1 SAMUEL 11

Saul tetə Amon gə̄ rɔ̄ɔ̄

1Nahas ń i mban̄g yā Amon gə̄ ní, aw̄ ndi gidə ɓē kə́ Yabes tə́, dɔ nang kə́ Galaad tə́, yā kənīń ɓē kə́ Yabes rɔ̄ɔ̄. De gə̄ malang kə́ kem ɓēé kə́ Yabes tə́ ədan̄ Nahas na: ɔ́jə́jí yá̰a̰ gə̄ ń kemií ndigə ní, ba ādə̄ lápə́ya i mbo̰ō̰jí tə́, tɔdɔ̄ jə-ndigə̄ kəla dɔjí gíŕ tɔ́gí tə́. 2Anī mban̄g Nahas ədadə́ na: Ré ī-ndigiī kadə̄ jə-ndiī kanjə̄ rɔ̄ɔ̄ anī ādə̄ m̄-tɔ̄ɔ̄ kumsí kə́ dām̄ kə́ ko̰ó̰ tə́ m-ə́lań rɔ̄sɔl̄ dɔ Israel gə̄ tə́ malang. 3Kum kɔɔ̄ kə́ kem ɓē Yabes tə́ gə̄ tél ədanən̄ na: Ādə̄jí ndɔ̄ sīrí ādə̄ j-əlań kəla gō nang kə́ Israel tə́ malang. Ré deē kógə̄ḿ reē dḭḭ̄jí aĺ anī, j-a jə-teē ndágá yā kaw̄ rɔ̄í tə́ ba kəya̰ rɔ̄jí kadī.

4Ngé kaw̄ kəla gə̄ ní reē ɔtə̄n̄ Gibea ɓē yā Saul tə́ anī ənīn̄ najə̄ ní mbī de gə̄ tə́. Loo ń noō tə́ de kə́ kem ɓēé gə̄ malang əgan̄ unən̄ ndūdə́ kə̄ dɔɔ́ nōōn̄eé ō. 5Kum mbang ngeé ń noō tə́ ní Saul tél bembeé kə man̄g yān gēé. Ni-dəje de gə̄ na ké i rí n rāā yá̰á̰ á de gə̄ a nōōn̄ naā beé wa. Anī ɔjənən̄ najə̄ ń de kə́ Yabes gə̄ ədan̄ ní. 6Dan ń Saul oō najə̄ ní anī, Ndíl yā Nə́ɓā reē dɔn tə́ kə tɔ́gɔ́ adə̄ wōn̄g rāān ngá̰ý. 7Ni-əhɔ man̄g kə́ bəra gə̄ jōó tɔ̄l̄, ba górīyō dā̰də́ dugəju dugəju télań gō nang kə́ Israel tə́ malang. Ba əndā kəla dɔ tə́ əda na: Deē ń a mbātə́ kaw̄ rɔ̄ɔ̄ tə́ gō Saul nin̄ kə Samuelé tə́ ní, yá̰á̰ ń a rāān̄ kə man̄g yān gēé ni n noó. Kɔ́ɔ̄ɓē əla ɓōĺ kə́ ngá̰ý kem ngán Israel gə̄ tə́, adə̄ nin̄ malang ɓə̄ngān̄ naā gidə kógə̄ḿ ɓuk aw̄n̄ gō Saul tə́. 8Saul tə́da kutədə́ kem ɓē kə́ Bejek tə́. Israel gə̄ i dūbú ɓú mətá ō, Juda gə̄ i dūbú kutə mətá ō. 9Ədan̄ ngé kəla gə̄ ń de kə́ Yabes gə̄ əlan̄də́ ní na: Āw̄ ə́daī de gə̄ kə́ Yabes kə́ gō nang kə́ Galaad tə́ gə̄ na bírí dan kadaá anī a əngen̄ ngé dḭḭ̄də́ gə̄. Ngé kaw̄ kəla gə̄ ní tél reē ədan̄ de kə́ kem ɓē kə́ Yabes tə́ gə̄ najə̄ ní, anī rɔ̄də́ nel̄də́ ngá̰ý. 10Nin̄ ədan̄ Nahas na: Bírí j-a jə-teē yā kaw̄ rɔ̄sí tə́ kadə̄ ī-rāāījí yá̰á̰ ń kemsí ndigə ní.

11Teē kə kōŕneé anī Saul kēgə̄ ngé rɔ̄ɔ̄ yān gə̄ gír loo mətá adə̄ udən̄ kem gérger yā madə̄ ba̰ā̰də́ gə̄ tə́ pá tá loo tīī. Tɔ̄lə̄n̄ Amon gə̄ bátə́ dan kadaá. Ngé gə̄ ń oyn̄ aĺ ní tḭ̄ḭ̄n̄ naā kógə̄ḿ kógə̄ḿ malang adə̄ de kə́ əhɔn̄ naā jōó gətóo. 12Anī ngán Israel gə̄ ədan̄ Samuel na: De gə̄ ń ndigən̄ kadə̄ Saul o̰o̰ ɓē dɔjí tə́ aĺ ní i náā gə̄? Ādījí sedə́ ādə̄ jə-tɔ̄l̄də́ kɔ̄ɔ́. 13Banī Saul əda na: Ndɔ̄ kə́ tītə̄ ń toō ní a tɔ̄lə̄n̄ deē kógə̄ḿ kemeé alé. Tɔdɔ̄ ɓōólaā i ndɔ̄ ń Kɔ́ɔ̄ɓē tetəń rɔ̄ɔ̄ nang kə́ Israel tə́ ní.

14Gō tə́ anī Samuel əda ngán Israel gə̄ na: Ī-reē j-awī Gilgal j-aw̄ j-əndāī Saul mban̄g gogə́ rang. 15Adə̄ ngán Israel gə̄ malang aw̄n̄ Gilgal aw̄ əndān̄ Saul mban̄g ɓáý to̰ ta kum Kɔ́ɔ̄ɓē tə́. Go tə́ anī ndējə̄n̄ Kɔ́ɔ̄ɓē yá̰a̰ tun̄ gə̄ kə́ tām̄ yā kem kógə̄ḿ tə́ ō, Saul nin̄ kə de gə̄ malang kə́ dɔ nang kə́ Israel tə́ rāān̄ rɔ̄nel̄ ngá̰ý ō.

Currently Selected:

1 SAMUEL 11: SARDC

Highlight

Copy

Compare