1 YÁ̰A̰ GƏ̄ 25

Gír ɓūtə̄ gə̄ yā ngé kənī pā gə̄

1De kə́ gír kaa yā Asap tə́ gə̄ ō, Heman tə́ gə̄ ō, Yedutun tə́ gə̄ ō ń nin̄ i ngé dān̄ gō najə̄ kɔr̄də́ kə́ loo ngé koō ta gə̄ tə́ i kə kənde gə̄ kə́ kəlādə́ i ngá̰ý gə̄ ō, kə́ kəlādə́ i ngá̰ý aĺ gə̄ ō, i kə gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō ní, Dabid nin̄ kə ngāgəra dɔ ɓūtə̄ gə̄ kə́ dɔ kəla rɔȳ Nə́ɓā tə́ gə̄ ɔrə̄n̄ kam̄də́ tayā tām̄ yā kəla rɔȳ Nə́ɓā tə́. Rī de gə̄ ń a rāān̄ kəla ń noō ní n toó:

2Ngán Asap gə̄ i Jakur ō, Jəjep ō, Netania ō, Asarela ō. Jama dɔdə́ i bɔbə̄də́ Asap, ba bɔbə̄də́ a ɔr̄ najə̄ kə́ loo nge koō ta tə́ i kə gō ń mban̄g a dəjenneé ní.

3Ngán Yedutun gə̄ i Gedalia ō, Seri ō, Yesaya ō, Simei ō, Hasabia ō, Matitia ō. Nin̄ mehḛ́ mbak ní i bɔbə̄də́ Yedutun n ɔr nodə́ ní. Bɔbə̄də́ i nge dān̄ gō najə̄ kɔrə̄n kə́ loo nge koō ta tə́ i kə kəndeé yā kɔsəń gɔn Kɔ́ɔ̄ɓē ō, yā tɔ̄ȳnneé ō.

4Ngán Heman gə̄ i Bukia ō, Matania ō, Ujiel ō, Sebuel ō, Yerimot ō, Hanania ō, Hanani Eliata ō, ō, Gidalti ō, Romameti Ejer ō, Yosebekasa ō, Maloti ō, Hotir ō, Mahajiot ō. 5Ngán Heman gə̄ malang n noó. Heman i nge ka̰a̰ yá̰a̰ yā mban̄g. I ni n i nge kəda mban̄g najə̄ kə́ ta Nə́ɓā tə́ yā kɔsəń gɔnən ō, yā kadə̄nəń tɔ́gə ō ní. Nə́ɓā adə̄ Heman ngán kə́ dəngam gə̄ kutə gidə i sɔ́ ō, ngán kə́ dəyá̰ gə̄ mətá ō.

6De gə̄ malang ń noó i bɔbə̄də́ n i nge kɔr̄də́ ta róbə́ á a ənīn̄neé pā kem kújə yā Kɔ́ɔ̄ɓē tə́ ní. A dānə̄n̄ gō pā yādə́ i kə gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, i kə kənde gə̄ kə́ kəlādə́ i ngá̰ý gə̄ ō, kə́ kəlādə́ i ngá̰ý aĺ gə̄ ō. I mban̄g ō, Asap ō, Yedutun ō, Heman ō n i ngé kɔr nodə́ loo rāā kəla yādə́ tə́ tām̄ yā kújə yā Nə́ɓā tə́ ní. 7Gōsə̄ pā gə̄ ō, de kə́ kem ɓūtə̄ yādə́ gə̄ tə́ ń ndóōn̄də́ loo kənī pā tɔ̄yń Kɔ́ɔ̄ɓē ō ní, nin̄ malang naā tə́ i deē ɓú jōó kə kutə sɔ́sɔ́ kə kalən kə́ sɔ́sɔ́. 8Yā kadə̄ kəla njə̄rań kə gōó majə ní, túgə̄n̄ i wə̄lā tām̄ yā de kə́ tɔgə gə̄ tə́ ō, ngán gə̄ tə́ ō, ngol de gə̄ tə́ ō, de kə́ nge ndóō yá̰á̰ tə́ ō, kanjə̄ kɔr̄ kam̄ deē.

9-31Ngār gə̄ kə́ dɔ ɓūtə̄ gə̄ tə́ ń wə̄lā ɔjə dɔdə́ ní rīdə́ n toó: Wə̄lā kə́ ta kəga dɔ ɔjə i dɔ Jəjep ngōn̄ Asap. Kə́ nge ko̰ jōó ɔjə i dɔ Gedalia. Kə́ nge ko̰ mətá ɔjə i dɔ Jakur. Kə́ nge ko̰ sɔ́ ɔjə i dɔ Isəri, kə́ nge ko̰ mí ɔjə i dɔ Netania, kə́ nge ko̰ mehḛ́ ɔjə i dɔ Bukia. Kə́ nge ko̰ sīrí ɔjə i dɔ Yesarela. Kə́ nge ko̰ sɔ́sɔ́ ɔjə i dɔ Yesaya. Kə́ nge ko̰ ndōhó ɔjə i dɔ Matania. Kə́ nge ko̰ kutə ɔjə i dɔ Simei. Kə́ nge ko̰ kutə gidə i kógə̄ḿ ɔjə i dɔ Ajarel. Kə́ nge ko̰ kutə gidə i jōó ɔjə i dɔ Hasabia. Kə́ nge ko̰ kutə gidə i mətá ɔjə i dɔ Subael. Kə́ nge ko̰ kutə gidə i sɔ́ ɔjə i dɔ Matitia. Kə́ nge ko̰ kutə gidə i mí ɔjə i dɔ Yeremot. Kə́ nge ko̰ kutə gidə i mehḛ́ ɔjə i dɔ Hanania. Kə́ nge ko̰ kutə gidə i sīrí ɔjə i dɔ Yosebekasa. Kə́ nge ko̰ kutə gidə i sɔ́sɔ́ ɔjə i dɔ Hanani. Kə́ nge ko̰ kutə gidə i ndōhó ɔjə i dɔ Maloti. Kə́ nge ko̰ kutə jōó ɔjə i dɔ Eliata. Kə́ nge ko̰ kutə jōó gidə i kógə̄ḿ ɔjə i dɔ Hotir. Kə́ nge ko̰ kutə jōó gidə i jōó ɔjə i dɔ Gidalti. Kə́ nge ko̰ kutə jōó gidə i mətá ɔjə i dɔ Mahajiot. Kə́ nge ko̰ kutə jōó gidə i sɔ́ ɔjə i dɔ Romameti Ejer.

Ngār kə́ dɔ ɓūtə̄ kə́ kógə̄ḿ tə́ naā tə́ kə ngánən gə̄ ō, ngákó̰o̰n gə̄ ō ní, malang ɓáa nin̄ i deē kutə gidə i jōó. I tītə̄ ń noō kə dɔ ɓūtə̄ gēé malang.

Currently Selected:

1 YÁ̰A̰ GƏ̄ 25: SARDC

Highlight

Copy

Compare