1 YÁ̰A̰ GƏ̄ 18

Dabid tetə rɔ̄ɔ̄

(Á̰a̰ī 2 Sam 8.1-14)

1Gō tə́ anī Dabid tetə Pilistin gə̄ rɔ̄ɔ̄ ba əla rɔ̄sɔl̄ dɔdə́ tə́. Ni-taā ɓē kə́ Gat ō, ngán ɓē gə̄ ń ɓē kə́ Gat o̰o̰ ɓē dɔ tə́ ní ō jīdə́ tə́. 2Ni-tetə Moab gə̄ rɔ̄ɔ̄ ō, adə̄ nin̄ télən̄ ngé kəla yān gə̄ kə́ a əgānən̄ tír̄. 3Ni-tetə Hadadejer rɔ̄ɔ̄ ō. Hadadejer i mban̄g kə́ Soba. Ɓē ko̰o̰ yān to ta kaw̄ kə̄ Hamat. I dan ń Hadadejer sāā ko̰o̰ ɓē dɔ bā Opəratə tə́ ní n ni tetən rɔ̄ɔ̄ ní. 4Dabid taā púsə rɔ̄ɔ̄ yān gə̄ dūbú ō, ngé kal̄ sə́nda yān gə̄ dūbūú sīrí ō, ngé rɔ̄ yān gə̄ kə́ ngé njə̄rā kə njadə́ gə̄ dūbú kutə jōó ō. Ni-gán̄g ngəra nja sə́nda gə̄ ń a ndɔ́rə̄n̄ púsə rɔ̄ɔ̄ gə̄ ní kɔ̄ɔ́ malang, ba ngɔ̄m̄ sə́nda gə̄ kə púsə rɔ̄ɔ̄ gə̄ ɓú kógə̄ḿ tām̄ yān tə́. 5Aram gə̄ kə́ Damas reē dḭḭ̄n̄ Hadadejer mban̄g kə́ Soba, banī Dabid tetədə́ rɔ̄ɔ̄ ō, tɔ̄l̄ de kə́ dəngam gə̄ dūbú kutə jōó gidə i jōó dandə́ tə́ ō. 6Loo ń noō tə́ Dabid tə́ndā ngé ko̰o̰ ɓē gə̄ dɔ Aram gə̄ kə́ gō nang kə́ Damas tə́, adə̄ télən̄ ngé kəla yān gə̄ kə́ a əgānən̄ tīr̄. Adə̄ loo malang ń Dabid aw̄ rɔ̄ɔ̄ tə́ tū tə́ ní Kɔ́ɔ̄ɓē tetə rɔ̄ɔ̄ adə̄n. 7Der lɔ́r gə̄ ń ngé kəla yā Hadadejer gə̄ a ōtōn̄ ní Dabid táā aw̄ń Jerusalem. 8Tibatə ō, Kun ō ń i ɓē gə̄ yā Hadadejer ní, Dabid ɔy gində̄ nə̄ngá kasə kə́ kemeé gə̄ ngá̰ý aw̄ń. Salomo̰ rāań bay kə́ bo ō, gində̄ kə́ bo kə́ ngāl̄ ɓururu gə̄ ō, ngáń gájə́ yá̰a̰ rāā kəla gə̄ kə́ kem kújə yā Kɔ́ɔ̄ɓē tə́ ō.

9Dan ń Towu, mban̄g kə́ Hamat, oō kadə̄ ngé rɔ̄ɔ̄ gə̄ yā Hadadejer mban̄g kə́ Soba ní Dabid na tetədə́ rɔ̄ɔ̄ kɔ̄ɔ́ malang anī, 10əla ngōnən Hadoram rɔ̄ mban̄g Dabid tə́ kadə̄ rāān lápə́ya ō, tɔ̄ȳn najə̄ rɔ̄ɔ̄ ń rɔ̄ɔ̄ Hadadejer ba tetən rɔ̄ɔ̄ ní ō, tɔdɔ̄ Hadadejer i madə̄ kɔ̄l̄ Towu. Hadoram reē kə yá̰a̰ malang kə́ rāā kə lɔ́rɔ́ ō, kə gində̄ arjā̰a̰ ō, kə gində̄ nə̄ngá kasaá ō, adə̄ Dabid. 11Mban̄g Dabid ɔr̄ kam̄ yá̰a̰ gə̄ ní tayā tām̄ yā Kɔ́ɔ̄ɓē tə́ tītə̄ ń ɔrə̄ń kam̄ gində̄ arjā̰a̰ ō, lɔ́r ō ń táā jī nápar de kə́ rang gə̄ tə́ ní. Nápar de gə̄ ní i Edom gə̄ ō, Amon gə̄ ō, Pilistin gə̄ ō, Amalek gə̄ ō.

12Abisai kə́ ngōn̄ Seruya tetə Edom gə̄ rɔ̄ɔ̄ wól loo ń katə̄ i tū tə́ ní. Ni-tɔ̄l̄də́ dūbú kutə gidə i sɔ́sɔ́. 13Ni tə́ndā ngé ko̰o̰ ɓē gə̄ gō nang kə́ Edom tə́, adə̄ Edom gə̄ malang télən̄ ngé rāā kəla yā Dabid gə̄. Loo malang ń Dabid aw̄ rɔ̄ɔ́ tū tə́ ní, Kɔ́ɔ̄ɓē tetə rɔ̄ɔ̄ adə̄n.

Rī ngé kəla yā Dabid gə̄

(Á̰a̰ī 2 Sam 8.15-18)

14Dabid o̰o̰ ɓē dɔ nang kə́ Israel tə́ malang kə taá, ḭ̄ deē ń najə̄ i yāí anī Dabid adī najə̄ ō, sarya gāngən i gōtə́ ō. Ni-rāā tītə̄ ń noō kə Israel gēé malang. 15Joab ngōn̄ Seruya i ngol ngé rɔ̄ɔ̄ gə̄. Yosapat ngōn̄ Ahilud, i kɔdə̄ mbēr̄ yā mban̄g. 16Sadok ngōn̄ Ahitub nin̄ kə Abimelek ngōn̄ Abiatar i ngé tun̄ yá̰a̰ gə̄. Sawəsa i nge ndang makətūbə̄. 17Benaya ngōn̄ Yoyada i ngol Kereti gə̄ ō, Peleti gə̄ ō ń nin̄ i ngé ngɔ̄m̄ dɔ mban̄g Dabid gə̄ ní ō, ngán Dabid gə̄ i de kə́ bo kə́ ngɔr ngá̰ý gə̄ kə́ rɔ̄ Dabid tə́ gə̄ ō.

Currently Selected:

1 YÁ̰A̰ GƏ̄ 18: SARDC

Highlight

Copy

Compare