1 YÁ̰A̰ GƏ̄ 14
14
Dabid ndi Jerusalem
(Á̰a̰ī 3.5-9; 2 Sam 5.11-16)
1Hiram mban̄g kə́ Tir əla de gə̄ rɔ̄ Dabid tə́ kə kāgə̄ sédər gēé ō, kə ngé tɔ́sə̄ mbal̄ gēé ō, kə ngé njár̄ kāgə̄ gēé ō, kadə̄ rāān̄ kújə adə̄n̄ Dabid. 2Loo ń noō tə́ Dabid ger̄ kadə̄ Kɔ́ɔ̄ɓē əndān mban̄g dɔ Israel gə̄ tə́ ō, ger̄ kadə̄ ɔsən̄ gɔn ko̰o̰ ɓē yān ngá̰ý sɔɔ̄ń Israel gə̄ ń i gír de gə̄ yā Nə́ɓā ní ō.
3Dan ń Dabid i Jerusalem ní, ni-taā dəyá̰ kə́ rang gə̄ ɓáý to̰ ojəń ngán kə́ dəngam gə̄ ō, ngán kə́ dəyá̰ gə̄ ō. 4Ngán kə́ dəngam gə̄ ń ni ojədə́ Jerusalem ní rīdə́ n toó: Samua, Sobab, Natan, Salomo̰, 5Ibar, Elisua, Elpelet, 6Noga, Nepeg, Yapia, 7Elisama, Beelyada, Elipelet.
Dabid tetə Pilistin gə̄ rɔ̄ɔ̄
(Á̰a̰ī 2 Sam 5.17-25)
8Pilistin gə̄ oōn̄ kadə̄ urən̄ yibə̄ dɔ Dabid tə́ əndanən̄neé mban̄g dɔ Israel gə̄ tə́ malang. Anī nin̄ malang aw̄n̄ sāā Dabid tə́. Dabid oō adə̄ teē aw̄ tənī tadə́. 9Pilistin gə̄ reē ugə̄n̄ ba taān̄ loo malang wól loo yā Repay gə̄ tə́. 10Dabid aw̄ koō ta Nə́ɓā tə́, dəje Nə́ɓā na ké kə n-aw̄ kə n-rɔ̄ɔ̄ Pilistin gə̄ wa, ké a əladə́ kem jīn tə́ wa. Anī Kɔ́ɔ̄ɓē tél ədan na: Kə aw̄ na n-ā n-ə́ládə́ kem jīn tə́. 11Pilistin gə̄ aw̄n̄ bátə́ ugə̄n̄ Baal Perasim, ba Dabid tetədə́ rɔ̄ɔ̄ loo ń noō tə́ əda na: Nə́ɓā un jīḿ mbutəń kum loo adə̄ ra wōȳ dan madə̄ ba̰ā̰ḿ gə̄ tə́ tītə̄ man̄ kə́ mbutə kum loo beé. I tām̄ najə̄ ń noō tə́ n əndān̄neé rī loo ní na i Baal Perasim ní#14.11 Baal Perasim, kə ta Hebəro ní kumən na i mojə nge mbutə kum loo.. 12Pilistin gə̄ əya̰n̄ nə́ɓā gə̄ ń i ɓesə̄ yādə́ gə̄ ní kɔ̄ɔ́ loo ní tə́, adə̄ Dabid əda na kə róōn̄ ɓesə̄ gə̄ ní horoó kɔ̄ɔ́.
13Pilistin gə̄ tél taān̄ loo malang wól loo Repay gə̄ tə́ ɓáý to̰. 14Dabid aw̄ koō ta Nə́ɓā tə́ ɓáý to̰, anī Nə́ɓā ədan na: Ī-lōō kənī rɔ̄í gidədə́ tə́ rɔ̄ɔńdə́. Ī-tūr̄ rɔ̄í āw̄ sa̰y, ba ə̄nī rɔ̄í dām̄ loo ń kāgə̄ mikokuli gə̄ i tū tə́ ní tə́ tá ḭ́ḭ tū tə́ ī-reē kum kə̄ dɔdə́ tə́. 15Ré ōō kōō yá̰a̰ ɓār̄ jam kāgə̄ gə̄ ní tə́ tītə̄ nja deē anī, ī-teē āw̄ ə̄nī rɔ̄ɔ̄, tɔdɔ̄ i Nə́ɓā n a njə̄rā kété noí tə́ yā tetə gérger yā Pilistin gə̄ rɔ̄ɔ̄ ní. 16Dabid rāā tītə̄ ń Nə́ɓā ədanəń ní. I beé n Israel gə̄ tetənə̄ń gérger yā Pilistin gə̄ rɔ̄ɔ̄ ba tə̄ɓān̄neédə́ Gabaon bátə́ ugə̄n̄neé sedə́ Gejer ní. 17Loo ń noō tə́ rī Dabid ɓār̄ kem ɓē gə̄ tə́ malang ō, Kɔ́ɔ̄ɓē rāā adə̄ nápar de gə̄ malang ɓōĺnən̄ ō.
Currently Selected:
1 YÁ̰A̰ GƏ̄ 14: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
