1 YÁ̰A̰ GƏ̄ 10

Gotə najə̄ yā Dabid, mban̄g kə́ Israel tə́

Koy Saul

(Á̰a̰ī 1 Sam 31.1-13)

1Ndɔ̄ kógə̄ḿ tə́ Pilistin gə̄ rɔ̄ɔ̄n̄ Israel gə̄, adə̄ Israel gə̄ a̰ȳn̄ naā nodə́ tə́ ō, ngá̰ý gə̄ oyn̄ dɔ mbal̄ kə́ Gilboa tə́ ō. 2Nja Pilistin gə̄ ra kɔŕ kɔtə́yɔ gō Saul tə́ nin̄ kə ngánən gēé. Nin̄ tɔ̄lə̄n̄ ngánən gə̄ ń i Jonatan ō, Abinadab ō, Malkisua ō ní. 3Ba tél tūrə̄n̄ rɔ̄də́ kə̄ dɔ Saul tə́. Dan ń ngé kur gərā gə̄ teēn̄ dɔn tə́ á a̰a̰də́ ní ndebə. 4Ni-əda nge kətō yá̰a̰ rɔ̄ɔ̄ yān gə̄ na: Ɔ̄r̄ kaskar yāí ɔ́səm̄neé na sōgə́ ngé kəja mɔtədə́ aĺ gə̄ ń noō reē mbóoń seḿ. Banī nge kətō yá̰a̰ rɔ̄ɔ̄ gə̄ ɔdə alé tɔdɔ̄ ɓōĺ asən nák. Anī Saul nəkɔ́ un kaskar ba əsō ta tə́. 5Dan ń nge kətō yá̰a̰ rɔ̄ɔ̄ gə̄ yā Saul a̰a̰ kadə̄ Saul oy kɔ̄ɔ́ anī, əsō ta kaskar yān tə́ ō, ba oy seneé. 6Saul oy ō, ngánən kə́ dəngam kə́ mətá gə̄ oyn̄ ō. De kə́ gír kojə yān tə́ gə̄ oyn̄ malang gidə kógə̄ḿ. 7Dan ń ngán Israel gə̄ a̰a̰n̄ kadə̄ ngé rɔ̄ɔ̄ gə̄ yā Israel gə̄ a̰ȳn̄ naā kɔ̄ɔ́ ō, Saul nin̄ kə ngánən kə́ dəngam gēé oyn̄ kɔ̄ɔ́ ō anī, əya̰n̄ ɓē yādə́ gə̄ ba a̰ȳn̄ naā, ādə̄ Pilistin gə̄ reē ndin̄ gotədə́ tə́.

8Teē kə ndɔ̄ kə́ noō anī Pilistin gə̄ ń reēn̄ ró̰ȳ yá̰á̰ kə́ rɔ̄ nīń gə̄ tə́ ní, əngen̄ nīń Saul ō, nīń ngánən kə́ mətá gə̄ ō, dɔ mbal̄ kə́ Gilboa tə́. 9Nin̄ gāngə̄n̄ dɔ Saul ō, ró̰ȳn̄ yá̰a̰ rɔ̄ɔ̄ yān kə́ rɔ̄n tə́ gə̄ ō, ba əlan̄ de gə̄ adə̄ ədan̄ najə̄ yon dɔ nang yā Pilistin gə̄ tə́ ō, ndɔ̄bə̄n̄ ɓesə̄ yādə́ gə̄ ō, ədan̄ de gə̄ ō. 10Nin̄ ɓōkə́n̄ yá̰a̰ rɔ̄ɔ̄ yān gə̄ kem kújə yā nə́ɓā yādə́ tə́ ō, əndan̄ kār̄ dɔn kə máyá̰ adə̄ ra kadə bɔr tə́ kem kújə yā nə́ɓā Dagon tə́ ō.

11De kə́ Yabes kə́ Galaad tə́ gə̄ oōn̄ yá̰a̰ malang ń Pilistin gə̄ rāān̄ kə Saul ní. 12Anī go̰ rɔ̄ɔ̄ gə̄ ḭḭn̄ dɔɔ́ malang aw̄ unən̄ nīń Saul ō, ɔyn̄ nīń ngánən kə́ dəngam gə̄ ō, reēn̄neé kem ɓē kə́ Yabes tə́. Nin̄ dubə̄n̄ kə̄ngādə́ gə̄ gír kāgə̄ kə́ bo kə́ Yabes tə́. Gō tə́ anī ndin̄ ɓō tām̄ yā Nə́ɓā tə́ ndɔ̄ sīrí.

13-14Saul oy i najə̄ hál kə́ sew aĺ kə́ ni-rāā kə Kɔ́ɔ̄ɓēé tə́. Tɔdɔ̄ ni rāā yá̰á̰ ń Kɔ́ɔ̄ɓē əda ní aĺ ō, aw̄ sāā tə́ rɔ̄ Kɔ́ɔ̄ɓē tə́ alé ba aw̄ sāā tə́ rɔ̄ kɔdə̄ sāā gə̄ tə́ ō. Adə̄ Kɔ́ɔ̄ɓē rāā adə̄ Saul oy, ba ni tél kə ko̰o̰ ɓēé adə̄ Dabid ngōn̄ Jese.

Currently Selected:

1 YÁ̰A̰ GƏ̄ 10: SARDC

Highlight

Copy

Compare