1 MBAN̄G GƏ̄ 16

1Kɔ́ɔ̄ɓē əda Yehu ngōn̄ Hanani najə̄ ń toō kadə̄ əda Baasa:

2M-úniī i dan bumbə́rú tə́ n m-ə̄ndāī mban̄g dɔ ngán Israel gə̄ tə́ ní. Ba ī-ndájə̄ kəla rāā Jeroboam ō, ī-sə̄lā ngán Israel gə̄ ādə̄ rāān̄ majaĺ adə̄mə̄n̄neé wōn̄g ō. 3I tām̄ ń noō tə́ n mā m̄-rāā kadə̄ ā ī-gətóo kɔ̄ɔ́ kə gír kojə yāí gēé malang tītə̄ ń deē a ɔyń loo kə́ yḛr kɔ̄ɔ́ kə ndəsá ní. M-ā m̄-rāāsí yá̰á̰ ń m̄-rāā kə Jeroboam ngōn̄ Nebat ní. 4De kə́ gír kojə yāí tə́ ń a oy kem ɓēé ní, bísə gə̄ a əsanən̄ ō, de kə́ gír kojə yāí tə́ ń a oy kem bembeé ní, yel̄ kə́ dɔɔ́ gə̄ a əsanən̄ ō.

5Gotə najə̄ yā Baasa i kə́ ndang kem makətūbə̄ kəla rāā mban̄g gə̄ kə́ Israel tə́. Ndangən̄ yá̰a̰ gə̄ ń ni-rāā ní ō, kəla rāān kə́ to kɔsə gɔn gə̄ ō, kem makətūbə̄ ní tə́. 6Baasa oy aw̄ gō kaan gə̄ tə́, dubə̄nən̄ i Tirsa. I ngōnən Ela n o̰o̰ ɓē gotən tə́ ní.

7Kɔ́ɔ̄ɓē əndā kəla ta Yehu ngōn̄ Hanani tə́ kadə̄ əda Baasa nin̄ kə deē yān gēé i tām̄ yá̰á̰ kə́ gír jōó gə̄ ń toō tə́: Ta kəga dɔ i tām̄ rāā ń Baasa nin̄ kə deē yān gēé rāān̄ yá̰á̰ kə́ majaĺ kə́ nel̄ Kɔ́ɔ̄ɓē alé, adə̄ kəla rāādə́ gə̄ adə̄ Kɔ́ɔ̄ɓē wōn̄g tītə̄ ń kəla rāā Jeroboam nin̄ kə de kə́ gír kojə yān tə́ gēé adə̄ń Kɔ́ɔ̄ɓē wōn̄g ní ō, kə́ nge ko̰ jōó i tām̄ tɔ̄l̄ ń Baasa tɔ̄l̄ de gə̄ kə́ gír kojə yā Jeroboam tə́ malang kɔ̄ɔ́ ní tə́ ō.

Ela mban̄g kə́ Israel

8Kem ɓāl̄ ko̰o̰ ɓē kə́ nge ko̰ kutə jōó gidə i mehḛ́ yā Asa mban̄g kə́ kə́ Juda tə́ ní Ela, ngōn̄ Baasa ndi mban̄g dɔ Israel gə̄ tə́ kem ɓē kə́ Tirsa tə́. Ni-o̰o̰ ɓē ɓāl̄ jōó. 9Nge kəla yān Jimri ń i ngār kə́ dɔ núsə́ púsə rɔ̄ɔ̄ yān gə̄ tə́ ní oōn̄ naā kə madə̄n gēé dɔn tə́. Adə̄ dan ń mban̄g Ela ndi Tirsa kem kújə yā Arsa nge ngɔ̄m̄ kújə yā mban̄g tə́ ndi a a̰ȳ kasə adə̄ kasə rāān kɔ̄ɔ́ ní a, 10Jimri udə kújú gōn tə́ ɔsə tɔ̄lən. Yá̰á̰ ń noō rāā yá̰a̰ i kem ɓāl̄ ko̰o̰ ɓē kə́ nge ko̰ kutə jōó gidə i sīrí yā Asa mban̄g kə́ Juda tə́. Jimri o̰o̰ ɓē gotə Ela tə́. 11Dan ń ni i mban̄g á ndi dɔ kōr̄ kāgə̄ mbang tə́ ɓá ní, ni tɔ̄l̄ gír kojə yā Baasa malang kɔ̄ɔ́ kanjə̄ kəya̰ deē kógə̄ḿ. Ngōn̄ kə́ dūú aáā de kə́ tɔgə aáā ni əya̰ alé. Ni tɔ̄l̄ ngéén gə̄ ō, madə̄n gə̄ ō malang. 12Jimri tɔ̄l̄ de gə̄ kə́ gír kojə yā Baasa tə́ malang kɔ̄ɔ́ tītə̄ ń Kɔ́ɔ̄ɓē əndāń ta nge koō ta yān Yehu tə́ adə̄ ədań dɔ Baasa tə́ ní. 13Yá̰a̰ gə̄ ń noō malang rāān̄ yá̰a̰ i tɔdɔ̄ Baasa nin̄ kə ngōnən Ela rāān̄ yá̰á̰ kə́ majaĺ ō, sə̄lān̄ Israel gə̄ adə̄ rāān̄ yá̰á̰ kə́ majaĺ ō, nin̄ ndɔ̄ȳn̄ ɓesə̄ gə̄ adə̄n̄neé Kɔ́ɔ̄ɓē Nə́ɓā yā Israel gə̄ wōn̄g ō.

14Gotə yá̰á̰ kə́ rang gə̄ malang ń Ela rāā ní, ndagən̄ kem makətūbə̄ kəla rāā mban̄g gə̄ kə́ Israel tə́.

Jimri, mban̄g kə́ Israel

15Kem ɓāl̄ ko̰o̰ ɓē kə́ nge ko̰ kutə jōó gidə i sīrí yā Asa mban̄g kə́ Juda tə́ ní, Jimri ndi mban̄g ndɔ̄ sīrí kem ɓē kə́ Tirsa tə́ dɔ Israel gə̄ tə́. Dan ń noō tə́ ní ngán Israel gə̄ a rɔ̄ɔ̄n̄ i ɓē kə́ Gibeton yā Pilistin gə̄. 16Ngán Israel gə̄ ń ta rɔ̄ɔ̄ tə́ ní oōn̄ kadə̄ Jimri na oōn̄ naā kə madə̄n gēé dɔ mban̄g tə́ ō, na tɔ̄l̄ mban̄g ō. Anī kə̄ ndɔ̄ nəkɔ́ noō tə́ Israel gə̄ malang ń ran̄ gérgereé noō ní əndān̄ Omri ń i ngol áskar gə̄ ní mban̄g kə́ Israel tə́. 17Loo ń noō tə́ Omri nin̄ kə Israel gə̄ malang ḭḭn̄ Gibeton aw̄ ɓē kə́ Tirsa. 18Dan ń Jimri a̰a̰ kadə̄ de gə̄ taān̄ ɓē kɔ̄ɔ́ anī, udə kem kújə́ kə́ dɔɔ́ yā mban̄g tə́, ba əla hor dɔ tə́ adə̄ hor o̰o̰n kem kújə́ ní tə́ o̰o̰ tɔ̄lən. 19Yá̰a̰ gə̄ ń noō malang rāān̄ yá̰a̰ i tām̄ yá̰á̰ kə́ majaĺ ń Jimri rāā tə́ ní. Ni-rāā yá̰á̰ kə́ majaĺ ta kum Kɔ́ɔ̄ɓē tə́, ndájə̄ kəla rāā Jeroboam ō, yá̰á̰ kə́ majaĺ ń Jeroboam rāā á sə̄lā Israel gə̄ adə̄ rāān̄ ní ō.

20Gotə yá̰á̰ kə́ rang gə̄ ń Jimri rāā ní ndangən̄ kem makətūbə̄ kəla rāā mban̄g gə̄ kə́ Israel tə́. Ənīn̄ gotə koō naā yān loo mundə̄ tə́ kə madə̄n gēé kem makətūbə̄ ní tə́ ō.

21Gō yo Jimri tə́ ní Israel gə̄ kə̄gə̄n̄ naā gír loo jōó. Núsə de kə́rēý gə̄ i gō Tibəni ngōn̄ Ginat tə́, nin̄ ndigən̄ kəndān mban̄g. Ba núsə de kə́rēý gə̄ i gō Omri tə́. 22Ta tɔ̄l̄ ta anī i deē yā Omri gə̄ n tɔ́gə́də́ tɔȳ yā deē yā Tibəni ngōn̄ Ginat gə̄ ní. Tibəni oy ba Omri ndi mban̄g.

Omri mban̄g kə́ Israel

23Kem ɓāl̄ ko̰o̰ ɓē kə́ nge ko̰ kutə mətá gidə i kógə̄ḿ gō Asa mban̄g kə́ Juda tə́ ní, Omri ndi mban̄g dɔ Israel gə̄ tə́. Ni-o̰o̰ ɓē ɓāl̄ kutə gidə i jōó. Ni-ndi kem ɓē kə́ Tirsa tə́ o̰o̰ń ɓē ɓāl̄ mehḛ́. 24Gō tə́ anī aw̄ mang mbal̄ kə́ Samari jī Semer tə́ kə nar gində̄ arjā̰a̰ dūbú mehḛ́. Ni-rāā ɓē dɔ mbal̄ ní tə́ ba əndā rī ɓē ní na i Samari kə rī Semer kɔ́ɔ̄ mbal̄ ní. 25Banī Omri rāā yá̰á̰ kə́ majaĺ ta kum Kɔ́ɔ̄ɓē tə́. Ni majaĺ ngá̰ý tɔȳ mban̄g kə́ kété non tə́ gə̄ malang. 26Ni ndájə̄ kəla malang ń Jeroboam ngōn̄ Nebat rāā ní ō, yá̰á̰ kə́ majaĺ gə̄ ń Jeroboam rāā á sə̄lā ngán Israel gə̄ adə̄ rāān̄ adə̄n̄neé Kɔ́ɔ̄ɓē Nə́ɓā yā Israel wōn̄g ní ō. Yá̰á̰ kə́ majaĺ gə̄ ní i rāā ndíĺ yá̰á̰ kə́ yā ndɔ̄ȳ gə̄.

27Gotə yá̰á̰ kə́ rang gə̄ ń Omri rāā ní ō, kəla rāān kə́ to kɔsə gɔn gə̄ ō ní, ndangən̄ kem makətūbə̄ kəla rāā mban̄g gə̄ kə́ Israel tə́. 28Omri oy aw̄ gō kaan gə̄ tə́, ba dubə̄nən̄ i Samari. Ngōnən Akab o̰o̰ ɓē gotən tə́.

Akab, mban̄g kə́ Israel

29Kem ɓāl̄ ko̰o̰ ɓē kə́ nge ko̰ kutə mətá gidə i sɔ́sɔ́ yā Asa mban̄g kə́ Juda tə́ ní, Akab ngōn̄ Omri ndi mban̄g dɔ Israel gə̄ tə́. Ni-o̰o̰ ɓē ɓāl̄ kutə jōó gidə i jōó Samari. 30Ni-rāā yá̰á̰ kə́ majaĺ ta kum Kɔ́ɔ̄ɓē tə́ tɔȳ yā mban̄g kə́ kété non tə́ gə̄ malang. 31Majaĺ gə̄ yā Jeroboam ngōn̄ Nebat ń ni ndájə̄ ní asən aĺ ɓáý, adə̄ taā Jesabel ngōn̄ Etəbaal mban̄g yā Sidon gə̄ ɓáý to̰ ō, ɔsə non nang tə́ no ɓesə̄ Baal tə́ ō. 32Ni-rāā loo kə́ yā tunə̄ń yá̰a̰ kadə̄ ɓesə̄ Baal kem kújə́ ń ni-rāā tām̄ yān tə́ kem ɓē kə́ Samari tə́ ní ō, 33udə ɓesə̄ Asera kem kújə́ ní tə́ ō. Yá̰a̰ gə̄ ń Akab rāā kadə̄ wōn̄g rāā Kɔ́ɔ̄ɓē Nə́ɓā yā Israel ní i ngá̰ý tɔȳ yā mban̄g kə́ Israel tə́ kə́ kété non tə́ gə̄ malang. 34I ɓāl̄ yān tə́ n Hiyel kə́ Betel tél rāań ɓē kə́ Jeriko gogə́ rang ní. Banī yá̰á̰ ń Kɔ́ɔ̄ɓē əndā ta Jojue ngōn̄ Nun tə́ adə̄ əda ní rāā yá̰a̰: Hágə Hiyel kə́ dəngam ń rīn na i Abiram ní oy dan ń a ndērə̄n̄ bəlo kə́ yā kəndāń ngəra ɓē ní ō, gidə hágən ń rīn na i Segub ní oy dan ń a tə́lan̄ bápə gə̄ kə́ ta róbə́ kə́ yā kudəń kə̄ kem ɓē ní tə́ ní ō.

Currently Selected:

1 MBAN̄G GƏ̄ 16: SARDC

Highlight

Copy

Compare