Iwomo 7
7
Iso Iyi Ositivi
1Akwɛyi obwoshi uwakɔ e yo Ositivi te << Iso iyi o so mu reshi ŋɔ lɛɛbi le te gba i yi le?>>
2Akwɛyi Ositivi a gba opwu tee: << Ɛmɛnɛ mi mbala umba ada mi, la lu ngbɛ alu kaa lu pwa! Ukpo uwakwu a zɔ ɛnwu ma la ete nzu Aburamu kwuye ungwu e degbo mu Omesopotamiya dɛ gba a ba ka mu Ara le. 3Ukpo a za wu te, <Lafya la ɛzhi ŋɔ mbala enzu ŋɔ kaa so mu ɛzhi iyi mi ŋi zɔ ŋɔ le.>
4<< Akwɛyi Aburamu a lafya la ɛzhi iyi Ashadiya a ka ŋɔ mu ɛzhi iyi Ara. Mizhikembo iyi lukwu undu ete wu, akwɛyi Ukpo a za wu te laba ŋɔ mu ɛzhi ɛlɛ iyi lu yi ma yi ele. 5Ukpo e shi wu ogu munɛ mo, kizɛ kɛkyi te lala e shi wu mo. Tetete, Ukpo e so e shi mɛzhi te uwu mbala ɛdɔ wu iyi izhikembo wu e shimbo ɛzhi ɛlɛ akwu iyamba; kwuye kwɔngu bɔkɔ Ukpo e so ɛlɛ Aburamu e de yi umɛ mo. 6Ukpo a za la Aburamu te, < Ɛdɔ ŋɔ aakwu agboga mu ɛzhi iyi bɔkɔ akwu iyamba mo, oo kwu enye, o lo mbo inyashi iyi lɔri ederi endo. 7akwɛyi Ukpo a zɔ te, ɛzhi iyi bɔkɔ ɛmɛ umba izirɛ o gbo rinye awu, uwu e loyi inyashi,> <Akwɛyi mizhikembo iyi ɛnyi, o wɔma mu ɛzhi ɛnyi o nyɔ oo gbo mi ɔya mu kizɛ ngyɛlɛ.> 8Akwɛyi Ukpo a za la Aburamu te le koko la zɛ ɛmɛ anzɔnu ɛsɔ ma kaa li zɔ te Aburamu mbala ɛdɔ wu o nyama la Iso iyi Ukpo e so e shi mɛzhi. Aburamu a mba Aziki akwɛyi a zɛ wu ɛsɔ ma ɔnu uwu kwɔfyi ungwɔranda. Mizhikembo iyɛnyi, Aziki a mba Ɔzhɛkɔpu a zɛ wu ɛsɔ ma, Ɔzhɛkɔpu ba a mba ɛmɛ wewo la wepo akwɛyi a zɛ mba ɛsɔ ma umba bɔkɔ o kwu watekeyi umba Izirɛ awu.
9<<Ɛmɛ umbakɔ umba Ɔzhɛkɔpu o wo rise ingyi uwɛri mba Ɔzhɔsɛfu akwɛyi o to wu o yama la wawo rishi akwɛyi o ka wa mu Izhipiti ka le gbo rinye. Ukpo ba e yi mbalawu 10akwɛyi a wa wu ma mu inyashi lɛɛbi. E shi Ɔzhɔsɛfu ilukwu, a mbwa wu ma a fya iyeshi mu eyi iyi ɔsu uwu Izhipiti, Ofero; Uwu e shiwu u to keyi uwu Izhipiti mbala kwogba ungwɔsu lɛɛbi.
11<< Akwɛyi lonzu iyama lu fye mu Izhipiti mbala ɛzhi iyi Okena lɛɛbi; ɛlɛ i bo la inyashi gyɔɔ. Kwuye kwɔngu mbala agba wu o fya kiya ingyi o rimo mo. 12Tabɔkɔ Ɔzhɛkɔpu a pwa te ewiri i yi mu Izhipiti, akwɛyi a lɔ ɛmɛ wu te lo so lo ya ewiri. ɛlɛ gba akwu luzɛ undu kwonze mbo le. 13Bɔkɔ o ka ungwopo, akwɛyi Ɔzhɔsɛfu a zɔ ɛnwu wu ma la ɛmanyi wu, akwɛyi Ofero a pwa iso iyi enzu umba Ɔzhɔsɛfu. 14Mizhikembo iyi ɛlɛ, Ɔzhɔsɛfu a lɔma te ete wu, Ɔzhɛkɔpu mbala agba wu lɛɛbi, umba enzu uwekperewo la walɔ, lo bo lo du wu mu Izhipiti. 15Akwɛyi Ɔzhɛkɔbu a kwuma a ka mu Izhipiti mbaa bɔkɔ uwu mbala ɛmɛ wu o ŋɔ nzhii ba lukwu mba. 16O gba la ɛkpɛzhi mba o bo mu Ɔshɛkɛmu akwɛyi o shi mbo mu ogariwu uwu bɔkɔ Aburamu a ya mafyi iyi ɛmɛ umba Amɔ mu Ɔshɛkɛmu awu.
17<< Tabɔkɔ kwuye kwu bo kɛlɛ ungwu Ukpo a nyɔlɔ iso wu ma iyi bɔkɔ e so eshi mɛzhi mbala Aburamu awu, akwɛyi enzu nzu umba o yi mu Izhipiti o kwo mu riba ikyomo gwurugwuru. 18Akwɛyi o to ɔsu uwepo mu Izhipiti uwu bɔkɔ e yi Ɔzhɔsɛfu mo. 19E Kyoro umba asɔkwu nzu ma akwɛyi e lo mbo inyashi gyɔɔ, a kpamba mɛga te lo fu ɛmɛ mbelu mba ma kaa lo kpomo.
20<<Kwuye kwɔngu gba o mba Omosisi le. Omosisi ba akwu umɛ uwoshoshi. Umba ete wu o yi wu mogba mba nzhii ba evya ɛla. 21Mizhikembo iyi ɛnyi o to wu o ko shi wu mu kwudu, akwɛyi umɛ oko uwu Ofero e towumo, akwɛyi e yi wu akwu umɛ wu. 22O zɔ Omosisi ɛzu iyi ilukwu iyinayina iyi ɛzhi iyi Izhipiti. E siso mu idomo mbala apula iwomo mu ekpasu.
23<< kwuyengwu Omosisi e yi lɔri uwekpendo akwɛyi a ka te la ma ɛmanyi wu, Izirɛ. 24Akwɛyi a ma onzu uwu Izhipiti te e yi mu onzu uwu Izirɛ ɛmwu ibyima. Akwɛyi a ka te a mbwa wu ma akwɛyi a ngbɛ onzu uwu Izhipiti ele ma. 25Omosisi a mate ɛmanyi wu Izirɛlu o zɔngɔma te Ukpo a lɔ wu kaa uwu la wamba ma mu rinye, umba ba ɔ zɔngɔma yi ma tayi mo. 26Eyi i lama Omosisi a ma ɛmanyi wu Izirɛ wepo te o yi mu ewa ikirimo. Akwɛyi ka te le lo mbo mesu, akwɛyi a za mba te, <Ɛmɛnɛ mi, lunyi lu kwu imɛnɛ, kimbe ki shi lu gyite la lu wo esu ira?>
27<< Akwɛyi onzu uwu bɔkɔ e yi mu uwufo ɛmwu ikpama awu, e shi Omosisi eyi biŋa akwɛyi a za wu te < Uwe e shi ŋɔ te kwu u to keyi mbala u zɔ nzu ombu? 28Naa ŋɔ gyi te kaa ngbɛ mi ma mate bɔkɔ ŋɔ ngbɛ onzu uwu Izhipiti mule awu ŋa?> 29Tabɔkɔ Omosisi a pwa ɛlɛ, akwɛyi a ri ma a ka mu Omidiya. A ŋɔ ugbɔga mɔmɔ mbaa bɔkɔ a mba ɛmɛ anzɔnu wepo.
30<< Mizhikembo iyi lɔri uwekpendo, Omosisi a ma ɔlɔgbulɔ uwu Ukpo mu ɛzhi ingbarara kɛlɛ mbala lɔwa undu Osinayi mbaa ɔyi u yi mu kwuwɛyi ungwɛri ipwumo. 31Tabɔkɔ Omosisi a ma ɛlɛ, izele i yi wu mo. Akwɛyi ka te e kpeyi kaa la ma gedegede le kyo, akwɛyi a pwa opwu uwu Ukpo u zɔ te: 32<Imi gba mi kwu Ukpo uwu asɔkwu ŋɔ le, Ukpo uwu Aburamu, Aziki mbala Ɔzhɛkɔpu.> Omosisi ele mu ipulama la iyi, akwɛyi a ka kɛlɛ kaa le yese mo fo.
33<< Akwɛyi Ukpo a za la Omosisi te, < Lu ekpoyata ŋa ma, mo mba ŋɔ ri ele akwu kizɛ kɛ kɛrikɛri. 34Mi ma inyashi iyi enzu mi mu Izhipiti. Mi pwa ibɛma mba gba mi bo te la mi wa mba ma le. Bo mi lɔŋɔ ma mu Izhipiti kaa wala enzu mi ma mu ɛzhi iyi Izhipiti.>
35<<Omosisi ele gba enzu umba Izirɛ o to wumo le. O yo wu te <Uwe e shi ŋɔ te ka kwu u to keyi nzu mbala u zɔ nzu ombu?> uwu gba Ukpo a lɔwu te lakwu u to keyi mbala usama mba mu imbwama iyi ɔlɔgbulɔ uwu Ukpo uwu e du wu mu ɛzhi ingbarara mbaa bɔkɔ ɔyi u yi mu ipwumo awu. 36A wa mba ma mu ɛzhi iyi Izhipiti mizhikembo yi e wo apula iyi kenzu iyama mbala lɔzɔ undu amɛ mu Izhipiti mbala Risu Refyobyo mbala kwuyengwu luzɛ mba mu ɛzhi ɛngbarara lɔri uwekpendo awu.
37<< Omosisi ele tete gba a za la ɛmɛ umba Izirɛ te, <Ukpo a wala anukenzu meka yi mate Imi te.> 38Omosisi ele gba akwu u to keyi uwu enzu nzu le kwuyengwu o kpala ɛlu mu ɛzhi ɛngbarara. Ɔlɔgbulɔ uwu Ukpo e siso mbala wu mu lɔwa undu Osinayi, mbala umba ete nzu akwɛyi a na iso iyi Ukpo iyi kwunyɔ iyi bɔkɔ ki yimo ki du yi.
39<<Umba ete nzu ba o towo iso wu imbwaluma. O gyi rɛnu wu mo ndii; mu egbo mbo igba i so mu Izhipiti i shemba woshi i ka le. 40Enzu o za la umanyiwu uwakɔ Ɛrɔnu te, < Ndo nzu eshi iyi i to nzu keyi, mo onzu ele, Omosisi, uwu a wa nzu ma mu ɛzhi iyi Izhipiti - ki yi kiya ingyi ki du wu mo!> 41Kwuye kwɔngu gba o ndo eshi iyi i yi mate umɛ uwu endo le. O wo yi isabɔ la odumudumu uwakwu. Ɔ lɛ kiya ingyi bɔkɔ e wo mbo gba i wo le ma. 42Akwɛyi Ukpo e fulo wa e she mbo ɔsu, e shi mbo o le mu apula iyi oshi ɔya igbomo kyamate elovyo mbala ɔvya, ilɛma. Ɛlɛ i zɛ kyaa mbala iyi bɔkɔ o ka mu kwokpo ungwu umba anukenzu te:
<Lu ka mi la isabɔ mbala rɛshi
mu lɔri uwekpendo mu ɛzhi ɛngbarara,
lunyi kwogba ungwu Izirɛ!
43Lunyi lu shi kwunu ungweshi
ungwu Ɔmɔlɛshi
mbala eshi iwɔ kwulovyo, iyi o ya yi te Ɔrɛfani,
eshi iyi lu wo ka lu
lɛ yi ma.
Kwuwongwɔlɛ Mi re yi mba rinye igbomo mu
ese iyi indama i ka Ɔbabilɔ ma.
44<< Asɔkwu nzu o yi kwunu ungwu Ukpo ilɛma mu ɛzhi ɛngbarara. O wo ngwu mate Ukpo e so Omosisi te le wo ngwu tayi, kyamate bɔkɔ ɔ zɔ wu ngwu tayi. 45Mizhikembo iyi o nakwunu ungwu ɛlu ikpalama ma, akwɛyi Ozhoshuwa mbala umba ete nzu ɔ za ngwu o bo ngwu mu ɛzhi iyi bɔkɔ Ukpo a nayima mafyi iyi ada umba kiya akwɛyi e shiyi mbo awu. Kwu ŋɔ mu ɛzhi ɛnyi nzhii ba kwuyengwu Odevidi. 46Odevidi a fya esheshi mbaa Ukpo akwɛyi a nda Ukpo kwoya te le shiwu kapa kaa le mbo kizɛ ingyi Ukpo ilɛma la Ukpo uwu Ɔzhɛkɔpu. 47Ɔsɔlɔmɔ gba ba e mbo ɔtɛpu la Ukpo le.
48<< Ada Ɔsu Ukpo ba a ŋɔ mu agba iyi bɔkɔ enzu gba o mbo le mo. Kyamate bɔkɔ anukenzu e so te:
49<< < Oshi akwu ukpa uwu ɛsu mi, ɛzhi ba akwu
kagyi unga alɛ ifulomo mi.
Ukpo a za wu te
Kwogba ungwu na ba ŋɔ do te
ŋɔ mbo mi?
Naa mu na ba akwu kizɛ
ingyi ɛnwu igbomo mi?
50A kwu ewo mi gba i wo
apula ɛlɛ lɛɛbi le mo re?>
51Ositivi a za mba te:<<Lunyi wa pwa mo mbɔlɛ umba bɔkɔ lu gyite lu lomo la Ukpo mo naa lu pwa iso iyi Ukpo mo: Lu koko lu towo iyi Kwundu uwu Ukpo ma kyamate bɔkɔ umba asɔkwu yi o wo tayi! 52Anukenzu uwu bɔkɔ umba eteyi o lowu inyashi mo, e yimo. Anukenzu umba o kwu ɛpa iyi inyɔma iyi Usama lala lu ngbɛ mba ma. Mu afyi ɛlɛ onzu ongbulolo ele lu ri utu wu, akwɛyi lu ngbɛ wu ma. 53Ositivi a za mba te lunyi gba lu na ɛrama iyi Omosisi iyi bɔkɔ Ukpo e shi Alɔgbulɔ wu te lo shi umba asɔkwu nzu le, lunyi ba lu towo imbwaluma.>>
O Kpa Ositivi Ekyi Nzhii Ba E Kpomo
54Tabɔkɔ wa to keyi umba Azhu o pwa iso ɛlɛ, o wo amba gyɔɔ la ɛfyi ikwumo. 55Ositivi uwu Kwundu uwu Ukpo ba e yi mbala wu awu, e yi eyefaa, e yese moshi akwɛyi a ma inzubɛkwu iyi Ukpo, akwɛyi a ma Ɔzhizɔsi a rima mu kwuwo ungwu ungyi ungwu Ukpo. 56Akwɛyi Ositivi a zɔ te <<<La lu yese, mi ma oshi te u wuma gboo akwɛyi mi ma Umɛ uwu Onzu a rima mu kwuwo ungwungyi ungwu Ukpo.>>
57Tabɔkɔ udaba uwakɔ uwu Azhu o pwa ɛlɛ akwɛyi kpɛkpɛ o se alu mba ma akwɛyi o tara ega mu opwu uwakwu, akwɛyi o rɛnya o ko kpo wu mɛnwu, 58o pipi wu o wa wu ma mu kwuse akwɛyi o le wo mu ekyi ikpama. Azɔgɔ wa towu ekyi mbɔlɛ ba o lu ekpayi mba ma o shi yi mu idu iyi onzu ulugbaga uwufo uwu o ya wu te Ɔsɔlu.
59kwuye ungwu o ye wu mu ekyi ikpama awu, akwɛyi Ositivi a lɛ Ukpo, a zɔ te <<Ɔkwu mi Ɔzhizɔsi, na kwunyɔ mi ma.>> 60Akwɛyi a bɔ epunu mɛzhi, a tara oga kpaa, a zɔ te, <<Ada Ɔsu Ukpo, gbala ingbomo mbo kpa mba.>> Tabɔkɔ a mbwa isomo tayi akwɛyi Ukpo a na wu kwunyɔ ma.
Currently Selected:
Iwomo 7: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
