1 MBAN̄G GƏ̄ 18

Eli tāā najə̄ man̄ kə́ a edə

1Gō tə́ ndɔ̄ gə̄ ngá̰ý mānə̄n̄, anī Kɔ́ɔ̄ɓē ɔr̄ najə̄ kə Eli kem ɓāl̄ kə́ nge ko̰o̰ mətá ń man̄ edəń aĺ tə́ ní, ədan na:

Āw̄ ādə̄ mban̄g Akab a̰a̰ī, tɔdɔ̄ m-ā m̄-rāā kadə̄ man̄ a edə dɔ nang tə́. 2Eli aw̄ kadə̄ Akab a̰a̰n. Dan ngeé ń noō tə́ ní ɓō i ngá̰ý Samari. 3Akab ɓāŕ Obadia ń i de kə́ dɔ yá̰a̰ kənge yā mban̄g tə́ ní. Tá Obadia i de kə́ ɓōĺ ndíĺ Kɔ́ɔ̄ɓē ngá̰ý, 4adə̄ dan ń Jesabel adə̄ tɔ̄lə̄n̄ ngé koō ta yā Kɔ́ɔ̄ɓē gə̄ ní, ni ɔy ngé koō ta yā Kɔ́ɔ̄ɓē gə̄ ɓú ɓɔ̄ɔ̄də́ kutə mí kutə mí kem bəlo mbal̄ gə̄ tə́ gír loo jōó, ba a̰a̰ gōdə́ kə yá̰a̰ kəsaá ō, kə man̄ ka̰yá̰ ō. 5Akab əda Obadia na:

Ī-njə̄rā āw̄ á̰a̰ ta kəɓa man̄ gə̄ kə́ kem ɓēé malang ō, kem gúr gə̄ malang ō, na majanī j-a j-əngeī mu yā kulə̄ń sə́nda gə̄ ō, kərō rapáy gə̄ ō. I beé tá j-a jə-tɔ̄lī núsə dā̰ kə́rēý gə̄ kɔ̄ɔ́ alé.

6Nin̄ kēgə̄n̄ naā loo gə̄ ń kadə̄ aw̄n̄ tū tə́ ní. Akab un róbə yān kə kérneé aw̄ ō, Obadia un róbə yān kə kérneé aw̄ ō. 7Dan ń Obadia i dɔ róbə́ tə́ ní a, Eli ndɔ̄dən. Ni-a̰a̰ Eli gerə̄n anī əsō kə̄ nang tə́ non tə́ ō, əga kumən nang tə́ ō, ba əda na:

Kɔ́ɔ̄ḿ Eli, i ḭ̄ nəkɔ́ a?

8Anī Eli tél ədan na:

I mā nəkɔ́, ba āw̄ ə́dá kɔ́ɔ̄í Akab na Eli a aw̄ noó. 9Obadia əda na:

I rí kə́ majaĺ n m̄-rāā á ə́lam̄ mā nge kəla yāí kem jī Akab tə́ kadə̄ tɔ̄lə̄m̄ ní? 10Tītə̄ ń Kɔ́ɔ̄ɓē Nə́ɓā yāí ndiń kə kumneé noō, nápar de gə̄, aláa ɓē ko̰o̰ kə́ kɔ́ɔ̄ḿ Akab əla de gə̄ tū tə́ sāāí tə́ aĺ gətóo. Ré de gə̄ ní ədanən̄ na Eli na gətóo loodə́ anī, ra sedə́ adə̄ túbən̄ kadə̄ ɔjən̄neé kadə̄ sāānī ba əngenī alé. 11Anī ə̄ndā dɔḿ tə́ kadə̄ m-āw̄ m-ə́dá kɔ́ɔ̄ḿ na Eli a reē noó a? 12Ré m-ə́ya̰ī ba m-ɔ́tə kɔ̄ɔ́ anī, Ndíĺ Kɔ́ɔ̄ɓē a reē yā kuniī kaw̄ seí loo kə́ m-ā m̄-ger̄ aĺ tə́. Ré m-ə́da Akab kōōí ba əngeī aĺ anī a tɔ̄lə̄m̄. Tá mā m-ə́lá gír ɓōĺ Kɔ́ɔ̄ɓē i dan ń mā i balsáá ɓáý ní. 13Kɔ́ɔ̄ḿ, yá̰á̰ ń m̄-rāā dan ń Jesabel a tɔ̄ləń nge koō ta yā Kɔ́ɔ̄ɓē gə̄ tə́ ní ədaīn̄ aĺ a? m̄-ɓɔ̄ɔ̄ ngé koō ta yā Kɔ́ɔ̄ɓē gə̄ ɓú kem bəlo mbal̄ gə̄ tə́, kutə mí kem bəlo mbal̄ kógə̄ḿ tə́ ō, kutə mí kem bəlo mbal̄ kə́rēý tə́ ō, m̄-ngɔ̄m̄də́ kə yá̰a̰ kəsaá ō, kə man̄ ka̰yá̰ ō. 14Anī ngɔlaā ə́da na kə m-āw̄ kə m-ə́dá kɔ́ɔ̄ḿ na Eli na a reē noó a? Akab a tɔ̄lə̄m̄!

Banī Eli tél ədan na:

15Tītə̄ ń Kɔ́ɔ̄ɓē kə́ bo kə́ tɔ́gən i ngá̰ý ń mā i nge kəla yān ní ndiń kə kumneé noō, ɓōólaā nəkɔ́ ń toō m-ā m-āw̄ yā ra no Akab tə́.

Eli aw̄ no Akab tə́

16Obadia aw̄ ənge Akab, ɔjən gotə najə̄ ní, anī Akab aw̄ tə́nī ta Eli tə́. 17Dan ń Akab a̰a̰ Eli ní a, ədan na:

Nge reē kə yá̰á̰ kə́ majaĺ dɔ ɓē kə́ Israel tə́, i ḭ̄ nəkɔ́ a?

18Eli tél ədan na:

I mā n i nge reē kə yá̰á̰ kə́ majaĺ dɔ ɓē kə́ Israel tə́ ní alé, i sḭḭ̄ kə ngééí gēé! Tɔdɔ̄ ī-rāāī gō míndə́ ń Kɔ́ɔ̄ɓē ədasí kadə̄ ī-rāāī ní alé, ba ī-ndɔ̄yī ɓesə̄ Baal gə̄. 19Banī kə́ ngɔr ń toō tə́ ní ə́la de gə̄ ādə̄ ɓārə́n̄ Israel gə̄ malang ādə̄ reēn̄ rɔ̄ḿ tə́ dɔ mbal̄ Karmel tə́ ō, ādə̄ ngé koō ta gə̄ ɓú sɔ́ yā ɓesə̄ Baal ɓú sɔ́ kə kutə mí ō, ngé koō ta gə̄ kə́ yā ɓesə̄ Asera ō ń a əsan̄ yá̰a̰ ta tábəl yā Jesabel tə́ ní adə̄ reēn̄ ō.

Eli nin̄ kə ngé koō ta gə̄ yā Baal gə̄ əngen̄ naā

20Akab əla gō ngán Israel gə̄ tə́ malang ō, gō ngé koō ta gə̄ tə́ ō, adə̄ reēn̄ dɔ mbal̄ Karmel tə́. 21Eli ndɔ́tə̄ kə̄ rɔ̄ de gə̄ tə́ malang ba ədadə́ na:

I rə́ngáý tə́ ń a asəsí ndām̄ dɔ njasí kə́ kógə̄ḿ tə́ ō, tél ndām̄ dɔ njasí kə́ rang tə́ ō ní? Ré i Kɔ́ɔ̄ɓē n i Nə́ɓā anī úniī gōn ō, ré i Baal n i Nə́ɓā anī, uniī gōn ō!

Banī deē kógə̄ḿ ədan najə̄ alé. 22Eli əda de gə̄ ɓáý to̰ na:

I mə̄kɔ́ ngóy n i nge koō ta yā Kɔ́ɔ̄ɓē kə́ na̰y ní, banī ngé koō ta yā Baal gə̄ nin̄ i deē ɓú sɔ́ kə kutə mí. 23Ādə̄ adə̄n̄jí man̄g kə́ bəra gə̄ jōó. Nin̄ a gə̄rān̄ kógə̄ḿ yā tɔ̄l̄ ba górīyō dā̰n kán̄ dɔ kīr̄ tə́ kanjə̄ kəla hor tū kīr̄ ní tə́ ō, mā m-ā m̄-rāā tītə̄ ń noō kə man̄g kə́ bəra kə́ noō ō. M-ā m̄-kán̄ dā̰n dɔ kīr̄ tə́ ba m-ā m-ə́la hor tū kīr̄ ní tə́ alé ō. 24Nin̄ a ɓārə́n̄ nə́ɓā yādə́ ō, mā m-ā m̄-ɓāŕ Kɔ́ɔ̄ɓē ō. Nə́ɓā ń a ndigə ɓār̄ ń ɓār̄nən̄ adə̄ a əla hor dɔ kīr̄ tə́ ní, i ni n i Nə́ɓā ní.

De gə̄ malang ndigən̄ najə̄ ní, ədan̄ na i najə̄ kə́ majə. 25Anī Eli əda ngé koō ta yā nə́ɓā Baal gə̄ na:

Ī-gə̄rāī man̄g kə́ bəra ba ə́laī gíŕ kété tɔdɔ̄ i sḭḭ̄ n kutəsí i ngá̰ý ní. Gō tə́ anī ī-ɓāríī nə́ɓā yāsí ba ī-lōōī kəla hor tū kīr̄ tə́. 26Nin̄ taān̄ man̄g kə́ bəra ń adə̄n̄də́ ní tɔ̄lə̄n̄ ba góriyōn̄ dā̰n ɓōkə́n̄ dɔ kīr̄ tə́ yā tun̄, ba ɓārə́n̄ Baal. Əlan̄ gír ɓārə́n dəloí bátə́ mbang ugə̄ dan ɓēé. Nin̄-ɓāŕnən̄ ədan̄ na: Baal, ī-ndigəjí!

Banī deē oō ndū deē aĺ ō, deē ndigə ɓār̄ ní aĺ ō. Nin̄ ndāmə̄n̄ gīrə̄n̄neé gidə loo tun̄ yá̰á̰ ń rāān̄ ní. 27Dan ń mbang i dan ɓēé anī, Eli lurdə́ əda na:

Ə́gaī kɔŕ ādə̄ ndūsí mān̄ dɔ nge kə́ kété! Ni i nə́ɓā adə̄ kəla i ngá̰ý dɔn tə́. Majanī gətóo ɓēé, majanī aw̄ mbā tə́, majanī a ɓīī i mbée, adə̄ gáŕ kadə̄ ni ndól̄ i mbée nəkɔ́ tá.

28Nin̄ əgan̄ kɔŕ kə ndūdə́ kə́ bo tɔȳ ké kété. Tá nin̄ tə́jān̄ rɔ̄də́ kə doó kə kaskaraá ō, kə nə̄ngaá ō, tītə̄ ń i jī bēl̄ loo rāādə́ tə́ ní adə̄ mósə a̰ȳ rɔ̄də́ tə́ mbong. 29Ba dan ń mbang əja rɔ̄n sḛ́ý ní a, ndewn̄ ngangan loo ɓāŕ Baal tə́. Nin̄-ɓāŕnən̄ kə rɔ̄ ndebeé bátə́ ugə̄ kum mbang ndējə̄ yá̰á̰ kə́ loo sɔlí. Banī deē oō ndū deē aĺ ō, deē ndigə ɓār̄ ní aĺ ō, yá̰á̰ kə́ rāā yá̰á̰ sḛ́ý gətóo ō.

30 Eli əda ngán Israel gə̄ malang na kə reēn̄ kə̄ rɔ̄n tə́ ngɔr. Anī nin̄-reēn̄. Ni-tél rāā loo tun̄ yá̰a̰ yā Kɔ́ɔ̄ɓē ń de gə̄ bótə̄yō̰n̄ kété kɔ̄ɔ́ ní gogə́ rang. 31Ni-ɔy mbal̄ kutə gidə i jōó, kə gō kutə gír ɓē kə́ kutə gidə i jōó gə̄ yā ngán Jakob ń Kɔ́ɔ̄ɓē ədan kété na a ɓāŕnən̄ ngɔlaā na i Israel ní. 32Mbal̄ kə́ kutə gidə i jōó gə̄ ní Eli tél rāań loo tun̄ yá̰á̰ kə́ kə rī Kɔ́ɔ̄ɓēé gogə́ rang. Gō tə́ anī əja bəlo gīrəń gidə loo tun̄ yá̰á̰ ní. Bəlo ń ni-əja ní man̄ kem səmbē bo kógə̄ḿ a aw̄ kemeé malang karī. 33Ni ɔsə̄ kīr̄ dɔ loo tun̄ yá̰á̰ ní tə́ ba górīyō dā̰ man̄g kə́ bəra ní ɓōkə́ dɔ tə́. 34Gō tə́ anī əda de gə̄ ń ran̄ ní na kə ɔdən̄ man̄ kem jóó sɔ́ kə ɓōkə́n̄ dɔ yá̰a̰ tun̄ kə́ yā róō tə́ ō, dɔ kīr̄ gə̄ tə́ ō. De gə̄ ní rāān̄ tītə̄ ń Eli ədań ní. Eli tél ədadə́ na kə ɓōkə́n̄ kə́ rang ɓáý to̰. Anī nin̄ ɓōkə́n̄ nja kə́ nge ko̰ jōó. Eli tél ədadə́ na kə ɓōkə́n̄ nja kə́ nge ko̰ mətá. Anī nin̄-ɓōkə́n̄ nja kə́ nge ko̰ mətá. 35Man̄ rə̄ɓā dɔ loo tun̄ yá̰á̰ tə́ gīr̄ gidə əla ta naā tə́ ō, rosə kem bəlo ō. 36Dan ń kum mbang tun̄ yá̰á̰ kə́ loo sɔlí asə anī, Eli ndɔ́tə̄ kə̄ ta loo tun̄ yá̰á̰ tə́ ba əda na:

Kɔ́ɔ̄ɓē, Nə́ɓā yā Abəraham ō, yā Isaak ō, yā Jakob ō, ɔ́jə kə̄ ndágá ɓōólaā ādə̄ de gə̄ gerə̄n̄ kadə̄ i ḭ̄ n i Nə́ɓā dɔ nang kə́ Israel tə́ ō, mā i nge kəla yāí ō, m̄-rāā yá̰a̰ gə̄ ń toō malang i kə gō najə̄ kə́ taí tə́ ō. 37Ī-ndigəm̄, Kɔ́ɔ̄ɓē, ī-ndigəm̄, ādə̄ de gə̄ ń toō gerə̄n̄ kadə̄ i ḭ̄ Kɔ́ɔ̄ɓē n i Nə́ɓā ō, nge tūr̄ kem deē yāí gə̄ kə̄ rɔ̄í tə́ ō ní.

38Anī hor yā Kɔ́ɔ̄ɓē əsō dɔ yá̰a̰ tun̄ kə́ yā róō tə́ o̰o̰ ō, o̰o̰ń kīr̄ gə̄ ō, mbal̄ gə̄ ō, bumbə́ru ō, rāā adə̄ man̄ kə́ kem bəloó iī kɔ̄ɔ́ ō. 39Dan ń ngán Israel gə̄ a̰a̰n̄ yá̰á̰ ní anī, nin̄ malang əsōn̄ kə̄ nang tə́, ɔsən̄ nodə́ nang tə́ ba ədan̄ na:

I Kɔ́ɔ̄ɓē ń i Nə́ɓā ní! I Kɔ́ɔ̄ɓē n i Nə́ɓā ní!

40 Eli ədadə́ na:

Əhɔī ngé koō ta yā Baal gə̄, ī-lōōī kəya̰ deē kógə̄ḿ dandə́ tə́ kadə̄ teē a̰ȳ!

Anī əhɔn̄də́. Eli aw̄ sedə́ kem gúŕ ń man̄ Kison a nūgə́ tū tə́ ní tə́ ba əja kɔ́də́ loo ń noō tə́.

Man̄ tél edə gogə́

41Gō tə́ anī Eli əda Akab na kə aw̄ kə əsa yá̰a̰ ō, kə a̰ȳ man̄ ō, tɔdɔ̄ n-oō kōō man̄ kə́ a edə. 42Akab aw̄ kəsa yá̰a̰ ō, ka̰ȳ maná ō, banī Eli aĺ dɔ mbal̄ Karmel tə́. Ni-ɔsə non nang tə́ ba əla dɔn mbān tə́. 43Ni-əda nge kəla yān na kə al̄ kə̄ dɔɔ́ ba kə go̰ō̰ loo kə̄ dām̄ kə́ bā bo tə́. Nge kəla yān ní al̄ dɔɔ́, go̰ō̰ loo ba ədan na yá̰a̰ na gətóo. Eli ədan nja sīrí na kə tél kə aw̄ kə go̰ō̰ loo. 44Nja kə́ nge ko̰ sīrí anī nge kəla əda na n-a̰a̰ ngōn̄ kil̄ man̄ kə́ dūú kə́ asə kə da jī deé dɔ bā bo tə́. Anī Eli ədan na kə aw̄ kə əda Akab kadə̄ ənī yá̰á̰ kɔ́ sə́nda yān gə̄ tə́ ba kə aw̄ na sōgə́ man̄ ɔgə̄n kaw̄. 45Kil̄ man̄ gə̄ ń nél reē sedə́ ní rāān̄ adə̄ dɔ rā̰ ndul kum kə̄ kété kété ō, man̄ edə ngá̰ý ō. Akab al̄ kem púsə́ sə́nda yān tə́ ba tél dɔ tə́ ta kaw̄ gogə́ Jisreel. 46Eli do̰ō̰ ɓōdə̄n ō, Kɔ́ɔ̄ɓē adə̄n tɔ́gə́ ngá̰ý ō, adə̄ ni a̰ȳ ngɔ̄də̄ kété no púsə́ sə́nda yā Akab tə́ bátə́ ugə̄ń Jisreel.

Currently Selected:

1 MBAN̄G GƏ̄ 18: SARDC

Highlight

Copy

Compare