1 MBAN̄G GƏ̄ 11

Salomo̰ rāā háĺ kə́ gōtə́ aĺ kə Kɔ́ɔ̄ɓēé

(Á̰a̰ī 2 Yá̰a̰ 11.18—12.1)

1Mban̄g Salomo̰ ń taā ngōn̄ mban̄g kə́ Ejiptə ní, táā dəyá̰ tə̄rā, aké rang gə̄ i ngá̰ý ɓáý to̰. Ni-taā dəyá̰ Moab gə̄ ō, Amon gə̄ ō, Edom gə̄ ō, Sidon gə̄ ō, Het gə̄ ō. 2Nin̄ i dəyá̰ gə̄ kə́ dan nápar de gə̄ ń Kɔ́ɔ̄ɓē tāā ngán Israel gə̄ najə̄ yādə́ tə́ ní, ədadə́ na kə lōōn̄ kudə dandə́ tə́ ō, kə lōōn̄ kəya̰də́ kadə̄ udən̄ dandə́ nin̄ tə́ ō. Tɔdɔ̄ na a rāān̄ kadə̄ ngán Israel gə̄ ndɔ̄ȳn̄ nə́ɓā yādə́ gə̄ ń i ɓesə̄ yādə́ gə̄ ní. Banī Salomo̰ əhɔ gō nápar de gə̄ ní adə̄ ngan̄g, tɔdɔ̄ ni gḛy dəyá̰ yādə́ gə̄ ní ngá̰ý. 3Nə̄yá̰n gə̄ ní kə́ kó ɓē gə̄ i ɓú sīrí ō, də̄yá̰ gidə ndogə̄ yān gə̄ i ɓú mətá ō. Dəyá̰ gə̄ ń noō malang tūrə̄n̄ dɔn kɔ̄ɔ́. 4Dan ń Salomo̰ tɔgə ɓə́gá ní, nə̄yá̰n gə̄ ní rāānən̄ adə̄ ndɔ̄ȳ nə́ɓā kə́ rang gə̄, ba lōō gíŕ táŕ Kɔ́ɔ̄ɓē Nə́ɓā yān tə́ kə ngarā̰ kemən gēé mámák tītə̄ yā bɔbə̄n Dabid. 5Salomo̰ rāā ɓesə̄ Astarte ń i ɓesə̄ kə́ dəyá̰ yā Sidon gə̄ ní ō, rāā ɓesə̄ Milkom ń i ɓesə̄ kə́ majaĺ ngá̰ý yā Amon gə̄ ní ō. 6Salomo̰ rāā yá̰á̰ kə́ majaĺ ngá̰ý ta kum Kɔ́ɔ̄ɓē tə́ ō, un gō Kɔ́ɔ̄ɓē mámák tītə̄ yā bɔbə̄n Dabid aĺ ō. 7Dan ngeé ń noō tə́ ní Salomo̰ rāā loo kə́ kḭḭ kə̄ dɔɔ́ dɔ mbal̄ ń ra sɔɔ̄ no ɓē kə́ Jerusalem ní tə́ tām̄ yā ɓesə̄ Kemos ń i ɓesə̄ kə́ majaĺ ngá̰ý yā Moab gə̄ ní tə́ ō, rāā loo kə́ kḭḭ kə̄ dɔɔ́ kə́ rang tām̄ yā ɓesə̄ Milkom ń i ɓesə̄ kə́ majaĺ ngá̰ý yā Amon gə̄ ní tə́ ō. 8Ni-rāā loo kə́ kḭḭ kə̄ dɔɔ́ gə̄ ní kógə̄ḿ kógə̄ḿ kə dɔ ɓesə̄ gə̄ yā nə̄yá̰n kə́ tə̄rā gə̄ ní malang. Dəyá̰ gə̄ ní a ndējə̄n̄ ɓesə̄ yādə́ gə̄ ndujə̄ yá̰á̰ kə́ kotə majə gə̄ ō, dā̰ kə́ tun̄ gə̄ ō. 9-10Kété ní Kɔ́ɔ̄ɓē Nə́ɓā yā Israel gə̄ ndōbə̄ Salomo̰ nja jōó ba ədan na kə lōō ndɔ̄ȳ nə́ɓā kə́ rang gə̄#11.9-10 Nə́ɓā kə́ rang gə̄: Ɓesə̄ gə̄ ń nə̄yá̰ Salomo̰ gə̄ a ndɔ̄ȳn̄ ní, deē yādə́ gə̄ a rāān̄ i nə́ɓā yādə́ gə̄ tə́.. Banī Salomo̰ rāā yá̰á̰ ń Kɔ́ɔ̄ɓē ədan ní alé. Loo ń noō tə́ wōn̄g rāā Kɔ́ɔ̄ɓē kə Salomo̰ 11adə̄ ədan na dan ń na rāā háĺ kə́ beé ō, madə̄ naā ń ni-ə́hɔ seneé ní na ngɔ̄m̄ aĺ ō, yá̰a̰ gə̄ ń n-ədan kadə̄ rāā ní na rāā aĺ ō ní, na n-a n-taā ko̰o̰ ɓē jīn tə́ kɔ̄ɔ́ yā kadə̄ nge kəla yān kógə̄ḿ. 12Ɓá tā ba tām̄ yā Dabid bɔbə̄ Salomo̰ tə́ ní, na n-a n-rāā yá̰á̰ ní na i dan ń Salomo̰ na ndiń kə kumneé tə́ toō alé. N-a n-taā ko̰o̰ ɓē ní na i jī ngōn̄ Salomo̰ tə́. 13N-a n-taā ko̰o̰ ɓē ní na i malang alé, n-a n-əya̰ gír ɓē kógə̄ḿ yā kadə̄ ngōn̄ Salomo̰ tām̄ yā Dabid bɔbə̄ Salomo̰ tə́ ō, tām̄ yā ɓē kə́ Jerusalem ń ni Kɔ́ɔ̄ɓē na n-gə̄rā ní tə́ ō.

Madə̄ ba̰ā̰ Salomo̰ gə̄

14Kɔ́ɔ̄ɓē sə̄lā madə̄ ba̰ā̰ kógə̄ḿ dɔ Salomo̰ tə́. Rīn na i Hadad. Ni i de kə́ Edom, gír kaan i gír kaa mban̄g. 15Kété dan ń Dabid rɔ̄ɔ̄ ɓē kə́ Edom ní, Joab ń i ngol áskar yān gə̄ ní ɔy ngé rɔ̄ɔ̄ yān gə̄ aw̄ dubə̄ń nīń ngán Israel gə̄ ń oyn̄ ta rɔ̄ɔ̄ tə́ ní kem ɓē kə́ Edom tə́. Gō tə́ anī ni tɔ̄l̄ de kə́ dəngam gə̄ kə́ kem ɓē kə́ Edom tə́ kɔ̄ɔ́ malang. 16Joab nin̄ kə ngé rɔ̄ɔ̄ yān gēé rāān̄ nāā mehḛ́ kem ɓē kə́ Edom tə́ gír tɔ̄l̄ de kə́ dəngam gə̄ tə́. 17Hadad a̰ȳ aw̄ Ejiptə kə de kə́ Edom kə́rēý gə̄ kə́ kété nin̄ i ngé rāā kəla yā bɔbə̄n gə̄. Dan ń noō tə́ ní Hadad na̰y ngōn̄ ɓáý. 18Nin̄ ḭḭn̄ Madian aw̄ ugə̄n̄ Paran. Ɔyn̄ de kə́ Paran gə̄ dɔdə́ tə́ ba aw̄n̄ Ejiptə rɔ̄ mban̄g Parao̰ tə́. Mban̄g Parao̰ adə̄ Hadad kújə ō, yá̰a̰ kəsa ō, adə̄n dɔ nang ō. 19Parao̰ rāā kem majə ngá̰ý kə Hadad. Ni-adə̄n ngōkó̰o̰ nə̄yá̰n Tapənes ń i mban̄g kə́ dəyá̰ ní adə̄ taā. 20Ngōkó̰o̰ Tapənes ojə ngōn̄ kə́ dəngam kə Hadad, anī Hadad əndā rī ngōn̄ ní na i Genubat. Tapənes ətō ngōn̄ ní i ndogó ɓē Parao̰, adə̄ ra i dan ngán Parao̰ gə̄ tə́. 21Dan ń Hadad i Ejiptə tə́ ɓáý ba oō kadə̄ Dabid na oy aw̄ gō kaan gə̄ tə́ kɔ̄ɔ́ ō, na ngol áskar gə̄ ń i Joab ní na oy kɔ̄ɔ́ ō anī, dəje Parao̰ kadə̄ əya̰n kadə̄ kə n-tél kə n-aw̄ gogə́ dɔ nang yān tə́. 22Anī Parao̰ tél dəjen na ké ndi rɔ̄n tə́ ní ké nal̄ i rí wa. Ké sāā tél kaw̄ gogə́ dɔ nang yān tə́ ní ké i tām̄ rí tə́ wa. Anī Hadad tél əda Parao̰ na n-nal̄ yá̰á̰ kógə̄ḿ alé ɓá tā ba kə əya̰n kadə̄ kə n-aw̄ nəkɔ́.

23Nə́ɓā sə̄lā madə̄ ba̰ā̰ kə́ rang ɓáý to̰ dɔ Salomo̰ tə́. Madə̄ ba̰ā̰ ní i Rejon kə́ ngōn̄ Eliada. Rejon a̰ȳ kɔ̄ɔ́ ɓē kɔ́ɔ̄n Hadadejer ń i mban̄g kə́ Soba ní tə́. 24Kem ɓāl̄ ń Dabid tɔ̄ləń ngé rɔ̄ɔ̄ gə̄ yā Hadadejer tə́ ní, Rejon ɔy de gə̄ gōn tə́ ba tél ngoldə́. Ni-aw̄ ndi sedə́ Damas. Ta tɔ̄l̄ ta anī o̰o̰ ɓē kə́ Damas. 25Adə̄ Rejon i madə̄ ba̰ā̰ Israel gə̄ ɓāl̄ ko̰o̰ ɓē yā Salomo̰ tə́. Tá Hadad a rāā Israel gə̄ majaĺ dām̄ kə́rēý tə́ ɓáý to̰.

Jeroboam tél madə̄ ba̰ā̰ Salomo̰

(Á̰a̰ī 2 Yá̰a̰ 9.29-31)

26-27Jeroboam mbātə́ najə̄ yā mban̄g. Najə̄ yān ní n toō: Jeroboam ngōn̄ Nebat i de kə́ gír ɓē yā Epəraim tə́. Rī ɓē yān na i Sereda ō, rī kó̰o̰n na i Serua ō. Kó̰o̰n i dəyá̰ kə́ ngaa koy. Nəkɔ́ Jeroboam i nge kəla yā Salomo̰ banī mbātə́ najə̄ yā Salomo̰ kɔ̄ɔ́. Dan ń Salomo̰ a rāań Milo#11.26-27 Milo: Á̰a̰ī 1 Mba 9.15 ō, a utə̄ń kum bəlo kə́ tū ndogə̄ mbal̄ kə́ gidə ɓē yā Dabid tə́ ō ní, 28Jeroboam i balsáá kə́ a̰a̰ já̰já̰ ō, əhɔ rɔ̄n tɔgə ngá̰ý ō. Dan ń Salomo̰ a̰a̰ kadə̄ ni-rāā kəla yān majanī, əndān kabata dɔ ngé kəla gə̄ kə́ gír kaa yā Epəraim tə́ ō, Manase tə́ ō. 29Ndɔ̄ kógə̄ḿ tə́ Jeroboam teē ndágá kɔ̄ɔ́ kem ɓē kə́ Jerusalem tə́ anī, nge koō ta yā Nə́ɓā kə́ Silo ń rīn na i Ahia ní əngen róbó. Nin̄ kɔ́ gə̄ i jōó beē ngóy bembeé. Kūbə̄ kə́ dɔ madə̄ tə́ kə́ kijə yā Ahia i rɔ̄n tə́. 30Anī ni-ɔr̄ kūbə̄ ni rə́yā̰ naā tə́ gír loo kutə gidə i jōó, 31ba əda Jeroboam na kə ɔy ta kūbə̄ kə́ gán̄g gə̄ ní kutə̄ kógə̄ḿ tɔdɔ̄ najə̄ ń Kɔ́ɔ̄ɓē Nə́ɓā yā Israel əda ní n toó, əda na n-a n-taā ko̰o̰ ɓē kɔ̄ɔ́ jī Salomo̰ tə́, ba na n-a n-adī ḭ̄ Jeroboam gír ɓē gə̄ kə́ kemeé kutə kógə̄ḿ. 32Ba gír ɓē kə́ kógə̄ḿ ń a nāy tām̄ yā Salomo̰ tə́ ní na i tām̄ yā Dabid kə́ nge kəla yān ni Kɔ́ɔ̄ɓē tə́ ō, tām̄ yā ɓē kə́ Jerusalem ń ni Kɔ́ɔ̄ɓē n-gə̄rā dan gír ɓē gə̄ malang kə́ Israel tə́ ní ō. 33Na n-a n-rāā yá̰á̰ ń noō na i tām̄ kəya̰ ń ngán Israel gə̄ na əya̰nən̄ ni Kɔ́ɔ̄ɓē kɔ̄ɔ́ ba na ndɔ̄ȳn̄ nə́ɓā Astarte ń i nə́ɓā kə́ dəyá̰ yā Sidon gə̄ ō, nə́ɓā Kemos ń i nə́ɓā yā Moab gə̄ ō, nə́ɓā Milkom ń i nə́ɓā yā Amon gə̄ ō ní tə́. Na unən̄ róbə gə̄ ń ni Kɔ́ɔ̄ɓē n-ɔjədə́ ní alé, adə̄ yá̰á̰ ń ta kumən ní tə́ i yá̰á̰ kə́ gōtə́ ní nin̄ na rāān̄ alé. Nin̄ na rāān̄ yá̰á̰ ń ndū najə̄ yān əda ní aĺ ō, na rāān̄ yá̰a̰ kə gō jī loo rāā yá̰a̰ gə̄ ń ni n-ɔjədə́ ní aĺ ō, yá̰á̰ ń Dabid bɔbə̄ Salomo̰ na rāā ní nin̄ na rāān̄ alé. 34Ɓá tā ba na n-a n-taā yá̰á̰ kógə̄ḿ kə́ kem ɓē ko̰o̰ ní tə́ jī Salomo̰ nəkɔ́ tə́ alé. Tɔdɔ̄ n-əndān kadə̄ ndi ngār dɔ gír deē yān gə̄ tə́ i kə dɔ ndɔ̄ gə̄ malang ń ni a ndiń kə́ kumneé ní tə́ tām̄ yā yā nge kəla yān Dabid tə́. Dabid ń na n-gə̄rān ní na oō tan adə̄ na rāā gō míndə gə̄ ń n-ədan kadə̄ rāā ní ō, na rāā yá̰a̰ gə̄ ń ndū najə̄ yān əda ní ō. 35Ba na n-a n-taā ko̰o̰ ɓē ní na i jī ngōn̄ Salomo̰ tə́. Na n-a n-adī ḭ̄ Jeroboam gír ɓē gə̄ kem ɓē ko̰o̰ ní tə́ kutə kógə̄ḿ. 36Na n-a n-əya̰ gír ɓē kə́ kógə̄ḿ yā kadə̄ ngōn̄ Salomo̰, yā kadə̄ nge kəla yān Dabid əngeń de kə́ gír kojə yān tə́ dɔ kōr̄ kāgə̄ mbang tə́ ngáńdáńg ta kum Kɔ́ɔ̄ɓē tə́ Jerusalem, ɓē ń ni Kɔ́ɔ̄ɓē n-gə̄rā yā kəndā rīn dɔ tə́ ní. 37Na n-a n-uniī ḭ̄ Jeroboam kadə̄ ā ó̰o̰ ɓē dɔ loo malang ń kemií a ndigə tə́ ní. Na ā ó̰o̰ ɓē dɔ Israel tə́. 38Ré na ōō yá̰a̰ malang ń n-ədaī ní ō, na ún gō róbə gə̄ ń n-ɔjiī ní ō, na ī-rāā yá̰á̰ kə́ gōtə́ ta kumən tə́ ō, na ī-rāā yá̰a̰ gə̄ kə gō ndū najə̄ gə̄ ń n-adī ní ō, na ī-rāā gō míndə gə̄ ń n-ədaī kadə̄ ī-rāā ní tītə̄ ń nge kəla yān Dabid rāań kété ní ō anī, ni na i naā tə́ seí ō, gír kojə yāí na a o̰o̰ ɓē ngándáńg tītə̄ gír kojə yā Dabid ō, na n-a n-adī Israel ō, 39yā kəlań rɔ̄sɔl̄ dɔ de gə̄ kə́ gír kojə yā Dabid tə́, banī na n-a n-əla rɔ̄sɔl̄ dɔdə́ tə́ na i ngándáńg alé.

40Salomo̰ sāā tɔ̄l̄ Jeroboam, anī ni a̰ȳ aw̄ Ejiptə, aw̄ ɓɔ̄ɔ̄ rɔ̄n ɓē Sisak mban̄g kə́ Ejiptə tə́. Ni-ndi noó bátə́ adə̄ Salomo̰ oyń. 41Gotə yá̰á̰ kə́ rang gə̄ malang ń Salomo̰ rāā ní ndangən̄ kem makətūbə̄ kəla rāā Salomo̰ tə́. Ndangən̄ kum kedə̄ yān gə̄ kemeé ō. 42Salomo̰ o̰o̰ ɓē dɔ ngán Israel gə̄ tə́ malang ɓāl̄ kutə sɔ́ kem ɓē kə́ Jerusalem tə́. 43Ni-oy aw̄ gō kaan gə̄ tə́ ba dubə̄nən̄ i kem ɓē yā bɔbə̄n Dabid tə́. I ngōnən Roboam n o̰o̰ ɓē gotən tə́ ní.

Currently Selected:

1 MBAN̄G GƏ̄ 11: SARDC

Highlight

Copy

Compare