Ɔkɔrɔti uwu kwonze 6
6
Enzu Wa Mbwalu Lo Lo ewa Iyi esu Mbaa Enzu Umba Bɔkɔ Akwu Wambwalu Mo Mo
1Akwiyi gba onzu ɛnyi meka yi e yi anu mbala u mbwalu uwufo, e wo la ba e lo ewa wu mbaa enzu umba Ukpo mo bɔkɔ e lo ewa mbaa enzu umba akwu wa mbwalu mo kaa lɔ zɔ wu ombu? 2Lunyi lu yitu te enzu umba Ukpo gba o bo zɔ ombu uwu kwudu kwɔlɛ le mo re? Lunyi umba bɔkɔ lu bu zɔ ombu uwu kwudu kwɔlɛ le lu do embu iyɛriyɛri ɛlɛ izɔma moo? 3Lunyi lu yitu te kinzu gba ki zɔ ombu uwu alɔgbulɔ umba Ukpo le mo re? I bi gyi umba apula iyi kwudu kwɔlɛ! 4Kwuwo kwɔlɛ, gba lu yi anu mbala esu, la lu shi enzu umba bɔkɔ wa mbwalu o to mbo te akwu kiya kinyinyi mo awu, kaa lɔ zɔ yi ombu mo! 5Ɛlɛ akwu kiya ingyi lovya! Moo lu yi onzu ukpukpɛnyi te meka yi uwu bɔkɔ e yi amasa iyi bɔkɔ a zɔ anu iyi ɛmɛnɛ ma mo? 6Ɔbulɛ ŋa umɛnɛ uwufo ba e yimo a ka e lo ewa iyi umanyi wu mu idu iyi umba bɔkɔ akwu wa mbwalu mo!
7Tabɔkɔ lu lo ewa iyi esu le, i zɔ te lu fɔma-a. I shoshi i ka kaa lɔ gyi yi anu byi mo? I shoshi i ka kaa lo wo yi iri byi mo? 8Ɔbulɛ ŋa lunyi gba ba lu wo esu iri le, ba lu gyi anu iyi esu le, ɛlɛ ba lu wo yi laa ɛmanyi yi wa mbwalu tete! 9Lunyi lu yitu te enzu umba ira o fye mu Irɛsu iyi Ukpo mo mo? Onzu le kyoro yi mo mo; moo kala wa yama, laa wa byeshi, laa wa to kaya laa anzɔnu umba bɔkɔ ɔ nɔ mbala anzɔnu 10laa awɛlɔ, laa wa wo ekweyi, laa umba bɔkɔ o ra lɛmba o shi atɛ, laa wa pe enzu ari laa wa wo iri, o fye mu Irɛsu iyi Ukpo mo. 11Tayi gba lunyi umbafo ba lu yi le mekyi. Tetete lunyi ɔ gbɔ yi ingbomo yi ma-a, ba lu wulu ma-a, Ukpo e to ombu a sha yi kwuwongu Ɔkwu Ɔzhizɔsi Okrasi mbala Kwundu uwu Ukpo nzu.
La lu Du Ukpo Ma Mu Ɛnwu Yi
12<<Mi yi kapa unga kiya ingyinangyina iwomo,>> ɔbulɛ akwu kiya ingyinangyina gba mi ri ogbo ma ngyi le mo. <<Mi yi kapa unga kiya ingyinangyina iwomo,>> tetete mi ra laa ɛmi mi shi kiya ingyinangyina bi mo. 13<<Kiya ingyirimo o wongyi kwuwongu ubu, ubu tete o wo wu kwuwongu kiya ingyirimo.>> Ukpo ba a ŋa ngbɛ epepo yi ɛdɔma. Moo ɛnwu o wo yi kuwongwu iyama mo, o wo yi kaa lo wo ɛduma laa Ɔkwu; Ɔkwu ba e yese mbaa ɛnwu nzu. 14Ukpo e yi Ɔkwu ma mu kwuvɔ, uwu ba ee yi nzu mo tete mu ekpasu wu.
15Lunyi lu yitu tee ɛnwu yi akwu ɛnwu iyi Okrasi mo? Inyete mi ra la ɛnwu iyi Okrasi mi kpa mbala iyi okyirakyi ŋa le mo? Ayimo! 16Lunyi lu yitu tee onzu uwu bɔkɔ a kpa ɛnwu wu mbala okyirakyi akwu ɛnwu ikpɛnyi mbala wu mo? Moo kwokpo ungwu Ukpo kwu zɔ tee, <<Enzu wepo mbamba oo kwu ɛnwu ikpɛnyi.>> 17Onzu uwu bɔkɔ a kpa ɛnwu wu mbala Ɔkwu ba akwu ukpɛnyi mbala wu mu kwundu.
18La lu zɛ gboo lu shi iyama. Moo ingbomo lɛɛbi iyi bɔkɔ onzu e ngbo, akwu ɛnwu wu gba e ngbo mo le; onzu uwu bɔkɔ a yama ba ɛnwu wu gba e ngbo yi mo le. 19Lunyi lu yitu tee ɛnwu yi akwu Ɔtɛpu uwu Kwundu uwu Ukpo, uwu bɔkɔ e yi mɛmi yi, uwu bɔkɔ lu na mbaa Ukpo awu mo? Ɛnwu yi ɛlɛ akwu iyayi fo, akwiyi Ukpo ŋa; 20a ya yi la abwa gyɔɔ. Kwuwongwu ɔlɛ, la lu shi Ukpo inzumbɛku mu ɛnwu yi.
Currently Selected:
Ɔkɔrɔti uwu kwonze 6: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
