Ɔkɔrɔti uwu kwonze 4
4
Wa zɛ ilɔ Umba Okrasi.
1Kwuwo kwɔlɛ, i fate la lu to nzu te ki kwu ɛmɛgba umba Okrasi umba bɔkɔ Ukpo e shi mbo anu itama iyi iso wu iyi bɔkɔ e nvye yi mo la enzu mo mekyi. 2Kwuwo kwɔlɛ, onzu uwunawuna uwu bɔkɔ o shi wu te la bɔ eyi mu ɛduma ɛlɛ, la bɔ shɛɛ mu ɛduma ɛnyi iwomo. 3Gba lunyi, na onzu uwunawuna a zɔ te mi wo ɛduma ɔnyɛ, naa mi wo ɔnyɛ mo, ɛlɛ akwu kiya kinyinyi mu eyi mi mo; Imi mafyi mi lala mii zɔ ɛmi ombu te mi wo ɛduma ɔnyɛ naa mi wo ɔnyɛ mo mo. 4Egbo mi i yi sɛsɛsɛ, tetete, akwu ɛlɛ gba i shi mi ɔsɛkɛnɛ le mo. Ɔkwu nzu Okrasi gba e mondo ɛduma mi mo le. 5Kwuwo kwɔlɛ, la lu zɔ onzu uwunawuna ombu mo. La lu rigbo kaa Ɔkwu nzu la gbama dɛ. Uwu gba a walaa apula iyi i nvyemo mbala egbo iyi onzonzu kwudu le. Mu kwuye kwɔngu gba onzonzu a na ipwɔma wu mbaa Ukpo kyakya la ɛduma iyi bɔkɔ e wo le.
6Ɛmɛnɛ mi, apula iyi mi so le akwu kwuwo yi kaka ka la lu vɔngɔ kiya munyi mi mbala Apɔlɔsi akwɛyi iso iyi bɔkɔ ɔ ka mu kwokpo ungwu Ukpo tee, <<Lɔ pika kiya ingyi ɔ ka mo>> awu, lu zɔngɔma yi ma. Ɛlɛ i shi lu kwɛnwu mu onzu ukpɛnyi akwɛyi lu lafya la uwufo mo. 7Ishi uwe bɔkɔ a za ŋa te ŋɔ ka onzu uwufo ma? Kimbe ba ŋɔ yi ngyi bɔkɔ akwu Ukpo gba e shi ŋɔ le mo? Akwiyi gba o shi ŋɔ ishimo, kimbe ki shi ŋɔ kwɛnwu kyamate o shi ŋɔ ishimo mo?
8Ee, lu yi kiya ingyinangyina ingyi lu gyi-e e lo! Lunyi lu yi kwuwo o lo! Lunyi lu yi mu ɛsu irimo-o ba ikyo mbala nzu mo lo! Lɔ zɔ te lu kwu asu-o lala ba kinzu tete ki kwu asu mbala yi! 9Moo mi ma mate Ukpo e shi kinzu wa zɛ ilɔ te la ki kwu wambwambwa mu kiya ingyinangyina. Ki yi kyamate enzu umba o fu mbo mu ugu ugyi o rigbo te lo ngbɛ mba ma la eyi iyenzu gedegede tayi. Kinzu ki kwu kiya ingyi iyesemo la alɔgbulɔ umba Ukpo mu oshi mbala enzu umba kwudu kwɔlɛ kaa lɔ ma kiya ingyi ki bi du nzu bi ŋa. 10Kinzu ki kwu erendo kwuwongu Okrasi; lunyi ba lu kwu enzu umba amasa kwuwongu ilomesu yi mbala Okrasi! Kinzu ki yi ekpasu mo, lunyi ba lu yi ekpasu! Kinzu ɔ zhinzu ma, lunyi ba o lo yi mo! 11Iyɔkpɔɔ lonzu mbala ugbembyi u ngbɛ nzu ma; ki yi ekpayi iyi ilomo mo; kinzu ki kwu kiya ingyi ɛmu ikpama; kinzu ki yi kwuyinu ungwafyafyi nzu mo; 12kinzu ki wo ɛduma mu ewo nzu dɛ gba ki ri kiya le. Gba enzu o kpa nzu ari, kinzu ba ki ta mba kenzu ungesheshi; gba o lonzu inyashi, kinzu ba ki yidu; 13gba o so nzu iso iyira, kinzu ba ki gbamba opwu mu opwu uwoshi. Kekelele ki yi kyamate kwɔza ungwu kwudu kwɔlɛ tayi; ki kwu kiya ingyi kashi la kwudu kwɔlɛ nzhii ba ta ɔnɛ te!
14Akwu te mi ka yi apula ɛlɛ kaa la mi lo yi lovya le mo, Imi ka yi te kaa la mi yi yi mu alu le kwuwongu lunyi lu kwu ɛmɛ umba idɛnyi mi. 15Ishi gba enzu umba o bɔ yi eyi mu Okrasi imbwaluma lo yi riba tetete lala, lu yi ada ukpɛnyi bi. Imi gba mi kwu ete yi le, moo Imi gba mi ka yi la iso iyi iyesheshi ɛlɛ keyi le. 16Kwuwo kwɔlɛ, mi kpa yi ɛshɛku te la lu mondo mi mu luzɛ yi. 17Kwuwo kwɔlɛ mi lɔ Otimoti, umɛ mi uwu idɛnyi mi mu ɔgwuzɛ uwu Okrasi imbwaluma, uwu bɔkɔ Ɔkwu a nyama la wu munyi yi. Uwu e lolo yi iyi ewo iyi luzɛ mi izɛma mu Okrasi Ɔzhizɔsi imbwaluma, undu bɔkɔ lu zɛ kyaa mbala ɛzu iyi mi zɔ mu ɔshɔshi uwunawuna bɔkɔ mi fye.
18Enzu umbafo meka yi o yi mu egunu ibɔma a, o to tee mi ŋi nyɔ munyi yi fo. 19Gba Ɔkwu a nyama, mi nyɔ munyi yi afyi ɛlɛ kaa la mi ma mafyi mi ekpasu iyi enzu wa bɔ egunu mbɔlɛ o yi yi, moo akwu iso mbo isomo ɛnyi kɛɛkyi mo. 20Moo Ɛsu irimo iyi Ukpo akwu iso iyi kenzu kɛɛkyi mo, ekpasu iyi kiya iwomo ingyi ki she la Ukpo gba ɔ gyi le. 21Iyina bɔkɔ i she yi i ka? La mi bo munyi yi la kwuzele nana la mi zɔ yi idɛnyi mu opwu uwu oloto ŋa?
Currently Selected:
Ɔkɔrɔti uwu kwonze 4: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
