1 YÁ̰A̰ GƏ̄ 11

Əndān̄ Dabid mban̄g dɔ Israel gə̄ tə́

(Á̰a̰ī 2 Sam 5.1-3)

1 Israel gə̄ malang kánə̄n̄ naā rɔ̄ Dabid tə́ Hebron ba ədanən̄ na: Jḭḭ i kojə yāí, jḭḭ i mósí. 2Kété nəkɔ́ ń Saul a o̰o̰ń ɓē dɔjí tə́ ní, i ḭ̄ n i nge teē kə Israel gēé kaw̄ sedə́ ta rɔ̄ɔ̄ tə́ ō, nge tél sedə́ ō ní. Tá Kɔ́ɔ̄ɓē Nə́ɓā yāí ədaī na i ḭ̄ n ā ūl̄ Israel gə̄ ń i deē yān gə̄ ní ō, na i ḭ̄ n ā ī-ndi ngār dɔdə́ tə́ ō ní. 3Kum kɔɔ̄ kə́ Israel tə́ gə̄ malang reē əngen̄ mban̄g Dabid Hebron ō, ni-əhɔ madə̄ naā sedə́ ta kum Kɔ́ɔ̄ɓē tə́ ō. Nin̄ urən̄ yibə̄ ngār dɔn tə́ əndanən̄neé mban̄g kə́ Israel tə́ tītə̄ ń Kɔ́ɔ̄ɓē əndāń ta Samuel tə́ kété adə̄ əda ní.

Dabid taā ɓē kə́ Jerusalem

(Á̰a̰ī 2 Sam 5.6-10)

4Dabid nin̄ kə Israel gə̄ malang aw̄n̄ Jerusalem ń i Yebus ní. Yebus i ɓē yā Yebus gə̄ ń ndin̄ dɔ nang ń noō tə́ kété ní. 5De kə́ Yebus gə̄ ədan̄ Dabid na: Ā údə laā alé. Banī Dabid taā Siyo̰ ń i ɓē kə́ ngan̄g ngá̰ý ní. Gō tə́ anī ni-əndā rī ɓē ní na i ɓē yā Dabid. 6Tɔdɔ̄ ni-əda na deē ń jīn a ɔdə Yebus gə̄ kété ní, ni a tél de kə́ bo dɔ ngol áskar gə̄ tə́. Joab ngōn̄ Seruya aw̄ ənī Yebus gə̄ rɔ̄ɔ̄ kété, adə̄ i ni n i de kə́ bo ní. 7Dabid ndi kem ɓē kə́ ngan̄g ngá̰ý ní tə́. I tām̄ najə̄ ń noō tə́ n a ɓarə̄n̄neé ɓē ní na i ɓē yā Dabid ní. 8Gō tə́ anī ni-rāā kújə gə̄ gidə ɓē yān ní tə́, əla gír Milo#11.8 Milo: Kum Milo na i nán̄g kə́ kán̄ dɔ naā tə́. ugə̄ń loo kə́ ngɔr gə̄ kə́ gidə ɓē ní tə́ ō, Joab rāā gotə ɓē ń na̰y ní ō. 9Dabid tél de kə́ bo kum kə̄ kété ō, Kɔ́ɔ̄ɓē kə́ bo kə́ tɔ́gən i ngá̰ý i naā tə́ seneé ō.

Ngé rɔ̄ɔ̄ gə̄ yā Dabid

(Á̰a̰ī 2 Sam 23.8-39)

10Go̰ rɔ̄ɔ̄ gə̄ yā Dabid ń nin̄ kə Israel gə̄ malang əndān̄ Dabid mban̄g kə gō najə̄ ń Kɔ́ɔ̄ɓē əda dɔ gír deē yān gə̄ tə́ ō, ɔsən̄ kílən kə̄ dɔɔ́ ɓāl̄ ko̰o̰ ɓē yān tə́ ō ní, rīdə́ n toó: 11Ta kəga dɔ i Isəbaal ngōn̄ Hakəmon. Ni i ngol de kə́ mətá gə̄. I ni n tɔ̄l̄ madə̄ ba̰ā̰ tə́ gə̄ ɓú mətá kə nənga yānneé ta rɔ̄ɔ̄ kə́ nja kógə̄ḿ beē tə́ ní. 12Nge kutə̄ gōn i Eleajar ngōn̄ Dodo kə́ Ahoa. Ni i dan ngé rɔ̄ɔ̄ kə́ mətá gə̄ tə́. 13Dan ń Pilistin gə̄ kánə̄n̄ naā Pas Damim yā rɔ̄ɔ̄ ngán Israel gə̄ ní, ni i kadə Dabid tə́ loo ngeé ń noō tə́. Ngán Israel gə̄ a̰ȳn̄ naā no Pilistin gə̄ tə́ ō, ndɔr̄ kōō ɔ́rjə i loo ní tə́ ō. 14Eleajar nin̄ kə deē yān gēé ran̄ kem ndɔr̄ ní tə́ danaá bang. Nin̄-əndan̄ Pilistin gə̄ ba tə̄ɓān̄də́ kɔ̄ɔ́ kemeé. I beé n Kɔ́ɔ̄ɓē tetəń rɔ̄ɔ̄ kə́ bo ní.

15Ndɔ̄ kógə̄ḿ tə́ ngé rɔ̄ɔ̄ gə̄ mətá dan ngé rɔ̄ɔ̄ kə́ kutə mətá gə̄ tə́ reē əngen̄ Dabid kem bəlo mbal̄ kə́ Adulam tə́, tɔdɔ̄ Pilistin gə̄ əndān̄ gérger yādə́ kum wól loo yā Repay gə̄ tə́. 16Dan ngeé ń noō tə́ ní Dabid ndi i loo ɓɔ̄ɔ̄ rɔ̄ yān tə́ ō, ɓūtə̄ ngé rɔ̄ɔ̄ yā Pilistin gə̄ ndin̄ i Betlehem ō. 17Anī yá̰á̰ ń ngurən rāā Dabid ní ni-əda kə̄ ndágá. Ni-dəje na ké i náā n a adə̄n̄ man̄ kə́ kem bəlo taā man̄ ndi kə́ ta róbə́ kə́ yā kudəń kə̄ kem ɓē kə́ Betlehem tə́ yā kadə̄ m-a̰ȳ ní wa. 18Anī ngé rɔ̄ɔ̄ kə́ mətá gə̄ ní aw̄ udən̄ kem gérger yā Pilistin gə̄ tə́, ba ɔdən̄ man̄ kə́ kem bəlo man̄ kə́ ta róbə́ kə́ yā kudəń kə̄ kem ɓē kə́ Betlehem tə́ ní reēnneé adə̄n̄ Dabid. Banī Dabid mbātə́ ka̰ȳ man̄ ní. Ni ɓōkə́ man̄ ní nang tə́ ndējə̄ Kɔ́ɔ̄ɓē, 19ba əda na: Kɔ́ɔ̄ɓē, kə m-ā̰ȳ man̄ ń toō a? To i tītə̄ loo ka̰ȳ mósə de gə̄ ń ənīn̄ kəlā jī yo tə́ aw̄n̄neé gō tə́ ní. Adə̄ ni mbātə́ ka̰ȳ man̄ ní. Yá̰á̰ ń ngé rɔ̄ɔ̄ kə́ mətá gə̄ rāān̄ ní n noó.

20Abisai kə́ ngōkó̰o̰ Joab i ngol ngé rɔ̄ɔ̄ gə̄ ń nin̄ i deē kutə mətá ní. I ni n ndɔ̄ kógə̄ḿ tə́ tɔ́sə̄ madə̄ ba̰ā̰də́ gə̄ ɓú mətá kə nənga yānneé tɔ́sə̄ tɔ̄l̄də́ ní. Rīn ɓār̄ dan ngé rɔ̄ɔ̄ kə́ kutə mətá gə̄ tə́. 21Rīn ɓār̄ tɔȳ yādə́ loo nja kə́ jōó tə́, tá ni-tél ngoldə́ gə̄gē ɓáý, banī ni-əndā gō ngé kə́ mətá gə̄ tə́ alé. 22Benaya kə́ Kabəseel i ngōn̄ Yoyada kə́ ngōn̄ go̰ rɔ̄ɔ̄ kógə̄ḿ ní, rāā yá̰á̰ kə́ to ɓōĺ gə̄ i ngá̰ý. I ni n tɔ̄l̄ go̰ rɔ̄ɔ̄ kə́ jōó gə̄ kə́ Moab ní ō, risə gō ɓɔl tə́ aw̄ tɔ̄lən kem bəlo taā man̄ tə́, ndɔ̄ ń néjə#11.22 Néjə, i man̄ kə́ to tītə̄ kɔ̄sə̄ ba ndaa túĺ túĺ tītə̄ búy kūbə̄ beé. Dan ń kūl̄ o̰o̰ ngá̰ý anī a ḭḭ dɔ rā̰ tə́ a dəse tun tun, ba gətóo dɔ nang yājí tə́ laā. Á̰a̰ī 2 Sam 23.20 a dəseń tun tun tə́ ní ō. 23I ni n tɔ̄l̄ báw deē kógə̄ḿ kə́ Ejiptə ní ō. Báw deē ní ngālən asə métər jōó kə núsə, ba nənga kə́ jīn tə́ bo tītə̄ kāgə̄ yā ngé kəjō kūbə̄ gə̄ beé. Yá̰á̰ ń əhɔ jīn tə́ a aw̄ń kə̄ rɔ̄ɔ̄n tə́ ní i kāgə̄. Ni-taā nənga kə́ jīn tə́ tél tɔ̄l̄ənneé. 24Yá̰á̰ ń Benaya kə́ ngōn̄ Yoyada rāā ní n noó. Ni-rāā adə̄ rīn ɓār̄ dan ngé rɔ̄ɔ̄ kə́ kutə mətá gə̄ tə́. 25De gə̄ rɔȳnən̄ tɔȳ ngé kə́ kutə mətá gə̄, banī ni-əndā gō ngé kə́ mətá gə̄ tə́ alé. Dabid əndān dɔ áskar gə̄ kə́ ngé ngɔ̄m̄ dɔn gə̄ tə́.

26Gotə go̰ rɔ̄ɔ̄ kə́ rang gə̄ i Asael ngōkó̰o̰ Joab ō, Elanan ngōn̄ Dodo kə́ Betlehem ō, 27Samotə kə́ Haror ō, Heles kə́ Palon ō, 28Ira ngōn̄ Ikes kə́ Tekoa ō, Abiejer kə́ Anatot ō, 29Sibəkai kə́ Husa ō, Ilai kə́ Ahoa ō, 30Marai kə́ Netopa ō, Heled ngōn̄ Baana kə́ Netopa ō, 31Itai ngōn̄ Ribai kə́ Gibea kə́ gō nang yā Benjamḛ gə̄ tə́ ō, Benaya kə́ Piraton ō, 32Hurai kə́ loo gə̄ ń man̄ gə̄ kə́ dɔ mbal̄ Gaas tə́ gə̄ a nūgə̄ń tū tə́ ní ō, Abiel kə́ Bet Araba ō, 33Asmabet kə́ Bahurim ō, Eliaba kə́ Saalbon ō, 34ngán Hasem gə̄ kə́ Gijon ō, Yonatan ngōn̄ Sage kə́ Harar ō, 35Ahiam ngōn̄ Sakar kə́ Harar ō, Elipal ngōn̄ Ur ō, 36Heper kə́ Mekəra ō, Ahia kə́ Palon ō, 37Hesəro kə́ Karmel ō, Naarai ngōn̄ Ejəbai ō, 38Joel kə́ ngōkó̰o̰ Natan ō, Mibar ngōn̄ Hagəri ō, 39Selek kə́ Amon ō, Narai kə́ Beerot ń i nge kətō yá̰a̰ rɔ̄ɔ̄ gə̄ yā Joab kə́ ngōn̄ Seruya ní ō, 40Ira ō, Gareb ō ń nin̄ i de kə́ gír kojə yā Yeter tə́ ní ō, 41Uri ń ni i Het ní ō, Jabad ngōn̄ Alai ō, 42Adina ngōn̄ Sija kə́ ngār kə́ gír ɓē yā Ruben tə́ ō, áskar kə́ seneé gə̄ i kutə mətá ō, 43Hanan ngōn̄ Maaka ō. Yosapat kə́ Meten ō, 44Ujia kə́ Asətarot ō, Sama ō, Yeyel ō ń nin̄ i ngán Hotam gə̄ kə́ Aroer ní ō, 45Yediael ngōn̄ Simri ō, ngōkó̰o̰n Yoha kə́ Tisə ō, 46Eliel kə́ Mahaba ō, ngán Elnam gə̄ ń i Yeribai nin̄ kə Yosabia ní ō, Itəma kə́ dɔ nang kə́ Moab tə́ ō, 47Eliel ō, Obed ō, Yasiel kə́ Soba ō.

Currently Selected:

1 YÁ̰A̰ GƏ̄ 11: SARDC

Highlight

Copy

Compare