Iwomo 8
8
1Kwuye ungwu o ngbɛ Ositivi ma awu, Ɔsɔlu e yi mɔmɔ ba a nyama te lo ngbɛ Ositivi ma.
Ɔsɔlu E Lo Wambwalu Inyashi Gyɔɔ
Ɔnumawu inyashi iyɛku i du wa mbwalu mu Ɔzhɛrusalɛ akwɛyi enzu lɛɛbi o kpashaa o fu mu Ozhudiya mbala Osamariya, ishi wa zɛ ilɔ kɛkyi.
2Wambwalu umbafo umba bɔkɔ o yi iyi iyi Ukpo o to ukpɛzhi uwu Ositivi o pu wu mo akwɛyi o wo obobyi wu gyɔɔ. 3Ɔsɔlu ba e kwo mu wa mbwalu inyashi ilomo. E fye mu agba mu agba, e yi wa mbwalu eko la anzɔnu akwɛyi e pyipyi mbo e fu mbo mu ugu ugyi.
O Tanu Iyi Iso Iyeshi Mu Osamariya.
4Enzu umba bɔkɔ o kpashaa le ɔ za la anu itama munamuna bɔkɔ o ka. 5Ofilipu a ka mu kwuse ungwɔkwu ungwu Osamariya kwukpɛnyi Akwɛyi a tanu iyi Ɔzhizɔsi Okrasi mɔmɔ. 6Tabɔkɔ enzu gyɔɔ o pwa iso iyi Ofilipu ikyo o ma apula iyi kenzu iyama iyi bɔkɔ e wo lɛɛbi, umba o shi alu mu iso wu mbala egbo mbo ikpɛnyi. 7Ɛndu iyira i wɔ kwudu mɛnwu iyi enzu riba la ikyakwokwo ibyima. Enzu wakpokapiya mbala wa mu alɛ ma gyɔɔ o bo mbo efya ma. 8Enzu umba kwuse kwɔngu o mu ɔnyɛ gyɔɔ.
Ɔsamɔ U Wo Imondo.
9Onzu uwufo o ya wu te Ɔsamɔ e yi mu imondo iwomo mu kwuse kwɔngu diridiri-e. Imondo wu i shi enzu umba Osamariya lɛɛbi kenzu iyama. E kwɛnwu te uwu akwu onzu uwakwuu mu kwuse kwɔngu, 10akwɛyi enzu lɛɛbi la enzu umba kwuwo mbala ayirewa o mbwalu wu akwɛyi o zɔ te, << Onzu ele akwu ekpasu iyi Ukpo iyi bɔkɔ o ya yi te ekpasu Iyɛkwu awu.>> 11Enzu o mbwalu wu kwuwongu bɔkɔ e to kwuye gyɔɔ bɔkɔ e wo mbo apula iyi kenzu iyama mbala imondo. 12kwuyengwu umba ba o nyama la iso iyesheshi iyi ɛsu irimo iyi Ukpo mbala ɛnyi iyi Ɔzhizɔsi Okrasi bɔkɔ Ofilipu e so mbo awu akwɛyi o wo mbo obatisima. Ka la eko la anzɔnu o wo mbo obatisima. 13Ɔsamɔ mafyiwu a nyama tete akwɛyi o wo obatisima. Akwɛyi a mbwalu Ofilipu munamuna mba bɔkɔ a ka, bɔkɔ a ma apula iyi lɔzɔ mbala apula iyi kenzu iyama iyi bɔkɔ Ofilipu e wo akwɛyi izele i yi wu.
14Tabɔkɔ wa zɛ ilɔ umba o yi mu Ɔzhɛrusalɛ o pwa te enzu umba Osamariya o na iso iyi Ukpo, akwɛyi ɔ lɔ Opita mbala Ɔzhɔnu ɔka munyi mbo. 15kwuyengwu Opita mbala Ɔzhɔnu o bomo, o lɛ Ukpo te kaa lo na Kwundu uwu Ukpo, 16kwuwongu Kwundu uwu Ukpo e de fye mu onzu ukpukpɛnyi mba te mo. O wo mbo obatisima mɛnyi iyi Ɔkwu Ɔzhizɔsi bi bɛnɛ. 17Akwɛyi Opita mbala Ɔzhɔnu o fulo mbo ewo mu reshi akwɛyi o na Kwundu uwu Ukpo.
18Tabɔkɔ Ɔsamɔ a ma te wa zɛ ilɔ o fulo wa mbwalu ewo mu reshi akwɛyi o na Kwundu uwu Ukpo akwɛyi eshi mbo ɛyi 19akwɛyi a za Opita mbala Ɔzhɔnu te <<La lu shimi ekpasu ɛlɛ ka onzu uwunawuna uwu bɔkɔ mi fulo wu ewo mi kaa la na Kwundu uwu Ukpo.>>
20Opita a gba wu opwu te <<Ɛyi ŋɔ li tomo mbala ŋa, kwuwongu bɔkɔ ŋɔ ka amasa te ŋɔ ya rɛshi ingyi Ukpo mɛyi! 21Ŋɔ kyo mɔgbɔ mo, ŋɔ yi ogbo mu ɛduma ɛlɛ mo, kwuwongu egbo ŋɔ iyi ongbulolo mbaa Ukpo mo. 22Kwu ira ŋa ɛlɛ ɔsu ka kpa ɛshɛku la Ukpo igboshimo egbo iyira iyi ŋɔ yi yi ele a gba yi akpa ŋa. 23Moo mi ma te ŋɔ yi yese ingyi ira, uŋɔ ba ŋɔ yi mɛyɛ iyi ingbomo.>>
24Akwɛyi Ɔsamɔ a za la Opita mbala Ɔzhɔnu te << La lu lɛ Ukpo kwuwo mi kaa iyi ŋɔ so le ndii li du mi mo.>>
25kwuye ungwu bɔkɔ Opita mbala Ɔzhɔnu o mbwa anu itama iyi iso iyi Ukpo akwɛyi o gbama o ka mu Ɔzhɛrusalɛ, o za la anu itama iyi ilɔ iyesheshi mu ese riba iyi Osamariya.
Ofilipu Mbala Onzu Uwu Itopiya.
26Ɔnuuwufo Ɔlɔgbulɔ uwu Ukpo a za la Ofilipu te, << So mu kwuko ungwu ononoyo mu - ɔgwuzɛ uwu bɔkɔ u solofo u wɔ mu Ɔzhɛrusalɛ uwu sheye mu Ogaza awu.>> 27Akwɛyi e yimo a kama, ta bɔkɔ e sheyimo e kpolo inozhi uwu bɔkɔ akwu onzu uwakwuu uwu Itopiya uwu bɔkɔ apula iyi Ɔsu oko uwu Okadɛsi uwu Itopiya bɔkɔ i yi mɔwu wu awu. Onzu ele a ka mu Ɔzhɛrusalɛ kaa la lɛ Ukpo. 28Tabɔkɔ a gbama e sheye mogba a ŋɔ mu omato uwu Onya a za la kwokpo ungwu anukenzu Azaya iwama. 29Akwɛyi Kwundu uwu Ukpo a za la Ofilipu te <<Turugba kɛlɛ mbaa omato uwu Onya awu.>>
30Akwɛyi Ofilipu a rɛnya a ka mbaa omato uwu Onya awu akwɛyi a pwa te onzu ele a wa kwokpo ungwu anukenzu Azaya. Akwɛyi Ofilipu e yo wu te << Ŋɔ zɔngɔma iyi ŋɔ yi mu iwama le ma?>> 31A gba opwu te, << Mi wo la mi yitu, gba onzu o zɔ mi yi dɛ mo?>> Akwɛyi a ya Ofilipu mo kaa la yama la ŋɔ mbala wu.
32Inozhi awu e yi mu kwokpo ungwu Ukpo iwama ungwu kwu zɔ te,
O she wu mo mba ingbɛma mate ilɔ tayi,
mate umɛ uwu ilɔ mewo iyi onzu uwu bɔkɔ a gbɔ wu inyi wu mo awu,
ba e siso mo.
33O lo wu ese o towu ombu mamo.
Uwe bɔkɔ e do ata ifulomo iyi eye wu.
Kwuwongwu enzu o ngbɛ wu ma e shi rito mu kwudu kwɔlɛ mo.
34Akwɛyi Inozhi awu e yo Ofilipu te << Shɔkɔ so mi, iso iyi uwe bɔkɔ anukenzu ele e yi mu isomo? E so mu reshi wu naa mu reshi ingyi onzu awa ŋa?>> 35Akwɛyi Ofilipu a za wu te kwokpo ungwu ŋɔ yi mu iwama awu kwu so iso iyesheshi iyi Ɔzhizɔsi.
36Tabɔkɔ o yi mu luzɛ mɔgwuzɛ o du embyi akwɛyi inozhi awu a zɔ te << Yese de, embyi o ŋɔ le, kimbe ki fo obatisima mi iwomo?>> 37Ofilipu a za wu te gba ŋɔ kwidu ŋɔ fulo la egbo lɛɛbi o wo ŋɔ obatisima> akwɛyi inozhi awu a zɔ te, <Mi nyama te Ɔzhizɔsi Okrasi akwu Umɛ uwu Ukpo> 38Akwɛyi Inozhi awu e shi omato uwu Onya awu te la rima. Akwɛyi Ofilipu la inozhi awu o solofo o fye mu embyi akwɛyi Ofilipu e wo wu obatisima. 39kwuyengwu bɔkɔ o wɔ kwudu mu embyi Kwundu uwu Ukpo e to Ofilipu mo a ka wuma akwɛyi inozhi awu a mawu fo. Uwu ba akwu luzɛ wu la ɔnyɛ imuma. 40Ofilipu ba a wɔ mu Azɔtu, e le mu igɔma la anu itama iyi ilɔ iyesheshi mu ese ɛnyi lɛɛbi nzhii ba e bo mu Oseseriya.
Currently Selected:
Iwomo 8: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
