Iwomo 18
18
Ɔpɔlu Mu Okoroti.
1Mizhikembo iyi ɛlɛ Ɔpɔlu a lafya la Atɛsi a ka mu Ɔkɔrɛti. 2E kpolo onzu uwu Azhu uwufo uwu o ya wu te Akwila uwu a wɔ mu Opotusu; e ngyi iyepo mu Itili mbala oko wu uwu o ya wu te Opirisila, kwongwu Ɔkaladiyɔ a ta okpa te Azhu lɛɛbi lɔ lafya la Oromu. Ɔpɔlu ba a ka te la ma Akwila mbala Opirisila, 3akwɛyi kwongwu akwu u ndo ɛtɛti mate umba tayi awu, a ŋɔ mbala mba o wo ɛduma kyaa. 4Kwɔfyi ungwu ɛnwu igbomo ungwunanguna Ɔpɔlu a ka mu udaba uwu Azhu la lɔɔmbu irimo mu iso iyi Ukpo mbala Azhu ikyo Agiriki ka le bwu mbo mo ka lo na iso iyi bɔkɔ e yembo mu isomo.
5kwuyengwu Osalasi mbala Otimoti ɔ wɔ mu Omasedoniya o bo, Ɔpɔlu a rala ɛnwu e shi ndii mu anu itama mbala izɔgɔ itomo laa enzu umba Azhu te Ɔzhizɔsi gba akwu u sa enzu le. 6Azhu ba o towu wu mo akwɛyi o kpa wu ari, akwɛyi Ɔpɔlu a bwulɔ kwumburu ungwu ekpayi wu ma, za mba te << Ɛnzhii yi o yi mu reshi yi! Kwukyikyi yi kwu wɔma mu kwɔrɔ mi ee. Mi yimo munɛ le mi sheye mbaa enzu umba bɔkɔ akwu Azhu mo ŋa.>>
7Akwɛyi Ɔpɔlu a lafya la udaba uwu ɛlu ikpalama uwu Azhu a ka mu kwogba ungwu Ɔtatɔ Ɔzhɔsitu u mbwalu Ukpo uwu bɔkɔ kwogba wu ku yi kɛlɛ mbala udaba uwu ɛlu ikpalama uwu Azhu awu. 8Okirisipu u to keyi uwu udaba uwu Azhu mbala a gba wu lɛɛbi mbala enzu umba Ɔkɔrɛti gyɔɔ o umba bɔkɔ o pwa iso iyi Ɔpɔlu o na iso iyi Ukpo akwɛyi o wo mbo obatisima.
9Mu utu uwufo Ɔpɔlu a ma ɛbɛ te Ukpo e so iso mbala wu, a za wu te << Ki wuyi mo; kpakpɛɛ mu iso isomo, ki kpala kenzu ŋɔ ma mo. 10Mo mi yi mbala ŋa, onzu uwunawuna e do ŋɔ ira iwomo mo kwongwu mi yi enzu riba mu kwuse ngwɔlɛ.>> 11Ɔpɔlu a ŋɔ mu Ɔkɔrɛtiya kari la kwurizhi mu iso iyi Ukpo izɔma.
12kwuyengwu Ogaliyo akwu ɔsu uwu Akaya, Azhu umba bɔkɔ o gyi Ɔpɔlu mo awu o kpala o shi wu akwɛyi o yi wu mo akwɛyi o kawa wu mu udaba uwu Ɔsu Ogaliyo kaa lo fu wu ombwu. 13O za la Ogaliyo te, << Onzu ele, e yi mu enzu ibumo te lo lɛ Ukpo mu ɛgwuzɛ iyi i fo ɛrama ma.>>
14Tabɔkɔ Ɔpɔlu a ba ya kenzu mo te le so iso de Ogaliyo a za la Azhu tee, <<Lunyi Azhu, gba la lu zɔ te ombu uwu lu bo wu ele akwu te onzu ele e wo izumbira iyɛku de ba mi ngbɛ kwɔlu mu iso yi ɛlɛ. 15Ombwu uwu lu bo wu ele ba akwu ombu uwu kaambu irimo meka iyi iso mbala ɛnyi mbala ɛrama yi awu, la lu so kaa lu zɔ kyayi ma mafyi yi. Mi kwu u zɔ ombu mu iso ɛlɛ te mo.>> 16Akwɛyi e shi o ra mba ma mu udaba. 17Akwɛyi enzu riba mbɔlɛ o fulowa o kpo Osositini u to keyi uwu udaba uwu Azhu mɛnwu, akwɛyi o byi wu ɛmu mɔmɔ mu idu iyi Ogaliyo, Ogaliyo ba a pwa mba ɛkwu mo.
Ɔpɔlu A Gba A Kama Mu Atiyɔki
18Ɔpɔlu e wo afyi gyɔɔ mu Ɔkɔrɛtiya dɛ gba a lafya la wa mbwalu mɔmɔ akwɛyi uwu mbala Opirisila mbala Akwila o fye mu kwɔda ungwu embyi o ka mu Osiriya le. Mu Osekiriya, a ngbɛ inyi wu ma kwongwu ivungɔma iyi bɔkɔ uwu e wo. 19O ka mu Ɛfɛsɔ akwɛyi Ɔpɔlɔ a za la Opirisila mbala Akwila te lo rigbo wu mɔmɔ. Akwɛyi uwu ba e fye mu udaba uwu Azhu mbaa kaambu irimo mbala Azhu. 20Wambwalu o za wu te la ŋɔ mbala mba le kyoo, uwu ba e tomo. 21Kwuye ungwu bɔkɔ a ŋa lu mba afyima, a za mba te, <<Mi gba minyɔ gba Ukpo a nyama.>> Akwɛyi e fye mu kwoda ungwu embyi a lafya la Ɛfɛsɔ. 22Tabɔkɔ a kama mu Oseseriya, akwɛyi a ka gbɛlɛ wa mbwalu ɛnyi akwɛyi a ka mu Atiyɔki.
23Mizhikembo iyi e to kwuye mu Atiyɔki, akwɛyi a lafya la mɔmɔ a ka mu ese ikikɔ ikikɔ mu ɛzhi iyi Ogalatiya mbala Ofirigiya a kɔ wa vɔngɔ kiya ɛnwu ma.
Apolosi Mu Ɛfisu Mbala Ɔkɔrɛti
24Kwuye kwɔngu onzu uwu Azhu uwufo o ya wu te Apɔlɔsi a wɔ kusɛ ungwu Alɛkizandariya e bo mu Ɛfɛsɔ. Onzu ele akwu onzu uwu e yi iyitu gyɔɔ mu kwokpo ungwu Ukpo ba e siso kego. 25Onzu ele a vɔngɔ ɛzu iyi ɔgwuzɛ uwu Ukpo gyɔɔ, ba e siso iyi Ukpo la ɔnyɛ mbala enzu ɛzu izɔma iyi Ɔzhizɔsi kyori kyori. Uwu ba e yi iyitu iyi obatisima uwu Ɔzhɔnu kɛɛkyi bi. 26Tabɔkɔ Opirisila mbala Akwila o pwa wu te e so iso la ɛkpasu mu udaba uwu ɛlu ikpalama uwu Azhu, akwɛyi o za wu te le so mu kwogba mba akwɛyi o zɔ wu ɛzu iyi iso iyi Ukpo kaa le yi yi marimari.
27Kwuye ungwu bɔkɔ Apɔlɔsi a gyite le so mu Akaya, wa mbwalu o kawu ɛnwu ma akwɛyi o kakwupu la wabwalu mɔmɔ te lɔ na wu ewo epo. Bɔkɔ a kama mɔmɔ, a mbwa ma la enzu gyɔɔ umba bɔkɔ o na rɛnu ingyi Ɔzhizɔsi kwongwu esheshi iyi Ukpo. 28Ɔpɔlu e ri kaambwu mbala Azhu gedegede te, umba o wo ɔnyɛ mo, akwɛyi a zɔ mba mu kwokpo ungwu Ukpo te Ɔzhizɔsi gba akwu Okrasi le.
Currently Selected:
Iwomo 18: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
