1 YÁ̰A̰ GƏ̄ 19

Əlan̄ rɔ̄sɔl̄ dɔ de kə́ bo gə̄ yā Dabid tə́

(Á̰a̰ī 2 Sam 10.1-5)

1Gō tə́ anī Nahas, mban̄g yā Amon gə̄, oy ba ngōnən ndi mban̄g gotən tə́. 2Anī Dabid əda na n-gḛy rāā kem majə kə Hanun ngōn̄ Nahas, tɔdɔ̄ bɔbə̄n na rāā kem majə seneé. Adə̄ Dabid əla de gə̄ sɔl̄ kem Hanun tə́ najə̄ yā bɔbə̄n tə́. Dan ń de gə̄ ń ni əladə́ ní reē ugə̄n̄ ɓē yā Amon gə̄ tə́ anī, 3de kə́ bo yā Amon gə̄ ədan̄ Hanun na ké ɔjəń na Dabid əla de gə̄ sɔl̄ kemən tə́ i yā rɔȳń bɔbə̄n wa. Na i yā kadə̄ njə̄rān̄ kem ɓēé əndān̄ ma̰ȳ loo ba kadə̄ ndɔ̄ kə́rēý tə́ anī reē taān̄ ɓē. 4Loo ń noō tə́ Hanun adə̄ əhɔn̄ de kə́ bo gə̄ yā Dabid, dəsān̄ mbāýdə́ ō, tə́jān̄ kūbə̄ kə́ rɔ̄də́ tə́ gə̄ adə̄ gīndə̄ ugə̄ ta gíŕdə́ tə́ dɔɔ́ ō, ba tə̄ɓān̄də́. 5Ədan̄ Dabid najə̄ yá̰á̰ ń rāā de kə́ bo yān gə̄ ní, anī ni-əla de gə̄ tə́nī tadə́ tə́, tɔdɔ̄ rɔ̄də́ sɔl̄də́ ngá̰ý. Mban̄g əla ədadə́ na kə ndin̄ Jeriko bátə́ kadə̄ mbāýdə́ əɓa pá tá kə reēn̄ ɓáý.

Dabid rɔ̄ɔ̄ Amon gə̄ ō, Aram gə̄ ō,

(Á̰a̰ī 2 Sam 10.6-19)

6Dan ń Hanun nin̄ kə Amon gə̄ gerə̄n̄ kadə̄ yá̰á̰ ń rāān̄ ní rāā adə̄ nin̄ télən̄ de kə́ majaĺ ngá̰ý gə̄ ta kum Dabid tə́ anī, əlan̄ kə gində̄ arjā̰a̰ kə́ kɔȳn i kəlōo dūbú kutə mətá mangən̄neé Aram gə̄ kə́ bā kə́ jōó gə̄ tə́ ō, Aram gə̄ kə́ Maaka ō, kə́ Soba ō, púsə rɔ̄ɔ̄ gə̄ ō, ngé kal̄ sə́nda gə̄ ō. 7Ndə̄mān̄ púsə rɔ̄ɔ̄ gə̄ dūbú kutə mətá gidə i jōó kə naraá ō, əndān̄ yá̰a̰ jī mban̄g kə́ Maaka tə́ kə deē yān gēé kadə̄ rɔ̄ɔ̄n̄ tām̄ yādə́ tə́ ō. Mban̄g kə́ Maaka nin̄ kə ngé rɔ̄ɔ̄ yān gēé reē ndin̄ ta ɓē kə́ Medeba tə́, banī Amon gə̄ teēn̄ kə̄ kem ɓē yādə́ gə̄ tə́ reē əngen̄ naā yā rɔ̄ɔ̄.

8Dabid oō najə̄n adə̄ əla Joab kə ngé rɔ̄ɔ̄ yān gēé malang loo rɔ̄ɔ̄ ní tə́. 9Amon gə̄ teē aw̄ ran̄ kə ta naá kə jī loo rɔ̄ɔ́ ta ɓē yādə́ tə́. Banī mban̄g gə̄ ń reēn̄ dḭḭ̄də́ tə́ ní tá ran̄ i loo kə́ rang tə́ kem bembeé. 10Joab a̰a̰ kadə̄ rɔ̄ɔ̄ i kété ō, gogə́ ō. Anī gə̄rā de gə̄ dan go̰ rɔ̄ɔ̄ gə̄ kə́ Israel tə́ malang ba tə́ndādə́ kə ta naá kə jī loo rɔ̄ɔ́ no Aram gə̄ tə́. 11Ni əya̰ gotə ngé rɔ̄ɔ̄ gə̄ jī ngōkó̰o̰n Abisai tə́. Nin̄ tə́ndān̄də́ kə ta naá kə jī loo rɔ̄ɔ́ no Amon gə̄ tə́. 12Gō tə́ anī Joab əda ngōkó̰o̰n na ré tɔ́gə Aram gə̄ tɔȳ yān anī kə reē kə dḭḭ̄n. Ba ré tɔ́gə Amon gə̄ tɔȳ yā ngokó̰o̰n anī i ni n na n-aw̄ yā dḭḭ̄n ní. 13Kə əhɔ rɔ̄n tɔgə ō, kə n-ɔjən̄ kadə̄ tɔ́gə́də́ to ō, tām̄ yā gír deē yādə́ gə̄ tə́ ō, tām̄ yā ɓē yā Nə́ɓā yādə́ tə́ ō. Ba kadə̄ Kɔ́ɔ̄ɓē kə rāā yá̰á̰ ń a̰a̰ kadə̄ i yá̰á̰ kə́ majə ní.

14Loo ń noō tə́ Joab nin̄ kə ɓūtə̄ ngé rɔ̄ɔ̄ yān gēé ndɔ́tə̄n̄ kə̄ kété yā rɔ̄ɔ̄ Aram gə̄. Aram gə̄ a̰ȳn̄ naā kɔ̄ɔ́ no Joab tə́. 15Dan ń Amon gə̄ a̰a̰n̄ kadə̄ Aram gə̄ a a̰ȳn̄ i naā anī, nin̄ a̰ȳn̄ naā kɔ̄ɔ́ no Abisai ngōkó̰o̰ Joab tə́ ō, ba udən̄ kem ɓēé. Joab tél dɔ tə́ aw̄ gogə́ Jerusalem.

16Dan ń Aram gə̄ a̰a̰n̄ kadə̄ Israel gə̄ tetən̄də́ rɔ̄ɔ̄ anī əlan̄ gō ngákó̰ó̰də́ Aram gə̄ kə́ gidə bā tə́ adə̄ reēn̄. Sopak, ngol áskar gə̄ yā Hadadejer n ndi dɔdə́ tə́ ní. 17Ədan̄ najə̄n Dabid adə̄ oō. Anī ni ɔy Israel gə̄ malang gāngəń bā Jurdḛ ba reē ndi no Aram gə̄ tə́. Ni tə́ndā deē yān gə̄ kə ta naá kə jī loo rɔ̄ɔ́ no Aram gə̄ tə́. Aram gə̄ ənīn̄ Dabid rɔ̄ɔ̄. 18Banī a̰ȳn̄ naā kɔ̄ɔ́ no Israel gə̄ tə́. Dabid nin̄ kə deē yān gēé tɔ̄lə̄n̄ ngé púsə rɔ̄ɔ̄ gə̄ dūbú sīrí ō, ngé rɔ̄ɔ̄ gə̄ kə́ ngé njə̄rā kə njadə́ gēé dūbú kutə sɔ́ ō, tɔ̄lə̄n̄ ngol áskar gə̄ ń i Sopak ní ō.

19Dan ń mban̄g gə̄ ń əlan̄ dɔdə́ gíŕ tɔ́gə yā Hadadejer tə́ ní a̰a̰n̄ kadə̄ Israel gə̄ tetən̄də́ rɔ̄ɔ̄ anī, ənīn̄ ndūdə́ adə̄n̄ Dabid rāān̄neé kem kógə̄ḿ seneé tām̄ yā lɔm tə́ ō, əlan̄ dɔdə́ gíŕ tɔ́gə yān tə́ ō. Loo ń noō tə́ Aram gə̄ ndigən̄ dḭḭ̄ Amon gə̄ to̰ alé.

Currently Selected:

1 YÁ̰A̰ GƏ̄ 19: SARDC

Highlight

Copy

Compare