1 YÁ̰A̰ GƏ̄ 13
13
Dabid gḛy reē kə sandúkə madə̄ naā yā Kɔ́ɔ̄ɓē Jerusalem
(Á̰a̰ī 2 Sam 6.1-11)
1Dabid oōn̄ naā kə ngol áskar gə̄ kə́ dɔ de kə́ dūbú gə̄ tə́ ō, de kə́ ɓú gə̄ tə́ ō, kə de kə́ bo gēé malang ō. 2Gō tə́ anī ni-əda Israel gə̄ malang ń kánə̄n̄ naā ní na: Ré sḭḭ̄ á̰a̰ī kadə̄ i yá̰á̰ kə́ majə ō, ḭḭ i rɔ̄ Kɔ́ɔ̄ɓē Nə́ɓā yājí tə́ ō anī, ādə̄ j-əla j-ədaī ngákó̰ó̰jí gə̄ ń ndin̄ gō nang kə́ Israel tə́ malang ní ō, ngé tun̄ yá̰a̰ gə̄ ō, ngán Lebi gə̄ ō, kem ɓē gə̄ ń ndin̄ tū tə́ ní tə́ ādə̄ reē əngen̄jí. 3Ba jə-tél jə-reēī kə sandúkə yā Nə́ɓā yājí gogə́ rɔ̄jí tə́, tɔdɔ̄ dan yā Saul tə́ ní j-əndāī kumjí gír sandúkə́ ní tə́ alé. 4Ngé kán̄ naā gə̄ malang ndigən̄ rāā tītə̄ ń noō, tām̄ yá̰á̰ ní majə ta kum ngán Israel gə̄ tə́ malang.
5Dabid ɓāŕ Israel gə̄ malang, əla gír man̄ kə́ Ejiptə tə́ bátə́ gān̄g Lebo Hamat, kadə̄ aw̄ reēn̄ kə sandúkə yā Nə́ɓā ń ndi kem ɓē kə́ Kiryat Yearim ní tə́. 6Ni-aw̄ sedə́ Baala ń i Kiryat Yearim tə́ ní dɔ nang kə́ Juda tə́, gō sandúkə́ ní tə́. Kɔ́ɔ̄ɓē ń loo ndin i dɔɔ́ dɔ de kə́ dɔ rā̰ tə́ kə́ ngé ngɔ̄m̄ loo gə̄ tə́ ní, a ɓārə́n̄ rīn i loo ń noō tə́. 7Unən̄ sandúkə yā Nə́ɓā ní kújú ɓē Abinadab əndān̄ kem púsə man̄g kə́ kijə tə́. Uja nin̄ kə Ahio i ngé rāā gír man̄g gə̄. 8Dabid ō, Israel gə̄ malang ō, ənīn̄ pā ndāmə̄n̄neé kə tɔ́gə́də́ gēé malang ō, ugən̄ kənde gə̄ kə́ kəladə́ i ngá̰ý gə̄ ō, kə́ kəladə́ i ngá̰ý aĺ gə̄ ō, əndan̄ kɔdə tamburḛ̄ḛ gō tə́ ō, əndan̄ gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō, kɔ̄rə́n̄ bərúnjə gə̄ ō.
9Dan ń reē ugə̄n̄ loo kənda kōō yā Kidon tə́ ní anī, Uja əla jīn yā kəhɔń sandúkə, tɔdɔ̄ na̰y i sḛ́ý anī man̄g gə̄ rāān̄ adə̄ teē əsō. 10Loo ń noō tə́ wōn̄g yā Kɔ́ɔ̄ɓē ḭḭ seneé adə̄ ənda Uja, tām̄ ni əla jīn ɔdəń sandúkə. Uja oy kə̄ loo nəkɔ́ ń noō tə́ ta kum Nə́ɓā tə́.
11Wōn̄g rāā Dabid najə̄ kənda ń Kɔ́ɔ̄ɓē ənda Uja ndéý kə́ beé ní. Adə̄ bátə́ ɓōólaā gə̄gē ní a ɓārə́n̄ loo ní na i Peres Uja#13.11 Peres Uja, kə ta Hebəro ní kumən na i kum loo kə́ Uja rāā adə̄ wōȳ.. 12Ndɔ̄ ń noō tə́ Dabid ɓōĺ Nə́ɓā kɔ̄ɔ́, adə̄ əda na n-asə kaw̄ kə sandúkə yā Nə́ɓāá ɓēé looneé alé. 13Adə̄ ni-aw̄ kə sandúkə́ ní ɓēé looneé alé, banī adə̄ əndān̄ kem kújə yā Obed Edom ń i de kə́ Gat ní tə́. 14Sandúkə yā Nə́ɓā rāā nāā mətá ɓē Obed Edom. Adə̄ Kɔ́ɔ̄ɓē rāā majə kə de gə̄ kə́ kem kújə yā Obed Edom tə́ ō, kə yá̰a̰ kənge yān gēé malang ō.
Currently Selected:
1 YÁ̰A̰ GƏ̄ 13: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
