Ɔzhɔnu 14
14
Ɔzhizɔsi Gba Akwu Ɔgwuzɛ Uwu U Re Mbaa Ada Le
1Ɔzhizɔsi a za mba tee <<la lu shi egbo yi mɛzhi. La lu kwu idu lu fulo mu Ukpo; la lu kwu idu lu fulo mami tete. 2Mu kwogba ungwu Ada mi igwu iyi iŋɔma i yi gyɔɔ; la akwu tayi mo, de ba la mi bi so yi te mo, mi rimo kaa la mi nɔngɔ riyi ma ka mi she yi. 3Gba mi mbwa riyi inɔngɔma shi yi, akwɛyi mii gbama mi kwu yi ma mi reye munyi mi, akwɛyi lu yi mbala mi iyɔkpɔɔ . 4Lunyi lu yi ɔgwuzɛ uwu u zɛ u sheye mbaa bɔkɔ mi sheyimo.>>
5Otoma a za wu tee, <<Ɔkwu, kinzu ki yitu mba bɔkɔ ŋɔ sheyimo mo, ki wo la ba ki yi ɔgwuzɛ ɔwu?>>
6Ɔzhizɔsi ba a gba wu opwu tee, <<Imi gba mi kwu ɔgwuzɛ, mbala ongbulolo mbala kwunyɔ le. Onzu uwu e domo te e re mbaa Ada e yi mo, gba a zɛ mbaa mi mo. 7Kwuwongwu ɔlɛ gba lu yitu mi, lu yitu iyi Ada mi tete. Te i na mu ɔnɛ le, lunyi lu yi wu lu gba lu ma wu oo.>>
8Ofilipu a za wu tee, <<Ɔkwu, zɔ nzu Ada ŋa nɛ, moo iyi bɔkɔ ki gyi gba i ŋɔ awu.>>
9Ɔzhizɔsi a gba opwu tee: <<Ngbɛɛ bɔkɔ mi yi mbala yi te, ŋɔ degbo ŋɔ di yitu mye moo Ofilipu? Onzu uwunawuna uwu bɔkɔ a ma mi, Ukpo Adami gba a ma le tete. I wo la bɔkɔ ŋɔ za mi te la mi zɔ yi Ada? 10Uŋɔ ŋɔ nyama te Imi mi yi mɛmi iyi Ada, Ada ba e yi mami tete mo re? Iso iyi mi so yi awu akwu iyami mo, akwiyi Ada, uwu e yi mami awu gba e yi mu ɛlɛ iwomo le. 11La lu nyama la mi ma gba mi za yi te, Imi mi yi mɛmi iyi Ada, Ada ba e yi mami tete; gba ba akwu tayi mo lala ba la lu nyama la mi kwuwongu apula iyi amɛ iyi bɔkɔ mi wo le. 12Imi mi so yi ongbulolo tee, gba onzu e kwu idu lu fulo mami, e do ɛduma iyi bɔkɔ mi yi mu iwomo le mo. Kwuwongwu mi gba mi sheyimo mbaa Adami, gba onzu e kwu idu lu fulo mami, ee wo iyi bɔkɔ i ka ɛlɛ ma. 13Imi ba mii wo iyinayina iyi bɔkɔ lu nda mu ɛnyi mi, kaa Umɛ le shi Ada la fya inzumbɛku ma. 14Gba lu nda kiya ingyinangyina mu ɛnyi mi, Imi mii wo yi ngyi.
Ɔzhizɔsi E Siso E Shi Mɛzhi Tee Aa Ka Mba Laa Kwundu Uwu Ukpo
15Gba lu gyi mi, lu mbwalu kaza mi. 16Akwɛyi mii nda Adami Ukpo kwoya, akwɛyi ee shi yi U mbwama uwufo uwu bɔkɔ ee yi mbala yi iyɔkpɔɔ. 17U mbwama ele gba akwu Kwundu u zɔ enzu ongbulolo le. Enzu umba kwudu kwɔlɛ o na wu mo, kwuwongu umba o zɔngɔma wu ma mo ba o yitu wu mo. Lunyi ba lu yi wu kwuwongu e yi mbala yi ba e yi mɛmi yi. 18Imi mi ŋi lu yi afyima mate ɛmɛ umbese tayi mo; mii gbama mi nyɔ munyi yi. 19Kwuye bwɛɛ te, enzu umba kwudu kwɔlɛ oo ma mi fo, lunyi ba lu ma mi, kwuwongu Imi mi ye la reyi awu, lunyi tete luu ye la reyi. 20Gba kwɔfyi kwɔngu kwu bo, lu zɔngɔma te Imi mi yi mu Ada, lunyi lu yi ma mi, Imi ba mi yi ma yi. 21Onzu uwu bɔkɔ a na iso mi ba a mbwalu yi, onzu awu gba a gyi mi le. Onzu uwu bɔkɔ a gyi mi, Ada mi a gyi wu; Imi tete mi gyi wu akwɛyi mii shi te e yi mi.>>
22Akwɛyi Ozhudasi (akwu Ozhudasi Isikariyɔ awu mo) e yo Ɔzhizɔsi tee, <<Ɔkwu, ŋɔ yi egbo iyi ŋɔ zɔ ɛŋɔ ma la nzu, kimbe ki shi ba ŋɔ zɔ ɛŋɔ ma la enzu umba kwudu kwɔlɛ mo?>>
23Ɔzhizɔsi a gba wu opwu tee, <<Gba onzu a gyi mi, onzu awu a mbwalu ɛzɔ mi. Ada mi a gyi wu, kinzu ki nyɔ munyi wu akwɛyi kii ŋɔ mbala wu. 24Onzu uwu ba a gyi mi mo, a mbwalu ɛzɔ mi mo. Iso iyi mi so yi ele akwu iyami mo, i ngyi mba Ada mi uwu bɔkɔ a lɔ mi awu.
25Imi mi so yi ɛlɛ lɛɛbi kwuwongu mi degbo mbala yi bɛnɛ ke. 26Ada ba a lɔ U mbwama, Kwundu Ɔkɛrikɛri, mu ɛnyi mi aa ka yi, ka la zɔ yi apula lɛɛbi iyi i fa te la lu yitu yi, akwɛyi e lolo yi apula lɛɛbi iyi bɔkɔ mi zɔ yi.
27<<Oloto gba mi lu wu yi afyima le; oloto uwami gba mi shi yi le. Oloto uwu bɔkɔ mi shi yi akwu mate bɔkɔ kwudu kwɔlɛ kwuu shi le mo. La lu shi egbo yi li fomo mo ba la lu riyi mo. 28Lunyi lu pwa mi mi so yi tee, <<Mi lu yi afyima akwɛyi mi gba mi nyɔ munyi yi.> Gba lu gyi mi, lu mwɔnyɛ kwuwongu mi sheye mba Ada mi; kwuwongu Ada a ka mi ma. 29Imi mi so ɛlɛ kekelele le kaa kwuyengwu lu ma te i wɔ tayi akwɛyi lu nyama la mi. 30Imi mi yi kwuye gyɔɔ ungwu mi so yi iso fo, kwuwongu onzu uwoyi ɔsu uwu kwudu kwɔlɛ e yi mu inyɔma. Onzu uwoyi ele e yi ekpasu mu reshi mi mo, 31akwɛyi enzu umba kwudu kwɔlɛ o zɔngɔma ma te mi gyi Ada mi, Imi ba mi mbwalu iyinayina iyi bɔkɔ Ada mi a za mi te la mi wo.
La ki yimo la ki lafya la riyi ngyɛlɛ kekelele.
Currently Selected:
Ɔzhɔnu 14: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
