1 SAMUEL 12
12
Najə̄ ń Samuel ɔr̄ kə Israel gēé ní
1Samuel əda Israel gə̄ malang na: Yá̰a̰ malang ń ī-dəjemī kadə̄ m̄-rāā m-ādə̄sí ní m̄-rāā kɔ̄ɔ́ ɓá, m-ə̄ndā mban̄g kógə̄ḿ dɔsí tə́. 2Adə̄ ngɔlaā ní i ni n a ɔr nosí tā. Tɔdɔ̄ mā m̄-tɔgə ɓə́ga kɔ̄ɔ́ ō, dɔḿ ndaa ō. Ba ngánə́ḿ gə̄ i dɔ dáńsí tə́. I mā n m-ɔ́r nosí kə balsááḿ bátə́ ɓōólaā ní. 3Mā n m̄-rā toó. Ré āwī kə najá seḿ kemsí tə́ anī, ə́daī kə̄ ta kum Kɔ́ɔ̄ɓē tə́ ō, ta kum mban̄g ń ni gə̄rā tə́ ní ō. I náā n m̄-taā man̄g yān aké kərō yān ní? I náā n m-ə́sa tətōn, aké m̄-rāā kumən ndoō tə́ ní? I náā n m̄-taā nar jīn tə́ yā kótəń kumḿ kɔ̄ɔ́ dɔ najə̄ yān tə́ ní? M-ā m̄-téləń yā kadə̄sí gogə́.
4 Israel gə̄ tél ədanən̄ na: Əsa tətōjí aĺ ō, ī-rāā kumjí ndoō tə́ aĺ ō, ī-táā yá̰a̰ jī de gə̄ tə́ aĺ ō. 5Samuel tél ədadə́ ɓáý to̰ na: De kə́ kum tə́ gə̄ i Kɔ́ɔ̄ɓē nin̄ kə mbangāá. Nin̄ a̰a̰n̄ kadə̄ sḭḭ̄ ə́ngeī yá̰á̰ kógə̄ḿ jīḿ tə́ ɓōólaā alé. De gə̄ tél ədanən̄ na: I rɔ̄kum. 6Samuel ədadə́ na: Kɔ́ɔ̄ɓē ń un Moijə nin̄ kə Aaro̰ adə̄ teēn̄ kə kaasí gēé kem ɓē kə́ Ejiptə tə́ kɔ̄ɔ́ ní i kum tə́.
7Ba ngɔlaā ní ī-raī loo ń noō tə́ ta kum Kɔ́ɔ̄ɓē tə́. M-ā m̄-tə́dá yá̰á̰ kə́ gōtə́ gə̄ malang ń Kɔ́ɔ̄ɓē rāā sesí ō, kə kaasí gēé ō ní. 8Dan ń Jakob ugə̄ dɔ nang kə́ Ejiptə tə́ ní, kaasí gə̄ nōōn̄ kə̄ dɔ Kɔ́ɔ̄ɓē tə́ adə̄ Kɔ́ɔ̄ɓē əla Moijə nin̄ kə Aaro̰ adə̄ aw̄ teēn̄ sedə́ kɔ̄ɔ́ kem ɓē kə́ Ejiptə tə́, ba reēn̄ sedə́ əndān̄də́ i loo ń toō tə́ laā. 9Ba dɔ kaasí gə̄ ndígə̄nal Kɔ́ɔ̄ɓē Nə́ɓā yādə́ kɔ̄ɔ́. Adə̄ Kɔ́ɔ̄ɓē əya̰ Sisəra ń i ngol ngé rɔ̄ɔ̄ gə̄ kə́ Hasor ní ō, Pilistin gə̄ ō, mban̄g kə́ Moab ō, adə̄ rɔ̄ɔ̄n̄ kaasí gə̄ tetən̄də́. 10Loo ń noō tə́ kaasí gə̄ nōōn̄ kə̄ dɔ Kɔ́ɔ̄ɓē tə́ kadə̄ rāā sedə́ ɓáý to̰, ədanən̄ na: Kɔ́ɔ̄ɓē, jə-rāā yá̰a̰ majə alé. J-əya̰ī kɔ̄ɔ́ ba jə-rāā ɓesə̄ Baal gə̄ ō, ɓesə̄ Astarte gə̄ ō. Ba ngɔlaā ré ī-gān̄g dɔjí jī madə̄ ba̰ā̰jí gə̄ tə́ anī j-a jə-rāā kəla yāí. 11Anī Kɔ́ɔ̄ɓē əla Jedeo̰ ō, Bedan ō, Jepte ō, adə̄ gāngə̄n̄ dɔsí jī madə̄ ba̰ā̰sí gə̄ ń gīrə̄n̄ gidəsí tə́ ní. Ta tɔ̄l̄ ta tə́ anī əlam̄ mā Samuel adə̄ m̄-gān̄g dɔsí jī madə̄ ba̰ā̰sí gə̄ ń gīrə̄n̄ gidəsí tə́ ní ō. I beé n ī-ndiīneé kem ɓēé kanjə̄ sōl̄ yá̰á̰ kógə̄ḿ ní. 12Ba dan ń sḭḭ̄ á̰a̰ī kadə̄ mban̄g yā ngán Amon gə̄ ń i Nahas ní a reē yā rɔ̄ɔ̄sí anī ə́damī na ī-sāāī mban̄g kadə̄ o̰o̰ ɓē dɔsí tə́, tītə̄ kə́ Kɔ́ɔ̄ɓē i mban̄g yāsí alé beē. 13Ngɔlaā ní mban̄g ń ī-gə̄rāī ō, ī-dəjeī ō ní n ra toó. Kɔ́ɔ̄ɓē adə̄sí seneé. 14Ré ī-ɓōlíī ndíĺ Kɔ́ɔ̄ɓē Nə́ɓā yāsí ō, ī-rāāī kəla yān ō, ōōī tan ba ī-mbatíī yá̰a̰ gə̄ ń ədasí kadə̄ ī-rāāī ní aĺ ō, ré sḭḭ̄ gə̄gē, mban̄g yāsí gə̄gē úniī gōn anī, yá̰a̰ malang a njə̄rā majə. 15Ba ré sḭḭ̄ ōōī tan aĺ ō, ī-mbātíī rāā yá̰a̰ gə̄ ń ədasí kadə̄ ī-rāāī ní ō anī, a əndasí tītə̄ ń əndan̄neé kaasí gə̄ ní ō. 16Ba ngɔlaā ní ī-raī dɔ rɔ̄sí tə́ kadə̄ á̰a̰īń yá̰á̰ kə́ to kɔr kum ngá̰ý ń Kɔ́ɔ̄ɓē a rāā yā rāā ta kumsí tə́ ní. 17I dan yā kəja gémē gə̄ n toó aĺ a? Ba m-ā m̄-dəje Kɔ́ɔ̄ɓē adə̄ rāā kadə̄ man̄ ndang ō, edə ō. Loo ń noō tə́ kumsí a teē adə̄ ā ī-gerī kadə̄ majaĺ ń ī-rāāī kə Kɔ́ɔ̄ɓēé á ī-dəjen mban̄g ní i majaĺ kə́ bo ngá̰ý. 18Samuel dəje Kɔ́ɔ̄ɓē anī ndɔ̄ nəkɔ́ ń noō tə́ Kɔ́ɔ̄ɓē rāā adə̄ man̄ ndang ō, edə ō. Adə̄ ngán Israel gə̄ malang ɓōlə́n̄ Kɔ́ɔ̄ɓē ō, Samuel ō ngá̰ý. 19Ədan̄ Samuel na: Ī-rāā Kɔ́ɔ̄ɓē Nə́ɓā yāí ɓɔ́ tām̄ yājí tə́ ādə̄ j-oy alé. Tɔdɔ̄ j-ənī yá̰á̰ kə́ majaĺ kə́ rang ń i dəje mban̄g kógə̄ḿ tām̄ yājí tə́ ní dɔ gotə yá̰á̰ kə́ majaĺ gə̄ malang ń jə-rāā tə́ ní. 20Samuel tél ədadə́ na: Ī-lōōī ɓōĺ. Rɔ̄kum, i sḭḭ̄ n ī-raī yá̰á̰ kə́ majaĺ ngá̰ý ń noō ní. Banī ī-lōōī tūr̄ gidəsí ta Kɔ́ɔ̄ɓē tə́ gogə́ to̰. Ī-rāāī kəla ādə̄niī kə ngarā̰ kemsí gēé malang. 21Ré ī-tūrī gidəsí kɔ̄ɔ́ tan tə́ anī, ā ī-rāāī i kəla yā ɓesə̄ gə̄ ń i nə́ɓā kə́ rɔ̄kum aĺ gə̄ ń asən̄ dḭḭ̄ deē aĺ ō, kajə deē aĺ ō ní. 22Kɔ́ɔ̄ɓē a əya̰sí kɔ̄ɔ́ alé. Tɔdɔ̄ i nəkɔ́ n ndigə rāāsí gír deē yān gə̄ tə́ tām̄ yā rīn kə́ to kɔsə gɔn ngá̰ý tə́ ní. 23Mā tā a m-ā m̄-lōō gír rāā Kɔ́ɔ̄ɓē ɓɔ́ tə́ tām̄ yāsí tə́ alé. Tɔdɔ̄ ré m̄-lōō gírí anī m̄-rāā i majaĺ kə Kɔ́ɔ̄ɓēé. M-ā m̄-na̰y kə̄ loo kɔjəsí róbə́ kə́ majə tə́ ō, kə́ súmūú tə́ ō. 24Ba yá̰á̰ ń kadə̄ sḭḭ̄ ī-rāāī ní i ɓōĺ Kɔ́ɔ̄ɓē ō, i rāā kəla yān kə gō róbə́ kə́ súmūú ō, kə ngarang kemsí gēé malang ō. Tɔdɔ̄ á̰a̰ī yá̰á̰ kə́ to ɓōĺ ngá̰ý gə̄ ń ni-rāā tām̄ yāsí tə́ ní. 25Ba ré ī-rāāī yá̰á̰ kə́ majanī sḭḭ̄ gə̄gē, mban̄g yāsí gə̄gē, a nujən̄sí sák sák kɔ̄ɔ́.
Currently Selected:
1 SAMUEL 12: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
