1 MBAN̄G GƏ̄ 12

Ngé kán̄ naā gə̄ kə́ Sisem

(Á̰a̰ī 2 Yá̰a̰ 10.1-15)

1Roboam aw̄ Sisem, tɔdɔ̄ Israel gə̄ malang reēn̄ kəndā mban̄g tə́ Sisem. 2Jeroboam kə́ ngōn̄ Nebat na̰y Ejiptə ɓáý. I loo ń ni a̰ȳ mban̄g Salomo̰ aw̄ ɓɔ̄ɔ̄ rɔ̄n tū tə́ ní tə́. Dan ń Jeroboam oō najə̄ kán̄ naā kə́ Sisem ní anī, tél ndi gogə́ Ejiptə. 3Banī əlan̄ de gə̄ gōn tə́ adə̄ ni-reē kə ngé kán̄ naā gə̄ malang kə́ Israel tə́. Nin̄ ədan̄ Roboam na:

4Bɔbí əndā júgə́ kə́ kɔȳ dɔjí tə́. Ba ī-rāā ādə̄ júgə́ ń i kəla ɓəlo ń bɔbí əndā dɔjí tə́ ní hɔɔ́lɔ̄, anī j-a jə-rāā kəla yāí.

5Roboam ədadə́ na:

Āwī, bírí i karī ba lootī tá ī-reēī.

Anī kɔ́sə̄ de gə̄ ɔtə aw̄n̄. 6Mban̄g Roboam dəje kɔjə̄ rɔ̄ kum kɔɔ̄ gə̄ ń rāān̄ kəla kə bɔbə̄n Salomo̰ kété, dan ń ndiń kə kumneé ɓáý tə́ ní. Ni dəjedə́ na ké kə n-əda de gə̄ ní na i rí wa. 7Anī nin̄ tél ədanən̄ na:

Ré ɓōólaā ɔ́jə́də́ kadə̄ ī-ndigə rāā kəla yā kɔ́sə de gə̄ ń toō ō, ī-téĺ ə́dádə́ najə̄ kə́ majə gə̄ ō anī, a rāān̄ kəla yāí ngándáńg.

8Banī Roboam mbātə́ kɔjə̄ ń de kə́ kum kɔɔ̄ gə̄ adə̄nən̄ ní. Ni-dəje balsáa gə̄ ń tɔgən̄ naā tə́ seneé ō, rāān̄ kəla yān ō ní kɔjə̄. 9Ni ədadə́ na:

Ba sḭḭ̄, kɔjə̄ yāsí ń ā ādə̄mī ní na i rí? Gír de gə̄ ń toō ń dəjemə̄n̄ kadə̄ m̄-rāā kadə̄ njúkə yā bɔbə́ḿ kə hɔɔ́lɔ̄ dɔdə́ tə́ ní, kə m̄-tél kə m-ə́dádə́ na i rí?

10Balsáa gə̄ ń tɔgən̄ naā tə́ seneé ní tél ədanən̄ na:

Gír de gə̄ ń toō n ədaīn̄ na bɔbí na əndā júgə́ kə́ kɔȳ dɔdə́ tə́ ba kə ḭ̄ kə ī-rāā kadə̄ hɔɔ́lɔ̄ dɔdə́ tə́ ní. Yá̰á̰ ń kadə̄ ī-téĺ ə́dádə́ ní n toó: 11Ta ngōn̄ jīí na bo tɔȳ ɓōdə̄ bɔbí. Bɔbí na əndā júgə́ kə́ kɔȳ dɔdə́ tə́, ba ḭ̄ na ā ə̄ndā júgə́ kə́ kɔȳ tɔȳ yā bɔbí dɔdə́ tə́. bɔbí na əndadə́ na i kə ndéy məraw kə́ karī, ba ḭ̄ na ā ə́ndádə́ na i kə ndéy məraw kə́ gində̄ i ta tə́.

12Kə ndɔ̄ kə́ nge ko̰ mətá anī, Jeroboam nin̄ kə ngán Israel gēé tél reē əngen̄ Roboam tītə̄ ń ədańdə́ ní. 13Mban̄g mbātə́ kɔjə̄ yā kum kɔɔ̄ gə̄ kɔ̄ɔ́, ba ɔr̄ najə̄ kə́ majaĺ kə kósə de gēé 14tītə̄ ń balsáa madə̄n gə̄ ədan̄neé ní. Ni ədadə́ na:

Bɔbə́ḿ əndā júgə́ kə́ kɔȳ dɔsí tə́, ba mā m-ā m-ə̄ndā júgə́ kə́ kɔȳ tɔȳ yā bɔbə́ḿ ɓáý dɔsí tə́. Bɔbə́ḿ əndasí i kə ndéy məraw kə́ karī, ba mā m-ā m-ə́ndásí i kə ndéy məraw kə́ gində̄ i ta tə́.

15I tītə̄ ń noō n mban̄g oōń najə̄ yā ngán Israel gə̄ alé ní. Ta róbə́ ń Kɔ́ɔ̄ɓē rāā yā kadə̄ najə̄ ń ni-əda Jeroboam ngōn̄ Nebat ní reē udəń gírí ní n noó. Kɔ́ɔ̄ɓē əndā najə̄ ní i ta nge koō ta yān kə́ Silo ń rīn na i Ahia ní tə́.

Ɓē kēgə̄ naā

(Á̰a̰ī 2 Yá̰a̰ 10.16—11.4)

16Dan ń ngán Israel gə̄ a̰a̰n̄ kadə̄ mban̄g oō yādə́ nin̄ aĺ anī, tél ədan̄ na:

Usəjí i rí kə Dabid? Yá̰a̰ ndəbā yājí i dɔ naā tə́ yā ngōn̄ Jese ń noō alé! Israel gə̄, ī-tél āwī gɔgə́ kem kújə tandā yāsí gə̄ tə́! Ngɔlaā ní Dabid, īkɔ́ á̰a̰ gō kem kújə yāí!

Loo ń noō tə́ ngán Israel gə̄ tḭ̄ḭ̄n̄ naā kə̄ ɓē yādə́ gə̄ tə́. 17I ngán Israel gə̄ ń ndin̄ kem ɓē gə̄ kə́ Juda tə́ ní ngóy n Roboam nay kə̄ loo ko̰o̰ ɓē tə́ dɔdə́ tə́ ní. 18Mban̄g Roboam əla Adoram ń i ngol ngé kəla ngámba gə̄ ní rɔ̄ Israel gə̄ tə́ kum gotən, banī nin̄ tə́nīnən̄ kə mbalá tə́nī tɔ̄l̄nən̄. Na̰y i séý anī mban̄g Roboam kə dɔneé teē alé. Ni aĺ kem púsə rɔ̄ɔ̄ yān tə́ ba a̰ȳ aw̄ Jerusalem 19I beé n Israel gə̄ mbātə́n̄neé kadə̄ gír kojə yā Dabid o̰o̰ń ɓē dɔdə́ tə́ bátə́ ɓōólaā ní.

20Dan ń Israel gə̄ malang oōn̄ kadə̄ Jeroboam na tél anī, əlan̄ gōn tə́ adə̄ reē loo kán̄ naā tə́ ba əndānən̄ mban̄g kə́ Israel tə́. I gír ɓē yā Juda ngóy kə kérneé n əhɔ gō de gə̄ kə́ gír kojə yā Dabid tə́ ní. 21Dan ń Roboam aw̄ ugə̄ Jerusalem anī, kán̄ áskar kə́ ger̄ rɔ̄ɔ̄ ngá̰ý gə̄ dūbú ɓú kə kutə sɔ́sɔ́ dan de gə̄ kə́ gír ɓē yā Juda tə́ ō, Benjamḛ tə́ ō, yā kaw̄ rɔ̄ɔń ɓē kə́ Israel ba taān̄ ɓē kadə̄ Roboam ngōn̄ Salomo̰. 22Banī Nə́ɓā ɔr̄ najə̄ kə deē yān ń rīn na i Semaya ní, ədan na:

23Əda Roboam ngōn̄ Salomo̰ ń i mban̄g kə́ Juda ní ō, de gə̄ malang kə́ gír ɓē yā Juda tə́ ō, Benjamḛ tə́ ō, gotə de gə̄ malang ō na: 24Najə̄ ń Kɔ́ɔ̄ɓē əda ní n toó: Ī-lōōī kaw̄ kənī Israel gə̄ ń nin̄ i ngákó̰ó̰sí gə̄ ní rɔ̄ɔ̄. Sḭḭ̄ kógə̄ḿ kógə̄ḿ ī-téliī kə̄ ɓē yāsí gə̄ tə́, tɔdɔ̄ i mə̄kɔ́ n m̄-rāā yá̰á̰ ń noō ní.

Loo ń oō najə̄ ń Kɔ́ɔ̄ɓē ədadə́ ní anī ndigən̄, adə̄ télən̄ kə̄ ɓē yādə́ gə̄ tə́.

25Jeroboam ənī ndogə̄ mbal̄ kə́ ngan̄g gīrəń gidə ɓē kə́ Sisem, gō nang kə́ mbalá yā Epəraim tə́, ba ndi kem ɓē kə́ Sisem tə́. Gō tə́ anī ni teē kɔ̄ɔ́ kem ɓē kə́ Sisem tə́ ba aw̄ ənī ndogə̄ mbal̄ kə́ ngan̄g gīrəń gidə ɓē kə́ Penuel.

Majaĺ yā Jeroboam

26Jeroboam gír kemən tə́ əda na:

Tītə̄ ń yá̰a̰ gə̄ a rāān̄neé yá̰á̰ á m-á̰a̰ toó ní, ɓē ko̰o̰ yāḿ ní a tél yā kaw̄ jī de gə̄ kə́ gír kojə yā Dabid tə́ gogə́. 27Ré gír de gə̄ ń toō na̰yn̄ kə̄ loo kaw̄ tə́ Jerusalem yā ndējə̄ Kɔ́ɔ̄ɓē yá̰á̰ kə́ tun̄ gə̄ tə́ kem kújə yā Kɔ́ɔ̄ɓē tə́ anī, kemdə́ a tél yā kəhɔ gō kɔ́ɔ̄də́ kə́ kété ń i Roboam mban̄g kə́ Juda tə́ ní. A tɔ̄l̄mə̄n̄ kɔ̄ɔ́ ba a télən̄ yā kaw̄ gō Roboam mban̄g kə́ Juda tə́.

28Gír̄ kógə̄ḿ reē dɔ mban̄g Jeroboam tə́, adə̄ ni mēr̄ rāā duĺ man̄g lɔ́r gə̄ jōó, ba əda de gə̄ na:

Israel gə̄, ngándáńg ā āwī i Jerusalem, ba ngɔlaā ní asə tā. Nə́ɓā ń teē sesí kɔ̄ɔ́ kem ɓē kə́ Ejiptə tə́ ní ni n toó.

29Jeroboam əndā duĺ man̄g lɔ́ŕ ní kógə̄ḿ Betel ō, kógə̄ḿ Dan ō. 30Majaĺ ní n noó. kósə de kə́ ngá̰ý gə̄ dānə̄n̄ duĺ man̄g kə́ nge ko̰ jōó ní aw̄ ugə̄n̄ seneé Dan.

31Jeroboam rāā kújə gə̄ dɔ loo ndɔ̄ȳ tə́, ba gə̄rā de gə̄ kə́ gír ɓē yā Lebi tə́ aĺ gə̄ dan ngán Israel gə̄ tə́ əndādə́ ngé tun̄ yá̰a̰ gə̄ tə́. 32Jeroboam rāā nāā kógə̄ḿ kə́ to tītə̄ nge ń a rāān̄ Juda ní kem nāā kə́ nge ko̰ sɔ́sɔ́ tə́, kə ndɔ̄ nāā kə́ nge ko̰ kutə gidə i mí, ba nəkɔ́ aĺ aw̄ tun̄ yá̰a̰ dɔ loo tun̄ yá̰á̰ tə́. Ni-rāā tītə̄ ń noō Betel ō, tun̄ yá̰a̰ adə̄ duĺ man̄g gə̄ ń ni rāādə́ ní ō. Ngé tun̄ yá̰a̰ gə̄ kə́ loo ndɔ̄ȳ gə̄ tə́ ń ni əndādə́ kem kəla tun̄ yá̰á̰ tə́ ní, əndādə́ Betel ō.

Gāngə̄n̄ sarya dɔ loo ndɔ̄ȳ kə́ Betel tə́

33Kə ndɔ̄ kə́ nge ko̰ kutə gidə i mí yā nāā kə́ nge ko̰ sɔ́sɔ́ anī, Jeroboam rāā nāā kógə̄ḿ tām̄ yā ngán Israel gə̄ tə́. I nəkɔ́ n gə̄rā ndɔ̄ nāā ní. Ndɔ̄ ngeé ń noō tə́ nəkɔ́ al̄ dɔ loo tun̄ yá̰á̰ ń mēr̄ rāā tə́ ní yā róō yá̰á̰ kə́ kotə majə gə̄ dɔ tə́.

Currently Selected:

1 MBAN̄G GƏ̄ 12: SARDC

Highlight

Copy

Compare