Iwomo 15
15
Ɛlukpalama Iyi Enzu Umbakɔ Mu Ɔzhɛrusalɛ
1Enzu umbafo o wɔ mu Ozhudiya o sheye mu Atiyɔki, akwɛyi o za la wa mbwalu ɛzu izɔma te: <<Mɛga o zɛ yi ɛsɔ ma kyamate bɔkɔ ɛrama iyi Omosisi i zɔ tayi, mo lu fya isama mo.>> 2Ɔpɔlu mbaIa Obanaba ba o nyama la iso mba ɛlɛ mo akwɛyi kaambu ungaku ke fye mekeka mba. Akwɛyi enzu umbakɔ umba Ɔshɔshi o ŋa Ɔpɔlu mbala Obanaba mbala enzu wa mbwalu mbafo te lo kala wa zɛ ilɔ mbala enzu umbakɔ mu Ɔzhɛrusalɛ iso ɛlɛ. 3Akwɛyi wa mbwalu umba Atiyɔki o shi mbo kiya ingyi luzɛ akwɛyi o wo mbo ungbo. Tabɔkɔ o fulomo, o zɛ mu ɛzhi iyi Ofonishiya mbala Osamariya, akwɛyi o ba ɛza la wa mbwalu ewo iyi bɔkɔ enzu umba bɔkɔ akwu Azhu mo o fulowa o mbwalu Ɔzhizɔsi. Ɛza ɛlɛ i shi wa mbwalu ubwu uruwu gyɔɔ. 4Tabɔkɔ Ɔpɔlu mbala Obanaba o bo mu Ɔzhɛrusalɛ, ɔshɔshi mbala wa zɛ ilɔ mbala enzu umbakɔ o bwamba ma, akwɛyi o ba mba ɛza ɛlɛ lɛɛbi iyi bɔkɔ Ukpo e shi mbo ekpasu bɔkɔ umba o wo.
5Akwɛyi wa mbwalu umbafo umba bɔkɔ o yi egbo ikpɛnyi mbala Afarisi o yimo o rima akwɛyi o zɔ te, <<Enzu umba bɔkɔ akwu Azhu mo umba bɔkɔ o mbwalu Ɔzhizɔsi akwu mega te o zɛ mba ɛsɔ ma, kaa lo gba lo lomo la ɛrama iyi Omosisi.>>
6Wa zɛ ilɔ mbala enzumbakɔ umba ɔshɔshi o ŋɔma kaa lo yese ɛlɛ ma. 7O ri kaambu mu iso ɛlɛ gyɔɔ, akwɛyi Opita e yimo a rima, a za mba te: <<Ɛmɛnɛ mi, lunyi lu yitu te mekyeki Ukpo a ŋa enzu mekeka yi te enzu umba bɔkɔ akwu Azhu mo lo pwa iso iyi Ukpo mu kenzu mi, kaa lo nyama la yi. 8Ukpo uwu bɔkɔ e yitu iyi egbo iyi onzu awu, a zɔ yi te a nyama la mba kwuwongu e shi mbo Kwundu uwu Ukpo, kyamate ba e shi nzu awu. 9Ukpo a zɔ uwewe kusɛ mo, mo a wulu akɔ mba ma kwuwongu ikwidufulo mbo mu Ɔzhizɔsi. 10Kwuwo kwɔlɛ, kimbe ki shi bɔkɔ lu gyi te la lu pwa Ukpo ma bɔkɔ lu fulo wa mbwalu mbɔlɛ ewulo iyɔlu iyi bɔkɔ kinzu mbala asɔku nzu lala ki do yi shimo mo? 11Ayi mo! Kinzu ki shi egbo te akwu kwuwongu esheshi iyi Ɔkwu Ɔzhizɔsi gba ki fya isama le, kyamate umba o tete.>>
12Enzu umba o gyirima lɛɛbi awu o gbo ndii ta bɔkɔ o ngbɛ kwɔlu mu ɛza iyi o ba mba awu. Ɔpɔlu mbala Obanaba o ba mba ɛza iyi apula iyi kenzu iyama bɔkɔ Ukpo e shimbo o wo meka iyi enzu umba bɔkɔ akwu Azhu mo. 13Kwuye ungwu bɔkɔ o mbwa iso isomo lɛɛbi, akwɛyi Ozhemisi e yimo a gba opwu te: <<Ɛmɛnɛ mi, la lu ngbɛ alu mu iso mi. 14Ɔsamɔ uwu o ya wu te Opita awu a ba nzu ɛza kwonze te, Ukpo e yi egbo mu enzu umba bɔkɔ akwu Azhu mo, akwɛyi a ŋa enzu umbafo lɛnwu wu meka mba kaa lakwu umba wu. 15Iso iyi bɔkɔ anukenzu o so i nyama la ɛlɛ kyamate bɔkɔ o ka awu te:
16< Mizhikembo iyi ɛlɛ Imi Ɔkwu mii gbama,
mii gba la kwogba ungwu Odevidi imbomo.
Ɛrizhi ɛnyi mii gba ya la imbomo.
akwɛyi mi gba ngwu la inɔngɔma,
17kaa enzu umba bɔkɔ o shimo awu lo gagyi Ɔkwu,
mbala enzu umba bɔkɔ akwu Azhu mo lɛɛbi, umba bɔkɔ o ya mba o ba la ɛnyi mi.
Imi Ɔkwu gba mi so ɛlɛ le.
18Mi so yi mi shi mɛzhi mekyeki.
19Ozhemisi a zɔ kpɔ te, <<Mu imama mi, enzu umba bɔkɔ akwu Azhu mo umba bɔkɔ o yi mu ifulowa bo mba Ukpo awu la ki fulo mbo ewulo iyɔlu mo. 20Kinzu ba la ki ka mba kwupu te, lo ri ewiri iyi bɔkɔ o wo isabɔ la eshi mo, lo yama mo, lo kwu ivye iyi izɔfyi uwu ɛnzhi wu o fumo mo mo, ba lo kwu ɛnzhi mo. 21Mekyeki, ɛrama iyi bɔkɔ Ukpo e shi Omosisi o ye yi mu iwama mu kwuse ungwunanguna mu idaba iyi Azhu orondo orondo.>>
Enzumbakɔ Umba Ɔshɔshi O Ka Kwupwu Laa Wambwalu Umba Bɔkɔ Akwu Azhu Mo
22Akwɛyi wa zɛ ilɔ mbala enzu umbakɔ mbala enzu umba ɔshɔshi lɛɛbi, o nyama te lo ŋa enzu umbafo kaa lo lɔ mba ma mu Atiyɔki lo zɛ mbala Ɔpɔlu mbala Obanaba. Akwɛyi o ŋa Ozhudasi uwu o ya wu te Obasaba mbala Osalasi, enzu wepo mbɔlɛ akwu wa to keyi mekeka iyi ɛmɛnɛ. 23O kakwupu o shi mbo te:
Kinzu wa zɛ ilɔ mbala enzu umbakɔ, mbala ɛmanyi yi gba ki ka yi kwupwu kwɔlɛ le,
Lunyi wa mbwalu umba lu kwu Azhu mo bɔkɔ lu yi mu Atiyɔki, Osiriya mbala Osilisiya:
Ki gbɛlɛ yi ɛnyi.
24Ki pwa te enzu umbafo mekeka nzu umba ki lɔ mba ma mo o wɔ o ka munyi yi o wo yi egbo gididi, o tutu yi egbo mo kwongwu iso iyi o so. 25Akwɛyi kpɛkpɛ nzu ki nyama te la ki ŋa enzu umbafo kaa la ki lɔ mba ma munyi yi, umba mbala ɛmɛza nzu kasɛkɛ Obanaba mbala Ɔpɔlu. 26Enzu mbɔlɛ o ra lakwunyɔ mba o shi kwuwongu ɛnyi iyi Ɔkwu nzu Ɔzhizɔsi Okrasi. 27Kwuwo kwɔngu ki lɔ Ozhudasi mbala Osalasi te lo so kaa lo so yi iso iyi bɔkɔ ki ka mu kwupu kwɔlɛ awu. 28Kwundu uwu Ukpo a zɔ nzu te, la ki fulo yi ewulo iyɔlu mo, lunyi ba la lu mbwalu ɛrama ɛlɛ te: 29lunyi ba la lu ri ewiri iyi bɔkɔ o wo isabɔ la eshi mo, la lu yama mo, la lu kwu ivye iyi izɔfyi uwu ɛnzhi wu o fumo mo mo, ba lo kwu ɛnzhi mo. Gba lu mbwa ɛrama ɛlɛ lɛɛbi i shoshi.
Ukpo le yi mbala yi.
30Enzu mbɔlɛ o fye alɔgbulɔ mo akwɛyi o to ɔgwuzɛ mba o ka mu Atiyɔki, o kpala enzu umba ɔshɔshi ɛlu akwɛyi o shi mbo kwupu kwɔlɛ mɔmɔ . 31Tabɔkɔ o wa mbakwupu kwɔlɛ ma, enzu o mwɔnyɛ kwuwongu iso ɛlɛ i ka mba ɛnwu ma. 32Ozhudasi mbala Osalasi, umba ba akwu anukenzu tete awu, o so ɛmɛnɛ iso gyɔɔ kaa lo ka mba ɛnwu ma lo shi mbo ekpasu. 33Alɔgbulɔ umba bɔkɔ o wɔ mu Ɔzhɛrusalɛ o wo afyi bwɛ mbala mba mu Atiyɔki, akwɛyi ɛmɛnɛ mbamba o fye mbo mo o wo mbo ungbo laa ɔnyɛ akwɛyi o kama iyamba mbaa enzu umba bɔkɔ o lɔ mba ma awu. 34Osalasi ba a ma te i she wu woshi te la ŋɔma mu mɔmɔ. 35Ɔpɔlu mbala Obanaba ba o rima mu Atiyɔki. Mɔmɔ umba mbala enzu umbafo gyɔɔ o zɔ ɛzu mbala anu itama iyi iso iyi Ɔkwu.
Ɔpɔlu mbala Obanaba O Kama Mbala Esu
36Mizhikembo iyi kwuye bwɛɛ akwɛyi Ɔpɔlu a za la Obanaba te, <<La ki gba la ifulama mu ese iyi bɔkɔ ki tanu iyi iso iyi Ukpo awu kaa la ki ma luzɛ mba mu iso iyi Ukpo.>> 37Obanaba a gyi te Ɔzhɔnu uwu o ya wu te Omaki awu le somo mbala mba. 38Ɔpɔlu ba a ma te i ye mbo ɔnyɛ mo gba a kama mbala mba, kwongwu bɔkɔ a ri ɛnya e shimbo mu Opafiliya, a lafya la ɛduma iwomo mbala mba. 39O ri kaambu gyɔɔ mbala esu akwɛyi onzonzu e to ɔgwuzɛ wu. Obanaba e to Omaki o fye mu kwoda ungwu embyi akwɛyi o to ɔgwuzɛ uwu Ɔsapurɔ, 40Ɔpɔlu ba e to Osalasi ma, akwɛyi ɛmɛnɛ o lɛ Ukpo te le gbo mbomo mu luzɛ mba akwɛyi o kama. 41A zɛ mu Osiriya mbala Osilisiya akwɛyi a ka wa mbwalu Ɔzhizɔsi ɛnwu ma.
Currently Selected:
Iwomo 15: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
