Iwomo 10
10
Ɔkɔnɛliyɔ A Lɔ Laa Opita.
1Onzu uwufo e yi mu Oseseriya o ya wu te Ɔkɔnɛliyɔ akwu u to keyi uwu uzhi uwu asozha umba Italiya. 2Uwu mbala agba wu lɛɛbi o yi iyi iyi Ukpo ba o wo kiya ingyi Ukpo a gyi. E wo ayirewa gyɔɔ rɛshi ba a lɛ Ukpo kwuye ngwunangwuna. 3Ɔnu uwufo mu ekerepe ela iyi ɔnɔnda Ɔkɔnɛliyɔ a ma ɛbɛ. Mu ɛbɛ imama ɛlɛ, a ma ɔlɔgbulɔ uwu Ukpo gedegede e bo munyi wu akwɛyi a ya wu ma te, << Ɔkɔnɛliyɔsi!>> 4Ɔkɔnɛliyɔ a bɔ wu eye ngoo, iyi i wowu mo akwɛyi e yo te, <<Adakwogba, ɛlɛ akwu mbɛ?>> Akwɛyi
Ɔlɔgbulɔ uwu Ukpo a gba wu opwu te <<Ukpo a na Ukpo ilɛma ŋa mbala rɛshi ingyi ŋɔ wo ayirewa awu, inyi gba apula e bɔkɔ o lolo ŋɔ ma yi le. 5Lɔ enzu Kekelele kaa lo so mu Ozhopa kaa lo ngye la Ɔsamɔ uwu bɔkɔ o ya wu te Opita awu, 6e yi mogba uwu Ɔsamɔ u pwu ekpo, uwu bɔkɔ kwogba wu kwu yi mu kenzu unga risu awu.>>
7kwuyengwu bɔkɔ ɔlɔgbulɔ uwu Ukpo uwu bɔkɔ e so wu iso le a kama, Ɔkɔnɛliyɔ a ya ɛmɛgba wu wepo ma mbala osozha ɛnyi uwu bɔkɔ e yi iyi iyi Ukpo ba e yi mbala wu kwuyengwunanguna ma. 8Ɔkɔnɛliyɔ a ba mba ɛza iyi kiya ingyi ki wo lɛɛbi, akwɛyi a lɔ mba ma mu Ozhopa.
9Meyi i lama iyi kwɔfyi kwɔngu, mu kwuyengwu ɔnɔnda, ta bɔkɔ o yi mu luzɛ akwɛyi o nda la Ozhopa fo, akwɛyi Opita a ya kadu mugu kaa la lɛ Ukpo. 10Lonzu lu wowu mo akwɛyi a gyite le ri kiya. Tabɔkɔ o yi mu kiya ingyirimo iwomo bɛnɛ akwɛyi e fye mu ɛbɛ imama. 11Opita a ma oshi te u wuma akwɛyi a ma kiya mate kwulamba ungwu o ma ngwu ma eko edondo o ye ngwu mu ikalama mɛzhi. 12Izɔfyi umba alɛ endo lɛɛbi mbala kiya ingyi bɔ ki pipi mɛzhi mbala afyi umba oshi o yi mɛmi ngwu. 13Akwɛyi a pwa opwu uwu Ukpo u za wu te << Opita, yimo kaa ngbɛ kaa kwu.>>
14Akwɛyi Opita a za wu te << Ada Ɔsu Ukpo mi do ɛlɛ iwomo mo!>> <<Mi di ri kiya ingyi ɛrama iyi Azhu nzu i nyama nana ingyi ki wuluma dɛɛ mo.>>
15Opwu ɔnwu u gba u u wɔ ungwopo kpɔ u za wu te <<Gba Ukpo a wulu kiya ma, ki zɔ te kiya ngyɛngyi ki sheshi mo mo.>>
16Ɛlɛ iwo tayi izhɛla akwɛyi o to kwulamba kwɔngu ma o gbawu o ka moshi.
17Tabɔkɔ Opita e yi mu egbo ibyima iyi iluma iyi ɛbɛ iyi uwu a ma le akwɛyi enzu umba bɔkɔ Ɔkɔnɛliyɔ a lɔ mba ma le o fye kwogba ungwu Ɔsamɔ ma akwɛyi o ri mu kenzugwu mɔmɔ. 18Akwɛyi o yama mu opwu uwɔkwu o yo kwuyo te Ɔsamɔ uwu bɔkɔ o ya wu te Opita awu e yi munɛ re?
19Tabɔkɔ Opita e degbo mu egbo ibyima meka iyi ɛbɛ ɛlɛ akwɛyi Kwundu Uwu Ukpo a za wu te <<Ɔsamɔ, enzu wala o yi mu kwuyo ŋɔ iyomo. 20Yimo, kalama kaa so kaa du mbo mɛzhi. Ki tomo iyi isomo mbala mba mo, mo Imi gba mi lɔ mba le.
21Opita a kalama a ka e du enzu mbɔlɛ akwɛyi e yo mbo te << Imi gba lu yi mu igagyima le. Kimbe ki bo yi?>>
22Enzu mbamba o gba wu opwu te << Ɔkɔnɛliyɔ u to keyi uwu asozha umba Oroma gba a lɔ nzu ma munyi ŋɔ le. Uwu akwu onzu ototo, a wuyi iyi Ukpo. Azhu lɛɛbi o lo wu mo gyɔɔ. Ɔlɔgbulɔ uwu Ukpo a za wu te la ya ŋa ma kaa bo mogba wu kaa la pwa iyi ŋɔ so.>> 23Akwɛyi Opita e fye mbo mo mogba wu akwɛyi e lo mbo riyi oga.
Opita E Bo Mogba Uwu Ɔkɔnɛliyɔ.
Meyi i lama iyi kwɔfyi kwɔngu, Opita a wɔ a kama mbala mba, akwɛyi wa mbwalu umbafo o wɔ mu Ozhopa o zɛ mbala wu o kama. 24Mu kwɔfyi ungwu kwu mbwalu, e fye mu Oseseriya. Ɔkɔnɛliyɔ ba e yi eyi mbo iyi ifulomo akwɛyi a ya enzu umba kwogba wu mbala ɛmɛza wu kasɛkɛ ma o kpala ɛlu mogba wu. 25Tabɔkɔ Opita e fye mo mogba, Ɔkɔnɛliyɔ e kwumo a bwa wu ma akwɛyi e gbo wu oya. 26Opita ba a za wu te <<Yimo, yimo!>> << Imi mi kwu onzu mate uŋɔ tete.>>
27Opita a za la iso isomo mbala wu akwɛyi e fyemo mɛmi, e du kwumbu ungwu enzu. 28Akwɛyi Opita a za mba te, <<Lunyi lu yitu marimari te kinzu ki yi ɛrama te Azhu mbala enzu umba bɔkɔ akwu Azhu mo, lo ri imɛza mbala esu mo. Ukpo ba a zɔ mi te la mi ya onzu uwunawuna te Ukpo a na wu mo mo, naa onzu uwu kashi mo. 29Kwuwongwu ɔlɛ gba bɔkɔ lu lɔ la mi, mi ri kaambu mo akwɛyi mi bo. Kekelele mi yo yi te, kimbe ki wo bɔkɔ lu lɔ la mi?>>
30Akwɛyi Ɔkɔnɛliyɔ a gba opwu te: << Ɔnɛ akwu kwɔfyi ungwu ondo bɔkɔ mi yi mogba mi mu Ukpo ilɛma mu kwuye kwɔlɛ tete, mu ekerepe ela iyi ɔnɔnda. Akwɛyi mi ma onzu uwufo uwu bɔkɔ e lo ekpayi iyi ilemo a ri mu keyi mi 31akwɛyi a za mi te, <<Ɔkɔnɛliyɔ, Ukpo a pwa ilɛma ŋa mbala rɛshi ingyi bɔkɔ ŋɔ wo ayirewa le. 32Lɔma kaa lo so mu Ozhopa mbaa Ɔsamɔ uwu bɔkɔ o ya wu te Opita awu. A kwu ugbɔga mogba uwu Ɔsamɔ u pwu ekpo uwu bɔkɔ a ŋɔ mu kenzu unga risu awu.> 33Ɛlɛ gba ishi mi lɔma munyi ŋɔ le, ki mwɔnyɛ la ibomo ŋɔ. Kelele lɛɛbi nzu ki ŋɔ le mu idu iyi Ukpo kaa la ki pwa kiya ingyinangyina ingyi Ukpo a za ŋa te so nzu.>>
Iso Iyi Opita Mogba Wu Ɔkɔnɛliyɔ
34Akwɛyi Opita e le mu iso isomo, a zɔ te: <<Kekelele gba mi zɔngɔma yi ma te Ukpo e yi kusɛ mo. 35uwu ba a na enzu umba kwudu lɛɛbi umba bɔkɔ ɔ riyi wu akwɛyi o wo iyi bɔkɔ uwu a gyi. 36Lunyi lu yitu iyi ilɔ iyi bɔkɔ Ukpo a lɔ la enzu wu umba Izirɛ, ilɔ iyesheshi iyi idigbomo iyi bɔkɔ Ɔzhizɔsi Okrasi, uwu bɔkɔ akwu Ɔkwu uwu enzu wu lɛɛbi e bo yi. 37Lunyi lu yitu iyi kiya ingyi ki wo mu Ozhudiya, iyo yoo mu Ogalili, mizhikembo iyi obatisima uwu bɔkɔ Ɔzhɔnu a tanu wu awu - 38Lunyi lu yitu te Ukpo e shi Ɔzhizɔsi uwu a wɔ mu ɔnazarɛti awu Kwundu wu mbala ekpasu ka le wo apula iyi amɛ. Lu yitu kpɔ te Ɔzhizɔsi a fulama mu ese ikikɔ ikikɔ e wo iyeshi la enzu, umba bɔkɔ o yi mɛyɛ iyi onzu uwoyi ba a wa mba ma. Ɔzhizɔsi e wo ɛlɛ lɛɛbi kwuwongu Ukpo e yi mbala wu
39<< Kinzu ki kwu azɔgɔ umba kiya ingyi Ɔzhizɔsi e wo lɛɛbi mu ɛzhi iyi Azhu mbala Ɔzhɛrusalɛ. Watokeyi mu Ɔzhɛrusalɛ o to wu o kpa mu kwuwɛyi o ngbɛ wu ma. 40Ukpo ba e yi wu mo mu kwuvɔ ɔnuwu kwɔfyi ungwɔla akwɛyi e shi enzu lɔ ma wu. 41A kwu enzu lɛɛbi gba o ma wu le mo, azɔgɔ umba Ukpo a ŋa le gba o ma wu le. Kinzu umba bɔkɔ Ukpo a ŋa nzu bɔkɔ ki ri, ki wo mbalawu gba ki mawu le mizhikembo iyi bɔkɔ e yimo mu kwuvɔ. 42Ukpo a ta nzu ɔkpa te la ki tanu iyi iso wu la enzu, la ki za mba te Ɔzhizɔsi gba Ukpo a ŋa wu le te kaa la zɔ ombu uwu enzu umba bɔkɔ o degbo la reyi mbala umba bɔkɔ o kpomo-o. 43Anukenzu lɛɛbi umba bɔkɔ o ka iso iyi Ɔzhizɔsi awu, o so enzu te onzu uwunawuna uwu bɔkɔ e kwu idu e fulo ma wu, oo gba la ingbomo wu oo kpa wu.>>
Enzu Umba Akwu Azhu Mo O Na Kwundu Uwu Ukpo
44Tabɔkɔ Opita e yi mu iso ɛlɛ isomo bɛnɛ akwɛyi enzu lɛɛbi umba o pwa iso ɛlɛ Kwundu uwu Ukpo e fye ma mba. 45Azhu Wambwalu umba bɔkɔ o ngyi mu Ozhopa mbala Opita o ya kenzu te enzu umba bɔkɔ akwu Azhu mo lala o na Kwundu uwu Ukpo tete, 46kwuwongu o pwa te o so lunzu ndowa ba ɔ du Ukpo ma,
akwɛyi Opita a za mba te, 47<<Onzu uwufo e yi uwu bɔkɔ e se enzu mbɔlɛ ɔgwuzɛ ma kaa lo wo mbo obatisima mo? Kwundu uwu Ukpo e fye ma mba kyamate kinzu tete-e?>> 48Akwɛyi Opita a za mba te lo wo mbo obatisima mu ɛnyi iyi Ɔzhizɔsi Okrasi. Akwɛyi o za la Opita te le wo afyi bwɛɛ mbala mba.
Currently Selected:
Iwomo 10: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
