Iwomo 16
16
Otimoti A Mbwalu Ɔpɔlu Mbala Osayilasi
1Ɔpɔlu e bo mu Odebi mbala Olisitira, mɔmɔ gba u vɔngɔ kiya uwu o ya wu te Otimoti e yi le, uwu anyi wu akwu Ozhudiya u mbwalu Ɔzhizɔsi ete wu ba akwu Ogiriki. 2Ɛmɛnɛ mu Olisitira mbala Ikɔniyɔ o siso iyeshi mekeka iyi Otimoti. 3Ɔpɔlu ba a gyi te la za wu le so mo, kwuwo kwɔngu a zɛ wu ɛsɔ ma dɛ kwongwu Azhu umba bɔkɔ o yi mɛzhi ɛnyi, lɛɛbi mba o yitu te ete uwu Otimoti akwu Ogiriki. 4Tabɔkɔ o ka mese mese, o so la enzu iso iyi bɔkɔ wa zɛ ilɔ mbala enzu umbakɔ mu Ɔzhɛrusalɛ o zɔ te lo wo. 5Akwɛyi ikwu idu fulo iyi wa mbwalu ikyo ekpasu ma, wa mbwalu ba o kwo mu riba ikyomo kwɔfyi kwɔfyi.
Ɔpɔlu A Ma Ɛbɛ Mekeka Iyi Onzu Uwu Omasedoniya
6Ɔpɔlu mbala enzu umba o zɛ mbala wu o fulama mɛzhi iyi Ofirigiya mbala Ogalatiya, moo Kwundu uwu Ukpo a nya mba ma te lo tanu iyi iso iyi Ukpo mu ɛzhi iyi Eshiya mo. 7Kwuye ungwu bɔkɔ o bo mu Omisiya, o gyi te lo fye mu Obitiniya, Kwundu uwu Ɔzhizɔsi ba a nya mba ma mo. 8Akwɛyi o zɛ mu Omisiya o ka mu Oturowa. 9Mutu ɔnwu Ɔpɔlu a ma ɛbɛ te, onzu uwu Omasedoniya uwufo e bo munyi wu akwɛyi a kpa wu ɛshɛku te, <<Sama kaa bo mu Omasedoniya ka mbwa nzu ma.>> 10Mizhikembo iyi Ɔpɔlu a mbwa ɛbɛ imama, akwɛyi ki nɔngɔ ewulo nzu ma efyefya akwɛyi ki to ɔgwuzɛ uwu Omasedoniya, kwongwu ki shi egbo nzu te Ukpo gba a ya nzu ma le te la ki za mba rɛnu wu.
Olidiya A Na Rɛnu Ingyi Ukpo Mu Ofilipiya
11Ki fye mu kwoda ungwu embyi mu Oturowa akwɛyi ki to ɔgwuzɛ ongbulolo ki ka mu Osamoteresi, akwɛyi eyi i lama ki fye mu Oniyapoli. 12Ki fulomo mɔmɔ akwɛyi ki ka mu Ofilipayi, kwuse ungwu kwu ka mɛzhi iyi Omasedoniya, mekyi ungwu kwu yi mu ewo iyi Oroma. Ki ŋɔ mɔmɔ afyi gyɔɔ.
13Ɔnu uwu kwɔfyi ungwu ɛnwu igbomo, ki wɔ kwudu ki zɛ mu kenzugwu unga kwuse ki ka mu kenzu unga ɔkwu mba bɔkɔ ki mate ki fya riyi ingyi Ukpo ilɛma. Ki ŋɔma akwɛyi eko umba bɔkɔ o gyirima mɔmɔ awu ki le mbo mu iso isomo. 14Oko uwufo uwu o ya wu te Olidiya e kyo e yi mekeka iyi enzu umba bɔkɔ o yi mu alu ingbɛma awu, e fulo ewo iyi ekpayi iwembi, a wɔ mu kwuse ungwu Otiyatira, oko ele akwu u mbwalu Ukpo. Ukpo a wu egbo wu ma akwɛyi a nyama mu iso iyi Ɔpɔlu. 15Mizhikembo iyi uwu mbala agba wu o wo obatisima, akwɛyi a za nzu te la ki so mogba wu. A zɔ te, <<Gba lu nyama ngboro te, imi mi kwu u mbwalu Ɔkwu, la lu bo kaa la lu gbo mi oga mogba mi.>> E bwu nzu mo nzhii ba ki nyama ki mbwalu wu.
O Ta Ɔpɔlu Mbala Osayilasi Mu Ugu ugyi Mu Ofilipiya
16Ɔnu uwufo ki wɔ ki she mu riyi ingyi Ukpo ilɛma, umoko unye uwu e yi ɛndu iyira iyi ba e kwu epa ma yi a wɔ e kpolo nzu. A fya eduwo gyɔɔ la enzu wu mu epa ikwumo ɛlɛ. 17Umoko ele a mbwalu Ɔpɔlu mbala nzu, la uzhi iwomo te, <<Enzu mbɔlɛ akwu ɛmɛgba umba Ukpo uwakwuu, o so yi iso iyi ɔgwuzɛ uwu isama.>> 18Te gba e koko e wo le nzhii ba afyi gyɔɔ, ɛlɛ i shi Ɔpɔlu e wo amba akwɛyi a mwanya e geleyi a za la ɛndu iyira ɛnyi te, <<Mu ɛnyi iyi Ɔzhizɔsi Okrasi Mi za ŋa te wɔma mu umoko ele!>> Mɔmɔ ɛndu iyira i lu wu afyima.
19Tabɔkɔ enzu umba umoko unye ele o ma te ɔgwuzɛ uwu eduwo ifyama mba u semo-o, akwɛyi o yi Ɔpɔlu mbala Osalasi o pyipyi mbo o ka mba mu idu iyi enzu umbakɔ. 20O kamba mu idu iyi wa zɔ ombu akwɛyi o zɔ te, Enzu mbɔlɛ akwu Azhu, o yi mu ovyo itama mu kwuse kwɔlɛ 21o zɔ enzu ɛzu te lo wo apula iyi bɔkɔ ɛrɛma nzu Oroma i nyama te la ki wo mo naa la ki vɔngɔ yi mo.>>
22Akwɛyi riba ingyi enzu mbamba o le mu Ɔpɔlu mbala Osalasi ɛmu ikpama, akwɛyi wa zɔ ombu o zɔ te lo lu mbo ekpayi ma akwɛyi o za la asozha te lo kpa mba ikpa. 23Mizhikembo iyi o mbwa mba ikpa ireyi ikpama, akwɛyi o ta mba mu ugu ugyi, akwɛyi o za la onzu u gbomo te le gbo mbo mo ɔnyɛnyɛ. 24#Tabɔkɔ a na ɔkpa ele ma, akwɛyi a ta mba mu ugu ugyi uwu ɛmɛ mi akwɛyi a ta mba kwutoshi.
25Mu utuweka Ɔpɔlu mbala Osalasi o yi mu Ukpo ilɛma mbala amu itama iyi iduma la Ukpo, umba bɔkɔ o yi mu ugu ugyi kya awu ba o yi mu alu ingbɛma. 26Kporo ba ɛzhi i dungɔma giri nzhii ba ɔla uwu Ugugyi e wo akpa, akwɛyi ikwu iyi ugu ugyi awu lɛɛbi i wuma, erimoki iyi o kpa uwewe akyi awu i vuvuma. 27U gbo ugu ugyi awu a nyeyimo mondo, tabɔkɔ a mate ikwu iyi ugu ugyi i yɛwu, akwɛyi a wa la ukpandɛrɛ wu kaa la ngbɛ ɛnwu ma kwuwongu a ma te umba bɔkɔ o yi mu ugu ugyi awu o rima lɛ-ɛ. 28Akwɛyi Ɔpɔlu ba a tara oga a za wu te, <<Ki ngbɛ ɛŋɔ ma mo! Kpɛkpɛ nzu ki yi munɛ!>>.
29U gbo ugu ugyi awu a zɔ tee lo ka wu laa ɔyi, e fye mɛmi efyefya akwɛyi a ta mɛzhi la ipwulama mu idu iyi Ɔpɔlu mbala Osalasi. 30Akwɛyi u gbo ugu ugyi awu a wa mba kwudu akwɛyi e yo mbo tee, <<Ada umbagba, kimbe ba mii wo bo sa mi ma?>>.
31O gba opwu te, <<Kwidu fulo mu Ɔkwu Ɔzhizɔsi, ŋɔɔ fya isama ma, uŋɔ mbala agba ŋa.>> 32Akwɛyi Ɔpɔlu mbala Osalasi o ta wu anu iyi rɛnu ingyi Ɔkwu uwu mbala enzu lɛɛbi umba kwogba wu. 33Mu utu ɔnwu, u gbo ugu ugyi awu akwu mba ma a gbɔ mba ashinakpa mba ma; akwɛyi uwu mbala agba wu o wo mbo obatisima kɛlɛlɛ. 34U gbo ugu ugyi e bo mbo mu kwogba wu akwɛyi e shi mbo kiya ingyi rimo; ɔnyɛ a nyɔlɔ wu ma kwuwongu uwu mbala agba wu o nyama la Ukpo.
35Bɔkɔ eyi i lama, wa zɔ ombu o lɔ asozha ma mbaa u gbo ugu ugyi awu te: <<La lu lafya la Ɔpɔlu mbala Osalasi.>> 36Akwɛyi u gbo ugu ugyi ele a za la Ɔpɔlu te, <<Wa zɔ ombu o lɔma te, lo lunyi afyima. Kekelele la lu sheyimo kya yi bi. La lu somo mu oloto.>>
37Ɔpɔlu ba a za la asozha mbamba te: <<O byi nzu ɛmu mu okpulo gedegede o yo kwuyo ungwu kwuyi ungwu ombu dɛ mo, kinzu ba ki kwu ɛmɛ umba Oroma, o ta nzu mu ugu ugyi. Akwɛyi kekelele ba o gyi te lo wa nzu ma kyokyokyo? Ayimo yimo! Lo bo lo wa nzu ma mafyi mba.>>
38Tabɔkɔ asozha mbamba o gba yi o ka la enzu wa zɔ ombu, akwɛyi kwuye ungwu bɔkɔ o pwa te Ɔpɔlu mbala Osalasi akwu ɛmɛ umba Oroma, iyi i wo mbo mo. 39O bo o ta mba mɛzhi akwɛyi o wa mba ma mu ugu ugyi awu, akwɛyi o kpa mba ɛshɛku te lo lafya la kwuse kwɔngu. 40Mizhikembo iyi Ɔpɔlu mbala Osalasi o wɔ ma mu ugu ugyi, o ka mu kwogba ungwu Olidiya, mɔmɔ o kpolesu mbala ɛmɛnɛ akwɛyi o so mbo iso iyi i kɔ mba ɛnwu ma. Akwɛyi o lafya la kwuse kwɔngu.
Currently Selected:
Iwomo 16: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
