1 YÁ̰A̰ GƏ̄ 21

Dabid adə̄ tə́dan̄ ngán Israel gə̄

(Á̰a̰ī 2 Sam 24.1-9)

1Ndɔ̄ kógə̄ḿ tə́ Sətan gḛy nujə kə Israel gēé, adə̄ sə̄lā Dabid ta tə́da kutədə́. 2Adə̄ Dabid əda Joab ō, ngār gə̄ kə́ dɔ ngán Israel gə̄ tə́ ō, na kə aw̄ kə tə́dan̄ kutə Israel gə̄. Kə əlan̄ gír Beer Seba bátə́ kadə̄ ugə̄n̄neé Dan, ba kə reē kə ɔjənən̄ kutədə́ kadə̄ kə n-ger̄. 3Anī Joab tél ədan na: Mban̄g, ndə̄ngā yāḿ i kadə̄ Kɔ́ɔ̄ɓē rāā adə̄ kutə ngán Israel gə̄ i ngá̰ý nja ɓú! Ɓōólaā ní nin̄ malang i ngé kəla yāí gə̄ aĺ a? Ī-sāā ger̄ kutədə́ kadə̄ najə̄ əsō dɔ Israel tə́ i tām̄ rí tə́? 4Banī Joab asə mbātə́ rāā yá̰á̰ ń mban̄g əndā dɔn tə́ kadə rāā ní alé. Adə̄ ɔtə aw̄. Ni un gō nang kə́ Israel malang ba tél reē gogə́ Jerusalem tə́. 5Ni-əda Dabid kutə de gə̄ ń ni tə́dá ní. Israel gə̄ malang i deē 1 100 000. De gə̄ malang ń noō i de kasə rɔ̄ɔ̄ kə kaskaraá gə̄. De kə́ Juda gə̄ i deē 470 000. 6Ni tə́dá ngán Lebi gə̄ aĺ ō, ngán Benjamḛ gə̄ aĺ ō, tɔdɔ̄ yá̰á̰ ń mban̄g əndā dɔn tə́ kadə̄ rāā ní nelə̄n aĺ ngá̰ý.

Nə́ɓā ənda Dabid najə̄ yá̰á̰ kə́ gōtə́ aĺ tə́

(Á̰a̰ī 2 Sam 24.10-17)

7Yá̰á̰ ní majə alé ta kum Nə́ɓā tə́ adə̄ ni ənda Israel gə̄. 8Anī Dabid əda Nə́ɓā na n-rāā i yá̰á̰ kə́ majaĺ ngá̰ý. Ngɔlaā ní kə Nə́ɓā kə mā̰ȳ rɔ̄n dɔ yá̰á̰ kə́ gōtə́ aĺ ń nge kəla yān na rāā ní tə́. Tɔdɔ̄ na n-rāā yá̰á̰ ní na i tītə̄ nge kɔ̄r̄ beé.

9Kɔ́ɔ̄ɓē əda Gad nge ka̰a̰ yá̰a̰ yā Dabid na: 10Āw̄ ə́da Dabid na yá̰á̰ ń Kɔ́ɔ̄ɓē əda ní n toó: M-ɔ́jiī yá̰á̰ gír i mətá kadə̄ ī-gə̄rā kógə̄ḿ danaá kadə̄ m̄-rāā m-ādī.

11Adə̄ Gad aw̄ ənge Dabid ba ədan na yá̰á̰ ń Kɔ́ɔ̄ɓē əda ní n toó ba i nge kə́ rá n ī-gḛy ní? 12I ɓō kə́ kadə̄ rāā de gə̄ ɓāl̄ mətá, aké i rɔ̄ɔ̄ kə́ kadə̄ rāāī nāā mətá kadə̄ madə̄ ba̰ā̰í gə̄ tə́gāīn̄ kə kaskaraá ḿ? Aké i Kɔ́ɔ̄ɓē kə́ kadə̄ tɔ̄l̄ de kə́ kem ɓēé gə̄ kə kaskar yānneé, adə̄ i deē yān kə́ dɔ rā̰ tə́ kə́ nge tɔ̄l̄ yo kə́ əlan kə rī tɔ̄l̄ de gēé kə mo̰y ngāl̄bɔ̄gīí gō nang kə́ Israel tə́ malang ḿ? Ī-gír̄ yá̰a̰ ba ə́dam̄ yá̰á̰ ń kadə̄ m̄-tél, m-ə́da nge kəlaḿ ní.

13Anī Dabid tél əda Gad na kə̄ngā sāā na əgan ta ba na n-ndigə kəsō jī Kɔ́ɔ̄ɓē tə́ tɔȳ kəsō jī de gə̄ tə́, tɔdɔ̄ Kɔ́ɔ̄ɓē na i de kə́ kumən o̰o̰n ngá̰ý kə deé.

14Loo ń noō tə́ Kɔ́ɔ̄ɓē rāā adə̄ mo̰y ngāl̄bɔ̄gīí əsō kem ɓē kə́ Israel tə́, adə̄ de gə̄ dūbú kutə sīrí oyn̄. 15Nə́ɓā əla de kə́ dɔ rā̰ tə́ kadə̄ aw̄ nujə ɓē kə́ Jerusalem. Ba dan ń Kɔ́ɔ̄ɓē a̰a̰ deē ní loo nujə loo tə́ anī tél ndə̄ngā rɔ̄n adə̄ ədan na: Kə tél kə ənī jīn nang tə́, kadə̄ asə bərá! Ba dan ń noō tə́ ní de kə́ dɔ rā̰ tə́ yā Kɔ́ɔ̄ɓē ní ra i kadə loo kənda kōō yā Ornan kə́ Yebus tə́.

16Dabid ənī kumən kə̄ dɔɔ́ anī a̰a̰ de kə́ dɔ rā̰ tə́ yā Kɔ́ɔ̄ɓē ɓōdə̄ loo tə́, ra i dɔ dán dɔ rā̰ nin̄ kə dɔ nangaá tə́. Nge kəla ní ɔr̄ kaskar yān kem hɔ̄pə̄n tə́, ba əla kum kə̄ dɔ ɓē kə́ Jerusalem tə́. Dabid nin̄ kə kum kɔ̄ɔ́ gə̄ ń əlan̄ kūbə̄ kəhɔ ndoō rɔ̄də́ tə́ ní əsō sébən̄ kumdə́ nang tə́. 17Dabid əda Nə́ɓā na: I mā n m̄-mēr̄ tə́da kutə ngán Israel gə̄ ní aĺ a? I mā n m̄-mān̄ dɔ ndū Nə́ɓā á m̄-rāā yá̰á̰ kə́ majaĺ ní! Ba batə̄ gə̄ ń noō rāān̄ i rí? Kɔ́ɔ̄ɓē Nə́ɓā yāḿ, ə́ndam̄ mā ō, gír kojə yāḿ ō, ba ī-lōō rāā gír deē yāí gə̄ yá̰á̰ kə́ tōr̄!

Dabid rāā loo tun̄ yá̰a̰ tām̄ yā Kɔ́ɔ̄ɓē tə́

(Á̰a̰ī 2 Sam 24.18-25)

18 De kə́ dɔ rā̰ tə́ yā Kɔ́ɔ̄ɓē mēr̄ Gad kəda Dabid kadə̄ aw̄ rāā loo tun̄ yá̰a̰ loo kənda kōō yā Ornan tə́ tām̄ yā Kɔ́ɔ̄ɓē tə́. 19Dabid aw̄ tītə̄ ń Gad ədanneé kə rī Kɔ́ɔ̄ɓēé ní. 20Ornan ra a ənda i gémē yān. Ni tūr̄ rɔ̄n anī a̰a̰ de kə́ dɔ rā̰ tə́ ní, ba ngánən kə́ dəngam kə́ sɔ́ gə̄ ń ran̄ seneé ní tá ɓɔ̄ɔ̄n̄ rɔ̄də́ kɔ̄ɔ́. 21Dabid aw̄ kə̄ rɔ̄ Ornan tə́. Dan ń Ornan a̰a̰ mban̄g anī, ni ɔtə loo kənda kōō tə́ ba reē ɔsə non nang tə́ no Dabid tə́. 22Dabid ədan na kə adə̄n loo kənda kōō yān kadə̄ n-rāā loo tun̄ yá̰a̰ yā Kɔ́ɔ̄ɓē tū tə́, kadə̄ yá̰á̰ kə́ tōr̄ ń əsō dɔ de gə̄ tə́ ní dəbań. Kə adə̄n na n-a n-adə̄n nar gírí kadə̄ asə kə gō gātəneé. 23Ornan tél ədan na: Kɔ́ɔ̄ɓē gə̄, yá̰á̰ ń ā ī-sāā ní ī-taā ī-rāań yá̰á̰ ń kemií gḛy ní. Man̄g yāḿ gə̄ n toó, ī-taā ī-rāā yá̰a̰ tun̄ kə́ yā róō horoó tə́ ō, púsə gə̄ n toō ī-taā ī-rāā kīr̄ tə́ ō, gémē n toó ī-rāā kōō kə́ yā ndējə̄ tə́ ō, m-ādī yá̰a̰ gə̄ noō malang! 24Banī mban̄g Dabid əda Ornan na n-ɔdə alé, na n-gḛy na i mang. Na n-a n-adə̄ nar gírí, tɔdɔ̄ yá̰á̰ ń i yá̰a̰ yān ni Ornan ní, loo kadə̄ n-taā jīn tə́ karī n-adə̄ Kɔ́ɔ̄ɓē ké i ba̰ý wa. Loo kadə̄ n-ndējə̄ Kɔ́ɔ̄ɓē yá̰a̰ tun̄ n-ənge karī ní ké i ba̰ý wa.

25Adə̄ Dabid adə̄ Ornan lɔ́r kə́ kɔȳn i kəlōo sīrí gír loo ní tə́. 26Ni-rāā loo tun̄ yá̰a̰ tām̄ yā Kɔ́ɔ̄ɓē tə́ loo ní tə́, ba ndējə̄n yá̰a̰ tun̄ kə́ róō horoó ō, yá̰a̰ tun̄ kə́ tām̄ yā kem kógə̄ḿ tə́ ō dɔ tə́. Gō tə́ anī ni ɓāŕ Kɔ́ɔ̄ɓē, anī Kɔ́ɔ̄ɓē ndigə ɓār̄ yān ba rāā adə̄ hor ḭḭ dɔ rā̰ tə́ reē o̰o̰ yá̰a̰ tun̄ gə̄ ń ton̄ dɔ loo tun̄ yá̰á̰ tə́ ní. 27Loo ń noō tə́ Kɔ́ɔ̄ɓē əda de kə́ dɔ rā̰ tə́ na kə tél kə əla kaskar yān gogə́ kem hɔ̄pə̄n tə́. 28Dabid a̰a̰ kadə̄ Kɔ́ɔ̄ɓē ndigə ɓār̄ yān loo kənda kōō yā Ornan kə́ Yebus ní tə́. Anī əla gír ndɔ̄ ń noō tə́ ní a ndējə̄ Kɔ́ɔ̄ɓē yá̰a̰ tun̄ gə̄ i loo ní tə́. 29Dan ngeé ń noō tə́ ní kújə yā Kɔ́ɔ̄ɓē ń Moijə rāā kem dəla loo tə́ ní ō, loo tun̄ yá̰á̰ kə́ tām̄ yā yá̰a̰ tun̄ kə́ yā róō horoó tə́ ō ní, ran̄ i loo kə́ kḭḭ kə̄ dɔɔ́ kə́ Gabaon tə́. 30Banī Dabid asə kaw̄ koō ta Kɔ́ɔ̄ɓē tə́ tū tə́ alé. Tɔdɔ̄ ni ɓōĺ kaskar yā de kə́ dɔ rā̰ tə́ yā Kɔ́ɔ̄ɓē ní.

Currently Selected:

1 YÁ̰A̰ GƏ̄ 21: SARDC

Highlight

Copy

Compare