Iwomo 9
9
Ɔsɔlu A Na Ɔzhizɔsi Tee La Kwu Ɔkwu Wu
(Iwomo Iyi Wa zɛ ilɔ 22.6-16; 26.12-18)
1Ɔsɔlu ba a gyakpɔ mu ishi itomo te, uwu a ngbɛ onzu uwunawuna uwu bɔkɔ akwu u mbwalu Ɔkwu ma. Akwɛyi a ka mba obwoshi uwakɔ 2akwɛyi a nda kwupu ungwu a za ngwu a ka la wa to keyi umba udaba uwu Azhu mu Ɔdamasikɔ, kaa onzu uwunawuna uwu bɔkɔ akwu u mbwalu Ɔzhizɔsi, eko la anzɔnu, u wu e yi wu mo a nyawa mu Ɔzhɛrusalɛ kaa la ta wu mu ugu ugyi. 3Tabɔkɔ Ɔsɔlu a nda la Ɔdamasikɔ ma fo, akwɛyi ɛbɛ iyɛku i wɔ mu oshi i kpowu mɛnwu. 4Mu kwotota kwɔngu a tama mɛzhi akwɛyi a pwa opwu u wu u za wu te, << Ɔsɔlu, Ɔsɔlu, kimbe ki shi bɔkɔ ŋɔ lo mi inyashi te?>>
5Akwɛyi Ɔsɔlu e yo kwuyo tee, Ɔkwu, <<Ŋɔ kwu uwe?>>
Akwɛyi a gba opwu te << Mi kwu Ɔzhizɔsi uwu bɔkɔ ŋɔ ye wu mu inyashi ilomo awu. 6<<Yimo ka fye mu kwuse kekelele akwɛyi o so ŋɔ kiya ingyi ŋɔ wo.
7Enzu umba bɔkɔ o yi mu luzɛ mbala Ɔsɔlu awu izele i yi mbo mo, o pwa opwu bi ba ɔ ma ɔzɛnzɛnyi mo. 8Ɔsɔlu e yimo mɛzhi, ta bɔkɔ a ya eyi mo, a ma kiya kinyinyi mo. Akwɛyi o yi wu mu ɔwu o kawa mu Ɔdamasikɔ. 9Ɔsɔlu e to afyi ɛla a ma ɛbɛ mo, e ri kiya mo ba e wo embyi mo.
10U vɔngɔ kiya uwu Ɔzhizɔsi uwufo uwu o ya wu te Ananayasi e yi mu Ɔdamasikɔ mɔmɔ. Akwɛyi a ma ɛbɛ te, Ukpo a ya wu ma <<Ananiya!>> Ɔkwu a ya wu ma meka iyi ɛbɛ imama te << Ananayasi!>> Akwɛyi a nya wu ma << Daa,>> 11Akwɛyi Ukpo za wu te << Yimo ka so mu kwogba ungwu Ozhuda mu Ɔgwuzɛ uwu o ya wu te Ototo awu kaa yo kwuyo ungwu onzu uwufo uwu bɔkɔ a wɔ mu Otasu uwu ɔ ya wu te Ɔsɔlu awu ŋɔ du wu mu Ukpo ilɛma. 12Ɔsɔlu a ma ɛbɛ te, onzu uwufo uwu o ya wu te Ananayasi e bo e fulo wu ewo kaa la gba la ɛbɛ imama.>>
13Ananayasi a gba opwu te <<Ɔkwu,>> <<Mi pwa ɛza iyi onzu ele mbala ira iyi bɔkɔ e wo enzu ŋɔ wabwalu lɛɛbi mu Ɔzhɛrusalɛ. 14A gba e bo munɛ la inyama iyi ebwoshi umbakɔ ka le yi umba bɔkɔ o to rinyi ŋɔ lɛɛbi.>>
15Ɔkwu ba a za la Ananayasi te, << So! mo mi ŋa wu ka le wo mi ɛduma, e siso mi mbaa umba bɔkɔ akwu Azhu mo mbala asu mba mbala midu iyi enzu umba Izirɛ. 16Mi zɔ wu inyashi iyi bɔkɔ a ba ma kwongwu ɛnyi mi.>>
17Akwɛyi Ananayasi a ka mu kwogba kwɔngu akwɛyi e fye mo. E fulo Ɔsɔlu ewo wu akwɛyi a za wu te << Umɛnɛ mi Ɔsɔlu, Ɔkwu Ɔzhizɔsi uwu bɔkɔ ŋɔ ma wu kwuyengwu ŋɔ yi mu inyɔma munɛ awu, a lɔ mi ma kaa gba la ɛbɛ imama, kaa na Kwundu uwu Ukpo. 18Mu kwotota kwɔngu kiya ki wɔ mate ekpo iyi umu tayi mu eyi iyi Ɔsɔlu akwɛyi a gba la ɛbɛ imama kyawu. E yimo akwɛyi Ananayasi e wo wu obatisima. 19E ri kiya ingyirimo akwɛyi a gba la ekpasu.
Ɔsɔlu A Ta Anu Iyi Ɔzhizɔsi Mu Ɔdamasikɔ
Ɔsɔlu e wo afyi bwɛɛ mbala wa mbwalu mu Ɔdamasikɔ. 20Mu kwotata kwɔngu e le mu anu itama mu idaba iyi Azhu te Ɔzhizɔsi akwu umɛ uwu Ukpo. 21Enzu umba bɔkɔ o pwa wu, izele i yi mbomo akwɛyi o yo te <<Akwu onzu ele gba e lo wa mbwalu Ɔzhizɔsi inyashi mu Ɔzhɛrusalɛ le mo re? Onzu ele e bo te le yi mbo kaa la ka la ebwoshi umbakɔ mu Ɔzhɛrusalɛ kaa lo fu mbo mu ugu ugyi>> 22Tetete ekpasu iyi Ɔsɔlu i le mu ikyomo kwɔfyi kwɔfyi. A kpa amasa iyi Azhu umba o yi mu Ɔdamasikɔ awu shaa, mu isomo te Ɔzhizɔsi gba akwu Okrasi le.
23Mizhikembo iyi afyi gyɔɔ i pikama, Azhu o wo ɔkwura wu ka lo ngbɛ wu Ɔsɔlu ma. 24Ɔsɔlu ba a pwa kwɔkyɛ mba te o ye wu migbomo la utu la ɔnu mu kenzugwu unga ɔbɛ ka lɔ ngbɛ wu ma. 25Ɛmɛgba wu ba o towu mo mutu o lo wu mu kibiri akwɛyi o za wu mu kwɔtu ungwu kwogyiga o shi wu mɛzhi akwɛyi a wirima a kama iya wu.
Ɔsɔlu A Gba A Ka Mu Ɔzhɛrusalɛ
26Tabɔkɔ e bo mu Ɔzhɛrusalɛ a gyite le kyo mbala wa mbwalu, umba ba o wuyi wu kwuwongu o nyama te akwu u mbwalu ongbulolo mo. 27Akwɛyi Obanaba ba e to wu a kawa mbaa wa zɛ ilɔ. Akwɛyi Obanaba a za mba te Ɔsɔlu a ma Ɔkwu mu ɔgwuzɛ, te Ɔkwu e siso mbala wu, akwɛyi Ɔsɔlu e siso iyi Ɔzhizɔsi gedegede mu Ɔdamasikɔ 28Akwɛyi Ɔsɔlu a ŋɔ mbala mba, a gɔ iyawu la anu itama iyi Ɔkwu gedegede mu Ɔzhɛrusalɛ. 29Ɔsɔlu e koko e ri lɔɔmbwu mu iso Ɔzhizɔsi mbala Azhu umba bɔkɔ akwu Agiriki, umba ba o gyite lo ngbɛ wu ma. 30Tabɔkɔ wa mbwalu o pwa ɛlɛ, o towu ɔ ka mu Oseseriya akwɛyi ɔ lɔ wu a ka mu Otasu.
31Akwɛyi wambwulu mu ɛzhi iyi Ozhudiya mbala Ogalili mbala Osamariya lɛɛbi o ŋɔ mu oloto. Kpɛkpɛ mba o zɛ luzɛ mba mu iyi iyi Ukpo ba kwundu uwu Ukpo a ka mba ɛnwu ma akwɛyi o kyo riba ma gyɔɔ.
Opita A Ka Mu Olida Mbala Ozhopa
32Tabɔkɔ Opita e yi mu ifulama mu ɛzhi iyi Azhu mbala Osamariya, akwɛyi a ka mbaa wa mbwalu mu Olida. 33Mɔmɔ e du onzu uwufo ukpokapiya ɔ ya wu te Aniyasi, a nɔ mu kwugodo lɔri lɔranda. 34Opita a za la Aniyasi te <<Aniyasi, Ɔzhizɔsi Okrasi e bo ŋɔ ofya ma-a. Yimo ka kwu ɔkyɔ ŋɔ ma.>> Mɔmɔɔmɔ, Aniyasi e yimo a rima. 35Enzu umba bɔkɔ o yi mu Olida mbala Ɔsharɔ lɛɛbi o ma Aniyasi akwɛyi ɛlɛ i shi mbo o nyama o bwalu Ɔkwu.
36U mbwalu Ɔzhizɔsi uwufo e yi mu Ozhopa mɔmɔ o ya wu te Otabita (iyi bɔkɔ iluma yi akwu Ɔdɔkasi), e koko e wo ɛduma iyi esheshi, a mbwama la ayirewa ma gyɔɔ. 37Mu kwushi kwɔngu, a nofya akwɛyi e kpomo. O wo ukpɛzhi wu ma akwɛyi o shi wu mu ugu uwoshi. 38Olida andama mbala Ozhopa mo. Bɔkɔ wa mbwalu o pwa te Opita e yi mu Olida, akwɛyi o lɔ enzu wepo o ka munyi wu, o ko kpawu ɛshɛku te <<Shɔɔkɔ bo kekelele!>> 39Opita a kama mbala mba, akwɛyi bɔkɔ o fyemo mogba, o kawa mu ugu uwoshi. Eko wakpanuma lɛɛbi o fula wu ma la ega ilomo, o kyo o zɔ wu ekpayi iyi Ɔdɔkasi e fu kwuyengwu e yi lakwunyɔ awu. 40Opita a wala enzu ma mu ugu lɛɛbi, akwɛyi a la epunu mɛzhi a lɛ Ukpo. E fulowa e shi ukpɛzhi eyi akwɛyi a za wu te << Otabita, yimo.>> Akwɛyi Otabita a ya eyi mo akwɛyi ta bɔkɔ a ma Opita akwɛyi e yimo a ŋɔma. 41E yi wu mu kwuwo e yimo a rima mu alɛ wu. Akwɛyi a ya enzu wa mbwalu ma mbala eko wakpanuma akwɛyi e shi wu mbo la reyi. 42Iwomo ɛlɛ i fulama lɛɛbi mu Ozhopa , akwɛyi enzu gyɔɔ o kwidu o fulo mu Ɔkwu. 43Opita a gyi e wo afyi mu Ozhopa, a ŋɔ mbala uwo ekpo uwufo o ya wu te Ɔsamɔ.
Currently Selected:
Iwomo 9: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
