1 MBAN̄G GƏ̄ 13

1Dan ń Jeroboam ra a róō yá̰a̰ ndējə̄ gə̄ dɔ loo tun̄ yá̰á̰ tə́ anī, deē yā Nə́ɓā kógə̄ḿ ḭḭ Juda reē ugə̄ Betel. Deē ní i Kɔ́ɔ̄ɓē n ədan najə̄ á reēń ní. 2Ni un ndūn kə̄ dɔɔ́ ədań najə̄ yā Kɔ́ɔ̄ɓē dɔ loo tun̄ yá̰á̰ tə́, əda na:

Loo tun̄ yá̰a̰! Loo tun̄ yá̰a̰! Ōō najə̄ ń Kɔ́ɔ̄ɓē əda ní! A ojən̄ ngōn̄ kə́ dəngam dan de gə̄ kə́ gír kojə yā Dabid tə́. A əndān̄ rī ngōn̄ ní na i Josias. Ni a tɔ̄l̄ ngé tun̄ yá̰a̰ gə̄ kə́ loo ndɔ̄ȳ gə̄ tə́ ń a róōn̄ yá̰á̰ kə́ kotə majə gə̄ dɔí tə́ ní, yā róōdə́ horoó dɔí tə́. A róōn̄ kə̄ngā de gə̄ horoó dɔí tə́ ō.

3Deē yā Nə́ɓā ní əda najə̄ ń toō ɓáý to̰, əda na yá̰á̰ ń kadə̄ deē gerə̄ń kadə̄ i Kɔ́ɔ̄ɓē n ɔr̄ najə̄ ní n toó: Loo tun̄ yá̰a̰ a njar naā tə́ ō, yibə̄ dā̰ kə́ dɔ tə́ a tə́sō nang tə́ ō.

4Dan ń mban̄g Jeroboam oō najə̄ ń deē yā Nə́ɓā əda dɔ loo tun̄ yá̰á̰ kə́ Betel tə́ ní anī, əla jīn dɔ loo tun̄ yá̰á̰ tə́ kum kə̄ rɔ̄ deē yā Nə́ɓā tə́ ba əda na: Əhɔniī! Banī jīn ń əla kə̄ dɔ deē yā Nə́ɓā tə́ ní tutə njururu, adə̄ asə téləń kə̄ rɔ̄n tə́ to̰ alé. 5Loo tun̄ yá̰á̰ ní njar naā tə́ ō, yibə̄ dā̰ kə́ dɔ tə́ tə́sō nang tə́ ō, tītə̄ ń deē yā Nə́ɓā ədań kə gō ndū Kɔ́ɔ̄ɓēé ní. 6Kə̄ ta jī tə́ noō mban̄g əda deē yā Nə́ɓā ní na:

m̄-dəjeī kadə̄ ī-rāā Kɔ́ɔ̄ɓē Nə́ɓā yāí ɓɔ́ ādə̄ mā̰ȳ rɔ̄n dɔḿ tə́ ō, adə̄ rāā jīḿ ādə̄ tél kə̄ rɔ̄ḿ tə́ ō.

Deē yā Nə́ɓā ní rāā Kɔ́ɔ̄ɓē ɓɔ́, anī jī mban̄g tél kə̄ rɔ̄n tə́. 7Anī mban̄g ədan na:

Ī-reē j-aw̄ ɓēé j-əsa yá̰a̰. Gō tə́ anī m-ā m-ādī kadə̄ karī.

8Banī deē yā Nə́ɓā ní tél əda mban̄g na:

Ká i núsə́ yá̰a̰ kənge yāí malang n ā ādə̄m̄neé gə̄gē, m-ā m-āw̄ ɓēé looí alé. M-ā m-ə́sa mápa laā aĺ ō, m-ā m-ā̰ȳ man̄ laā aĺ ō. 9Tɔdɔ̄ Kɔ́ɔ̄ɓē ədam̄ na kə m-ə́sa yá̰a̰ aĺ ō, kə m-ā̰ȳ man̄ aĺ ō, ré m-ā m̄-tél yā kaw̄ kə̄ gogə́ ɓēé anī, kə m-ún róbə́ gír njaḿ aĺ ō.

10Adə̄ deē yā Nə́ɓā ní un i róbə́ kə́ rang n téləń dɔ tə́ ta kaw̄ kə̄ gogə́ ɓēé ní ba un i róbə́ gír njan ń aw̄ń Betel ní alé.

Deē yā Nə́ɓā rāā yá̰á̰ kə́ Nə́ɓā ɔgə̄n rāā

11Banī nge koō ta kógə̄ḿ kə́ tɔgə ndi Betel noó. Ngánən gə̄ reē ənīnən̄ gotə yá̰a̰ malang ń deē yā Nə́ɓā kə kḭḭ Juda reē rāā ndɔ̄ ń noō tə́ kem ɓē kə́ Betel tə́ ní ō, ədanən̄ najə̄ ń ní əda mban̄g ní ō. 12Anī bɔbə̄ ngán gə̄ ní dəjedə́ na ké deē yā Nə́ɓā ní ké un i róbə́ kə́ rá n aw̄ń wa. Ngán gə̄ aw̄ a̰a̰n̄ róbə́ ń aw̄ń ní. 13Gō tə́ anī bɔbə̄də́ ədadə́ na kə ənīn̄ síŕdí gidə kərō yān tə́ kə adə̄nən̄. Ngán gə̄ ənīn̄ síŕdí gidə kərō tə́ adə̄n̄ bɔbə̄də́ aĺ ndi dɔ tə́. 14Nge koō ta kə́ tɔgə ní ngɔ̄də̄ gō deē yā Nə́ɓā ní aw̄ əngen gír kāgə̄ kógə̄ḿ kə́ bo tə́, anī dəjen na ké i ni n i deē yā Nə́ɓā kə́ kḭḭ Juda ní wa. Anī deē yā Nə́ɓā ní ədan na i ni. 15Nge koō ta kə́ tɔgə əda deē yā Nə́ɓā ní na kə reē kə aw̄ seneé ɓēé kə aw̄ kə əsa yá̰a̰. 16Anī deē yā Nə́ɓā ní tél ədan na n-asə tél aĺ ō, n-asə kaw̄ gogə́ seneé aĺ ō. Na n-a n-əsa yá̰a̰ seneé loo ń noō tə́ aĺ ō, na n-a n-a̰ȳ man̄ seneé loo ń noō tə́ aĺ ō, 17tɔdɔ̄ Kɔ́ɔ̄ɓē na ədan na kə n-əsa yá̰a̰ loo ń noō tə́ aĺ ō, kə n-a̰ȳ man̄ loo ń noō tə́ aĺ ō, kə n-tél kə róbə́ gír njan aĺ ō. 18Banī nge koō ta kə́ tɔgə ní əda na:

Mā i nge koō ta madí, adə̄ de kə́ dɔ rā̰ tə́ kógə̄ḿ ədam̄ na Kɔ́ɔ̄ɓē əda na kə m̄-tél kə m-āw̄ seí ɓēé looḿ kadə̄ ə́sá yá̰a̰ ō, ā̰ȳ man̄ ō.

Nge koō ta kə́ tɔgə ní gólə̄n i mbée. 19Deē yā Nə́ɓā ní tél aw̄ seneé ɓēé aw̄ əsa mápa ō, a̰ȳ man̄ ō.

Gāngə̄n̄ sarya dɔ deē yā Nə́ɓā tə́

20Dan ń ndin̄ ta yá̰a̰ kəsa tə́ anī Kɔ́ɔ̄ɓē ɔr̄ najə̄ kə nge koō ta kə́ tɔgə ń tél kə deē yā Nə́ɓāá ní, 21adə̄ əda deē yā Nə́ɓā ń ḭḭ gō nang kə́ Juda tə́ ní na:

Najə̄ ń Kɔ́ɔ̄ɓē əda ní n toó: Ḭ̄ ī-mbātə́ ta Kɔ́ɔ̄ɓē, adə̄ ī-rāā gō míndə ń Kɔ́ɔ̄ɓē Nə́ɓā yāí ədaī na kə ī-rāā aĺ ní. 22Loo ń Kɔ́ɔ̄ɓē ɔgī kəsa yá̰a̰ tū tə́ ō, ka̰ȳ man̄ tū tə́ ō ní, ḭ̄ ə́sá yá̰a̰ ō, ā̰ȳ man̄ ō tū tə́, adə̄ a óy, ba a ənīn̄ nīní kem bāá ɓádə yā kaaí gə̄ tə́ alé.

23Dan ń əsan̄ yá̰a̰ ō, a̰ȳn̄ man̄ ō oy anī, nge koō ta kə́ tɔgə ní ənī síŕdí gidə kərō yā nge koō ta ń ni-tél seneé ní tə́, 24ba adə̄n adə̄ aw̄. Ɓɔl kógə̄ḿ əhɔn adə̄ nīnə́n to kum róbó. Kərō ra dɔ nīnə́n tə́ dām̄ kə́rēý tə́ ō, ɓɔl ra dām̄ kə́rēý tə́ ō. 25Ngé mān̄ róbə gə̄ a̰a̰n̄ nīń ní kum róbó ba ɓɔl ra kadə tə́, anī aw̄ ədan̄ kem ɓē ń nge koō ta kə́ tɔgə ndi kemeé ní tə́. 26Dan ń nge kōō ta ń tél reē kə madə̄neé gogə́ kem ɓēé ní oō najə̄ ní anī, əda na:

I deē yā Nə́ɓā ń mbātə́ ta Kɔ́ɔ̄ɓē ní n Kɔ́ɔ̄ɓē əlan ta ɓɔl tə́ adə̄ tétə̄ kə̄ngān ō, əhɔn tītə̄ ń Kɔ́ɔ̄ɓē ədanəń ní ō.

27Ni mēr̄ ngánən gə̄ kənī síŕdí gidə kərō yān tə́. 28Gō tə́ anī ni-aw̄ ənge nīń ní to kum róbó ba kərō nin̄ kə ɓɔlɔɔ́ ran̄ dɔ tə́. Ɓɔl əsa nīń aĺ ō, rɔ̄ kərō aĺ ō. 29Nge koō ta kə́ tɔgə ní un nīń deē yā Nə́ɓā ní, ənī dɔ kərōó tél aw̄ń ɓēé aw̄ nōōn ba dubə̄n. 30Ni-ənī nīń ní i kem bəlo ɓádə yān nəkɔ́ tə́. Nōōn̄ yo ədan̄ na: A ngōkó̰ó̰ḿ! 31Dan ń nge koō ta ní dubə̄n oy anī, əda ngánən gə̄ na ré n-oy anī kə dubə̄nən̄ kem bəlo ɓádə́ ń dubə̄n̄ deē yā Nə́ɓā tū tə́ ní tə́. Kə ənīn̄ nīnə́n kadə yān tə́. 32Tɔdɔ̄ najə̄ ń kə́ dɔ loo tun̄ yá̰á̰ kə́ Betel tə́ ō, dɔ kújə gə̄ malang kə́ dɔ loo ndɔ̄ȳ gə̄ kə́ kem ɓē kə́ Samari tə́ ō ń ni un ndū kə̄ dɔɔ́ ədań ní i najə̄ yā Kɔ́ɔ̄ɓē, adə̄ a rāā yá̰a̰ rɔ̄kum.

33Gō yá̰á̰ ń toō tə́ ní, mban̄g Jeroboam əya̰ yá̰a̰ rāān kə́ majaĺ gə̄ kɔ̄ɔ́ alé. Ni na̰y kə̄ loo kəndā ngán Israel kə́ karī gə̄ kem kəla tun̄ yá̰á̰ tə́ ɓáý. Deē ń kemií ndigə anī əndāī kem kəla tun̄ yá̰á̰ tə́ dɔ loo ndɔ̄ȳ gə̄ tə́. 34Majaĺ yā Jeroboam nin̄ kə de gə̄ kə́ gír kojə yān tə́ gə̄ n noó. Nujən̄də́ sák sák ō, gətóon̄ dɔ nang tə́ kɔ̄ɔ́ ō, i tām̄ majaĺ ń noō tə́.

Currently Selected:

1 MBAN̄G GƏ̄ 13: SARDC

Highlight

Copy

Compare