1 MBAN̄G GƏ̄ 10
10
Mban̄g kə́ dəyá̰ kə́ Saba reē go̰ō̰ Salomo̰ tə́
(Á̰a̰ī 2 Yá̰a̰ 9.1-12)
1Mban̄g kə́ dəyá̰ kə́ Saba oō najə yā Salomo̰, tɔdɔ̄ rī Salomo̰ ɓār̄ ngá̰ý sɔɔ̄ń rī Kɔ́ɔ̄ɓē. Ni-reē kənge Salomo̰ tə́ yā nāā kum kedə̄ yān kə najə̄ kə́ ngan̄g ngan̄g gēé. 2Reē ugə̄ Jerusalem kə de kə́ ngá̰ý gēé gōn tə́ ō, kə jámbal gə̄ kə́ ətōn̄ yá̰á̰ kə́ kotə majə gə̄ ō, lɔ́ŕ kə́ ngá̰ý ō, mbal̄ gə̄ kə́ gātə̄də́ i ngá̰ý gə̄ ō. Dan ń ugə̄ rɔ̄ Salomo̰ tə́ anī, yá̰a̰ malang ń ni núm̄ kemən tə́ yā kɔr̄ seneé ní ɔr̄ seneé.
3Salomo̰ tūrə̄n najə̄ malang ń ni dəjen ní, najə̄ kógə̄ḿ kə́ dumə̄n gətóo. 4Mban̄g kə́ dəyá̰ kə́ Saba oō najə̄ kɔr̄ Salomo̰ gə̄ kə́ kum kedə̄ i ngá̰ý kemeé gə̄ ō, a̰a̰ kújə́ ń rāā ní ō, 5yá̰a̰ kəsa gə̄ ń a reēn̄neé kə̄ dɔ tábəl gə̄ tə́ ní ō, loo ndi yā ngé kəla yān gə̄ ō, a̰a̰ kūbə̄ ko̰ō̰ ngé kadə̄ de gə̄ yá̰a̰ kəsa ō, man̄ ka̰ȳ ō, a̰a̰ yá̰á̰ kə́ tun̄ gə̄ ń Salomo̰ a ndējə̄ Kɔ́ɔ̄ɓē kem kújə yā Kɔ́ɔ̄ɓē tə́ ní ō. Yá̰a̰ gə̄ ń noō malang yáān ngá̰ý, 6-7adə̄ əda mban̄g na dan ń na n-ndi ɓēé ní na n-oō najə̄ yān ō, na n-oō najə̄ kum kedə̄ yān ō. Ba dan ń nəkɔ́ na n-reē n-a̰a̰ kə kumneé aĺ ɓáý ní, na n-taā kem najə̄ gə̄ ń ədanən̄ ní alé. Ba yá̰a̰ malang ń ədanən̄ ní na i yá̰á̰ kə́ rɔ̄kum. Ba kum kedə̄ yā Salomo̰ gə̄gē, yá̰a̰ kənge yān gə̄gē malang ní na tɔȳ nge ń n-oō ní say: Núsən gə̄gē nge ń n-oō ní na əndā gō tə́ alé. 8Na ngé kəla yā Salomo̰ gə̄gē, de gə̄ malang kə́ ndogó ɓē Salomo̰ gə̄gē ní rɔ̄də́ na nel̄də́, tɔdɔ̄ nin̄ na i rɔ̄ Salomo̰ tə́ kə ndɔ̄ gə̄, adə̄ na a oōn̄ najə̄ kɔrə̄n kə́ kə kum kedēé gə̄. 9Kɔ́ɔ̄ɓē Nə́ɓā yā Salomo̰ ń gə̄rā Salomo̰ kadə̄ o̰o̰ ɓē dɔ Israel gə̄ tə́ ní, ādə̄ de gə̄ ɓōkə́nən̄ tɔ̄ȳ. Kɔ́ɔ̄ɓē na tár Israel gə̄ na i kə́ njɔ́ḿ gə̄ tə́ á na əndā Salomo̰ kadə̄ ni i mban̄g yādə́ kadə̄ gān̄g sarya yādə́ kə gō gēé ní. 10Gō tə́ anī mban̄g kə́ dəyá̰ kə́ Saba ní adə̄ mban̄g Salomo̰ lɔ́ŕ kə́ kɔȳn malang asə kəlōo dūbú mətá kə núsə ō, adə̄n yá̰á̰ kə́ kotə majə gə̄ ngá̰ý ō, mbal̄ gə̄ kə́ gātə̄də́ i ngá̰ý gə̄ ō. Yá̰á̰ kə́ kotə majə gə̄ ń ni reēń adə̄ mban̄g Salomo̰ ní, kə́ rang kə́ asə beé gətóo i kə́ bátə́ gə̄ tə́.
11To bo gə̄ yā Hiram ń reēn̄ kə lɔ́ŕ kə́ Opir ní, reēn̄ kə kāgə̄ santal ngá̰ý ō, mbal̄ gə̄ kə́ gātə̄də́ i ngá̰ý gə̄ ō. 12Mban̄g rāā yá̰a̰ ndə̄nā rɔ̄ kə́ tū kújə yā Kɔ́ɔ̄ɓē tə́ ō, kə́ tū kújə yā mban̄g tə́ ō, kənde gə̄ kə́ tām̄ yā gōsə̄ pā gə̄ tə́ ō, kə kāgə̄ santal gə̄ ní. Kāgə̄ santal kə́ rang reē gogə́ to̰ aĺ ō, deē a̰a̰ń kāgə̄ santal to̰ aĺ i kə́ bátə́ gə̄ tə́ ɓōólaā ō. 13Salomo̰ adə̄ mban̄g kə́ dəyá̰ yá̰a̰ malang ń kemən gḛy ní. Ni-adə̄n kadə̄ karī gə̄ ngá̰ý dɔ tə́ ɓáý to̰. I mban̄g Salomo̰ ngóy n asə kadə̄ kadə̄ karī kə́ tītə̄ ń noō ní. Gō tə́ anī mban̄g kə́ dəyá̰ kə́ Saba nin̄ kə nge kəla yān gēé tə́lən̄ dɔ tə́ aw̄n̄ gogə́ dɔ nang yādə́ tə́.
Ngán najə kə́ sḛ́ý sḛ́ý gə̄ kə́ dɔ yá̰a̰ kənge yā Salomo̰ tə́
(Á̰a̰ī 2 Yá̰a̰ 1.14-17; 9.13-28)
14Lɔ́ŕ kə́ kem ɓāl̄ kógə̄ḿ beē ń Salomo̰ a ənge ní, kɔȳn malang i kəlōo dūbú kutə jōó 15kanjə̄ tə́da yā ngé njə̄rā mbā gə̄ ō, yā ngé rāā gātə̄ gə̄ ō, yā mban̄g gə̄ malang kə́ no ɓē tə́ ō, yā ngé ko̰o̰ ɓē gə̄ kə́ kem ɓēé ō.
16Mban̄g Salomo̰ rāā der lɔ́ŕ kə́ bo bo gə̄ ɓú jōó kə lɔ́ŕ kə́ tām̄ yā deē kógə̄ḿ kə́ bo tə́ i kəlōo mehḛ́. 17Ni-rāā de lɔ́ŕ kə́ dūú gə̄ ɓú mətá kə lɔ́ŕ kə́ kəndaá ō. Kɔȳ lɔ́ŕ kə́ tām̄ yā der kógə̄ḿ kə́ dūú tə́ i kəlōo kógə̄ḿ kə núsə́. Mban̄g kán̄ de gə̄ ní kem kújə́ ń a ɓārə́n̄ na i ku kāgə̄ gə̄ kə́ Liban ní tə́. 18Mban̄g rāā kōr̄ kāgə̄ mban̄g kə́ bo kə ngān̄g dā̰á̰ ba rāā lɔ́ŕ kə́ unjə̄ njáý njáý gidə tə́. 19Kōr̄ kāgə̄ mbang ní ndi i dɔ loo kə́ kḭḭ kə̄ dɔɔ́ tə́. Loo gə̄ kə́ kadə̄ deē tə́ndā njan tū tə́ tá al̄ aw̄ ndiń kemeé ní gír i mehḛ́, ba loo ndə̄nā dūn̄ kə́ tū tə́ i kə́ kū. Loo kə́ tū tə́ kə́ yā kadə̄ deē tə́nī jīn dɔ tə́ i dām̄ jōó. Ɓɔl gə̄ ran̄ kə gō kadaá dām̄ jōó. 20Ba loo kə́ mehḛ́ gə̄ kə́ kadə̄ deē tə́ndā njan tū tə́ ní, rāān̄ ɓɔl gə̄ kutə gidə i jōó kə gō kadaá, mehḛ́ dām̄ kə́rēý tə́ ō, mehḛ́ dām̄ kə́ noō tə́ ō. Rāān̄ yá̰á̰ kə́ tītə̄ ń noō kem ɓē ko̰o̰ kə́rēý tə́ aĺ ɓáý. 21Kópə yā mban̄g Salomo̰ gə̄ malang i kə́ rāān̄də́ kə lɔ́rɔ́ ō, ngáń gájə́ yá̰a̰ rāā kəla gə̄ malang kə́ kem kújə́ ń rīn na i ku kāgə̄ gə̄ kə́ Liban tə́ ní i kə́ rāā kə lɔ́ŕ kə́ unjə̄ njáý ō. Deē rāā yá̰a̰ kə gində̄ arjā̰a̰á̰ alé. Tɔdɔ̄ ɓāl̄ yā Salomo̰ tə́ ní, de gə̄ rāān̄ gində̄ arjā̰a̰ i yá̰á̰ tə́ alé. 22Mban̄g Salomo̰ aw̄ kə to bo gə̄ kə́ Tarsis kə́ a əladə́ loo kə́ sa̰y gə̄ tə́ naā tə́ kə to bo gə̄ yā Hiram. Kə dɔ ɓāl̄ mətá gə̄ malang noō to bo gə̄ ní a télən̄ kə lɔ́r gə̄, kə gində̄ arjā̰a̰ gə̄, kə ngān̄g dā̰ gə̄, kə ɓetə̄ gə̄ kə yel̄ pá̰a̰ gə̄#10.22 Yel̄ pá̰a̰: I yel̄ kə́ majə ngá̰ý kə́ ngār gə̄ n a ulə̄n̄.. 23Mban̄g Salomo̰ tɔȳ gotə mban̄g gə̄ malang kə́ dɔ nang tə́ kə yá̰a̰ kənge yānneé ō, kə kum kedə̄ yānneé ō. 24De kə́ dɔ nang tə́ gə̄ malang a sāān̄ i ka̰a̰ Salomo̰ yā koō najə̄ kə́ kə kum kedēé gə̄ ń Nə́ɓā adə̄n kemən tə́ ní. 25Kə dɔ ɓāl̄ gə̄ ń noō nin̄ a reēn̄ i kə yá̰á̰ kə́ rāā kə gində̄ arjā̰a̰ gə̄ ō, kə́ rāā kə lɔ́r gə̄ ō, kūbə̄ gə̄ ō, yá̰a̰ rɔ̄ɔ̄ gə̄ ō, yá̰á̰ kə́ kotə majə gə̄ ō, sə́nda gə̄ ō, kərō rapáy#10.25 Kərō rapáy: Á̰a̰ī 2 Sam 19.29 gə̄ ō n a ndējə̄n̄ Salomo̰ ní.
26Salomo̰ kán̄ púsə rɔ̄ɔ̄ yān gə̄ ō, sə́nda yān gə̄ ō. Púsə rɔ̄ɔ̄ yān gə̄ i dūbú kə ɓú sɔ́ ō, sə́nda yān gə̄ i dūbú kutə gidə i jōó ō. Ni ngɔ̄m̄ núsə́ kə́rēý gə̄ rɔ̄n tə́ Jerusalem, ba aw̄ kə gotə gēé kem ɓē gə̄ ń kadə̄ ngɔ̄mə̄n̄də́ tū tə́ ní tə́. 27Mban̄g rāā yá̰a̰ adə̄ gində̄ arjā̰a̰ kə́ Jerusalem i ngá̰ý tītə̄ kɔkərɔ beé ō, kāgə̄ sédər i ngá̰ý tītə̄ kāgə̄ sikomor gə̄ kə́ dɔ nang kə́ mbal̄ bo gə̄ gətóon̄ tū tə́ tə́ beē ō. 28Sə́nda yā Salomo̰ gə̄ i sə́nda kə́ a ḭḭn̄ sedə́ i dɔ nang kə́ Ejiptə tə́ ō, dɔ nang kə́ Silisi tə́ ō. Ngé rāā gātə̄ gə̄ a aw̄ a mangən̄də́ i loo gə̄ ń noō tə́ tām̄ yā mban̄g tə́. 29Púsə́ kə́ kḭḭń Ejiptə tə́ ní, gātə̄n i njáŕ sə́lē arjā̰a̰ ɓú mehḛ́, ba sə́nda i njáŕ sə́lē arjā̰a̰ ɓú kə kutə mí. Ngé rāā gātə̄ kə́ kógə̄ḿ beē gə̄ nəkɔ́ ń toō a reēn̄neé tām̄ yā mban̄g yā Het gə̄ tə́ ō, mban̄g gə̄ kə́ Aram tə́ ō.
Currently Selected:
1 MBAN̄G GƏ̄ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
