1 MBAN̄G GƏ̄ 14

Gotə yá̰á̰ kə́ rang gə̄ ń Jeroboam rāā ní

1Dan ngeé ń noō tə́ ní, ngōn̄ Jeroboam ń rīn na i Abia ní əsō mo̰y. 2Anī Jeroboam əda nə̄yá̰n na kə əla kūbə̄ kə́ kadə̄ deē a̰a̰n anī ger̄ kadə̄ i nə̄yá̰ Jeroboam n aw̄ toó alé, ba kə aw̄ Silo na Ahia nge koō ta na ndi noó. I ni n ədan na n-a n-ndi yā ko̰o̰ ɓē dɔ ngán Israel gə̄ tə́ ní. 3kə ɔy mápa kutə kógə̄ḿ ō, mápa kə́ rāā kə yibə̄ gə̄ ō, kə un kū yibə̄ tejə kógə̄ḿ ō, ba kə aw̄ kə əngen. Na a ədan yá̰á̰ ń a rāā yā reē dɔ ngōn̄də́ tə́ ní. 4Nə̄yá̰ Jeroboam rāā tītə̄ ń noō. Ni-ḭḭ dɔɔ́ əsō róbó ta kaw̄ kə̄ Silo, aw̄ ugə̄ ta kújə yā Ahia tə́. Ahia a̰a̰ loo to̰ alé, kumən ra ro, tɔdɔ̄ ni tɔgə ɓə́gá ngá̰ý kɔ̄ɔ́. 5Banī Kɔ́ɔ̄ɓē tāān kété ədan na nə̄yá̰ Jeroboam na a reē noó, ba na rāā rɔ̄n dəyá̰ kə́ rang tə́ kadə̄ deē gerə̄n alé. Na a dəjen najə̄ kə́ dɔ ngōnən kə mo̰y tə́. Ba kə tél kə tūr̄ kə ədan najə̄ kə́ beé ō, kə́ beé ō. 6Dan ń kōō nja dəyá̰ ń a reē kə̄ ta kújə́ tə́ ní əsō mbī Ahia tə́ anī, Ahia un ndū kə̄ dɔɔ́ ədanəń na:

Nə̄yá̰ Jeroboam, údə́ kújú! Ī-rāā tītə̄ kə́ ḭ̄ i dəyá̰ kə́ rang i tām̄ rí tə́? Najə̄ kə́ majaĺ kə́ kadə̄ m-ə́daī to laā. 7Ī-tél āw̄ ə́da Jeroboam na najə̄ ń Kɔ́ɔ̄ɓē Nə́ɓā yā Israel əda ní n toó: M-ɔ̄rī dan de gə̄ tə́ m-ə̄ndāī ngār dɔ gír deē yāḿ gə̄ ń i ngán Israel gə̄ ní tə́. 8m̄-taā ko̰o̰ ɓē jī de gə̄ kə́ gír kojə yā Dabid tə́ m-ādī. Banī ḭ̄ ī-to tītə̄ nge kəla yāḿ Dabid ń m-ə́dan yá̰a̰ anī rāā ō, ənī kemən mámák unəń gōḿ ō, yá̰á̰ ń i yá̰á̰ kə́ gōtə́ ta kumḿ tə́ tá ní a rāā ō ní alé. 9Ḭ̄ ī-rāā yá̰á̰ kə́ majaĺ tɔȳ de gə̄ malang ń reēn̄ kété noí tə́ ní. Ḭ̄ ə́ya̰m̄ kɔ̄ɔ́ ba ī-rāā nə́ɓā kə́ rang gə̄ tām̄ yāí tə́, ī-nō nə̄ngá kasə horoó ī-rāā yá̰á̰ kə́rēý kə́ ɔsə kum gotə yá̰a̰ gə̄ ń a ndɔ̄ȳn̄ tə́ ní ī-rāań adə̄ wōn̄g rāām̄. 10I tām̄ najə̄ ń noō tə́ n m-ā m̄-rāā kadə̄ yá̰á̰ kə́ to kum kaȳ aĺ a reē dɔ gír kojə yāí tə́ ní. M-ā m̄-tɔ̄l̄ de kə́ dəngam gə̄ kə́ gír yāí tə́ malang kɔ̄ɔ́, ngáń kə́ dūú gə̄gē, de kə́ tɔgə gə̄gē. M-ā m̄-rāā kadə̄ de kə́ gír kojə yāí tə́ gə̄ gətóon̄ kɔ̄ɔ́ malang tītə̄ ń deē a ɔyń loo kə́ yḛr kɔ̄ɔ́ kə ndəsá ní. 11De kə́ gír kojə yāí tə́ ń a oy kem ɓēé ní, bísə gə̄ a əsanən̄ ō, aké a oy bembeé ní yel̄ kə́ dɔɔ́ gə̄ a əsanən̄ ō. Najə̄ ń Kɔ́ɔ̄ɓē əda ní n noó. 12Banī ḭ̄ nə̄yá̰ Jeroboam, ḭḭ dɔɔ́ āw̄ ɓēé. Dan ń ā ə̄ndā njaí kə̄ kem ɓēé anī, ngōnīí a oy. 13Ngán Israel gə̄ malang a nōōnən̄ ō, a dubə̄nən̄ ō, tɔdɔ̄ i ni ngóy n i de kə́ gír kojə yā Jeroboam tə́ kə́ a dubə̄nən̄ kem bəlo ɓádə́ tə́ ō, kə́ Kɔ́ɔ̄ɓē yā Israel a̰a̰ yá̰á̰ kə́ majə kemən tə́ ō ní. 14Kɔ́ɔ̄ɓē a əndā mban̄g kógə̄ḿ dɔ ngán Israel gə̄ tə́ kadə̄ a nujə gír kojə yā Jeroboam kɔ̄ɔ́. I tām̄ yā ndɔ̄ kə́ ɓōólaā tə́. M-ə́da na i rí? I tām̄ yā kum mbang kə́ ngɔr ń toō tə́. 15Gō tə́ anī Kɔ́ɔ̄ɓē a ənda Israel gə̄. Nin̄ a yéȳn̄ tītə̄ mu tə̄ɓā kə́ kadə man̄ tə́. Kɔ́ɔ̄ɓē tə̄ɓādə́ dɔ nang kə́ majə ń adə̄ kaadə́ gə̄ tə́ ní kɔ̄ɔ́, ba a tə̄ndā yā tḭ̄ḭ̄də́ gidə bā Opəratə kə́ dām̄ kə́ nó tə́, tɔdɔ̄ nin̄ udən̄ kāgə̄ ɓesə̄ kə́ yā ɓōĺ gidə gə̄ adə̄n̄neé Kɔ́ɔ̄ɓē wōn̄g. 16Kɔ́ɔ̄ɓē a əya̰də́ kɔ̄ɔ́ tām̄ majaĺ yā Jeroboam tə́ ō, tām̄ rāā ń Jeroboam rāā ngán Israel gə̄ adə̄ rāān̄ majaĺ ní ō.

17Nə̄yá̰ Jeroboam ḭḭ aw̄ gogə́ ɓēé Tirsa. Dan ń ni-əndā njan kə̄ ta kújə yān tə́ anī, ngōnən oy ō. 18Dubə̄n̄ ngōn̄ ní ō, Israel gə̄ malang nōōnən̄ ō, tītə̄ ń Kɔ́ɔ̄ɓē ədań ní. Kɔ́ɔ̄ɓē əndā najə̄ ní i ta nge kəla yān Ahia ń i nge koō ta ní tə́.

19Gotə yá̰á̰ kə́ rang gə̄ ń Jeroboam rāā ní, ndangən̄ kem makətūbə̄ kəla rāā mban̄g gə̄ kə́ Israel tə́ tə́. Ɔjən̄ gotə rɔ̄ɔ̄ yān gə̄ kemeé ō. 20Jeroboam o̰o̰ ɓē ɓāl̄ kutə jōó gidə i jōó pá tá kadə̄ oy aw̄ gō kaan gə̄ tə́ ɓáý. Dan ń ni-oy anī, ngōnən Nadab o̰o̰ ɓē gotən tə́.

Yá̰á̰ kə́ rang gə̄ ń Roboam mban̄g kə́ Juda rāā ní

(Á̰a̰ī 2 Yá̰a̰ 12.1-16)

21Ɓāl̄ Roboam ngōn̄ Salomo̰ i kutə sɔ́ gidə i kógə̄ḿ dan ń əndānən̄ mban̄g kə́ Juda tə́ ní. Ni-o̰o̰ ɓē ɓāl̄ kutə gidə i sīrí Jerusalem, ɓē ń Kɔ́ɔ̄ɓē gə̄rā dan gír ɓē gə̄ yā ngán Israel gə̄ tə́ yā kəndā rīn dɔ tə́ ní. Rī kó̰o̰ Roboam na i Naama. Kó̰o̰n i dəyá̰ Amon. 22Juda gə̄ rāān̄ yá̰á̰ kə́ majaĺ ta kum Kɔ́ɔ̄ɓē tə́. Nin̄ rāān̄ yá̰á̰ kə́ majaĺ gə̄ adə̄n̄neé Kɔ́ɔ̄ɓē wōn̄g tɔȳ yā kaadə́ gə̄ ɓáý. 23Rāān̄ loo ndɔ̄ȳ gə̄ tītə̄ yā kaadə́ gə̄ ō, túdə̄n̄ mbal̄ gə̄ kə nja kə́ dɔɔ́ ō, túdə̄n̄ kāgə̄ ɓesə̄ kə́ yā ɓōĺ gidə gə̄ kə̄ dɔ ngán mbal̄ gə̄ tə́ malang ō, gír kāgə̄ gə̄ kə́ mbīdə́ əga ku gə̄ tə́ malang ō. 24Dəngam gə̄ kə dəyá̰ gə̄ kə́ ngé rāā ájə́ba kə́ tām̄ yā ɓesə̄ gə̄ tə́ ton̄ kem ɓēé. Juda gə̄ ndájə̄n̄ háĺ kə́ majaĺ ngá̰ý gə̄ yā napar de gə̄ ń Kɔ́ɔ̄ɓē tə̄ɓādə́ kɔ̄ɔ́ yā kəya̰ń loo kadə̄ ngán Israel gə̄ ní.

25Kem ɓāl̄ kə́ nge ko̰ mí ń Roboam o̰o̰ń ɓē tə́ ní, Sisak, mban̄g kə́ Ejiptə reē ənī ɓē kə́ Jerusalem rɔ̄ɔ̄. 26Ni ɔy yá̰a̰ kənge gə̄ kə́ kem kújə yā Kɔ́ɔ̄ɓē tə́ ō, kə́ kem kújə yā mban̄g tə́ ō aw̄ń. Ni ɔy yá̰a̰ malang aw̄ń. Der lɔ́r ń Salomo̰ rāā ní gə̄gē, ɔy malang aw̄ń. 27Mban̄g Roboam rāā der kə́ rang gə̄ kum gotə kə gində̄ nə̄ngá kasaá, ba adə̄ ngol gə̄ kə́ dɔ ngé ngɔ̄m̄ loo gə̄ ń ran̄ ta kújə yā mban̄g tə́ ní kadə̄ ngɔ̄mə̄n̄. 28Adə̄ ngándáńg ré mban̄g a aw̄ kə̄ kem kújə yā Kɔ́ɔ̄ɓē tə́ anī, ngé ngɔ̄m̄ loo gə̄ a ɔyn̄ der gə̄ ní, ba gō tə́ anī a tél a aw̄n̄neé gogə́ kem kújə yā ngé ngɔ̄m̄ loo gə̄ tə́.

29Gotə yá̰á̰ kə́ rang gə̄ malang ń Roboam rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. 30Kə dɔ ndɔ̄ gə̄ malang ń noō rɔ̄ɔ̄ i mbō̰ Roboam nin̄ kə Jeroboam tə́. 31Roboam oy aw̄ gō kaan gə̄ tə́, dubə̄nən̄ i kem ɓē yā Dabid tə́, kem bəlo ɓádə́ ń dubə̄n̄ bɔbə̄n ō, kaan ō tū tə́ ní tə́. Rī kó̰o̰ Roboam na i Naama. Kó̰o̰n i dəyá̰ Amon. I ngōnən Abiam n o̰o̰ ɓē gotən tə́ ní.

Currently Selected:

1 MBAN̄G GƏ̄ 14: SARDC

Highlight

Copy

Compare