kə́ rɔ̄də́ nel̄də́ aĺ gə̄ ō nin̄ malang asən̄ deē ɓú sɔ́ ń noō, kánə̄n̄ naā rɔ̄n tə́, adə̄ ni-tél ngoldə́.

3Dabid ḭḭ noó aw̄ Misəpe dɔ nang kə́ Moab tə́, ba əda mban̄g kə́ Moab na: Ādə̄ bɔbə́ḿ ō kó̰ḿ ō ndin̄ sesí bátə́ kadə̄ m̄-gerə̄ń yá̰á̰ ń Nə́ɓā a sāā rāā seḿ ní. 4Ni-aw̄ sedə́ rɔ̄ mban̄g kə́ Moab tə́ adə̄ ndin̄ seneé kem ndɔ̄ gə̄ ń ni ɓɔ̄ɔń rɔ̄n tə́ ní.

5Ndɔ̄ kə́rēý tə́ anī nge koō ta yā Nə́ɓā ń rīn na i Gad ní əda Dabid na: Ī-ndi loo ń ā ī-ɓɔ̄ɔ̄ rɔ̄í tū tə́ tə́ toō to̰ alé. ī-teē tū tə́ kɔ̄ɔ́ ba āw̄ dɔ nang kə́ Juda tə́. Adə̄ Dabid aw̄ ndi kem ku kāgə̄ gə̄ kə́ Heret tə́.

Saul tɔ̄l̄ ngé tun̄ yá̰a̰ gə̄ kə́ kem ɓē kə́ Nob tə́

6Saul oō kadə̄ de gə̄ a̰a̰n̄ Dabid nin̄ kə madə̄n gēé. Saul ndi i Gibea gír kāgə̄ tamaris kə́ ra loo kə́ ḭḭ kə̄ dɔɔ́ tə́. Nənga yān i jīn tə́ ō ngé kəla yān gə̄ malang ran̄ kə njadə́ dɔɔ́ rɔ̄n tə́ ō. 7Ni-ədadə́ na: Sḭḭ̄ Benjamḛ gə̄, ī-nēlī mbīsí majə ōōīneé. Sḭḭ̄ malang ń ī-raī toó, ngōn̄ Jese a adə̄sí loo ndɔr̄ gə̄ kə kāgə̄ nduú gə̄ ō a? Aké a əndāsí ngol de kə́ dūbú gə̄ ō kə́ ɓú gə̄ ō á, 8sḭḭ̄ malang ōōī naā seneé kadə̄ kətaā ngār jīḿ tə́ a? Dan ń ngōnə̄ḿ əhɔ madə̄ naā kə ngōn̄ Jese ní, de kógə̄ḿ dansí tə́ kə́ ədam̄ gətóo. Tá dan ń sə̄lā nge kəla yāḿ dɔḿ tə́ kadə̄ əyā gūmbə̄ əhɔm̄neé tītə̄ ń to ɓōólaā toó ní deē kógə̄ḿ dansí tə́ kə́ o̰o̰n tɔdɔ̄ḿ kadə̄ ɓogə dɔ ədam̄ gətóo. 9Anī Doeg kə́ Edom ń ra kadə ngé kəla yā Saul gə̄ tə́ ní əda Saul na: Ndɔ̄ kógə̄ḿ tə́ m-á̰a̰ ngōn̄ Jese aw̄ Nob rɔ̄ Ahimelek ngōn̄ Ahitub tə́. 10Ahimelek sāā dɔn tə́ rɔ̄ Kɔ́ɔ̄ɓē tə́ ba adə̄n yá̰a̰ kəsa ō kaskar yā Goliat kə́ Pilistin ní ō. 11Tā anī mban̄g əla gō Ahimelek nge tun̄ yá̰á̰ kə́ ngōn̄ Ahitub tə́ ō, gō ngéén gə̄ ń i ngé tun̄ yá̰á̰ kə́ Nob tə́ gə̄ ní ō adə̄ reēn̄ malang rɔ̄ mban̄g tə́. 12Saul əda Ahimelek na: Ngōn̄ Ahitub, ī-nēl̄ mbīí majə ōoń. Ahimelek tél ədan na: Kɔ́ɔ̄ ɓē gə̄, mā n toó. 13Anī Saul əda Ahimelek na: I tām̄ rí tə́ á sḭḭ̄ kə ngōn̄ Jese ōōī naā dɔḿ tə́ ní? Ḭ̄ ādə̄n mápá ō kaskar ō ī-sāā dɔn tə́ rɔ̄ Nə́ɓā tə́ ō kadə̄ tūrəń gidən taḿ tə́ ō əyāń gūmbə̄ yā kəhɔmneé ō tītə̄ ń ni rāań ɓōólaā toó i najə̄ rí tə́? 14Ahimelek tél əda mban̄g na: Kɔ́ɔ̄ ɓē gə̄ dan ngé kəla yāí gə̄ tə́ malang ní, de kə́ sew tītə̄ Dabid i noó a? Ni i umií ō, pajā yāí kə́ nge ngɔ̄mī ō i ni n de gə̄ rɔȳnən̄ ɓēé looí ní ō. 15I ndɔ̄ ń noō tə́ n m-ə́lań gír sāā dɔn tə́ rɔ̄ Nə́ɓā tə́ ní a? Nə́ɓā oō ndūḿ. Ɓɔ́ kɔ́ɔ̄ ɓē gə̄, ī-lōō kəndā najə̄ kógə̄ḿ dɔḿ mā nge kəla yāí tə́ ō dɔ ngééḿ gə̄ tə́ malang ō tɔdɔ̄ mā nge kəla yāí m̄-ger̄ yá̰á̰ kógə̄ḿ tū najə̄ ń toō tə́ alé. 16Banī mban̄g əda na: Ahimelek, ā óy naā tə́ kə ngééí gə̄ malang. 17Gō tə́ anī mban̄g əda pajā yān gə̄ kə́ ngé ngɔ̄mə̄n gə̄ ń ran̄ kadən tə́ ní na: Ɔ́tə ī-tɔ̄lī ngé tun̄ yá̰a̰ yā Kɔ́ɔ̄ɓē gə̄, tɔdɔ̄ nin̄ i ngé kənī najə̄ gír Dabid tə́ ō. Nin̄ gerə̄n̄ kadə̄ Dabid a̰ȳ i mbée ba ədamə̄n̄ alé. Banī ngé kəla yā mban̄g gə̄ ndigən̄ kun jīdə́ tɔ̄ləń ngé tun̄ yá̰a̰ yā Kɔ́ɔ̄ɓē gə̄ alé. 18Anī mban̄g əda Doeg na: Ɔ́tə ī-tɔ̄l̄ ngé tun̄ yá̰a̰ gə̄ ń noō. Anī Doeg kə́ Edom njə̄rā kə̄ rɔ̄ ngé tun̄ yá̰a̰ gə̄ tə́ tɔ̄l̄də́ kə jīneé. Ndɔ̄ ń noō tə́ ni tɔ̄l̄ de gə̄ kutə sɔ́sɔ́ gidə i mí kə́ o̰o̰n̄ epod lḛ́ḛ rɔ̄də́ tə́ gə̄. 19Saul adə̄ tɔ̄lə̄n̄ dəngam gə̄ ō, dəyá̰ gə̄ ō, ngáń kə́ dūú gə̄ ō, ngán kásə̄ gə̄ ō, man̄g gə̄ ō, kərō gə̄ ō, batə̄ gə̄ ō, bə̄yā̰ gə̄ ō malang kə́ Nob ń i ɓē yā ngé tun̄ yá̰a̰ gə̄ ń toō ní kə kaskaraá. 20I ngōn̄ Ahimelek kə́ ngōn̄ Ahitub kógə̄ḿ beē ngóy n teē a̰ȳ. Rīn na i Abiatar. Ni a̰ȳ aw̄ gō Dabid tə́, 21ba ədan na Saul tɔ̄l̄ ngé tun̄ yá̰a̰ gə̄ yā Kɔ́ɔ̄ɓē kɔ̄ɔ́. 22Anī Dabid ədan na: Ndɔ̄ tə́ gēé ní m-á̰a̰ Doeg kə́ Edom, adə̄ m̄-ger̄ kadə̄ a əda Saul. I mā n m̄-rāā yá̰á̰ á najə̄ əsōń dɔ ngééí gə̄ tə́ ní. 23Ī-ndi seḿ ba ī-lōō ɓōĺ. Deē ń a sāā tɔ̄lī ní a sāā i tɔ̄lə̄m̄ mā. Yá̰a̰ a rāāī rɔ̄ḿ tə́ alé.

Currently Selected:

1 SAMUEL 22: SARDC

Highlight

Copy

Compare