1 YÁ̰A̰ GƏ̄ 12

Madə̄ Dabid kə́ ta kəga dɔ gə̄ reēn̄ gōn tə́ Sikəlag

1De gə̄ ń reēn̄ gō Dabid tə́ Sikəlag dan ń Dabid a̰ȳń Saul ngōn̄ Kis ní i go̰ rɔ̄ɔ̄ gə̄. Adə̄ ré rɔ̄ɔ̄ to anī nin̄ a aw̄n̄ i ta rɔ̄ɔ̄ tə́. 2Yá̰a̰ rɔ̄ɔ̄ yādə́ gə̄ i gərā ō, bējə̄ ō. Nin̄ a tə́nīn̄ kɔkərɔ i kə jī geldə́ ō, kə jī ko̰də́ ō, a urən̄ kum gərá i kə jī geldə́ ō, kə jī ko̰də́ ō.

Ngéé Saul gə̄ kə́ gír ɓē yā Benjamḛ tə́ gə̄ ń reēn̄ ní i: 3Ahiejer kə́ ngār nin̄ kə ngōkó̰o̰n Yoas ń nin̄ i ngán Sema kə́ Gibea ní ō, Yejiel nin̄ kə Pelet ń nin̄ i ngán Asmabet ní ō, Beraka ō, Yehu kə́ Anatot ō, 4Isəmaya kə́ Gabaon ō. Ni i go̰ rɔ̄ɔ̄ kə́ dan ngé kə́ kutə mətá gə̄ tə́ ō, ni i ngol ngé kə́ kutə mətá gə̄ ō. 5Kutə̄ gō i Irmeya ō, Yajiel ō, Yohanan ō, Yojabad kə́ Gedera ō, 6Elujai ō, Yerimot ō, Bealia ō, Semaria ō, Sepatia kə́ Harupə ō, 7ngán kaa Kore gə̄ ń i Elkana ō, Isia ō, Ajarel ō, Yoejer ō, Yasobam ní ō, 8Yoela ō, Jebadia ō ń nin̄ i ngán Yeoram kə́ Gedor ní ō.

9De kə́ gír ɓē yā Gad tə́ gə̄ əya̰n̄ madə̄də́ gə̄ ba reēn̄ gō Dabid tə́ loo ɓɔ̄ɔ̄ rɔ̄ yān kə́ kem dəla loo tə́. Nin̄ i go̰ rɔ̄ɔ̄ gə̄ kə́ ndóōn̄ rɔ̄ɔ̄ adə̄ gerə̄n̄ majə ngá̰ý. Yá̰a̰ rɔ̄ɔ̄ yādə́ gə̄ i der ō, nənga ō. Nin̄ ton̄ ɓōĺ tītə̄ ɓɔl gə̄ ō, ɔlən̄ tītə̄ kāl̄ gə̄ kə́ dɔ mbal̄ ō. 10-14Nin̄ i deē kutə gidə i kógə̄ḿ. Rīdə́ n toó: Ejer, Obadia, Eliab, Misəmana, Irmeya, Atai, Eliel, Yohanan, Eljabad, Irmeya, Makəbanai. 15De kə́ gír ɓē yā Gad tə́ gə̄ ń nin̄ i ngol ngé rɔ̄ɔ̄ gə̄ ní nin̄ n noó. De kə́ dūú ngá̰ý dandə́ tə́ i kum gotə de gə̄ ɓú ō, de kə́ bo ngá̰ý kə́ dandə́ tə́ i kum gotə de gə̄ dūbú ō. 16I nin̄ n teēn̄ bā Jurdḛ kem nāā kə́ ta kəga dɔ tə́ ń bā Jurdḛ a rə̄ɓań kem kārə̄n tə́ kə̄ ndágá ní ba tə̄ɓān̄ de gə̄ malang ń ndin̄ kum wól loo gə̄ tə́ dām̄ kə́ gír ɓē tə́ ō, no ɓē tə́ ō, ní.

17De kə́ gír ɓē yā Benjamḛ tə́ gə̄ ō, yā Juda tə́ gə̄ ō, reēn̄ bátə́ ugə̄n̄ gō Dabid tə́ looń ɓɔ̄ɔ̄ rɔ̄n tū tə́. 18Ni teē tə́nī tadə́ ba ədadə́ na: Ré ī-reēī kəngeḿ tə́ i najə̄ lápə́ya tə́ ō, i najə̄ kɔsə kílə́ḿ tə́ kə̄ dɔɔ́ ō anī, m̄-ndigə̄ ngá̰ý kadə̄ m̄-ɓo rɔ̄ḿ yāsí tə́ kə ngarā̰ kemḿ mámák. Ba ré ī-reēī i gólə̄m̄ tə́ yā kəlam̄ jī madə̄ ba̰ā̰ḿ gə̄ tə́, tá m̄-rāā yá̰á̰ kógə̄ḿ kə́ majaĺ alé anī, ādə̄ Nə́ɓā yā kaají gə̄ i kə́ kum tə́ ō, rāāsí yá̰á̰ kə́ tōr̄ tām̄ majaĺ yāsí tə́ ō.

19Loo ń noō tə́ Ndíl yā Nə́ɓā reē dɔ Amasai tə́, ni ń i ngol ngé kə́ kutə mətá gə̄ ní, adə̄ ni un ndūn kə̄ dɔɔ́ ədań na:

Dabid, jḭḭ i deē yāí gə̄,

ngōn̄ Jese, jḭḭ i naā tə́ seí!

Ādə̄ kem sɔl lɔm i seí tə́ ō,

ādə̄ kem sɔl i kə nge rāā seí ō!

Tɔdɔ̄ i Nə́ɓā yāí n rāā seí ní!

Loo ń noō tə́ Dabid əhɔdə́ kə̄ rɔ̄n tə́ ba əladə́ dan ngol ngé rɔ̄ɔ̄ yān gə̄ tə́. 20Dan ń Dabid ɓɔ rɔ̄n tū yā Pilistin gə̄ tə́ yā kaw̄ rɔ̄ɔń Saul ní, de kə́ gír ɓē yā Manase tə́ gə̄ tetən̄ rɔ̄də́ gōn tə́. Kə́ rɔ̄kum tə́ tā anī Dabid nin̄ kə deē yān gēé rɔ̄ɔ̄n̄ naā tə́ kə Pilistin gēé alé, tām̄ ngol ngé rɔ̄ɔ̄ gə̄ yā Pilistin gə̄ tə̄ɓān̄də́ kɔ̄ɔ́, tām̄ ədan̄ naā dɔ dáńdə́ tə́ na: Dabid a tetə rɔ̄n gō Saul ń i kɔ́ɔ̄n kə́ kété ní tə́, adə̄ a əlají kem jīn tə́. 21Ba i dan ń Dabid tél ugə̄ gogə́ kem ɓē kə́ Sikəlag tə́ ní n de kə́ gír ɓē yā Manase tə́ gə̄ tetən̄ rɔ̄də́ gōn tə́ ní. De gə̄ ní i Adəna ō, Yojabad ō, Yediael ō, Mikael ō, Yojabad ō, Elihu nin̄ kə Siletai ń nin̄ i ngol ngé rɔ̄ɔ̄ kə́ dūbú gə̄ kə́ gír ɓē yā Manase tə́ ní ō. 22Nin̄ malang i go̰ rɔ̄ɔ̄ gə̄, adə̄ nin̄ rāān̄ kə ngé rɔ̄ɔ̄ gə̄ yā Dabid. Nin̄ télən̄ ngol ngé rɔ̄ɔ̄ gə̄. 23Kə dɔ ndɔ̄ gə̄ ń noō de gə̄ a reē ɓɔ̄ɔ̄n̄ rɔ̄də́ tū yā Dabid tə́ yā kɔsə kílən kə̄ dɔɔ́, adə̄ ngé rɔ̄ɔ̄ yān gə̄ bəlan̄ ngá̰ý.

Kutə de gə̄ ń ndigən̄ najə̄ yā Dabid á reēn̄ gōn tə́ Hebron ní

24De kə́ kasə kaw̄ ta rɔ̄ɔ̄ tə́ gə̄ ń aw̄n̄ gō Dabid tə́ Hebron yā kəndān mban̄g kum gotə Saul kə gō ndū Kɔ́ɔ̄ɓēé ní kutədə́ ń toó:

25De kə́ gír ɓē yā Juda tə́ gə̄ i deē 6 800. Yá̰a̰ rɔ̄ɔ̄ yādə́ gə̄ i der ō, nənga ō. 26De kə́ gír ɓē yā Simeo̰ tə́ gə̄ i deē 7 100. Nin̄ malang i go̰ rɔ̄ɔ̄ gə̄. 27De kə́ gír ɓē yā Lebi tə́ gə̄ i deē 4 600 28naā tə́ kə Yoyada ń ni i ngār kə́ gír kaa yā Aaro̰ tə́ ní ō, de kə́ seneé gə̄ i 3 700 ō. 29Sadok ń i ngōn̄ kə́ balsáá ɓáý ní ni i sedə́ ō. Ni i go̰ rɔ̄ɔ̄. Ngār gə̄ kə́ gír kojə yān nəkɔ́ tə́ gə̄ ń aw̄n̄ seneé ní nin̄ i deē 22. 30De kə́ gír ɓē yā Benjamḛ tə́ gə̄ ń nin̄ i ngákó̰o̰ Saul gə̄ ní, nin̄ i deē 3 000. Bátə́ ugə̄ń dan ń noō tə́ ní, ngá̰ý gə̄ dandə́ tə́ a rāān̄ i kəla yā de kə́ gír kojə yā Saul tə́ gə̄. 31De kə́ gír ɓē yā Benjamḛ tə́ gə̄ i deē 20 800. Nin̄ malang i go̰ rɔ̄ɔ̄ gə̄ ō, i de gə̄ kə́ rīdə́ ɓār̄ ngá̰ý dan kojə yādə́ gə̄ tə́ ō. 32Núsə de kə́ gír ɓē yā Manase tə́ gə̄ ń ndin̄ no ɓē tə́ ní, de kə́ tū tə́ gə̄ i deē 18 000. Ɔjən̄ dɔdə́ kadə̄ aw̄ əndān̄ Dabid mban̄g. 33De kə́ gír ɓē yā Isakar tə́ gə̄ i deē 200. Nin̄ malang i ngol áskar gə̄. De kə́ gír tɔ́gə yādə́ gə̄ tə́ i naā tə́ sedə́. De gə̄ ní nin̄ malang i ngé kəndā ma̰ȳ ndɔ̄ gə̄ ń a mānə̄n̄ ní, yā gerə̄ń yá̰á̰ ń kadə̄ ngán Israel gə̄ rāān̄ ní. 34De kə́ gír ɓē yā Jabulo̰ tə́ gə̄ i deē 50 000. Nin̄ rāān̄ gō rɔ̄də́ kɔ̄ɔ́ ɓá yā kaw̄ ta rɔ̄ɔ̄ tə́ kə yá̰a̰ rɔ̄ɔ̄ yādə́ gēé malang ō, yā rɔ̄ɔ̄ kə kem kə́ kógə̄ḿ ō. 35De kə́ gír ɓē yā Nepətali tə́ gə̄ i deē 1 000. Nin̄ malang i ngār gə̄. Deē yādə́ gə̄ i 37 000. Yá̰a̰ rɔ̄ɔ̄ yādə́ gə̄ i der ō nənga ō. 36De kə́ gír ɓē yā Dan tə́ gə̄ i deē 28 600. Nin̄ rāān̄ gō rɔ̄də́ kɔ̄ɔ́ ɓá yā kaw̄ ta rɔ̄ɔ̄ tə́. 37De kə́ gír ɓē yā Aser tə́ gə̄ i 40 000. Nin̄ rāān̄ gō rɔ̄də́ kɔ̄ɔ́ ɓá yā kaw̄ ta rɔ̄ɔ̄ tə́ ō. 38De kə́ gír ɓē yā Ruben tə́ gə̄ ō, yā Gad tə́ gə̄ ō, yā núsə de kə́ gír ɓē yā Manase tə́ gə̄ ō ń nin̄ i de kə́ gidə bā Jurdḛ kə́ dām̄ kə́ nú tə́ gə̄ ní, nin̄ malang i deē 120 000, kə́ yá̰a̰ rɔ̄ɔ̄ kə́ tayā tayā gēé jīdə́ tə́.

39De gə̄ ń noō malang i ngé rɔ̄ɔ̄ gə̄. Nin̄ ndin̄ dɔ rɔ̄də́ tə́ kɔ̄ɔ́ tām̄ yā rɔ̄ɔ̄ tə́. Nin̄ reēn̄ Hebron kə kem kə́ kógə̄ḿ yā kəndā Dabid mban̄g dɔ Israel gə̄ tə́ malang. Gotə Israel gə̄ malang reēn̄ kəndā Dabid mban̄g tə́ kə kem kə́ kógə̄ḿ ō. 40Nin̄ rāān̄ ndɔ̄ mətá rɔ̄ Dabid tə́, əsan̄ ō, a̰ȳn̄ ō. Tɔdɔ̄ ngákó̰ó̰də́ gə̄ sāān̄ yá̰a̰ kəsa tām̄ yādə́ tə́. 41De gə̄ ń ndin̄ ngɔr ō, de gə̄ ń ndin̄ sa̰y nú gō nang yā Isakar tə́ ō, Jabulo̰ tə́ ō, Nepətali tə́ ō ní, reēn̄ kə yá̰a̰ kəsa gēé ō. Nin̄ reēn̄neé i gidə kərō gə̄ tə́ ō, gidə jámbal gə̄ tə́ ō, gidə kərō rapáy gə̄ tə́ ō, gidə man̄g gə̄ tə́ ō. Yá̰a̰ gə̄ ń reēn̄neé ní i ndujə̄ ō, i kótə̄ kə́ najə kadə̄ tutə ō, i kan̄ kāgə̄ nduú kə́ najə kadə̄ tutə ō, i kasə nduú ō, i yibə̄ ō, i man̄g gə̄, kə batə̄ gə̄, kə bə̄yā̰ gə̄ ngá̰ý ō, tɔdɔ̄ rɔ̄ Israel gə̄ malang nel̄də́.

Currently Selected:

1 YÁ̰A̰ GƏ̄ 12: SARDC

Highlight

Copy

Compare