1 YÁ̰A̰ GƏ̄ 23

Dabid tə́ndā ngán Lebi gə̄ kə gō ɓūtə̄də́ gēé

1Dan ń Dabid əndā ngōnən Salomo̰ mban̄g dɔ Israel gə̄ tə́ ní, ni tɔgə ɓə́gá ngá̰ý kɔ̄ɔ́. 2Gō tə́ anī ni-əla gō ngār gə̄ kə́ Israel tə́ malang ō, ngé tun̄ yá̰a̰ gə̄ tə́ ō, ngán Lebi gə̄ tə́ ō adə̄ reēn̄.

3Loo ń noō tə́ tə́dan̄ ngán Lebi gə̄ ń ɓāl̄də́ ḭḭ dɔ kutə mətá tə́ ta kaw̄ kə̄ dɔɔ́ ní kógə̄ḿ kógə̄ḿ malang. Nin̄ malang i deē dūbú kutə mətá gidə i sɔ́sɔ́. 4Dabid gə̄rā de gə̄ dūbú kutə jōó gidə i sɔ́ dandə́ tə́ kadə̄ nin̄ i ngé kəndā kumdə́ gír kəla kújə yā Kɔ́ɔ̄ɓē tə́ gə̄ ō, gə̄rā de gə̄ dūbú mehḛ́ dandə́ tə́ kadə̄ nin̄ i ngé ndóō de gə̄ ndū najə̄ gə̄ ō, ngé gān̄g sarya gə̄ ō, 5gə̄rā ngé ra ta róbə́ kújə́ tə́ gə̄ dūbú sɔ́ ō, ngé tɔ̄ȳ Kɔ́ɔ̄ɓē kə yá̰á̰ kə́ ɓāŕ gōsōó gə̄ dūbú sɔ́ ō. Yá̰á̰ kə́ ɓār̄ gōsə̄ gə̄ ní i ni n mēr̄ rāādə́ yā ɓōkə́nń Kɔ́ɔ̄ɓē tɔ̄ȳ ní. 6Dabid tə́ndā ɓūtə̄də́ kə gō gír kaa ngán Lebi gə̄ ń i Gerson ō, Kehat ō, Merari ō ní. 7Ngán Gerson gə̄ i Ladan ō, Simei ō. 8Ngán Ladan gə̄ i Yehiel kə́ ngār ō, Jetam ō, Joel ō. Nin̄ i deē mətá. 9Ngán Simei gə̄ i Selomit ō, Hajiel ō, Haran ō. Nin̄ i deē mətá. I nin̄ n i ngār gə̄ kə́ dɔ gír kojə yā Ladan tə́ ní. 10Ngán kə́ rang gə̄ i Yahat ō, Jija ō, Yeus ō, Beria ō. Ngán Simei kə́ sɔ́ gə̄ n noó. 11Yahat i nga tɔ́gə, Jija i gidən. Ngán Yeus ō, Beria ō i ngá̰ý alé, adə̄ ndangən̄ rīdə́ makətūbūú i tītə̄ gír kojə kə́ kógə̄ḿ beē.

12Ngán Kehat gə̄ i Amram ō, Isar ō, Hebron ō, Ujiel ō. Nin̄ deē sɔ́. 13Ngán Amram gə̄ i Aaro̰ nin̄ kə Moijə. Ɔ̄rə̄n̄ kam̄ Aaro̰ əndānən̄ tayā kə ngánən gēé kadə̄ əndān̄ rɔ̄də́ ta kəla kə́ kem loo kə́ táĺ ngá̰ý tə́, kə́ njɔ́ḿ gə̄ tə́. Yá̰a̰ gə̄ ń kadə̄ rāān̄ ní i ndējə̄ Kɔ́ɔ̄ɓē ndujə̄ yá̰á̰ kə́ kotə majə gə̄ ō, rāā kəla kə rīneé ō, tɔ́r̄ tadə́ dɔ de gə̄ tə́ kə rīneé ō. 14Moijə i deē yā Nə́ɓā. Tə́dan̄ ngánən gə̄ i dan de gə̄ kə́ gír ɓē yā Lebi tə́ gə̄. 15Ngán Moijə gə̄ i Gersom ō, Eliejer ō. 16Ngōn̄ Gersom i Sebuel. Ni i ngār. 17Ngōn̄ Eliejer i Rehabia. Ni i ngār. Eliejer ojə ngán kə́ rang gə̄ alé, banī ngán Rehabia gə̄ i ngá̰ý. 18Ngōn̄ Isar i Selomit. Ni i ngār. 19Ngán Hebron gə̄ i sɔ́: Nge kə́ nga tɔ́gə rīn na i Yeria, gidən rīn na i Amaria. Nge kə́ ko̰ mətá rīn na i Yajiel. Nge kə́ ko̰ sɔ́ rīn na i Yekamam. 20Ngán Ujiel gə̄ i jōó: Nge kə́ nga tɔ́gə rīn na i Mika, ba rī gidən na i Isia. 21Ngán Merari gə̄ i Mali nin̄ kə Musi. Ngán Mali gə̄ i Eleajar ō, Kis ō. 22Eleajar oy kanjə̄ kojə ngōn̄ kə́ dəngam. Ni ojə i ngán kə́ dəyá̰ gə̄. I ngákó̰ó̰də́ kə́ dəngam gə̄ ń i ngán Kis gə̄ ní n táān̄də́ kə́ nə̄yá̰də́ gə̄ tə́ ní. 23Ngán Musi gə̄ i Mali ō, Eder ō, Yeremot ō. Nin̄ i deē mətá.

24Ngán yā Lebi gə̄ n noó kə gō gír kojə yādə́ gēé. Nin̄ i de kə́ dɔ gír kojə yādə́ gə̄ tə́. Ndangən̄ rīdə́ kógə̄ḿ kógə̄ḿ kə dɔdə́ gēé kem makətūbūú. Nin̄ əlan̄ gír rāā kəla yādə́ kə́ kem kújə yā Kɔ́ɔ̄ɓē tə́ i dan ń ɓāl̄də́ ḭḭ dɔ kutə jōó tə́ kum kə̄ dɔɔ́ ní. 25Tɔdɔ̄ Dabid əda na Kɔ́ɔ̄ɓē Nə́ɓā yā Israel na rāā adə̄ gír deē yān gə̄ na ndin̄ majə ō, na nəkɔ́ Kɔ́ɔ̄ɓē na ndi kem ɓē kə́ Jerusalem tə́ na i kə́ njɔ́ḿ gə̄ tə́ ō. 26Adə̄ ngán Lebi gə̄ na a ətōn̄ kújə kənge naā to̰ aĺ ō, na a ətōn̄ yá̰a̰ rāā kəla gə̄ malang kə́ kemeé to̰ aĺ ō. 27Ba ngán Lebi gə̄ ń ɓāl̄də́ ḭḭ dɔ kutə jōó tə́ kum kə̄ dɔɔ́ ní, ndangən̄ rīdə́ makətūbūú i kə gō ndū Dabid kə́ ta tɔ̄l̄ ta tə́. 28I ngán Aaro̰ gə̄ n a ɔjən̄də́ kəla gə̄ kə́ kem kújə yā Kɔ́ɔ̄ɓē tə́ kə́ yā rāā gə̄ ní. Adə̄ i kəla kə́ ta ndágə loo kə́ gīr̄ gidə kújə yā Kɔ́ɔ̄ɓē tə́ gə̄ ō, kə́ kem kújə gə̄ kə́ kadə kújə yā Kɔ́ɔ̄ɓē tə́ ō, kəla tə́gó yá̰a̰ malang kə́ kɔr̄ kam̄ tām̄ yā Nə́ɓā tə́ kadə̄ unjə̄ ō, kəla kə́ tayā tayā gə̄ kə́ kem kújə yā Nə́ɓā tə́ ō. 29Kəla rāādə́ i kəla kɔr̄ mápá kə́ yā ndējə̄ ō, i kəla landə ndujə̄ yā ndējə̄ ō, i kəla kɔr̄ makəla kanjə̄ kaa mápa ō, kɔr̄ mápa kə yibīí dɔ gində̄ kə́ laa tə́ ō, rāā gotə yá̰á̰ kə́ rang gə̄ kə ndujə̄ kə́ ló̰yō̰ó̰ gə̄ ō, i kəla kəndā kumdə́ gír kār̄ tɔ̄jə̄ yá̰a̰ gə̄ tə́ ō, gíŕ yá̰a̰ kɔjə ngāl̄ yá̰a̰ gə̄ tə́ ō. 30Nin̄ a ndin̄ dɔ rɔ̄də́ tə́ yā kɔ̄sə gɔn Kɔ́ɔ̄ɓē tə́ ō, yā ɓōkə́n tɔ̄ȳ ō, 31a rāān̄ beé tām̄ yá̰a̰ tun̄ kə́ róō horoó kadə̄ Kɔ́ɔ̄ɓē tə́ ō, a rāān̄ beé ndɔ̄ sabat gə̄ tə́ ō, ndɔ̄ rāā nāā kə́ teē kijə tə́ ō, ndɔ̄ rɔ̄nel̄ kə́ rang gə̄ tə́ ō, kə dɔ kutə yá̰a̰ tun̄ gə̄ ń ndang adə̄n̄də́ kadə̄ to ngándáńg ta kum Kɔ́ɔ̄ɓē tə́ ní. 32Nin̄ a a̰a̰n̄ gō kújə kənge naā ō, loo kə́ táĺ ō, a a̰a̰n̄ de kə́ gír kojə yā Aaro̰ tə́ gə̄ ń i ngákó̰ó̰də́ gə̄ ní ō, yā kadə̄ kəla njə̄rań kem kújə yā Kɔ́ɔ̄ɓē tə́.

Currently Selected:

1 YÁ̰A̰ GƏ̄ 23: SARDC

Highlight

Copy

Compare