Oroma 3
3
1Inyete Azhu o koshi laa enzu umba akwu Azhu mo mungye? Naa rigbɛ ingyi ɛsɔ izɛma akwu mbɛ? 2I yi gyɔɔ mu ɔgwuzɛ uwunawuna! Iyi kwonze, akwu Azhu gba Ukpo e shi mbo iso wu kaa lo gbo yi mo le. 3Inyete ba gba umbafo mba o wo iyi bɔkɔ umba ɔ zɔ te o wo mo kɔ? Ɛlɛ i shi Ukpo e wo iyi bɔkɔ a zɔ te ee wo mo? 4I yi tayi mo ndii! Onzu uwunawuna akwu u mu angba, tetete Ukpo ba akwu ongbulolo. Kyamate bɔkɔ kwokpo ungwu Ukpo kwu so te,
<<Gba ŋɔ siso, enzu lo ma te ŋɔ so ongbulolo;
akwɛyi ombu ŋɔ u wɔmakwuyengwu enzu ɔ vu undu ŋɔ.>>
5Inyete gba ira nzu iwomo i wa la ototo uwu Ukpo kwudu gedegede kɔ? Gba Ukpo e lo nzu inyashi, kii zɔ te e wo ototo mo? (Ɛlɛ akwu kwuyo ungwu bɔkɔ onzu uwu inyi igyi uwunawuna e yo le.) 6Akwu tayi mo ndii! Gba Ukpo la kwu ototo mo, ee wo la ba e do te a ngbɛ kwudu kwɔlɛ ombu uwoyi? 7Inyete gba imwangba mi, i wa la ongbulolo uwu Ukpo kwudu gedegede akwɛyi i ka wu la kwupwɔ, kimbe kii shi bɔkɔ o gba ɔ ngbɛ mi ombu uwoyi te mi kwu onzu u wo ingbomo? 8Enzu umbafo o mwilo mi te, Imi mi zɔ tee, <<La ki wo iyira kaa iyeshi li wɔ!>> Ukpo a ngbɛ mba ombu uwoyi kyakya la iwomo mbo.
Onzu Ototo E Yi Mo
9Inyete kinzu Azhu, ki koshi la umba bɔkɔ akwu Azhu mo re? Akwu tayi mo ndii! Mi zɔ yi ee tee enzu lɛɛbi, la Azhu, la umba bɔkɔ akwu Azhu mo akwu enzu umba ingbomo. 10Kyamate bɔkɔ kwokpo ungwu Ukpo kwu so tee:
<<Onzu ototo ukpɛnyi te e yi mo,
11onzu ukpɛnyi u yitu iyeshi mbala iyira, naa u lɛ Ukpo e yi mo.
12Enzu lɛɛbi o kwu Ukpo ɔsu;
kpɛkpɛmba akwu enzu umbu mbwa;
u wo iyeshi e yi mo,
ukpɛnyi te e yi mo.>>
13<<Iso mbo i nyɔlɔma mbala kwukyoro ungwu lukwu;
iso iyi angba gba ɛtunɛ mba i so le.>>
<<Ayi mba i yi rɛnu kyamate ɛtu iyi ɔkwu tayi.>>
14<<Lunzu mbo lu nyɔlɔma mbala iso iyira mbala arikpama.>>
15<<O kɔ ba o-oo wo amba kaa lɔ ngbɛ onzu mo;
16munamuna bɔkɔ umba ɔ ka, itutumo mbala ubugyi gba oo shi yi le.
17Umba o yitu iyi ɔgwuzɛ uwu i ŋɔ moloto mo.>>
18<<O yi iyi iyi Ukpo mu makɔ mba mo.>>
19Kekelele ki yitu tee iyinayina iyi bɔkɔ ɛrama iso, i so mbala umba bɔkɔ ɛrama i yi mu reshi mbo, kaa kenzu unga onzu uwunawuna la ka kpalama kaa Ukpo la ngbɛ kwudu kwɔlɛ lɛɛbi ombu uwoyi. 20Moo onzu e yi ototo midu iyi Ukpo kwuwongu ɛrama imbwaluma mo; kiya ingyi ɛrama bɔkɔ ii wo gba i yi tee, i zɔ enzu ingbomo mbo.
Ewo Iyi Bɔkɔ Enzu Oo Fya Ototo Mbaa Ukpo
21Kekelele ɔgwuzɛ uwu o fya ototo ma mbaa Ukpo ba o ta wu kwudu-o. Ɔgwuzɛ ɔlɛ akwu ɛrama imbwaluma mo, tetete Ɛrama iyi Omosisi mbala ɛzɔ iyi anukenzu i siso meka yi. 22Ukpo ee shi enzu oo yi ototo kwuwongu ikwu idu lu fulo mbo mu Ɔzhizɔsi Okrasi. Ukpo e wo ɛlɛ laa enzu lɛɛbi umba bɔkɔ ɔ mbwalu Okrasi, kwuwongu ikikɔ i yi mo ndii: 23moo enzu lɛɛbi o ngbomo akwɛyi o ndama mbaa isama iyi Ukpo. 24Tetete kwuwongu rɛshi ingyi esheshi iyi Ukpo, enzu lɛɛbi o fya ototo ma mbaa wu mu Okrasi Ɔzhizɔsi uwu bɔkɔ a wa mba ma awu. 25Ukpo a ra Ɔzhizɔsi e shi, kaa mu ɛnzhi ifumo wu, lakwu ɔgwuzɛ uwu bɔkɔ enzu umba bɔkɔ o kwu idu lu fulo ma wu, o to mbo ingbomo mbo mo. 26Ukpo e wo ɛlɛ kaa la zɔ ototo wu, moo mekyi e yidu akwɛyi a lafya la ingbomo iyi enzu iyekyi, mu kwuye kwɔlɛ ba a lafya la ingbomo mbo fo kaa la zɔ ototo wu. Mu iwomo ɛlɛ, Ukpo a zɔ tee u wu mafyi wu akwu ototo, onzu uwu e kwu idu lu fulo mu Ɔzhizɔsi, ee shi wu akwu onzu ototo midu iyi Ukpo.
27Kekelele ki kwɛnwu mungye? Mu kiya kinyinyi mo! Kwuwongwu kwuwongumbe? A kwu kwuwongu ki mbwalu ɛrama iyi Omosisi le? Aayimo, akwu kwuwongu ikwu idu lu fulo nzu mu Ɔzhizɔsi. 28Moo ki nyama tee onzu aa fya ototo ma mbaa Ukpo mu ɔgwuzɛ uwu ikwu idu lu fulo mu Ɔzhizɔsi kɛɛkyi, moo akwu mu ɛrama imbwaluma mo. 29Naa Ukpo akwu Ukpo uwu Azhu kɛɛkyi re? A kwu Ukpo uwu umba bɔkɔ akwu Azhu mo tete mo? Tegba i yi le. 30Ukpo akwu ukpɛnyi. Ee shi Azhu aakwu enzu umba ototo kwuwongu ikwu idu lu fulo mbo, umba bɔkɔ akwu Azhu mo ee shi mbo oo kwu enzu umba ototo tete kwuwongu ikwu idu lu fulo mbo. 31Inyete ɛlɛ i zɔ te ɛrama kii shi yi mɛmba kwuwongu ikwu idu lu fulo re? Ayimo, i yi tayi mo ndii; kinzu ki nyama la ɛrama iyi Omosisi tete.
Currently Selected:
Oroma 3: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
