1 YÁ̰A̰ GƏ̄ 26

Ɓūtə̄ gə̄ yā ngé ra ta róbə́ kújə́ tə́ gə̄

1Ɓūtə̄ gə̄ yā ngé ra ta róbə́ kújə́ tə́ gə̄ i noó ō. Meselemia kə́ ngōn̄ Kore kə́ ngōn̄ Abiasap kə́ gír kaa yā Kore tə́ 2ojə ngán gə̄ i sīrí. Nge kə́ ta tɔ́gə rīn na i Jakari. Nge kə́ ko̰ jōó rīn na i Yediael. Nge kə́ ko̰ mətá rīn na i Jebadia. Nge kə́ ko̰ sɔ́ rīn na i Yatəniel, 3nge kə́ ko̰ mí rīn na i Elam. Nge kə́ ko̰ mehḛ́ rīn na i Yohanan. Nge kə́ ko̰ sīrí rīn na i Eliohenai.

4-5Ngán Obed Edom gə̄ i sɔ́sɔ́ tɔdɔ̄ Nə́ɓā rāā majə seneé. Rī ngōnən kə́ nga tɔ́gə na i Semaya. Rī gidən na i Yehojabad. Rī nge kə́ ko̰ mətá na i Yoa. Rī nge kə́ ko̰ sɔ́ na i Sakar. Rī nge kə́ ko̰ mí na i Netanel. Rī nge kə́ ko̰ mehḛ́ na i Amiel. Rī nge kə́ ko̰ sīrí na i Isakar. Rī nge kə́ ko̰ sɔ́sɔ́ na i Pewultai. 6Ngōnən kə́ ngatɔ́gə́ ń rīn na i Semaya ní ojə ngán kə́ dəngam gə̄ kə́ ndin̄ dɔ de gə̄ kə́ kem kojə yādə́ gə̄ tə́, tɔdɔ̄ nin̄ i de kə́ ngáā gə̄. 7Ngán Semaya gə̄ i Otəni ō, Repael ō, Obed ō, Eljabad naā tə́ kə ngákó̰o̰n gə̄ ń i de kə́ ngáā gə̄ ní ō, adə̄ i Elihu ō, Semakia ō. 8Nin̄ malang i ngán Obed Edom gə̄. Nin̄ ō, ngándə́ gə̄ ō, ngákó̰ó̰də́ gə̄ ō ní, nin̄ i de kə́ ngáā gə̄. Tɔdɔ̄ ɔjən̄ tɔ́gə́də́ tū kəla rāādə́ gə̄ tə́. Nin̄ malang i deē kutə mehḛ́ gidə i jōó.

9Deē yā Meselemia gə̄ i ngánən gə̄ ō, ngákó̰o̰n gə̄ ō. Nin̄ malang i deē kutə gidə i sɔ́sɔ́, i de kə́ ngáā gə̄.

10Hosa ń i de kə́ gír kaa yā Merari tə́ ní, ojə ngán gə̄ i sɔ́. Ngār yādə́ i Simri. I ni n i ngōn̄ hágə́ ní alé, ba i bɔbə̄n n əndān ngār ní. 11Kə́ nge ko̰ jōó i Hilkia. Kə́ nge ko̰ mətá i Tebalia. Kə́ nge ko̰ sɔ́ i Jakari. Deē yā Hosa gə̄ ń i ngánən gə̄ ō, ngákó̰o̰n gə̄ ō ní, nin̄ malang i deē kutə gidə i mətá.

12Ngol de gə̄ ō, de gə̄ kə́ kem ɓūtə̄ gə̄ tə́ ō ń nin̄ i ngé ngɔ̄m̄ ta róbə gə̄ ní, a rāān̄ kəla yādə́ i naā tə́ malang kem kújə yā Kɔ́ɔ̄ɓē tə́. 13Nin̄-túgə̄n̄ i wə̄lā n adə̄n̄neé naā ta róbə gə̄ kə́ yā ngɔ̄m̄ ní. Túgə̄n̄ tām̄ yā de kə́ ngán gə̄ tə́ ō, tām̄ yā de kə́ tɔgə gə̄ tə́ ō, kə gír kojə yādə́ gēé.

14Kə́ tām̄ yā ta róbə́ kə́ gír ɓē tə́ ní, wə̄lā əhɔ i Selemia. Banī ngōnən Jakari ń kɔjə̄ yān gə̄ i kɔjə̄ kə́ majə gə̄ dejə ní, wə̄lā əhɔ i ta róbə́ kə́ dām̄ mbɔ́r ɓē kə́ ko̰ó̰ tə́ n adə̄n ní. 15Yā Obed Edom i ta róbə́ kə́ dām̄ mbɔ́r ɓē kə́ geleé tə́, banī yā ngánən gə̄ i ta róbə́ kújə́ kán̄ yá̰a̰ gə̄. 16Supim nin̄ kə Hosa kēgə̄n̄ naā kəla ngɔ̄m̄ ta róbə́ kə́ no ɓē tə́ ō, ta róbə́ kə́ Saleketə ń deē ḭḭ kem kújú ba teē kə̄ ndágá anī a̰a̰ kə̄lá róbə́ kə́ əta tan kə̄ dɔɔ́ ní ní ō.

Ɓūtə̄ ngé ngɔ̄m̄ loo gə̄ ní kēgə̄n̄də́ i beé: 17Ngán Lebi gə̄ kə́ ta róbə́ kə́ dām̄ kə́ gír ɓē tə́ tə́ i mehḛ́ kə dɔ ndɔ̄ gə̄. Kə́ ta róbə́ kə́ dām̄ mbɔ́r ɓē kə́ ko̰ó̰ tə́ i sɔ́ kə dɔ ndɔ̄ gə̄. Kə́ ta róbə́ kə́ dām̄ mbɔ́r ɓē kə́ geleé tə́ i sɔ́ kə dɔ ndɔ̄ gə̄. Kə́ tām̄ yā ta róbə́ kújə́ kán̄ yá̰a̰ gə̄ tə́ ní, nin̄ i jōó jōó. 18Kə́ tām̄ yā kújə́ kə́ kadə madə̄ tə́ ń rāānən̄ i dām̄ kə́ no ɓē tə́ ní, de kə́ dɔ róbə́ tə́ gə̄ i sɔ́, banī de gə̄ jōó i kem kújə́ ní tə́.

19Ɓūtə̄ gə̄ yā ngé ngɔ̄m̄ ta róbə́ kújə gə̄ n noó. Ɔyn̄də́ i dan de gə̄ kə́ gír kaa yā Kore tə́ gə̄ ō, Merari tə́ gə̄ ō.

Kəla kə́ tayā kə́ adə̄n̄ ngán Lebi kə́rēý gə̄

20Adə̄n̄ ngán Lebi gə̄ kəla ngɔ̄m̄ yá̰a̰ kənge#26.20 Yá̰a̰ kənge, i lɔ́r ō, gində̄ arjā̰a̰ ō, yá̰á̰ kə́ rang gə̄ kə́ gātə̄də́ i ngá̰ý gə̄ ō. kə́ kem kújə yā Nə́ɓā tə́ ō, ngɔ̄m̄ yá̰á̰ kə́ yā ɓōĺ gidə gə̄ ō. 21De kə́ gír kojə yā Ladan tə́ gə̄ ní i gír kaa yā Gerson tə́ ní, ngār gə̄ kə́ dɔ kojə yādə́ gə̄ tə́ i Yehieli ō, 22ngán kemən gə̄ ń i Jetam nin̄ kə ngōkó̰o̰n Joel ní ō. Adə̄n̄də́ kəla ngɔ̄m̄ yá̰a̰ kə ngé gə̄ kə́ kem kújə yā Kɔ́ɔ̄ɓē tə́. 23Kə́ tām̄ yā Amram gə̄ tə́ ō, Isar gə̄ tə́ ō, Hebron gə̄ tə́ ō, Ujiel gə̄ tə́ ō ní, 24i Sebuel kə́ ngōn̄ Gersom, kə́ ngōn̄ Moijə n adə̄nən̄ kəla ngɔ̄m̄ yá̰a̰ kənge gə̄ ní. 25Ngákó̰o̰n gə̄ kə́ gír yā Eliejer tə́ i Rehabia ngōn̄ Eliejer ō, Yesaya ō, Yoram ō, Jikəri ō, Selomit ō. 26Yá̰a̰ gə̄ ń mban̄g Dabid ō, ngār gə̄ kə́ dɔ gír kojə gə̄ tə́ ō, ngol áskar kə́ dūbú gə̄ ō, kə́ ɓú gə̄ ō, ngol ngé rɔ̄ɔ̄ gə̄ ō, ɔrə̄n̄ kam̄ tayā tām̄ yā Nə́ɓā tə́ ní, i Selomit ngeé ń toō n i nge ngɔ̄m̄ naā tə́ kə ngákó̰o̰n gēé ní. 27I núsə́ yá̰a̰ kənge kə́ kəhɔ ta rɔ̄ɔ̄ tə́ n de gə̄ ngeé ń toō ɔrə̄n̄ kam̄ tayā tām̄ yā Nə́ɓā tə́ yā rāań loo kə́ nujə gə̄ kə́ tū kújə yā Kɔ́ɔ̄ɓē tə́ ní. 28Yá̰a̰ malang ń Samuel nge ka̰a̰ yá̰a̰ ō, Saul ngōn̄ Kis ō, Abner ngōn̄ Ner ō, Joab kə́ ngōn̄ Seruya ō, ɔrə̄n̄ kam̄ tayā tām̄ yā Nə́ɓā tə́ ní, i Selomit nin̄ kə ngákó̰o̰n gēé n i ngé ngɔ̄m̄ gə̄ ní.

29Kenania nin̄ kə ngánən gēé ń i de kə́ gír kaa yā Isar tə́ gə̄ ní, i nin̄ n i ngé kəndā kumdə́ gíŕ yá̰á̰ kə́ kem ɓē kə́ Israel tə́ ní. Tɔdɔ̄ i nin̄ n i ngé ndóō de gə̄ ndū najə̄ gə̄ ō, ngé rāā sarya gə̄ ō ní.

30Hasabia nin̄ kə ngákó̰o̰n gēé ń i de kə́ gír kaa yā Hebron tə́ gə̄ ní i de kə́ ngáā gə̄. Nin̄ malang i deē dūbú kə ɓú sīrí. I nin̄ n i ngé kəndā kumdə́ gír dɔ nang kə́ Israel tə́ gə̄ ń deē ra bā Jurdḛ tə́ anī i kə̄ dām̄ kə́ no ɓē tə́ ní ní. I nin̄ n i ngé kəndā kumdə́ gíŕ yá̰a̰ gə̄ yā Nə́ɓā tə́ malang ō, kəla yā mban̄g tə́ malang ō ní. 31Yeria i ngār kə́ dɔ de kə́ gír kaa yā Hebron tə́ gə̄. Kem ɓāl̄ kə́ nge ko̰ kutə sɔ́ tə́ ń Dabid o̰o̰ń ɓē ní, tútən̄ gír kəlā nge naā yā de kə́ gír kojə yā Hebron gə̄ tə́ kem ɓē kə́ Yajer kə́ Galaad tə́, anī əngen̄ de kə́ ngáā gə̄ dandə́ tə́. 32Yeria nin̄ kə ngákó̰o̰n gēé ní nin̄ malang i deē dūbú jōó kə ɓú sīrí. I de kə́ ngáā gə̄ malang. Nin̄ i de kə́ dɔ gír kojə yādə́ gə̄ tə́. Mban̄g Dabid əndādə́ dɔ Ruben gə̄ tə́ ō, Gad gə̄ tə́ ō, núsə de kə́ gír ɓē yā Manase tə́ ō, kadə̄ əndān̄ kumdə́ gír kəla gə̄ malang yā Nə́ɓā tə́ ō, yā mban̄g tə́ ō.

Currently Selected:

1 YÁ̰A̰ GƏ̄ 26: SARDC

Highlight

Copy

Compare