Iwomo 17
17
Ɔpɔlu Mbala Osalasi Mu Otesalonika
1Ɔpɔlu mbala Osalasi ɔ zɛ mu ese iyi Afipoli mbala Apoloniya akwɛyi o bo mu Otesalonika mbaa bɔkɔ udaba uwu ɛlu ikpalama uwu Azhu e yi. 2mate bɔkɔ e koko e wo awu, Ɔpɔlu a ka mu udaba uwu ɛlu ikpalama uwu Azhu, afyi iyi ɛnwu igbomo ela a ma mu kaambu irimo mbala mba mu iso Ukpo, 3a lunyi mba ma a gba zɔ yi mba gedegede te, akwu ɛga te Okrasi e kpomo akwɛyi a gba lakwunyɔ iyimo. Ɔpɔlu a za mba te, <<Ɔzhizɔsi uwu mi ba yi ɛza wu ele uwu gba akwu Okrasi le.>> 4Azhu mbafo o nyama la iso iyi bɔkɔ Ɔpɔlu e so mbo awu akwɛyi o kyo mbala Ɔpɔlu mbala Osalasi. Enzu umba Ogiriki gyɔɔ umba o yi iyi iyi Ukpo mbala eko umba enzu umbakwu riba o kyo mbala mba tete. 5Azhu umbafo ba o wo rise iyi Ɔpɔlu mbala Osalasi; akwɛyi o ka mu rishi o ko gagyi ɛmɛ umbira, akwɛyi o kpala enzu umba ovyo ɛlu, akwɛyi o so mu ovyo iwomo mu kwuse. O gyakpɔ o ka mu kwogba ungwu Ɔzhasɔ mbaa Ɔpɔlu mbala Osalasi igagyima kaa lo wa mba kwudu lo shi enzu umba riba mbamba. 6Tabɔkɔ o du mbo mo, akwɛyi o pyipyi Ɔzhasɔ mbala wa mbwalu umbafo o ka mba mu idu iyi enzu umbakɔ umba kwuse, o za la uzhi iwomo te: <<Enzu mbɔlɛ o yi mu ovyo itama munamuna, ba o bo mu kwuse nzu tete-e. 7Ɔzhasɔ ba a na mba e shi mbo mu kwogba wu. Lɛɛbi mba o fo ɛrɛma iyi Osiza ma, o zɔ te, Ɔsu uwufo e yi, o ya wu te Ɔzhizɔsi.>> 8Tabɔkɔ riba ingyi enzu mbamba mbala wa to keyi umba kwuse o pwa iso ɛlɛ akwɛyi egbo mbo i tutumo. 9Akwɛyi o shi Ɔzhasɔ mbala wa mbwalu umbafo te lo shi ekpa akwɛyi o lu mba afyima o kama.
Ɔpɔlu Mbala Osayilasi Mu Oberiya
10Tabɔkɔ utu u kpomo, wa mbwalu o wo Ɔpɔlu mbala Osalasi ungbo te lo sheyi mu Oberiya. Tabɔkɔ o kama mɔmɔ, o to ɔgwuzɛ uwu Udaba uwu ɛlu ikpalama uwu Azhu. 11Enzu umba Obiriya o yi egbo iyi iso inama mu akɔ mba o ka enzu umba Otesalonika ma, kwuwongu o gyikpɔ te lo pwa iso ɛlɛ akwɛyi o manda iso ɛnyi ma kwɔfyi kwɔfyi kaa lo yitu ongbulolo iyi iso iyi Ɔpɔlu bɔkɔ e so awu. 12Azhu gyɔɔ mbala eko umba inzubɛkwu mbala anzɔnu umba Ogiriki o na iso iyi Ukpo.
13Tabɔkɔ Azhu umba Otesalonika o pwa te Ɔpɔlu e yi mu rɛnu ingyi Ukpo anu itama mu Oberiya, akwɛyi o ka mɔmɔ tete, o le mu enzu egbo iyimo, o lo mbo atiti. 14Kɛlɛlɛ akwɛyi ɛmɛnɛ o fye Ɔpɔlu ma o ka wa mu kenzu unga risu, Osalasi mbala Otimoti ba ɔ ŋɔ iyamba mu Obiriya. 15Enzu wa mbwalu o fye Ɔpɔlu ma nzhii ba o kawa mu Atɛsi akwɛyi o lu wu afyima, e shi mbo ilɔ te lo za la Osalasi mbala Otimoti te lo du wu efyefya.
Ɔpɔlu Mu Kwuse Ungwu Atɛsi
16Kwuye ungwu bɔkɔ Ɔpɔlu e rigbo Osalasi mbala Otimoti mu Atɛsi, egbo wu itutumo gyɔɔ kwongwu bɔkɔ a ma eshi munamuna mu kwuse kwɔngu. 17Kwuwo kwɔngu kwɔfyi kwɔfyi a ka mu udaba uwu ɛlu ikpalama uwu Azhu mu eza ibama mbala Azhu mbala umba bɔkɔ akwu Azhu mo bɔkɔ o gbo Ukpo oya awu, ikyo a ka mu rishi mbaa enzu umba bɔkɔ e du mbo mɔmɔ. 18Wa zɔ ɛzu umbafo umba o ya mba te Epikuriyani mbala umba Ositoki o le mu kaambu irimo mbala Ɔpɔlu. Umbafo mba o yo kwuyo te, <<Kimbe ba u wo uzhi le e yi mu isomo?>> Umbafo ba o zɔ te, <<I yi mate e yi mu anu itama iyi rɛnu ingyi Ukpo uwepo.>> O so ɛlɛ kwuwo ngwu Ɔpɔlu e yi mu rɛnu itama iyi iso iyeshi mekeka iyi Ɔzhizɔsi mbala igba la kwunyɔ iyimo. 19Akwɛyi o to Ɔpɔlu o kawa mbaa udaba uwu Areyopagusu, o za wu te, <<Ki gyi te la ki yitu iyi ɛzɔ iyepo ɛlɛ bɔkɔ ŋɔ yi mu izɔma le? 20Mo ŋɔ ka nzu la ɛzɔ iyepo, ki gyi te la ki yitu kimbe ba akwu iluma yi.>> 21(Ɛmɛ umba Atɛsi lɛɛbi mbala agboga umba bɔkɔ o yi mɔmɔ o ngbɛ kwuye mba mu iso isomo mbala alu ingbɛma mu ɛzɔ iyepo ɛlɛ.)
22Akwɛyi Ɔpɔlu e yimo a rima mu udaba uwu Areyopagusu ele a zɔ te: <<Enzu umba Atɛsi! Mi ma yi te mu ɔgwuzɛ uwunawuna lu kwu enzu umba o mbwalu Ukpo riba riba. 23Kwuwongwu kwuyengwu bɔkɔ mi yi mu ifulama, mi ngbɛndu mu apula iyi lu gbo yi oya, mi ma kwɔla ungwu isabo ungwu o ka ɛnyi mangwu te, <Laa UKPO uwu o yi wu mo.> Kekelele, Ukpo uwu bɔkɔ lu gbo wu oya ba lu yi wu mo awu, uwu gba mi ye yi mu iso wu isomo le.
24<<Ukpo ele e wo kwudu mbala apula iyinayina iyi bɔkɔ e yi mɛmi yi, uwu gba akwu Ukpo uwoshi mbala ɛzhi le, uwu a ŋɔ mu ɛtɛpu uwu enzu o mbo le mo. 25Ukpo ele e yi ugɔ uwu kiya moo a gyi imbwama iyi enzu mo mu ɛduma iyi ewo mo, kyamate e yi ugɔ tayi, kwongwu uwu mu afyi wu gba enzu lɛɛbi kwunyɔ mbala ɛnyɔ ifumo mbala ingyinangyina le. 26Ɛdɔ iyi enzu iyinayina lɛɛbi i ngyi mu onzu ɛnyi, kaa lo nyɔlɔ kwudu kwɔlɛ ma; akwɛyi uwu a ka mba kwuyengwu bɔkɔ o wo mbala mbaa bɔkɔ ese i yi le. 27Ukpo e wo ɛlɛ kaa enzu lo gagyi wu akwɛyi ingboshimo oo gagyi wu kego ba o fye wu mo, mekyeki uwu a ndama mbala ukpɛnyɛnyi nzu mo. 28<Moo mawu gba ki yi le, gba ki kpa ɛvyɛ le, gba e shi ki yi kwunyɔ le.> Mate bɔkɔ aba iyayi iyifo i zɔ, <Ki kwu Ɛmɛ wu.>
29<<Kwuwo kwɔlɛ ishi gba ki kwu ɛmɛ umba Ukpo, la ki byi egbo te Ukpo eyi mate uwɔ uwu ogolu naa osiliva nana kwoki ungwu bɔkɔ onzu mu ilukwu wu e mbo le mo. 30Mekyeki Ukpo e to iyitumo iyi enzu te a kwa wu kiya mo, ɔbulɛ kekelele a ta okpa te enzu lɛɛbi munamuna lo lafya la iyira iwomo. 31Moo a zɔ kwɔfyi diridiri-e ungwu onzu uwu bɔkɔ uwu a ŋa le, aa zɔ ombu la uwewe mu kwudu kwɔlɛ mu ongbulolo. e wo kiya ngyi bɔkɔ enzu o nyama la ngyi lɛɛbi, 32Kwuye ungwu bɔkɔ o pwa iso iyi igba la iyimo iyi ukpɛzhi, umbafo mba o wo ɛnɛ, mbafo ba o zɔ te, <<ki gyi te la ki pwa ŋa kpɔ mu iso ɛlɛ.>> 33Kwuwo ungwu ɛlɛ, akwɛyi Ɔpɔlu a wɔma mɔmɔ. 34Umbafo bwɛ mekeka mba o mbwalu Ɔpɔlu akwɛyi o shi egbo mbo. Umba bɔ o kyo mbala mba gba akwu Odiyonisiyu, uwu bɔkɔ e kyo mu udaba uwu Areyopagusu, tete oko uwufo uwu o ya wu te Odamarisu, mbala umbafo gyɔɔ.
Currently Selected:
Iwomo 17: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
