Oroma 4
4
Mbwalu Ɔgwuzɛ Uwu Aburamu.
1Kekelele ki so te meka iyi Aburamu uwu bɔkɔ akwu usɔkwu nzu? A fya mbe mu luzɛ wu undu ikwidufulo? 2Gba lɔ zɔ tee o shi wu ototo mbaa Ukpo kwuwongu ɛduma wu, ba le be yi kiya ingyi ɛnwu ikwumo - tetete ba akwu mu idu iyi Ukpo mo. 3Iso iyi Ukpo i zɔ tee, <<Aburamu e kwu idu e fulo mu Ukpo, akwɛyi kwuwongu ikwu idu lu fulo wu ɛlɛ, Ukpo a ya wu tee ototo.>> 4Enzu umba bɔkɔ o wo ɛduma, rigbɛ ingyi oo shi mbo o ya ngyi rɛshi mo; akwu rigbɛ ingyi anu mba. 5Enzu ba umba bɔkɔ ɔ wɛlɛ mu ikwu idu lu fulo, moo akwu mu ɛduma mo, akwɛyi o kwu idu lu fulo mu Ukpo uwu bɔkɔ ee shi enzu umba ingbomo ɔsɛkɛnɛ awu ba akwu ikwu idu lu fulo ɛlɛ gba Ukpo a ra yi gba ee shi mbo ototo mbala ɛwu le. 6Ɛlɛlɛ gba Odevidi e so le bɔkɔ a zɔ tee ɔnyɛ akwu uwu onzu uwu bɔkɔ Ukpo a na wu tee akwu onzu ototo ba akwu kwuwongu ɛduma iyi bɔkɔ onzu awu ee wo le mo:
7<<Ɔnyɛ akwu uwu umba bɔkɔ ingbomo mbo o gba yi kpa mba,
umba bɔkɔ ingbomo mbo o kokoyi mo!
8Ɔnyɛ akwu uwu onzu uwu bɔkɔ Ɔkwu ee shi ingbomo wu makɔ mo!>>
9Inyete ɔnyɛ uwu bɔkɔ Odevidi e siso mawu ele akwu uwu umba bɔkɔ ɔ zɛ mba ɛsɔ ma kɛɛkyi re? Aayimo! A kwu uwu umba bɔkɔ ɔ zɛ mba ɛsɔ ma mo awu tete. Moo ki zɔ yi yi mu kwokpo ungwu Ukpo-o tee, <<Aburamu e kwu idu lu fulo mu Ukpo, akwɛyi kwuwongu ikwu idu lu fulo wu, Ukpo a na wu tee akwu onzu ototo.>> 10Kwuye ungwuna bɔkɔ ɛlɛ i wo? I wo dɛ nana mizhikembo iyi ɔ zɛ Aburamu ɛsɔ ma ŋa? I wo dɛ moo akwu mizhikembo mo. 11Ɔ zɛ wu ɛsɔ ma mizhikembo akwɛyi ɛsɔ izɛma wu ɛnyi akwu kɛzɔ unga ka zɔ te Ukpo a na wu te akwu onzu ototo kwuwongu a kwidu e fulo mawu dɛ gba ɔ bɔ zɛ wu ɛsɔ ma le. Kwuwo kwɔlɛ, Aburamu akwu ete uwu enzu lɛɛbi umba bɔkɔ o zɛ mba ɛsɔ ma mo, tetete kwuwongu o kwidu o fulo mu Ukpo, a na mba akwu enzu watoto munyi wu. 12U wu tete akwu ete uwu enzu umba ɔ zɛ mba ɛsɔ ma, umba bɔkɔ akwu ɛsɔ izɛma kɛɛkyi mo, i kyo ɔ zɛ luzɛ undu ikwu idu lu fulo undu bɔkɔ ete nzu Aburamu a zɛ dɛ gba ɔ bɔ zɛ wu ɛsɔ ma le awu.
Iso Iyi Ukpo E So E Shi Mɛzhi Ɔɔ Na Yi Mu Ikwidufulo
13kwuyengwu bɔkɔ Ukpo a za la Aburamu tee kwudu kwɔlɛ aakwu ungwawu mbala ɛdɔ wu awu, akwu kwuwongu Aburamu a mbwalu ɛrama le mo, akwu kwuwongu bɔkɔ e kwu idu lu fulo akwɛyi Ukpo a na wu tee akwu onzu ototo. 14Moo gba kiya ingyi Ukpo e so e shi mɛzhi, oo shi umba bɔkɔ o mbwalu ɛrama, de ba ikwu idu lu fulo akwu kiya kinyinyi mo, i so i shi mɛzhi iyi Ukpo ba akwiyi umbwa. 15Ɛrama i bo la amba umba Ukpo mɛzhi; mbaa bɔkɔ ɛrama i yi mo, ifomo iyi ɛrama ba i yi mo.
16Kwuwo kwɔlɛ, i siso i shi mɛzhi i ri mu ikwu idu lu fulo, kaa lakwu rɛshi ingyi esheshi iyi Ukpo la ɛdɔ iyi Aburamu lɛɛbi - akwu la wa mbwalu ɛrama kɛɛkyi mo, i kyo la umba bɔkɔ o kwu idu lu fulo kyamate Aburamu e wo awu tete. Moo Aburamu akwu ete wu wa mbwalu lɛɛbi; 17kyamate kwokpo ungwu Ukpo kwo so tee, <<Imi mi wo ŋɔ ete uwu enzu lɛɛbi.>> Isiso ishi mɛzhi ɛlɛ ishoshi mu idu iyi Ukpo uwu bɔkɔ Aburamu a kwidu e fulo mawu awu, Ukpo uwu bɔkɔ aa gba la enzu iyimo mu kwuvɔ awu, uwu bɔkɔ ɔkpa wu, aa wa la kiya ingyi bɔkɔ ki di yi dɛ mo awu, la ki yi.
18Aburamu ba e fulo eyi fo, tetete a kwidu e fulo akwɛyi akwu <<ete uwu enzu riba riba.>> Kyamate kwokpo ungwu Ukpo kwu so tee, <<Ɛdɔ ŋɔ i yi riba kyamate elovyo tayi.>> 19Kwuye kwɔngu lɔri wu lu nda la oderi fo; ɛnwu wu i kpomo-o, oko wu, Osera ba e do te a mba ma fo; tetete e kwu idu lu fulo. 20Uwu ba a lafya la ikwu idu lu fulo wu mo, e yi egbo epo mu iso iyi Ukpo e so e shi mɛzhi awu mo; ikwu idu lu fulo wu i shi wu ekpasu akwɛyi a du Ukpo ma. 21Ikyo e yi egbo epo mo ndii tee Ukpo e do te e wo iyi bɔkɔ e so e shi mɛzhi. 22Ɛlɛ gba i shi <<Ukpo a na Aburamu tee akwu onzu ototo>> kwuwongu ikwu idu lu fulo wu le. 23Iso iyi bɔkɔ ɔ so tee, <<Ukpo a na wu tee akwu onzu ototo>> awu, akwu kwuwo wu kɛɛkyi mo. 24Ukpo a ka yi kwuwo nzu tete, kinzu umba bɔkɔ Ukpo a ba na nzu tee ki kwu watoto, kinzu umba bɔkɔ ki kwu idu lu fulo mu uwu bɔkɔ Ukpo e yi Ɔzhizɔsi Ɔkwu nzu mo mu kwuvɔ awu. 25Kwuwongwu ingbomo nzu, Ukpo a ra la Ɔzhizɔsi Okrasi e shi kaa le kpomo, akwɛyi o yi wu mo mu kwuvɔ kaa la ki fya ototo ma mbaa Ukpo.
Currently Selected:
Oroma 4: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
