1 MBAN̄G GƏ̄ 9
9
Kɔ́ɔ̄ɓē ndɔ̄bə̄ Salomo̰ nja kə́ nge ko̰ jōó
(Á̰a̰ī 2 Yá̰a̰ 7.11-22)
1Dan ń Salomo̰ rāā kújə yā Kɔ́ɔ̄ɓē oy ō, rāā kújə mban̄g yān nəkɔ́ oy ō, rāā yá̰á̰ kə́ rang gə̄ ń ni sāā rāā ní oy ō anī, 2Kɔ́ɔ̄ɓē ndɔ̄bən nja kə́ nge ko̰ jōó. Ndɔ̄bən i tītə̄ ń ndɔ̄bənneé kem ɓē kə́ Gabaon tə́ kété ní. 3Kɔ́ɔ̄ɓē ədan na n-oō ndɔ̄ȳ yān ō, rāā ń na rāān ɓɔ́ ní na n-oō ō: Kújə́ ń na rāā ní na n-ɔr̄ kamə̄n tayā kadə̄ rīn kə ɓār̄ dɔ tə́ ngándáńg. Kumən na a ra dɔ tə́ ō, kemən na i dɔ tə́ ō, ngándáńg. 4Ré Salomo̰ na njə̄rā kə̄ non tə́ tītə̄ ń bɔbə̄n Dabid na njə̄rań kété ní kə kem kə́ rɔ̄kum ō, kə háĺ kə́ súmūú ō, ré na rāā yá̰a̰ malang ń n-ədan kadə̄ rāā ní ō, rāā yá̰á̰ ń ndū najə̄ yān əda ní ō, rāā yá̰a̰ kə gō jī loo rāā yá̰á̰ ń ni n-ɔjə ní ō anī, 5n-a n-rāā kadə̄ kōr̄ kāgə̄ mbang yān a ndi ngándáńg dɔ Israel tə́, tītə̄ ń n-ədań bɔbə̄n Dabid kété ní. Ni-əda bɔbə̄n Dabid kété na ngándáńg deē kógə̄ḿ kə́ gír yān tə́ na a ndi dɔ kōr̄ kāgə̄ mbang kə́ Israel tə́. 6Ba ré nin̄ ō, ngáńdə́ gə̄ ō, na tūrə̄n̄ gidədə́ kɔ̄ɔ́ tan tə́ ō, na rāān̄ gō míndə ń n-ədadə́ kadə̄ rāān̄ ní aĺ ō, na rāān̄ yá̰á̰ ń ndū najə̄ yān əda ní aĺ ō, na aw̄ rāān̄ kəla adə̄n̄ nə́ɓā kə́ rang gə̄ ō, ɔsən̄ nodə́ nang tə́ nodə́ tə́ ō anī, 7na n-a n-tə̄ɓā ngán Israel gə̄ dɔ nang ń n-adə̄də́ tə́ ní kɔ̄ɔ́ ō, na n-a n-mbātə́ kújə́ ń n-ɔr̄ kamə̄n tayā kadə̄ ɓārə̄n̄ rīn dɔ tə́ ní ō, adə̄ n-a n-əndā kumən dɔ tə́ to̰ alé. Adə̄ Israel a tél i mēlē tām̄ ō, kur̄ kəgō ō, yā gír de gə̄ malang. 8Kújə́ kə́ ngāl̄ ngá̰ý kum kə̄ dɔɔ́ ń toō ní de gə̄ malang ń a mānə̄n̄ kadə tə́ ní a ɔr kumdə́ ngá̰ý ō, a yáādə́ ngá̰ý ō. Adə̄ a dəjen̄ na ké i tām̄ rí tə́ áké Kɔ́ɔ̄ɓē rāā yá̰á̰ kə́ tītə̄ ń toō kə ɓē ń toō ō, kə kújə́ ń toō ō wa. 9Anī a tél a ədan̄də́ na i tɔdɔ̄ nin̄ əya̰n̄ Kɔ́ɔ̄ɓē Nə́ɓā yādə́ ń teē kə kaadə́ gēé kɔ̄ɔ́ kem ɓē kə́ Ejiptə tə́ ní. Nin̄ əya̰nən̄ kɔ̄ɔ́ ba tél namə̄n̄ kə nə́ɓā kə́ rang gə̄ ō, ɔsən̄ nodə́ nang tə́ nodə́ tə́ ō, rāān̄ kəla adə̄n̄də́ ō. I tām̄ ń noō tə́ n Kɔ́ɔ̄ɓē reēń kə yá̰á̰ kə́ to kum kaȳ aĺ gə̄ malang ń toō dɔdə́ tə́ ní.
Kəla kə́ tayā tayā gə̄ ń Salomo̰ rāā ní
(Á̰a̰ī 2 Yá̰a̰ 8.1-18)
10-11Hiram mban̄g kə́ Tir, adə̄ Salomo̰ kāgə̄ sédər gə̄ ō, kāgə̄ sipəres gə̄ ō, lɔ́r malang ń sāā yā rāań kəla kújə gə̄ ní ō. Salomo̰ rāā kújə yā Kɔ́ɔ̄ɓē ō, kújə yān nəkɔ́ ō, oy i kem ɓāl̄ kutə jōó. Dan ń gír ɓāl̄ kə́ kutə jōó gə̄ ní gāngə̄n̄ anī, Salomo̰ adə̄ Hiram ɓē kutə jōó gō nang kə́ Galile tə́. 12Hiram ḭḭ Tir reē ka̰a̰ ɓē gə̄ ń Salomo̰ adə̄n tə́ ní ba nelə̄n kə ɓē gə̄ ní alé, 13adə̄ ni-əda na ké i ɓē kə́ ba̰ý gə̄ n ngōkó̰o̰n Salomo̰ adə̄n toó wa. I tām̄ najə̄ ń noō tə́ n bátə́ ɓōólaā gə̄gē a ɓārə́n̄ gō nang ń noō na i ɓē kə́ Kabul#9.13 Kabul, i tītə̄ najə̄ kə́ kə ta Hebəroó ń kumən na i yá̰a̰ aĺ ní. ní. 14Hiram əla kə lɔ́ŕ kə́ kɔȳn i kəlōo dūbú mətá kə núsə adə̄ Salomo̰.
15Mban̄g Salomo̰ ɔy de gə̄ kəla ngámbá tə́ rāań kújə yā Kɔ́ɔ̄ɓē ō, kújə yān nəkɔ́ ō, nán̄g kə́ ra dɔ naā tə́ bing ba gidə asə naā ń a ɓārə́n̄ na i Milo#9.15 Milo: Á̰a̰ī 2 Sam 5.9; 1 Mba 9.24 ní ō, ndogə̄ mbal̄ kə́ Jerusalem ō, ɓē kə́ Hasor ō, Megido ō, Gejer ō. 16Kété ní Parao̰ ń i mban̄g kə́ Ejiptə ní aw̄ ənī ɓē kə́ Gejer rɔ̄ɔ̄. Ni-taā ɓē ní, tɔ̄l̄ Kanaan gə̄ ń ndin̄ kemeé ní kɔ̄ɔ́ malang ba əla hor dɔ ɓē tə́. Ba dan ń ngōnən taā Salomo̰ anī, adə̄ ngōnən ɓē ní kadə̄ karī tə́. 17I tām̄ najə̄ ń noō tə́ ń Salomo̰ rāań ɓē kə́ Gejer gogə́ rang ní. Ni-rāā ɓē kə́ Bet Horon kə́ wól loo tə́ ō, 18Baalat ō, Tamar ń i ɓē kə́ kem dəla loo kə́ dɔ nang yā Juda tə́ ní ō, 19ni-rāā ɓē kə́ bo gə̄ malang ń a kán̄ yá̰a̰ yān gə̄ kemeé ní ō, ɓē bo gə̄ ń a tə́ndā púsə rɔ̄ɔ̄ yān gə̄ kemeé ní ō, ɓē bo gə̄ kə́ tām̄ yā sə́nda yān gə̄ tə́ ō. Salomo̰ rāā kújə gə̄ malang ń kemən gḛy ní kem ɓē kə́ Jerusalem tə́ ō, dɔ mbal̄ Liban tə́ ō, kem ɓē gə̄ malang ń əlan̄ dɔdə́ gíŕ tɔ́gə yān tə́ ní ō.
20Kété ní gotə Amor gə̄ ō, Het gə̄ ō, Periji gə̄ ō, Hibi gə̄ ō, Yebus gə̄ ō, nayn̄ kem ɓēé. Nin̄ i Israel gə̄ alé. 21Ngáńdə́ gə̄ ń nayn̄ gotədə́ tə́ kem ɓēé á ngán Israel gə̄ asən̄ tɔ̄l̄də́ malang kɔ̄ɔ́ aĺ ní, Salomo̰ ɔydə́ adə̄ rāān̄ kəla ngámbá bátə́ ɓōólaā. 22Salomo̰ adə̄ ngán Israel gə̄ rāān̄ kəla ngámba alé, tɔdɔ̄ nin̄ i ngé rɔ̄ɔ̄ gə̄ ō, ngé kəla yān gə̄ ō, ngār yān gə̄ ō, go̰ rɔ̄ɔ̄ yān gə̄ ō, ngol ngé kal̄ púsə rɔ̄ɔ̄ gə̄ ō, ngol ngé kal̄ sə́nda yān gə̄ ō. 23Ngāgəra dɔ kəla gə̄ ń gə̄rāndə́ kadə̄ əndān̄ kumdə́ gír kəla gə̄ ń de gə̄ a rāān̄ tām̄ yā Salomo̰ tə́ ní kutədə́ i ɓú mí kə kutə mí.
24Dan ń ngōn̄ Parao̰ kə́ dəyá̰ ndɔ́tə̄ kɔ̄ɔ́ kem ɓē yā Dabid tə́ ba aw̄ ndi kem kújə́ ń rāān̄ tām̄ yān tə́ ní anī, Salomo̰ rāā Milo.
25Salomo̰ a ndējə̄ Kɔ́ɔ̄ɓē yá̰a̰ tun̄ kə́ róō horoó ō, yá̰a̰ tun̄ kə́ tām̄ yā kem kógə̄ḿ tə́ ō, dɔ loo tun̄ yá̰á̰ ń rāā tām̄ yā Kɔ́ɔ̄ɓē tə́ ní i nja mətá kem ɓāl̄ kógə̄ḿ ō, ni a róō ndujə̄ yá̰á̰ kə́ kotə majə i dɔ loo tun̄ yá̰á̰ ń ra no Kɔ́ɔ̄ɓē tə́ ní ō. I beé n ni rāań adə̄ kum rāā kújə́ ní toń ní.
26Mban̄g Salomo̰ rāā to bo gə̄ Esion Geber, ngɔr kə̄ Elat, kadə bā tə̄ɓā gə̄ tə́, dɔ nang kə́ Edom tə́. 27Hiram adə̄ Salomo̰ ngé kəla yān gə̄ kə́ gerə̄n̄ bā bo majə, adə̄ nin̄ i naā tə́ kə ngé kəla yā Salomo̰ gēé. 28Nin̄ aw̄n̄ bátə́ Opir, aw̄ ɔyn̄ lɔ́ŕ kə́ tū tə́ reēn̄neé adə̄n̄ mban̄g Salomo̰. Lɔ́ŕ ń reēn̄neé ní kɔȳn tɔȳ kəlōo dūbú kutə gidə i jōó.
Currently Selected:
1 MBAN̄G GƏ̄ 9: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
