Oroma 12
12
Kwunyɔ Mu Ɛduma Iyi Ukpo
1Kwuwo kwɔlɛ, ɛmɛnɛ mi, kwuwongu eyembembyi iyi Ukpo nzu Mii kpa yi ɛshɛku tee: la lu shi ɛnwu li kwu isabɔ ireyi la Ukpo, ɛkɛrikɛri iyi bɔkɔ i she la Ukpo. Ɛlɛ gba akwu oya igbomo la Ukpo uwu ongbulolo le. 2La lu nyama enzu lo shi yi kaa la lu wo apula mate enzu umba kwudu kwɔlɛ mo, lunyi ba la lu nyama kaa Ukpo le shi egbo ibyima yi li yi kikɔ, Akwɛyi ɛlɛ ii shi lu yitu iyi bɔkɔ Ukpo a gyi, apula iyi bɔkɔ i sheshi, i nya wu ma ba i yi yɛriri.
3Kwuwongwu esheshi iyi bɔkɔ Ukpo e shi mi, Mii za la uwewe meka yi tee: onzu le to ɛnwu tee a ka iyi bɔkɔ ishoshi te le yi ma mo. Uŋɔ ba kwu onzu U byegbo ɔnyɛnyɛ, li zɛ kyakya mbala ikwu idu fulo iyi bɔkɔ Ukpo e shi ŋɔ. 4Kinzu ki yi asanga iyi ɛnwu riba mu ɛnwu ikpɛnyi, asanga ɛlɛ lɛɛbi i yi ɛduma ikikɔ ikɔkɔ. 5Tatayi gba i yi le, mate bɔkɔ ki yi riba awu, kwuwongu Okrasi kinzu ki kwu ɛnwu ikpɛnyi, akwɛyi kinzu ki kwu umbesu lɛɛbi. 6Kwuwo kwɔlɛ ishoshi la ki wo ɛduma mu rɛshi nzu ikikɔ mate mbala rɛshi ingyi bɔkɔ Ukpo e shi nzu awu. Gba rɛshi nzu akwu iso isomo iyi Ukpo, la ki wo yi mate mbala ikwu idu fulo nzu iyi bɔkɔ ki yi yi; 7gba akwu ɛduma iwomo la enzu, la ki wo yi ɔnyɛnyɛ; gba akwiyi kiya izɔma, la ki zɔ yi ɔnyɛnyɛ; 8gba akwiyi enzu ɛnwu ikɔma, la ki wo yi ɔnyɛnyɛ. Onzu uwu ee shi kiya la enzu umba o yi igɔ le shi mu egbo ikpɛnyi; gba akwu i bɔ kwunzu le wo yi laa ekpasu wu; gba akwu eyembembyi imama iyi enzu le wo yi mu egbo ikpɛnyi.
9La lu pwu idɛnyi iyi enzu mu egbo ikpɛnyi. Kiya ingyi bɔkɔ akwu ingyi ira la lu towo ngyi mo, ingyeshi ba la lu kpangyi idu. 10La lu gyesu mate ɛmɛnɛ wa mbwalu tayi, akwɛyi la lu lomo lesu. 11La lu kiri ɛnwu mo lunyi ba la lu wo ɛduma la ekpasu yi. La lu wo fafa mu ɛduma iyi Ukpo iwomo. 12Mu eyifulomo yi la lu yi egbo iruwu, la lu yidu mu inyashi imama yi, akwɛyi la lu lɛ Ukpo kwuyengwunanguna. 13La lu mbwama la wa mbwalu umba bɔkɔ o yi igɔ, agboga ba la lu na mba mu agba yi.
14Enzu umba o lo yi inyashi la lu ta mba kenzu ungeshi, la lu ta mba kenzu ungeshi la lu ta mba ungira mo. 15La lu mwɔnyɛ mbala enzu umba bɔkɔ o yi ɔnyɛ, la lu lo oga mbala umba bɔkɔ o yi mu oga ilomo. 16La lu ŋɔ moloto mbala uwewe. La lu fulo ɛyi mu kadu mo, lunyi ba la lu ri imɛza mbala umba bɔkɔ akwu kiya mo awu. La lu to ɛyi tee lu kwu umba amasa mo.
17La lu gba la kwusa lu wa ungwu ira iyi bɔkɔ onzu e wo yi mo. Iyi bɔkɔ akwu iyeshi mu eyi iyi enzu gba la lu gyakpɔɔ mu iwomo le. 18La lu wo iyinayina mu ekpasu yi, kaa la lu yi iŋɔma iyi oloto mbala uwewe. 19Ɛmɛza mi la lu wa kwusa mo, lunyi la lu lafya la Ukpo le wo le mu amba wu. Moo te gba kwokpo kwu so le tee, <<Ɔkwu a zɔ tee, kwusa iwama akwu ungwa mi, Imi mii wa kwusa.>> 20Lunyi ba la lu wo ɛlɛ, mate bɔkɔ kwokpo kwu zɔ tee: Gba ogewa ŋa e ye la lonzu, shi wu kiya le ri; gba e yi ugbembyi, shi wu embyi le wo; mu iwomo ŋɔ ɛlɛ ŋɔɔ shi lovya lu ngbɛ wu ma.>> 21La lu nyama kaa ira li ri yi mo mo; la lu ra la iyeshi kaa lu ri ira ma le.
Currently Selected:
Oroma 12: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
