1 YÁ̰A̰ GƏ̄ 20
20
Joab taā ɓē kə́ Raba
(Á̰a̰ī 2 Sam 11.1; 12.26-31)
1Dan ń ɓāl̄ kə́ rang ndɔ̄ adə̄ i dan yā kaw̄ rɔ̄ɔ̄ tə́ yā mban̄g gə̄ ní a, Joab ɔy ngé rɔ̄ɔ̄ gə̄ aw̄ nujəń loo gō nang yā Amon gə̄ tə́, ba aw̄ ənī ɓē bo kə́ Raba rɔ̄ɔ̄. Banī Dabid ndi gogə́ Jerusalem.
Dan ń Joab taā ɓē kə́ Raba ba nujən sák sák kɔ̄ɔ́ oy anī, 2Dabid taā jākā mbang kə́ dɔ mban̄g yā Amon gə̄ tə́. Rāān̄ jākā ní i kə lɔ́rɔ́. Kɔȳn tɔȳ kəlōo kutə mətá. Əlan̄ mbal̄ kə́ gātə̄n i ngá̰ý tutə. Əlan̄ jākā ní dɔ Dabid tə́. Ni ɔy yá̰a̰ kənge kə́ kem ɓē ní tə́ ngá̰ý aw̄ń. 3Dabid ɔy de kə́ kem ɓēé gə̄ aw̄ sedə́ kadə̄ rāān̄ kəla ɓəlo, adə̄ i kəla njár̄ kāgə̄ ō, tə́gā mbal̄ aláa tə́gā kāgə̄ ō. Ni-rāā i tītə̄ ń noō kə gotə ɓē kə́ rang gə̄ malang yā Amon gēé. Gō tə́ anī tél dɔ tə́ aw̄ gogə́ Jerusalem kə ngé rɔ̄ɔ̄ yān gēé malang.
Israel gə̄ rɔ̄ɔ̄n̄ Pilistin gə̄
(Á̰a̰ī 2 Sam 21.18-22)
4Gō tə́ anī Israel gə̄ rɔ̄ɔ̄n̄ Pilistin gə̄ Gejer. Sibəkai kə́ Husa tɔ̄l̄ Sipai kə́ gír kaa yā Repay gə̄ tə́ i loo rɔ̄ɔ̄ ngeé ń noō tə́. Adə̄ əlan̄ rɔ̄sɔl̄ dɔ Pilistin gə̄ tə́. 5Rɔ̄ɔ̄ kə́ rang to ɓáý to̰ kə Pilistin gēé. Elanan ngōn̄ Yair tɔ̄l̄ Lami kə́ ngōkó̰o̰ Goliat kə́ Gat ń kāgə̄ nənga yān bo tītə̄ kāgə̄ kəjō kūbə̄ ní loo rɔ̄ɔ̄ ní tə́. 6Rɔ̄ɔ̄ kə́ rang to ɓáý to̰ kem ɓē kə́ Gat tə́. Báw de kógə̄ḿ kə́ ta ngán jīn gē njan gē i mehḛ́ mehḛ́, adə̄ malang ɓáa i kutə jōó gidə i sɔ́ i noó. Ni i de kə́ gíŕ kaa yā Harapa tə́ ō. 7Deē ní tɔ́sə̄ gātə̄ Israel gə̄. Anī Yonatan kə́ ngōn̄ Simea kə́ ngōkó̰o̰ Dabid tɔ̄lən. 8Pilistin gə̄ ń noō n Dabid nin̄ kə ngé kəla yān gēé tɔ̄lə̄n̄də́ ní, i de kə́ gír kaa yā Harapa kə́ Gat tə́ gə̄.
Currently Selected:
1 YÁ̰A̰ GƏ̄ 20: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
