Ɔkɔrɔti uwu kwonze 7
7
Eyo Mɛka Iyi Oko Itomo Mbala Ɔnu Iyama
1Iso iyi bɔkɔ lu ka mi kwupu ma yi awu, i shoshi bi gba onzu e to oko mo. 2Tetete, kwuwongu iyama i yi gyɔɔ ŋa awu, i shoshi tee uwewe le to oko uwawu, oko ba la ya ɔnu uwawu. 3Ɔnu la nyi oko wu inɔma mo, oko ba la nyi ɔnu wu inɔma mo tete. 4Moo akwu oko gba e yi ekpasu mu ɛnwu wu le fo, akwiyi ɔnu wu ŋa; tatayi akwu ɔnu gba e yi ekpasu mu ɛnwu wu le fo, akwiyi oko wu ŋa. 5La lu nyi esu inɔma ma mo, gba lu ŋu shi esu kwuye bwɛ kwuwongu lu ŋu shi ɛyi laa Ukpo ilɛma de ba la lu so kya dɛ; akwɛyi la lu gba lu kpa mbala esu kpɔ, kaa onzu uwoyi la ka yi laa ipwama iyi bɔkɔ lu fa la ɛnwu yi irima mo.
6Ɛlɛ mi so yi ele, mi tayi ɔkpa mo, amasa gba mi ta yi le byi. 7Gba igyima la kwu ifyama ba mi gyi tee uwewe le yi kyamate Imi te; ɔbulɛ rɛshi ingyi bɔkɔ Ukpo e shi uwewe akwu ikikɔ ikikɔ, onzu ukpɛnyi e yi ngyɛlɛ, onzu uwufo ba e yi ngyewa.
8Kekelele te mi so enzu umba bɔkɔ o do to eko mo mbala eko wa kpo anu ma tee, lo to eko mo ba lo ya anu mo kyamate Imi te. 9Akwiyi gba umba o do ɛnwu mba iyimo mo, ba lo to eko, lo ya anu, i shoshi i ka ekweyi iyi bɔkɔ i ngbɛ mba ma.
10Enzu umba bɔkɔ o to eko-o naa o ya anu-o awu ba mi ta mba ɔkpa, uwu bɔkɔ e ngyi mbaa mi mo, e ngyi mbaa Ɔkwu tee: oko la lafya laa ɔnu wu mo; 11akwiyi gba a fɔma mbaa ɔnu wu, ba la ŋa laa ɛwu, moo ba la gba le lomesu mbala ɔnu wu; ɔnu ba la lafya la oko wu mo.
12(Ɛlɛ akwu Imi, mafyi mi gba mi yi mu isomo le, moo akwu Ɔkwu mo) laa umba bɔkɔ o shimo tee: akwiyi gba umɛnɛ e yi oko uwu bɔkɔ akwu u mbwalu mo, oko awu ba a nyama te aa ŋɔ mbala wu, la ra wu ma mo. 13Akwiyi gba oko u mbwalu e yi ɔnu uwu bɔkɔ akwu u mbwalu mo, ba a nyama te aa ŋɔ mbala wu, uwu la wɔma le shi ɔnu awu mo. 14Moo ɔnu uwu bɔkɔ akwu u mbwalu mo awu, a wuluma sɛsɛ mbaa Ukpo kwuwongu ikyomesu mbala oko wu, tatayi oko uwu bɔkɔ akwu u mbwalu mo awu, a wuluma sɛsɛ mbaa Ukpo kwuwongu ikyomesu mbala ɔnu wu u mbwalu. Gba akwu tayi mo, ɛmɛ yi o yi kyamate ɛmɛ umba bɔkɔ o yi Ukpo mo tayi; tetete kwuwongu ukpɛnyi yi akwu u mbwalu Ukpo awu ɛmɛ yi tete akwu umba Ukpo. 15Akwiyi gba onzu uwu bɔkɔ akwu u mbwalu mo awu a gyi tee le fulomo la lafya laa U mbwalu, le shiwobi le sheyimo iyawu. Umɛnɛ uwu bɔkɔ akwu u mbwalu akwu unye meka iyi ɛlɛ te mo. Ukpo a ya nzu ma kaa la ki ŋɔ moloto mbala umbafo. 16Oko, ŋɔ yitu naa uŋɔ gba ŋɔ bi sa ɔnu ŋɔ ma lee? Na ɔnu, ŋɔ yitu naa uŋɔ gba ŋɔ bi sa oko ŋɔ ma lee?
Rima Mbaa Bɔkɔ Ukpo A Ya Ŋa Ma Awu
17Uwewe la ri mu riyi ingyi Ɔkwu e shi wu mbala mu ingyi bɔkɔ Ukpo a ya wu ma. Ɛlɛ gba akwu kaza unga bɔkɔ mi ta laa ɛshɔshi lɛɛbi le. 18Onzu uwu bɔkɔ a zɛ ɛsɔ ma dɛ gba Ukpo a ya wu ma le, la rayi tayi. Onzu uwu bɔkɔ a zɛ ɛsɔ ma dɛ gba Ukpo a ya wu ma le mo, la zɛ ɛsɔ ma shaa mo. 19Laa ɛsɔ izɛma la kworiyo akwu kiya kinyinyi mo; eyi ibɔma mu ɔkpa uwu Ukpo gba ɔ gyi le. 20Uwewe la ra la iyi bɔkɔ e yi ma yi dɛ ishi Ukpo a ya wu ma le awu. 21Ŋɔ kwu unye kwuyengwu bɔkɔ Ukpo a ya ŋa ma awu re? Shi egbo ŋɔ mɛzhi ki taka mo; akwiyi gba ŋɔ yi ɔgwuzɛ uwu ŋɔ wɔma, ba wɔma. 22Moo onzu uwu bɔkɔ akwu unye kwuyengwu bɔkɔ Ɔkwu a ya wu ma awu, akwu onzu uwu bɔkɔ Ɔkwu a wa wu ma a; tatayi onzu uwu bɔkɔ akwu unye mo kwuyengwu bɔkɔ Okrasi a ya wu ma awu, akwu unye uwu Okrasi ŋa. 23Ukpo a ya yi la abwa; la lu kwu enye umba enzu mo. 24Ɛmɛnɛ mi, uwewe la ri mu riyi ingyi bɔkɔ e yi dɛɛ ishi Ukpo a ya wu ma awu.
Eyo Mɛka Iyi Eko Umba O Do Ya Anu Mo Mbala Eko Wakpanuma Anu Ma
25Iso iyi eko umba bɔkɔ o do ya anu mo awu: Ɔkwu e shi mi ɔkpa mo, Imi mii so yi iyi egbo mi mate onzu uwu bɔkɔ o nyama la wu kwuwongu eyembembyi iyi Ɔkwu. 26Kwuwongwu inyashi iyi kwuye kwɔlɛ, mi ma tee i shoshi kaa uwewe la ŋɔ kyawu tayi. 27Akwiyi gba ŋɔ to oko-o, de ba ki rawuma mo. Akwiyi gba ŋɔ di to oko mo, de ba ki gagyi oko shaa mo. 28Akwiyi gba ŋɔ to oko, ŋɔ ngbomo mo; akwiyi gba umokokpayi a ya ɔnu, e ngbomo mo. Onzu uwu bɔkɔ e to oko naa a ya ɔnu, a ma inyashi mu kwudu kwɔlɛ a ka le, Imi ba mi gyi te la mi gyi yi ɔlu ma.
29Ɛmɛnɛ mi, iyi mi so yi ele gba akwu tee: kwuye kwu shi gyɔɔ fo, kwuwo kwɔlɛ enzu umba bɔkɔ o yi eko, lɔ ŋɔ kyamate o yi mbo mo tayi; 30umba bɔkɔ o yi mu obobyi iwomo, lɔ ŋɔ kyamate o yi mu obobyi iwomo mo tayi; umba bɔkɔ o yi mwɔnyɛ imuma, lɔ ŋɔ kyamate umba bɔkɔ o yi mu ɔnyɛ imwuma mo tayi; umba bɔkɔ o ya kiya, lɔ ŋɔ kyamate kiya ngyɛngyi akwu ingyamba mo tayi; 31umba bɔkɔ o yi apula iyi kwudu kwɔlɛ lo ra la ɛmba lo shi yi mo. Moo kwudu kwɔlɛ ta ki mangwu ole kwu nda laa ibomo fo.
32Imi mi gyi tee la lu yi aka itama mo. Onzu uwu bɔkɔ e yi oko mo, a byi egbo iyi ɛduma iyi Ɔkwu, kaa le she laa Ɔkwu. 33Onzu uwu bɔkɔ e yi oko ba e shi egbo wu mu apula iyi kwudu kwɔlɛ, kaa le she laa oko wu, 34akwɛyi amasa wu i foyaa. Oko uwu bɔkɔ e yi ɔnu mo, e shi egbo wu mu ɛduma iyi Ɔkwu, iyi bɔkɔ uwu a gyi gba akwu tee a bɔ eyi mu ɛduma iyi Ɔkwu laa kwundu mbala egbo wu lɛɛbi; oko uwu bɔkɔ e yi ɔnu ba ee shi egbo wu mu apula iyi kwudu kwɔlɛ, kaa le she laa ɔnu wu.
35Imi mi so yi ɛlɛ kaa la mi mbwa yi ma le bi moo akwu ɛga mo. Mi gyi tee la lu ŋɔ ɔnyɛ mu egbo ikpɛnyi kaa la lu wo ɛduma iyi Ɔkwu marimari.
36Akwiyi gba onzu e yi mu anu ishimo iyi oko lɔri lɔri-e akwɛyi a ma tee ye wu mu kwuye ingbɛma, lɔri undu umoko awu ba lu yi gyɔɔ ɔ, de ba le towumo mate egbo wu i gyi tayi. Ɛlɛ akwu ingbomo mo, lo to esu byi. 37Onzu uwu a ka mu egbo wu ba o kpa wu mu ega mo, ba e do ɛnwu wu irima, gba a zɔ te uwu a e to umoko awu mo, ishoshi. 38Kwuwongwu ɔlɛ, onzu uwu bɔkɔ e to umoko awu, e wo ɔnyɛ, onzu uwu bɔkɔ e to wumo awu ba, e wo ɔnyɛ a ka le.
39Oko la ŋɔma mbaa ɔnu wu mega nzhii ba lukwu; Akwiyi gba ɔnu wu e kpomo, ba la ya ɔnu awa uwu bɔkɔ egbo wu i gyi. Ɔnu awu ba lakwu u mbwalu Ɔkwu mega. 40Mu imama mi, gba a ŋɔma kyawu tayi a mwɔnyɛ a ka le. Imi mi ma tee mi yi Kwundu uwu Ukpo tete.
Currently Selected:
Ɔkɔrɔti uwu kwonze 7: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
