1 MBAN̄G GƏ̄ 15

Abiam mban̄g kə́ Juda

(Á̰a̰ī 2 Yá̰a̰ 13.1-3; 22—23)

1Kem ɓāl̄ ko̰o̰ ɓē kə́ nge ko̰ kutə gidə i sɔ́ sɔ́ yā Jeroboam ngōn̄ Nebat tə́ ní, Abiam ndi mban̄g dɔ Juda gə̄ tə́. 2Ni-o̰o̰ ɓē ɓāl̄ mətá Jerusalem. Rī kó̰o̰n na i Maaka, i ngōn̄ Abisalom. 3Abiam ndájə̄ yá̰á̰ kə́ majaĺ gə̄ ń bɔbə̄n rāā kété non tə́ ní malang. Ni-adə̄ Kɔ́ɔ̄ɓē Nə́ɓā yān kemən mámák tītə̄ yā kaan Dabid alé, 4ɓá tā ba Kɔ́ɔ̄ɓē Nə́ɓā yān adə̄n ngōn̄ kógə̄ḿ kadə o̰o̰ ɓē gotən tə́, kadə̄ ta gír kojə ɗogə́roń aĺ ō, Jerusalem ndiń gotoó ō, tām̄ yā Dabid tə́. 5Tɔdɔ̄ Dabid rāā yá̰á̰ kə́ gōtə́ ta kum Kɔ́ɔ̄ɓē tə́ kə ndɔ̄ gə̄ malang ń ndiń kə kumneé tə́ ní ō, un rón kɔ̄ɔ́ dan yá̰á̰ kógə̄ḿ kə́ Kɔ́ɔ̄ɓē ədan tə́ aĺ ō. Ba yá̰á̰ kə́ majaĺ ń rāā ní i najə̄ yā Uri kə́ Het ní ngóy#15.5 Majaĺ ń Dabid rāā ní: Á̰a̰ī 2 Sam 11.

6Rɔ̄ɔ̄ i mbɔ mbó̰o̰ Roboam nin̄ kə Jeroboam tə́ kə ndɔ̄ gə̄ malang ń ni ndiń kə kumneé ní.

7Gotə yá̰á̰ kə́ rang gə̄ malang ń Abiam rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. Abiam rɔ̄ɔ̄ Jeroboam ō. 8Abiam oy aw̄ gō kaan gə̄ tə́, ba dubə̄nən̄ i kem ɓē yā Dabid tə́. I ngōnən Asa n o̰o̰ ɓē gotən tə́ ní.

Asa mban̄g kə́ Juda

(Á̰a̰ī 2 Yá̰a̰ 14.1-2; 15.16-19; 16.1-6; 11—14)

9Kem ɓāl̄ ko̰o̰ ɓē kə́ nge ko̰ kutə jōó yā Jeroboam mban̄g kə́ Israel tə́ ní, Asa ndi mban̄g dɔ Juda gə̄ tə́. 10Ni-o̰o̰ ɓē ɓāl̄ kutə sɔ́ gidə i kógə̄ḿ Jerusalem. Rī kaan kə́ dəyá̰ na i Maaka, i ngōn̄ Abisalom. 11Asa rāā yá̰á̰ kə́ gōtə́ ta kum Kɔ́ɔ̄ɓē tə́ tītə̄ yā kaan Dabid. 12Ni-tə̄ɓā dəngam gə̄ ō, dəyá̰ gə̄ ō, kə́ ngé rāā ájə́ba tām̄ yā ɓesə̄ gə̄ tə́ kɔ̄ɔ́ ō, nujə ndíĺ yá̰a̰ gə̄ ń kaan gə̄ rāān̄ ɓesə̄ tə́ ní kɔ̄ɔ́ ō, 13loo kə́ to rɔȳ ń əndān̄ kaan Maaka tū tə́ á a ɓāŕnən̄ na i dəyá̰ kə́ bo ní, ni ɔrə̄n tū tə́ kɔ̄ɔ́ ō. Tɔdɔ̄ kaan ní rāā ndíĺ yá̰á̰ kə́ majaĺ ngá̰ý tām̄ yā ɓesə̄ Asera tə́. Asa nujə ɓesə̄ kə́ majaĺ ngá̰ý ní kɔ̄ɔ́, ba róōn kadə man̄ Sedəro̰ tə́. 14Ba de gə̄ əya̰n̄ loo ndɔ̄ȳ gə̄ kɔ̄ɔ́ alé. Ɓá tā ba Asa əndā kemən dɔ Kɔ́ɔ̄ɓē tə́ mámák kə dɔ ndɔ̄ gə̄ malang ń ni ndiń kə kumneé tə́ ní. 15Yá̰a̰ gə̄ ń nin̄ kə bɔbə̄neé ɔrə̄n̄ kam̄də́ tām̄ yā Nə́ɓā tə́ á i gində̄ arjā̰a̰ ō, lɔ́r ō, ngán gájə́ yá̰a̰ rāā kəla gə̄ ō ní, ni aw̄ń kem kújə yā Kɔ́ɔ̄ɓē tə́.

16Rɔ̄ɔ̄ i mbɔ mbó̰o̰ Asa nin̄ kə Baasa mban̄g kə́ Israel tə́ bátə́ oynə̄ń. 17Baasa mban̄g kə́ Israel aw̄ ənī ɓē kə́ Juda rɔ̄ɔ̄. Ni ɔr gong gidə ɓē kə́ Rama tə́ ɔgə̄ń Asa mban̄g kə́ Juda mān̄. 18Anī Asa ɔy gotə arjā̰a̰ ō, lɔ́r ō, kə́ kem loo ngɔ̄m̄ nar kə́ kem kújə yā Kɔ́ɔ̄ɓē tə́ ō, kə́ kem loo ngɔ̄m̄ nar kə́ kem kújə yā mban̄g tə́ ō, malang adə̄ ngé kəla yān gə̄ kadə̄ aw̄n̄neé adə̄n̄ Ben Hadad ngōn̄ Tabərimon kə́ ngōn̄ Hejion, mban̄g kə́ Aram ń ndi Damas ní, ba əndā kəla ń toō tadə́ tə́ kadə̄ ədanən̄:

19Ādə̄ madə̄ naā to dɔ dáńjí tə́ seí tītə̄ ń toń dɔ dán bɔbə́ḿ tə́ kə bɔbí kété ní. M-ə́la kə kadə̄ karī arjā̰a̰ ō, lɔ́r ō ń toō i kadī tə́. Ba ī-gān̄g madə̄ naā ń ə́hɔ kə Baasa mban̄g kə́ Israel tə́ ní kɔ̄ɔ́, ādə̄ ɔy áskar yān gə̄ kɔ̄ɔ́ dɔ nang yāḿ tə́.

20Ben Hadad ndigə yá̰á̰ ń mban̄g Asa dəjen kadə̄ rāā ní. Ni-əla ngol ngé rɔ̄ɔ̄ yān gə̄ adə̄ aw̄ rɔ̄ɔ̄n̄ ɓē gə̄ kə́ Israel tə́. Ni-taā ɓē kə́ Iyon ō, Dan ō, Abel Betə Maaka ō, gō nang Kinerot malang ō, gō nang malang yā Nepətali dɔ tə́ ɓáý to̰ ō. 21Dan ń Baasa oō gotə anī, əya̰ ta kəla kutə̄ ɓē kə́ Rama ba tél aw̄ ndi Tirsa. 22Loo ń noō tə́ mban̄g Asa ɓāŕ de ké Juda tə́ gə̄ malang adə̄ reēn̄ náḿ náḿ. Nin̄ reē ɔyn̄ mbal̄ gə̄ kə kāgə̄ gə̄ ń Baasa ɔrəń gong gidə ɓē kə́ Rama tə́ ní kɔ̄ɔ́. Mbal̄ gə̄ kə kāgə̄ gə̄ ní mban̄g Asa ɔrəń gong gidə ɓē kə́ Geba yā Benjamḛ tə́ ō gidə ɓē kə́ Misəpa tə́ ō.

23Gotə yá̰á̰ kə́ rang gə̄ malang ń Asa rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. Ndangən̄ kəla rāān kə́ to kɔsə gɔn gə̄ malang ō, yá̰a̰ malang ń ni-rāā ní ō, loo kəndā ń ni-əndā ɓē gə̄ ní ō, kem makətūbə̄ ní tə́. Dan ń ni tɔgə ngá̰ý ní, mo̰y kə́ nja tə́ rāān. 24Asa oy aw̄ gō kaan gə̄ tə́. Dubə̄nən̄ i kem ɓē yā kaan Dabid tə́. I ngōnən Josapat n o̰o̰ ɓē gotən tə́ ní.

Nadab mban̄g kə́ Israel

25Kem ɓāl̄ ko̰o̰ ɓē kə́ nge ko̰ jōó yā Asa mban̄g kə́ Juda tə́ ní Nadab kə ngōn̄ Jeroboam ndi mban̄g dɔ Israel gə̄ tə́. Ni-o̰o̰ ɓē ɓāl̄ jōó. 26Ni-rāā yá̰á̰ kə́ majaĺ ta kum Kɔ́ɔ̄ɓē tə́. Ni ndájə̄ kəla rāā bɔbə̄n ō, yá̰á̰ kə́ majaĺ ń bɔbə̄n rāā ba sə̄lā Israel gə̄ kadə̄ rāān̄ ní ō. 27Tā anī Baasa ngōn̄ Ahia kə́ gír ɓē yā Isakar tə́ oōn̄ naā kə madə̄n gēé dɔn tə́ ba tɔ̄lən dan ń Nadab nin̄ kə Israel gə̄ malang a rɔ̄ɔ̄n̄ ɓē kə́ Gibeton yā Pilistin gə̄ ní. 28Baasa tɔ̄l̄ Nadab i kem ɓāl̄ ko̰o̰ ɓē kə́ nge ko̰ mətá yā Asa mban̄g kə́ Juda tə́, ba o̰o̰ ɓē gotən tə́. 29Dan ń ni-ndi mban̄g ní, ni tɔ̄l̄ de kə́ gír kojə yā Jeroboam tə́ gə̄ malang kɔ̄ɔ́ kanjə̄ kəya̰ deē kógə̄ḿ. Ni-tɔ̄l̄də́ malang kə gō najə̄ ń Kɔ́ɔ̄ɓē əndā ta nge kəla yān Ahia kə́ Silo tə́ ní. 30Yá̰a̰ gə̄ ń noō malang rāān̄ yá̰a̰ i tɔdɔ̄ Jeroboam rāā yá̰á̰ kə́ majaĺ ō, ni sə̄lā ngán Israel gə̄ adə̄ rāān̄ yá̰á̰ kə́ majaĺ ō. Yá̰a̰ gə̄ ń ni-rāā ní adə̄ Kɔ́ɔ̄ɓē Nə́ɓā yā Israel gə̄ wōn̄g ngá̰ý.

31Gotə yá̰á̰ kə́ rang gə̄ malang ń Nadab rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. 32Rɔ̄ɔ̄ i mbɔ mbó̰o̰ Asa nin̄ kə Baasa mban̄g kə́ Israel tə́ bátə́ oyn̄neé.

Baasa mban̄g kə́ Israel

33Kem ɓāl̄ ko̰o̰ ɓē kə́ nge ko̰ mətá yā Asa mban̄g kə́ Juda tə́ ní Baasa ngōn̄ Ahia ndi mban̄g dɔ Israel gə̄ tə́ kem ɓē kə́ Tirsa tə́. Ni-o̰o̰ ɓē ɓāl̄ kutə jōó gidə i sɔ́.

34Ni-rāā yá̰á̰ kə́ majaĺ ta kum Kɔ́ɔ̄ɓē tə́. Ni ndájə̄ kəla rāā Jeroboam ō, yá̰á̰ kə́ majaĺ ń Jeroboam rāā á sə̄lā ngán Israel gə̄ adə̄ rāān̄ ní ō.

Currently Selected:

1 MBAN̄G GƏ̄ 15: SARDC

Highlight

Copy

Compare