1 SAMUEL 19

Jonatan rɔ̄ɔ̄ dɔ Dabid tə́

1Saul əda ngōnən Jonatan ō ngé kəla yān gə̄ malang ō, najə̄ núm̄ ń ni núm̄ tɔ̄l̄ Dabid ní. Ba Jonatan ń i ngōn̄ Saul ní tár Dabid ngá̰ý. 2Adə̄ tāān əda na: Bɔbə́ḿ Saul a sāā tɔ̄lī, adə̄ bírí kə dəloí ní ī-ndi dɔ rɔ̄í tə́. Ī-sāā loo ī-ɓɔ̄ɔ̄ rɔ̄í tū tə́ kɔ̄ɔ́. 3Mā m-ā m̄-teē yā dān̄ bɔbə́ḿ kaw̄ seneé kem bembə ń ā ī-ɓɔ̄ɔ̄ rɔ̄í tū tə́ ní tə́. M-ā m-ɔ̄r̄ najə̄ yāí kə bɔbə́ḿ. Ba yá̰á̰ ń m-ā m-á̰a̰ā̰ tū tə́ ní m-ā m-ə́daī.

4Jonatan ɔr̄ najə̄ kə́ majə tām̄ yā Dabid tə́ kə bɔbə̄n Saulú əda na: Bɔbə́ḿ, majə kadə̄ ī-rāā yá̰á̰ kə́ majaĺ kə nge kəla yāí Dabid alé, tɔdɔ̄ ni-rāā yá̰á̰ kə́ majaĺ seí alé. Tá kəla kə́ bo gə̄ ń ni-rāā ní i majə ngá̰ý tām̄ yāí tə́. 5Ni-un rɔ̄n adə̄ i yo n tɔ̄ləń Pilistin deē ní. Kɔ́ɔ̄ɓē tetə i rɔ̄ɔ̄ kə́ bo ngá̰ý n adə̄ ngán Israel gə̄ ndɔ̄ ń noō tə́ ní. Īkɔ́ á̰a̰ā̰ ō, rɔ̄í nelī ō. Ba i tām̄ rí tə́ á ī-sāā ɓōkə́ mósə de kə́ kanjə̄ najə̄ dɔn tə́ nang tə́ yā rāań yá̰á̰ kə́ majaĺ ní? I tām̄ rí tə́ á ī-sāā tɔ̄l̄ Dabid kanjə̄ kumən ní? 6Saul ndigə najə̄ ń Jonatan ədan ní, adə̄ túbə əda na: Tītə̄ ń Kɔ́ɔ̄ɓē ndiń kə kumneé noō, deē a tɔ̄l̄ Dabid alé. 7Loo ń noō tə́ Jonatan aw̄ ənge Dabid ɔjən gotə najə̄ gə̄ ń ɔrə̄n̄ ní malang. Gō tə́ anī aw̄ kə Dabid rɔ̄ Saul tə́ adə̄ tél rāā kəla yā Saul tītə̄ kə́ kété gə̄.

Mikal ajə Dabid

8Rɔ̄ɔ̄ tél ḭḭ dɔɔ́ gogə́ ɓáý to̰ adə̄ Dabid aw̄ yā rɔ̄ɔ̄ Pilistin gə̄. Ni-rāā Pilistin gə̄ majaĺ ngá̰ý adə̄ a̰ȳn̄ naā kɔ̄ɔ́ non tə́.

9Ndɔ̄ kə́rēý tə́ ndíĺ kə́ majaĺ kógə̄ḿ ḭḭ rɔ̄ Kɔ́ɔ̄ɓē tə́ reē udə kem Saul tə́. Saul ndi i kem kújə yān tə́ kə nəngaá jīn tə́, ba Dabid a ugə i kənde. 10Anī Saul sāā kɔsə Dabid kəren kadə ndogə̄ mbal̄ tə́ kə nənga yānneé, banī Dabid əja rɔ̄n kɔ̄ɔ́ ta nənga tə́ adə̄ nənga mān̄ ɔsə kadə bɔr. Dabid teē a̰ȳ ndɔ̄ɔ́ ndɔ̄ ń noō tə́. 11Saul əla de gə̄ kadə̄ gētə̄n̄ Dabid ta kújə yān tə́ kadə̄ ré teē dəloí anī kə tɔ̄l̄nən̄. Banī Mikal ń i nə̄yá̰ Dabid ní ədan yá̰á̰ ń a rāā yā rāā yá̰á̰ ní, ədan na: Ré ā̰ȳ ndɔ̄ɔ́ laā aĺ anī bírí a tɔ̄l̄nī. 12Mikal əla Dabid ko̰rō̰ kújə́ tə́ dɔɔ́ adə̄ Dabid risə kə̄ gidə kə́rēý tə́ ba a̰ȳ ajəń rɔ̄n. 13Gō tə́ anī Mikal un ɓesə̄ ənī kem tə̄rá gotə Dabid tə́, ba taā gír dɔ ɓesə̄ ní kə yá̰a̰ taā gír dɔ kə́ rāā kə bḭḭ̄ bə̄yā̰á̰ ō, seĺ kūbə̄ dɔ ɓesə̄ ní tə́ ō. 14Saul əla de gə̄ kəhɔ Dabid tə́ anī Mikal ədadə́ na: Ni i mo̰y. 15Saul tél əla de gə̄ ní ɓáý to̰ ba ədadə́ na: Únəniī kə tə̄rá yān gēé ī-reēī seneé ādə̄mī ādə̄ m̄-tɔ̄lən. 16Ba dan ń de gə̄ ní aw̄n̄ anī əngen̄ i ɓesə̄ kem tə̄rá ō, yá̰a̰ taā gír dɔ kə́ rāā kə bḭḭ̄ bə̄yā̰á̰ i gír dɔn tə́ ō. 17Saul dəje Mikal na ké gólə̄n beé i tām̄ rí tə́ wa. Ké əya̰ madə̄ ba̰ā̰n ní adə̄ a̰ȳ i tām̄ rí tə́ wa. Anī Mikal tūr̄ ədan na: I nəkɔ́ n ədam̄ na kə m-ə́ya̰n kadə̄ n-aw̄ aĺ anī n-a n-tɔ̄lə̄m̄ ní.

Dabid ō, Saul ō, nin̄ i Nayot

18I beé n Dabid teē aȳń ní. Ni-aw̄ rɔ̄ Samuel tə́ Rama aw̄ ɔjən gotə yá̰a̰ malang ń Saul rāā seneé ní. Ni ō, Samuel ō, aw̄ ndin̄ Nayot. 19De gə̄ ədan̄ Saul na Dabid na i Nayot kə́ Rama tə́. 20Anī Saul əla de gə̄ kəhɔ Dabid tə́ ɓáý to̰. Dan ń de gə̄ ń Saul əladə́ ní a̰a̰n̄ ɓūtə̄ ngé koō ta yā Nə́ɓā gə̄ kə́ Ndíl yā Nə́ɓā ɔsə sedə́ adə̄ a̰a̰n̄ oy oy tītə̄ de gə̄ kə́ yá̰a̰ rāādə́ beé ō, a̰a̰n̄ kadə̄ Samuel i ngāgəra dɔ ngé koō ta yā Nə́ɓā gə̄ ní ō anī, Ndíl yā Nə́ɓā udə kemdə́ tə́ adə̄ nin̄ a̰a̰n̄ oy oy tītə̄ de kə́ yá̰a̰ rāādə́ beé ō. 21De gə̄ reē ədan̄ Saul gotə anī əla de kə́ rang gə̄. Banī Ndíl yā Nə́ɓā rāādə́ adə̄ a̰a̰n̄ oy oy tītə̄ kə́ yá̰a̰ rāādə́ gə̄ beé ō. Saul əla de kə́ rang gə̄ nja kə́ nge ko̰ mətá anī Ndíl yā Nə́ɓā rāādə́ adə̄ a̰a̰n̄ woy woy tītə̄ kə́ yá̰a̰ rāādə́ beē ɓáý to̰. 22Tā anī Saul nəkɔ́ ḭḭ kə rɔ̄neé aw̄ ta kaw̄ Rama. Dan ń ugə̄ ta bəlo taā man̄ ndi kə́ bo kə́ Seku tə́ anī, dəje na ké Samuel nin̄ kə Dabidí i rá wa. Anī ədanən̄ na nin̄ na i Nayot kə́ Rama tə́. 23Anī ni-aw̄ Nayot kə́ Rama tə́. Dan ń ni i dɔ róbó ɓáý ní, Ndíl yā Nə́ɓā rāān adə̄ ni-a̰a̰ oy oy bátə́ ugə̄ń Nayot kə́ Rama tə́. 24Ni-ɔr̄ kūbə̄ kə́ rɔ̄n tə́ tītə̄ yā madə̄n gə̄ ō, ba a̰a̰ oy oy no Samuel tə́ ō. Gō tə́ anī teē əsō nang tə́ ba to rɔ̄n karī ndɔ̄ ń noō tə́ bátə́ loo tíbə dɔn tə́ ō, loo tīī dɔn tə́ ō. I tām̄ najə̄ ń noō tə́ n de gə̄ a ədan̄neé na ké Saul i dan nge koō ta gə̄ tə́ ō wa ní.

Currently Selected:

1 SAMUEL 19: SARDC

Highlight

Copy

Compare