Oroma 11
11
Eyembembyi Iyi Ukpo Mɛka Iyi Enzu Umba Izirɛ
1Kwuyo ungwu bɔkɔ mii yo gba akwu tee: Ukpo e towo enzu wu mo re? Aayimo! Imi mafyi mi mi kwu onzu uwu Izirɛ, ɛdɔ iyi Aburamu, mu udaba uwu Obezhami. 2Ukpo e towo enzu wu umba bɔkɔ a ŋa mu iyemo mo. Lunyi lu yitu kiya ingyi bɔkɔ kwokpo ungwu Ukpo kwu zɔ, mbaa bɔkɔ anukenzu Elazha e lewa iyi enzu umba Izirɛ midu iyi Ukpo tee: 3<<Ɔkwu, o ngbɛ umba anukenzu ŋɔ ma akwɛyi o shiri ala ŋa ma; Imi kɛɛki gba mi shi le, ba o yemi mu igagyima tee kaa lo ngbɛ mi ma.>> 4Ukpo a gba wu opwu tee: <<Mi shɛlɛmi enzu edubu erewo umba bɔkɔ o do gbo oya laa eshi iyi Obaalu dɛ mo.>> 5Tegba i yi le kekelele: enzu umba bɔkɔ Ukpo a ŋa kwuwongu esheshi wu o degbo o shimo. 6Akwiyi gba o ŋa mba kwuwongu esheshi, kwuwo kwɔlɛ onzu la zɔ tee Ukpo a ŋa wu kwuwongu ɛduma wu mo. Moo gba Ukpo aa ŋa onzu kwuwongu ɛduma wu, de ba esheshi wu akwiyi ongbulolo mo. 7Kekelele kii mbwa yi te? Tee enzu umba Izirɛ o fya kiya ingyi bɔkɔ o yengyi mu igagyima mo. Enzu kwɛɛ byi umba bɔkɔ Ukpo a ŋa gba o fya ngyi le; washimo ba o se alu mba ma mbaa iyama iyi Ukpo. 8Mate bɔkɔ kwokpo kwu so tayi tee, <<Ukpo e shi egbo mbala akɔ mba li shipu; nzhii ta ɔnɛ te, eyi mbo i mɛbɛ mo alu mba ba i pwama mo.>> 9Odevidi kpɔ a zɔ tee:
<<Ɔnuwunawuna bɔkɔ o bo o ŋɔma tee lo ri kiya, lakwu kwuda mba;
Ukpo le shi lo ta ma ngu, kwusa lakwu wamba ma!
10Ukpo le shi eyi mbo lo peyi kaa lo ma ɛbɛ mo;
ɔsu mbo lu kwumo mu inyashi iyɔkpɔɔ.>>
11Kwuwo kwɔlɛ mi yo kwuyo te mɛɛ, kwuyengwu bɔkɔ Azhu o lɛfyi awu, o kpa mɛzhi ba o gba la iyimo fo re? Aayimo! Kwuwongwu ingbomo mbo akwɛyi enzu umba bɔkɔ akwu Azhu mo o fya isama ma, kaa lakwu rise la Azhu. 12Ingbomo iyi Azhu i bo la inzumbeshi la kwudu kwɔlɛ, ifɔma mba mu kwundu ba i ka la esheshi iyɛku la enzu umba bɔkɔ akwu Azhu mo. Akwiyi gba Azhu lɛɛbi o kyo mbo, esheshi ii ka le gyɔɔ!
Isama Iyi Enzu Umba Bɔkɔ Akwu Azhu mo
13Iso ɛlɛ mi so mbala lunyi umba bɔkɔ lu kwu Azhu mo awu: Tabɔkɔ mi kwu uzilɔ la enzu umba bɔkɔ akwu Azhu mo le, Imi mi kwu ɛnwu mu ɛduma mi. 14Mu iwomo mi ɛlɛ, ingboshimo enzu mi oo wo rise, akwɛyi umbafo mbo oo fya isama ma. 15Moo tabɔkɔ Ukpo e towo mbo mo awu, Ukpo e shi enzu umba kwudu kwɔlɛ bɔkɔ akwu agewa wu awu o vindɔ ɛmɛza wu. Iluma iyi i na mba ba akwu kwuwongu mbe? Iluma u kwunyɔ la la enzu umba o kpomo-o. 16Akwiyi gba kwuri ungwu kwoburedi ungwu kwonze akwu ungwu Ukpo, de ba kwoburedi ngyɔ akwu ungwu Ukpo tete; akwiyi gba akpa iyi uwɛyi o shi yi Ukpo, ende ngwu akwu iya wu tete. 17Gba ende iyifo iyi uwɛyi uwu olivu o kpolo yi mo, akwɛyi uwɛyi uwu olivu uwɔsɛ, o kyo ngwu mbala kwuwɛyi kwɔngwu. Lunyi umba bɔkɔ lu kwu Azhu mo lu yi mate uwɛyi uwu olivu uwɔsɛ tayi, akwɛyi kekelele lunyi lu yi mu rigbɛ ingyɛkwu ifyama ingyi bɔkɔ ki ngyi mbaa Azhu. 18Kwuwo kwɔlɛ, lunyi la lu nzhii enzu umba bɔkɔ o kpolo mbo mo mate ende tayi mo. Lu kwu ɛnwu iyi mbɛ? Lunyi lu yi mate kwonde tayi; la lu yitu tee lunyi lu ra laa akpa mo, akpa gba i ra yi le. 19Ingboshimo ŋɔ zɔ tee, <<Akpa ɛnyi o kpolo yi moo kaa li she mi ɔgwuzɛ.>> 20Tegba i yi le. O kpolo yi mo kwuwongu o yi ikwu idu fulo mo, lunyi ba lu rima kpakiri kwuwongu lu kwu idu lu fulo. Kwuwo kwɔlɛ la lu kwu ɛnwu ma yi mo; lunyi ba la lu wiyi. 21Ukpo a ma eyembembyi iyi Azhu, umba bɔkɔ akwu ende shɛ le mo; lu mate a lu yi afyima bi re? 22Munɛ ki ma tee, mbafo Ukpo a zɔ enzu esheshi, mbafo ba a ma eyembembyi mbo mo. Enzu umba bɔkɔ o lafya la imbwaluma Ukpo a ma eyembembyi mbo mo, lunyi ba a zɔ yi esheshi, gba lu zɛ luzɛ mu esheshi wu. Akwiyi gba lu wo tayi mo, lunyi tete o kpolo yi mo. 23Akwiyi gba Azhu o gba o kwu idu o fulo, Ukpo aa gba mba ma mu riyi mba ingyeki; moo Ukpo e do yi iwomo. 24Lunyi bɔkɔ lu kwu Azhu mo lu yi mate kwonde ungwu uwɛyi uwɔsɛ ungwu bɔkɔ o kpolo ngwu mo akwɛyi o fya ngwu ma mbala kwuwɛyi ungwu olivu ungwu bɔkɔ o gba ngwu igbama. Azhu o yi mate kwuwɛyi kwɔlɛ; ii kɔma la Ukpo mo tee la fya ende iyi bɔkɔ o kpolo yi mo mbala kwuwɛyi yi.
Eyembembyi Iyi Ukpo Mɛka Iyi Enzu Lɛɛbi
25Ɛmɛnɛ mi, kwunvyeru ungwu ongbulolo ungwu bɔkɔ mi gyi te la lu yitu gba e yi tee, mi gyi te la lu mɛnwu yi mate enzu umba amasa mo. Ukpo e shi egbo iyi enzu umba Izirɛ umbafo tee li kɔma iyi kwuye bwɛ nzhii ba enzu umba bɔkɔ akwu Azhu mo o ŋɔ mbaa Ukpo o nyɔlɔma dɛ. 26Ɔlɛ gba akwu ɔgwuzɛ uwu bɔkɔ enzu umba Izirɛ oo fya isama ma le: Mate bɔkɔ kwokpo kwu so tee:
<<Usama aa wɔ mu Ɔzayɔ
akwɛyi ira iyinayina mu ɛdɔ iyi Ɔzhɛkɔbu aa wa yi kwudu.
27Imi mi siso ɛlɛ mii shi mɛzhi mbala mba
kwuyengwu mii gbala ingbomo mbo mii kpa mba.>>
28Kwuwongwu anu itama iyi iso iyesheshi, Azhu akwu agewa umba Ukpo akwɛyi lunyi umba bɔkɔ lu kwu Azhu mo awu akwu esheshi meka yi. Kwuwogu bɔkɔ akwu iŋama iyi Ukpo awu, akwɛyi umba akwu ɛmɛza umba Ukpo kwuwongu umba asɔkwu mba. 29Moo Ukpo e shi ɛnwu kwungbɛ meka iyi onzu uwu a ya wu ma ba e lo wu esheshi mo. 30Moo lunyi mafyi yi mekyi lu lomo la Ukpo akwɛyi kekelele ba Ukpo a ma eyembembyi yi kwuwongu Azhu o towo Ukpo imbwalu ma. 31Tatayi umba Azhu o towo Ukpo imbwaluma tete, kwuwongu Ukpo a ma eyembembyi yi awu, uwu ba a ma eyembembyi mba kekelele. 32Moo Ukpo e wo enzu lɛɛbi kyamate enzu umba o fu mbo mu ugu ugyi tayi kwuwongu ingbomo mba kaa laa zɔ mba lɛɛbi eyembembyi wu .
Ɛnyi La Kwu Iyi Ukpo
33Apula iwomo iyeshi iyi Ukpo, mbala ilukwu wu mbala iyitu wu akwu iyɛku! Ewo iyi apula wu iwomo mbala ɛgwuzɛ wu, Uwe e do yi izɔngɔma? 34Mate bɔkɔ kwokpo ungwu Ukpo kwu so tee: <<Uwe ba e yitu iyi egbo iyi Ukpo? Nana uwe ba akwu u ta wu amasa? 35Uwe bɔkɔ e shi wu kiya dɛ-ɛ, kaa la gba wu la kwɔkpa iwama?>>
36Moo apula lɛɛbi uwu gba e wo yi, apula lɛɛbi i yi le akwu kwuwo wu, ba lɛɛbi akwu iyawu. inzumbɛku akwiyi Ukpo ɔkpɔ ba ɔkpɔɔ! Li yi tayi.
Currently Selected:
Oroma 11: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
