1 YÁ̰A̰ GƏ̄ 22

1I tām̄ najə̄ ń noō tə́ n ni ədań na kújə yā Kɔ́ɔ̄ɓē Nə́ɓā ō, loo tun̄ yá̰á̰ ń kadə̄ Israel gə̄ ndējə̄n̄ yá̰a̰ tun̄ kə́ yā róō horoó gə̄ dɔ tə́ ō ní na i loo ni tə́ ní.

Dabid ɔsə nja yá̰a̰ gə̄ naā tə́ yā rāań kújə yā Kɔ́ɔ̄ɓē

2Dabid adə̄ ɔsən̄ dɔ tə̄rā gə̄ ń ndin̄ dɔ nang kə́ Israel tə́ ní naā tə́ ba ɔr̄ de gə̄ dandə́ tə́ kadə̄ tɔ́sə̄n̄ mbal̄ yā rāań kújə yā Nə́ɓā. 3Ni kán̄ gində̄ kə́ karī ngá̰ý kə̄ dɔ naā tə́ yā rāań mayá̰ gə̄ ba kəndań bápə ta róbə́ gə̄ tə́ ō, yā rāań kəlā gində̄ gə̄ kə́ yā kəhɔń yá̰a̰ gə̄ ō. Ni kán̄ gində̄ nə̄ngá kasə ngá̰ý kə̄ dɔ naā tə́ adə̄ dum̄ kadə̄ deē mbɔ̄jə́ kɔȳn ō, 4kán̄ kāgə̄ sédər gə̄ ń Sidon gə̄ ō, Tir gə̄ ō, adə̄nən̄ ní kə̄ dɔ naā tə́ ngá̰ý. 5Tɔdɔ̄ Dabid əda na ngōnən Salomo̰ na dūú ɓáý ō, tɔ́gən na gətóo ō. Tá majə kadə̄ kújə yā Kɔ́ɔ̄ɓē i kújə kə́ kadə̄ rīn ɓār̄ kə̄ kem ɓē gə̄ tə́ malang najə̄ bon tə́ ō, majən tə́ ō. Ní na n-gḛy kɔsə nja yá̰a̰ gə̄ malang kə́ yā rāań kə̄ kújə́ ní kə̄ naā tə́. Adə̄ Dabid ɔsə nja yá̰a̰ gə̄ kə̄ naā tə́ ngá̰ý pá tá kadə̄ oy ɓáý.

Dabid əndā kəla rāā kújə yā Kɔ́ɔ̄ɓē dɔ Salomo̰ tə́

6Dabid ɓāŕ ngōnən Salomo̰ ba ədan na kə rāā kújə́ kógə̄ḿ tām̄ yā Kɔ́ɔ̄ɓē Nə́ɓā yā Israel tə́. 7Ni ədan na: Ngōnə̄ḿ, mə̄kɔ́ m̄-gír̄ kemḿ tə́ kadə̄ m̄-rāā kújə́ kógə̄ḿ tām̄ yā Kɔ́ɔ̄ɓē Nə́ɓā yāḿ tə́. 8Banī Kɔ́ɔ̄ɓē ədam̄ na m̄-ɓōkə́ mósə de gə̄ nang tə́ ngá̰ý ō, na m-āw̄ ta rɔ̄ɔ̄ kə́ bo gə̄ tə́ ō ní, na i mā n m-ā m̄-rāā kújə́ kə́ kadə̄ de gə̄ ndɔ̄ȳnən̄ kemeé ní alé. Tām̄ mā m̄-ɓōkə́ mósə de gə̄ nang tə́ ngá̰ý ta kumən tə́. 9Banī na m-ā m-ójə ngōn̄ kə́ dəngam, ngōn̄ ní na i de kə́ nge kem sɔl̄ adə̄ na n-a n-əya̰ madə̄ ba̰ā̰n gə̄ ń ndin̄ gīrə̄n̄ gidən ní kadə̄ njə́ɓānən̄ alé. A ɓārə́n̄ ngōn̄ ní na i Salomo̰, kə́ kumən na i de kə́ gḛy ndi majə kə madə̄ ɓēn gēé. Tɔdɔ̄ na ɓāl̄ ko̰o̰ ɓē yān tə́ ní n-a n-adə̄ Israel kem sɔl̄ ō, na n-rāā kadə̄ ndi jəke kanjə̄ sōl̄ yá̰á̰ kógə̄ḿ ō, ɓāl̄ ko̰o̰ ɓē yān tə́. 10I ni Salomo̰ n na a rāā kújə yā kadə̄n ní. Kə́ tām̄ yān ni Kɔ́ɔ̄ɓē tə́ ɓá Salomo̰ na i ngōnən ō, ni Kɔ́ɔ̄ɓē na i bɔbə̄n ō. Na n-a n-rāā kadə̄ kōr̄ kāgə̄ mbang yān ndi ngan̄g ngándáńg kadə̄ o̰o̰ń ɓē dɔ Israel gə̄ tə́.

11Beé ní, ngōnə̄ḿ, ādə̄ Kɔ́ɔ̄ɓē Nə́ɓā yāí i naā seí kadə̄ ī-rāań kújə yān ādə̄ majə tītə̄ ń əndāń dɔí tə́ ní. 12Ādə̄ Kɔ́ɔ̄ɓē rāā seí adə̄ ī-ger̄ kəndā ma̰ȳ yá̰a̰ ō, ādə̄ adī ger̄ yá̰a̰ ō, kadə̄ ī-ngɔ̄məń ndū najə̄ yān dan ń a adī əndā ó̰o̰ ɓē dɔ Israel gə̄ tə́ ní. 13Ndū kə́ kun gə̄ ō, yá̰a̰ kāgə̄ ɓē gə̄ ō ń Kɔ́ɔ̄ɓē adə̄ Moijə tām̄ yā ngán Israel gə̄ tə́ ní, ré ī-ngɔ̄m̄də́ ō, ī-rāań yá̰a̰ ō anī, ā ī-teē deē. Ə́hɔ rɔ̄í tɔgə ō, ī-ra dəngam ō! Ī-sōl̄ yá̰á̰ kógə̄ḿ aĺ ō, ī-lōō ɓōĺ ō. 14Mā i yá̰a̰ alé ba m̄-kán̄ lɔ́r kə̄ dɔ naā tə́ tām̄ yā kújə yā Kɔ́ɔ̄ɓē tə́ adə̄ kɔȳn mān̄ kəlōo 3 000 000 ō, gində̄ arjā̰a̰ kə́ kɔȳn tɔȳ kəlōo 30 000 000 ō, gində̄ nə̄ngá kasə ō, gində̄ kə́ karī ō, kə̄ dɔ naā tə́ ngá̰ý al̄ naā adə̄ loo mbɔ̄jə́ kɔȳdə́ gətóo. m̄-sāā kāgə̄ gə̄ ō, mbal̄ gə̄ ō kɔ̄ɔ́ ɓá, ba ī-sāā kə́ rang gə̄ kə̄ dɔ tə́ ɓáý to̰. 15Ngé kəla gə̄ i ngá̰ý tām̄ yāí tə́: Ngé tə́gā mbal̄ gə̄ ō, ngé tɔ́sə̄ mbal̄ gə̄ ō, ngé tə́gā kāgə̄ gə̄ ō, kɔdə̄ kəla kə́ tayā tayā gə̄ ō. 16Lɔ́r ō, gində̄ arjā̰a̰ ō, gində̄ nə̄ngá kasə ō, gində̄ kə́ karī ō ní, deē asə tə́dádə́ alé. Ḭ́ḭ dɔɔ́ ī-rāā kəla ba ādə̄ Kɔ́ɔ̄ɓē i naā tə́ seí!

17Gō tə́ anī Dabid əda ngár gə̄ malang kə́ Israel tə́ kadə̄ rāān̄ kə ngōnən Salomo̰ó̰. Ni ədadə́ na: 18Kɔ́ɔ̄ɓē Nə́ɓā yāsí i naā tə́ sesí aĺ a? Ni-rāā adə̄ ī-ndiī majə kə nápar de gə̄ ń ndin̄ gīrə̄n̄ gidəsí ní. Tɔdɔ̄ ni-əla de gə̄ ń ndin̄ kété dɔ nang ń toō tə́ ní kem jīḿ tə́. Adə̄ nin̄ əlan̄ dɔdə́ gíŕ tɔ́gə yā Kɔ́ɔ̄ɓē tə́ ō, gíŕ deē yān gə̄ tə́ ō. 19Ngɔlaā ní ə̄ndāī rɔ̄sí ta sāā yá̰á̰ ń kem Kɔ́ɔ̄ɓē Nə́ɓā yāsí ndigə ní tə́ kə dan wursí gēé mámák kadə̄ ī-gerī. Ḭ́ḭī dɔɔ́ ī-rāāī kújə́ kə́ táĺ yā Kɔ́ɔ̄ɓē Nə́ɓā ba ī-reēī kə sandúkə madə̄ naā yā Kɔ́ɔ̄ɓē ō, yá̰á̰ kə́ yā ɓōĺ gidə kə́ tām̄ yā Nə́ɓā tə́ gə̄ ō, ī-tə́ndāī kem kújə́ ń ī-rāāī kə rī Kɔ́ɔ̄ɓēé ní tə́.

Currently Selected:

1 YÁ̰A̰ GƏ̄ 22: SARDC

Highlight

Copy

Compare