1 MBAN̄G GƏ̄ 17
17
Eli tāā najə̄ man̄ kə́ a edə alé
1 Eli kə́ Tisbe ń i de kə́ gō nang kə́ Galaad tə́ ní əda mban̄g Akab na:
Tītə̄ ń Kɔ́ɔ̄ɓē Nə́ɓā yā Israel ń mā i nge kəla yān ní ndiń kə kumneé noō, man̄ a edə to̰ aĺ ō, tal a əhɔ to̰ aĺ ō, kem ɓāl̄ gə̄ ń a reēn̄ tə́ noō bátə́ ré m-ə́da najə̄ pá tá.
Eli ndi kadə man̄ kə́ Kerit tə́
2Gō tə́ anī Kɔ́ɔ̄ɓē əda Eli na: 3Ī-ndɔ́tə̄ laā kɔ̄ɔ́, āw̄ kum kə̄ gír ɓē tə́ ī-ɓɔ̄ɔ̄ rɔ̄í wól loo kə́ Kerit tə́. Loo ń ā ī-ɓɔ̄ɔ̄ rɔ̄í tū tə́ ní, ré deē ra bā Jurdḛ tə́ anī, i kə̄ dām̄ kə́ gír ɓē tə́. 4Ā ə́nge man̄ loo ní tə́ yā ka̰ȳ ō, m-ā m-ə́dá ká̰ā̰ gə̄ kadə̄ aw̄n̄ kə yá̰a̰ kəsaá adə̄nī ō.
5Eli rāā yá̰á̰ ń Kɔ́ɔ̄ɓē ədan ní, aw̄ ndi wól loo kə́ Kerit tə́. 6Ká̰ā̰ gə̄ aw̄n̄ kə mápa ō, dā̰ ō, adə̄nən̄ kə ndɔ̄ý ō, loo sɔlí ō. Ni a̰ȳ man̄ ń a nūgə́ kem wól loo tə́ ní.
Eli i ɓē dəyá̰ kə́ ngaa koy kə́ Sarepta
7Ugə̄ dan kə́rēý tə́ anī man̄ kə́ wól loo tə́ ní iī kɔ̄ɔ́ tām̄ man̄ kə́ dɔɔ́ edə kem ɓēé alé. 8Anī Kɔ́ɔ̄ɓē ɔr̄ najə̄ kə Eli ədan na:
9Ḭ́ḭ dɔɔ́, āw̄ Sarepta ń i ɓē kə́ kadə ɓē kə́ Sidon tə́ ní āw̄ ī-ndi kemeé. M-ə́da dəyá̰ kógə̄ḿ kə́ noō kə́ ngaa koy kadə̄ a̰a̰ gōí kə yá̰a̰ kəsaá.
10 Eli ḭḭ dɔɔ́ əsō róbó aw̄ kə̄ Sarepta. Dan ń ugə̄ ta róbə́ kə́ yā kudəń kə̄ kem ɓēé tə́ anī, a̰a̰ dəyá̰ kógə̄ḿ kə́ ngaa koy ra a ɔy kīr̄. Ni ɓāŕ dəyá̰ ní ədan na kə aw̄ kə sāā man̄ sḛ́ý kem jóó kə reēń kadə̄ n-a̰ȳ. 11Dəyá̰ ní a aw̄ kə̄ sāā man̄ ní tə́ anī, Eli ɓāŕ gōn ba ədan na kə reē kə gūrū mápá dɔ tə́ kə adə̄n. 12Anī dəyá̰ ní tél ədan na:
Tītə̄ ń Kɔ́ɔ̄ɓē Nə́ɓā yāí ndiń kə kumneé noō mápa gətóo. Yá̰á̰ ń m-āwń ní i ndujə̄ kə́ sḛ́ý beē kem jóó ō, i yibə̄ kə́ sḛ́ý beē kem kūú ō. m̄-reē i sāā kīrīí yā kaw̄ rāań tām̄ yājí tə́ kə ngōnə̄ḿ. Ré j-əsa oy anī j-a jə-ngóō i yo ngóy.
13Ī-sōl̄ alé! Āw̄ ī-rāā tītə̄ ń ə́dań noō. Ba ī-rāā ngōn̄ mápá kə́ dūú tə́ ī-reēń ādə̄m̄ pá tá ī-rāā yāí ō, yā ngōnīí ō ɓáý. 14tɔdɔ̄ najə̄ ń Kɔ́ɔ̄ɓē Nə́ɓā yā Israel əda ní n toó: Ndujə̄ a təgā kem jóó aĺ ō, yibə̄ a təgā kem kūú aĺ ō, bátə́ ndɔ̄ ń Kɔ́ɔ̄ɓē a rāań kadə̄ man̄ a edəń dɔ nang tə́ ní.
15Dəyá̰ ní aw̄ rāā tītə̄ ń Eli ədanneé ní. Gō tə́ anī ni ō, ngōnən ō, Eli ō, əngen̄ yá̰a̰ kəsa adə̄ nin̄ əsan̄ yá̰a̰ ta kaw̄ jóo. 16Ndujə̄ təgā kem jóó aĺ ō, yibə̄ təgā kem kūú aĺ ō, tītə̄ ń Kɔ́ɔ̄ɓē əndāń ta Eli tə́ adə̄ ədań ní.
Eli ndól̄ ngōn̄ kə́ oy
17Gō yá̰a̰ gə̄ ń noō tə́ anī mo̰y rāā ngōn̄ dəyá̰ ń əhɔ Eli mbā ní. Mo̰y ní rāā ngōn̄ ní ngá̰ý adə̄ koōn teē kɔ̄ɔ́. 18Anī dəyá̰ ní əda Eli na:
Deē yā Nə́ɓā, i rí n i dɔ dáńjí tə́? Ī-reē ɓēé looḿ i kadə̄ əga kem Nə́ɓā dɔ yá̰á̰ kə́ gōtə́ aĺ kə́ m̄-rāā tə́ ba kadə̄ ngōnə̄ḿ kə oyń a?
19Eli tél əda dəyá̰ ní na: Ādə̄m̄ ngōnīí!
Ni-taā ngōn̄ ní jī dəyá̰ ní tə́ aw̄ń kem kújə́ kə́ dɔɔ́ ń a to kemeé tə́ ní ba ənīn kem tə̄rá. 20Gō tə́ anī ni ɓāŕ Kɔ́ɔ̄ɓē əda na: Kɔ́ɔ̄ɓē Nə́ɓā yāḿ, dəyá̰ kə́ ngaa koy ń əhɔm̄ mbā ní gə̄gē ā ī-rāān yá̰á̰ kə́ tōr̄ kadə̄ ngōnən oy a?
21 Eli laa dɔ ngōn̄ ní tə́ nja mətá ba ɓāŕ Kɔ́ɔ̄ɓē əda na:
Kɔ́ɔ̄ɓē Nə́ɓā yāḿ, ādə̄ koō ngōn̄ ń toō tél reē gogə́ kemən tə́!
22Kɔ́ɔ̄ɓē oō ndū Eli, adə̄ koō ngōn̄ ní tél reē gogə́ kemən tə́. Ngōn̄ ní ajə, adə̄ tél a taā koō. 23Eli un ngōn̄ ní reē seneé kem kújə́ kə́ nang tə́, adə̄n kə kó̰o̰neé, ba əda na:
Á̰a̰ā̰, ngōnīí ndi kə kumneé.
24Dəyá̰ ní əda Eli na:
Ngɔlaā m̄-ger̄ kadə̄ ḭ̄ i deē yā Nə́ɓā ō, Kɔ́ɔ̄ɓē əndā najə̄ taí tə́ rɔ̄kum ō.
Currently Selected:
1 MBAN̄G GƏ̄ 17: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
